1, 2. (a) Inamaanisha nini kuwa shahidi, na namna gani vyombo vya kutoa habari vya dunia hii vimeshindwa kufanya hivyo? (b) Sababu gani Yehova hana lazima ya vyombo vya kutoa habari vya dunia hii?

INAMAANISHA nini kuwa shahidi? Kamusi moja inafasiria kwamba shahidi ni “mutu ambaye alijionea mambo fulani na anayaelezea wengine.” Kwa mufano, katika muji wa Pietermaritzburg, huko Afrika Kusini, gazeti ambalo linaitwa sasa The Witness (Shahidi) limekuwa likitangaza habari tangu miaka zaidi ya 160. Jina la gazeti hilo linafaa, kwa sababu kusudi la gazeti ni kutoa habari za kweli kuhusu mambo yanayotokea katika dunia. Mutu aliyeanzisha gazeti hilo aliahidi kwamba litatoa tu “habari za kweli, ukweli wote, na ukweli tu.”

² Lakini, jambo la kuhuzunisha ni kwamba, vyombo vya kutoa habari vimeficha na hata vinasema uongo kuhusu mambo ya lazima sana ya historia ya mwanadamu. Ndiyo sababu Yehova alisema hivi kupitia nabii Ezekieli: ‘Mataifa yatalazimika kujua kwamba mimi ni Yehova.’ (Eze. 39:7) Lakini Yehova, Mutawala Mukubwa wa ulimwengu wote, hana lazima ya vyombo vya kutoa habari vya dunia hii. Ana Mashahidi milioni 8 hivi, ambao wanawasaidia watu wa mataifa yote wamujue na wajue namna aliwatendea watu zamani, na namna anawatendea leo. Mashahidi hao ambao ni jeshi kubwa wanatangaza pia mambo ambayo Mungu ameahidi kufanyia wanadamu wakati unaokuja. Tunapotia kazi hiyo ya kuhubiri pa nafasi ya kwanza, tunaonyesha kwamba tunaishi kulingana na jina letu, kama inavyoonyeshwa katika Isaya 43:10, ambayo inasema: “‘Ninyi ni  mashahidi wangu,’ asema Yehova, ‘mutumishi wangu ambaye nimemuchagua.’”

3, 4. (a) Ni wakati gani Wanafunzi wa Biblia walichukua jina mupya, na walijisikia namna gani? (Ona picha mwanzoni mwa habari hii.) (b) Tutazungumuzia maulizo gani?

³ Ni pendeleo kubwa kuitwa kwa jina la Yehova, kwa sababu yeye ni ‘mufalme wa umilele,’ ambaye anasema: ‘Hilo ndilo jina langu mupaka wakati usio na kipimo, na huo ndio ukumbusho wangu kwa kizazi baada ya kizazi’! (1 Tim. 1:17; Kut. 3:15; linganisha na Mhubiri 2:16.) Katika mwaka wa 1931, Wanafunzi wa Biblia walianza kuitwa Mashahidi wa Yehova. Kisha hapo, gazeti Munara wa Mulinzi lilichapisha barua nyingi za shukrani. Kwa mufano, kutaniko moja la Canada liliandika hivi: “Tulifurahi sana kujua kwamba sasa tutaitwa ‘Mashahidi wa Yehova;’ ilikuwa habari njema kwetu; kwa hiyo tulichochewa tena kuishi kulingana na jina letu hilo mupya.”

⁴ Namna gani unaweza kuonyesha shukrani kwa sababu ya pendeleo la kuitwa kwa jina la Yehova? Pia, je, kupitia Maandiko, unaweza kueleza sababu gani Yehova anatuita Mashahidi wake?

5, 6. (a) Wazazi Waisraeli walitoa ushahidi katika njia gani? (b) Wazazi Waisraeli waliombwa wafanye jambo lingine gani la lazima, na sababu gani wazazi wa leo wanapaswa kufuata mufano huo?

⁵ Wakati wa Isaya, kila Muisraeli alikuwa ‘shahidi’ wa Yehova, na taifa lote nzima liliitwa ‘mutumishi’ wa Mungu. (Isa. 43:10) Wazazi Waisraeli walitoa ushahidi kwa kuwafundisha watoto wao kuhusu namna Mungu alitendea mababu zao. Kwa mufano, walipoombwa kufanya Pasaka kila mwaka, waliambiwa hivi: “Wana wenu watakapowaambia, ‘Utumishi huu unamaanisha nini kwenu?’ ndipo mutakaposema, ‘Ni zabihu ya pasaka kwa Yehova, aliyepita juu ya nyumba za wana wa Israeli huko Misri alipowaletea Wamisri pigo, lakini akazikomboa nyumba zetu.’” (Kut. 12:26, 27) Inawezekana wazazi hao  waliwaelezea pia watoto wao kwamba wakati Musa aliingia mara ya kwanza kwa mufalme wa Misri ili kumuomba awaachilie Waisraeli waende kumuabudu Yehova katika jangwa, Farao alimujibu: “Yehova ni nani, hivi kwamba mimi niitii sauti yake na kuwaruhusu Israeli waende zao?” (Kut. 5:2) Bila shaka, waliwaelezea pia kwamba kisha Yehova kuleta mapigo juu ya Misri, na kisha Waisraeli kuponyoka jeshi la Misri kwenye Bahari Nyekundu, jibu la ulizo la Farao lilikuwa wazi kwa wote. Yehova alikuwa na anaendelea kuwa Mweza-yote. Tena, taifa la Israeli lilijionea kwamba Yehova ni Mungu wa kweli na Anatimiza ahadi zake.

⁶ Bila shaka Waisraeli ambao walifurahia pendeleo la kuitwa kwa jina la Yehova waliwaelezea watoto wao mambo hayo yote; lakini waliwaelezea pia watu wa mataifa mengine ambao walikuwa watumwa wa Waisraeli. Jambo lingine la lazima ambalo waliombwa ni kuwafundisha watoto wao kuwa na mwenendo safi. Yehova alisema hivi: ‘Muwe watakatifu, kwa sababu mimi Yehova Mungu wenu ni mutakatifu.’ (Law. 19:2; Kum. 6:6, 7) Huo ni mufano muzuri kwa wazazi Wakristo leo; wanapaswa pia kufundisha watoto wao ili wawe na mwenendo safi, na kwa njia hiyo walitukuze jina la Mungu!—Soma Methali 1:8; Waefeso 6:4.

7. (a) Wakati Waisraeli walikuwa waaminifu kwa Yehova, hilo lilikuwa na matokeo gani juu ya mataifa yaliyowazunguka? (b) Watu wanaoitwa kwa jina la Yehova wana daraka gani?

⁷ Kwa hiyo, wakati Waisraeli walikuwa waaminifu, walitoa ushahidi muzuri juu ya jina la Mungu. Walikuwa wameambiwa hivi: “Vikundi vyote vya watu wa dunia vitalazimika kuona kwamba jina la Yehova limeitwa juu yako, nao kwa kweli watakuogopa wewe.” (Kum. 28:10) Lakini, jambo la kuhuzunisha ni kwamba Waisraeli walijulikana zaidi kwa sababu ya kukosa uaminifu. Walirudilia tena na tena ibada ya sanamu zilizofanywa na watu. Zaidi ya hiyo, walikuwa wabaya sana kama tu miungu ya Wakanaani ambayo walikuwa wakiabudu, na walikuwa wanatolea miungu hiyo watoto wao na kuwatesa maskini. Hilo ni onyo nzuri sana kwetu kwa sababu sikuzote tunapaswa kujikaza sana ili kuwa na mwenendo safi, na hivyo kumuiga Yule aliye Mutakatifu Zaidi, ni kusema, Yehova, ambaye tunaitwa kwa jina lake!

8. Yehova alimuomba Isaya afanye nini, na Isaya alijisikia namna gani?

⁸ Yehova alikuwa ametabiri jambo nzuri sana kuhusu kuwakomboa Waisraeli kutoka katika utumwa; Waisraeli wangejionea jambo hilo. (Isa. 43:19) Sura sita za kwanza-kwanza za kitabu cha Isaya zinazungumuzia sana musiba ambao ungepata Yerusalemu na miji iliyokuwa pembeni yake. Yehova, ambaye anajua kusoma mioyo vizuri, alimuambia Isaya aendelee kuonya watu kuhusu musiba huo hata kama wangekataa ujumbe wake. Isaya alihuzunika sana na alitaka kujua mupaka wakati gani taifa la Mungu lingebaki bila kutubu. Mungu alijibu namna gani? ‘Ni mupaka majiji yabomoke, yawe bila mukaaji, na nyumba ziwe bila mutu wa udongo, na inchi iharibiwe iwe ukiwa.’—Soma Isaya 6:8-11.

9. (a) Unabii wa Isaya kuhusu kuharibiwa kwa Yerusalemu ulitimia wakati gani? (b) Yehova anafanya nini leo ili kutuonya tubaki macho?

⁹ Isaya alipewa kazi hiyo katika mwaka wa mwisho wa utawala wa Uzia, ni kusema, katika mwaka wa 778 mbele ya kuzaliwa kwa Yesu. Aliendelea kutoa unabii kwa miaka 46 hivi, ni kusema mupaka mwaka wa 732 mbele ya kuzaliwa kwa Yesu, wakati wa utawala wa Mufalme Hezekia. Isaya alimaliza kazi yake miaka 125 mbele ya Yerusalemu kuharibiwa katika mwaka wa 607 mbele ya kuzaliwa kwa Yesu. Kwa hiyo, watu wa Mungu walikuwa wameambiwa  mbele ya wakati kuhusu musiba ambao ungepata taifa lao. Leo pia, Yehova amewaambia watu wake mambo ambayo yatatokea wakati unaokuja. Gazeti Munara wa Mulinzi limeanza kuchapishwa kumepita miaka 135; gazeti hilo limewasaidia watu kubaki macho kwa kuwakumbusha kwamba hivi karibuni ulimwengu huu muovu wa Shetani utamalizika na Utawala wa Yesu wa miaka elfu utaanza.—Ufu. 20:1-3, 6.

10, 11. Wayahudi waliokuwa Babiloni walijionea kutimizwa kwa unabii gani wa Isaya?

¹⁰ Wayahudi wengi waaminifu waliojitoa kwa Wababiloni waliokolewa wakati Yerusalemu iliharibiwa na walipelekwa Babiloni. (Yer. 27:11, 12) Kisha miaka 70, watu wa Mungu walijionea kutimizwa kwa unabii huu wenye kushangaza: ‘Yehova, Mukombozi wenu, Mutakatifu wa Israeli, amesema hivi: Nitatuma ujumbe huko Babiloni kwa ajili yenu na kuyashusha mapingo ya magereza.’—Isa. 43:14.

¹¹ Ili kutimiza unabii huo, jambo lenye kushangaza sana lilitokea usiku mumoja wa Mwezi wa 10, mwaka wa 539 mbele ya kuzaliwa kwa Yesu. Usiku huo, mufalme pamoja na wakubwa wengine wa Babiloni walikuwa wanakunywa divai katika vyombo ambavyo walichukua katika hekalu la Yerusalemu, na walikuwa wanaabudu miungu yao iliyofanywa na watu. Wakati huo, majeshi ya Wamedi na Waajemi [ao Waperse] yalikamata muji wa Babiloni. Katika mwaka wa 538 ao 537 mbele ya kuzaliwa kwa Yesu, Koreshi (Cyrus), ambaye alikamata muji wa Babiloni, aliwaamuru Wayahudi warudi Yerusalemu ili wajenge tena hekalu la Mungu. Isaya alikuwa ametabiri mambo hayo yote; alikuwa pia ametabiri kwamba wakati Waisraeli wangerudi Yerusalemu, Yehova angetimiza mahitaji yao na kuwalinda wale waliotubu. Mungu aliwaita kuwa ni ‘watu ambao alijifanyia, ili wasimulie sifa zake.’ (Isa. 43:21; 44:26-28) Wayahudi hao waliporudi Yerusalemu na kujenga hekalu la Yehova, walijionea kwamba Yehova, Mungu wa pekee wa kweli, anatimiza ahadi zake sikuzote.

12, 13. (a) Ni nani wengine waliofaidika na kurudishwa kwa ibada safi? (b) “Kondoo wengine” wanapaswa kufanya nini wanapounga mukono “Israeli wa Mungu,” na wana tumaini gani?

¹² Katika taifa hilo jipya kulikuwa pia maelfu ya watu ambao hawakuwa Waisraeli; na baadaye watu wengine ambao waliamini dini ya Kiyahudi walijiunga na taifa hilo. (Ezra 2:58, 64, 65; Esta 8:17) Leo, ‘umati [ao mukutano] mukubwa’ ambao ni “kondoo wengine” wa Kristo wanawaunga mukono Wakristo watiwa-mafuta, ambao ni “Israeli wa Mungu.” (Ufu. 7:9, 10; Yoh. 10:16; Gal. 6:16) Wale wanaofanyiza mukutano mukubwa pia wanaitwa Mashahidi wa Yehova.

¹³ Wakati wa Utawala wa Kristo wa Miaka Elfu, Wale wanaofanyiza mukutano mukubwa watafurahia sana kuwafasiria wale watakaofufuliwa namna gani walikuwa Mashahidi wa Yehova katika siku za mwisho. Lakini tutapata pendeleo hilo ikiwa tangu sasa tunajikaza kuishi  kulingana na jina letu, na ikiwa tunabaki safi. Pia, kila siku tunapaswa kuendelea kumuomba Yehova atusamehe makosa yetu, tukikumbuka kwamba sisi ni wakosefu na kwamba ni pendeleo kubwa kuitwa kwa jina la Yehova.—Soma 1 Yohana 1:8, 9.

14. Jina Yehova linamaanisha nini?

¹⁴ Ili kuonyesha kwamba tunapendezwa sana na pendeleo letu la kuitwa kwa jina la Mungu, ni vizuri tufikiri sana juu ya maana ya jina hilo. Jina la Mungu ambalo mara nyingi linatafsiriwa “Yehova,” linatoka katika neno la Kiebrania linalomaanisha “kuwa.” Kwa hiyo, jina Yehova linapenda kumaanisha “Yeye Anafanya Kuwa.” Maana hiyo inapatana kabisa na daraka mbili za Yehova, ni kusema, Muumbaji wa dunia nzima na wa viumbe vyote vyenye akili, na pia Mutimizaji wa ahadi zake. Hakuna mupinzani yeyote anayeweza kumuzuia Yehova kutimiza mapenzi yake na kusudi lake. Hata Shetani hawezi kuzuia mapenzi ya Mungu kutimia.

15. Namna gani Yehova aliwatendea Waisraeli kulingana na maana ya jina lake? (Soma habari “Jina Lenye Maana Sana.”)

¹⁵ Wakati Yehova alimutuma Musa ili kuwakomboa Waisraeli kutoka Misri, alifunua sehemu fulani ya utu wake kwa kutumia maneno yanayoonyesha kwamba alijitaja mwenyewe. Biblia inasema: “Mungu akamuambia Musa: ‘Nitakuwa Kile Nitakachokuwa’ [ao, Nitakuwa Chochote Nipendacho Kuwa]. Naye akaongeza kusema: ‘Hivi ndivyo utakavyowaambia wana wa Israeli, “Nitakuwa amenituma kwenu.”’” (Kut. 3:14.) Kwa hiyo, katika hali yoyote, Yehova atakuwa chochote anachotaka kuwa ili kutimiza kusudi lake. Yehova alijifanya kuwa Mukombozi, Mulinzi, Kiongozi, na alitimiza mahitaji ya kiroho na ya kimwili ya Waisraeli waliokuwa katika utumwa.

16, 17. (a) Namna gani tunaweza kuonyesha shukrani kwa pendeleo la kuitwa kwa jina la Yehova? (b) Habari inayofuata itazungumuzia nini?

¹⁶ Leo, Yehova anaendelea kutenda kulingana na maana ya jina lake kwa kutimiza mahitaji yetu yote ya kiroho na ya kimwili. Lakini, jina la Mungu halimaanishe tu kwamba yeye anakuwa chochote anachotaka kuwa. Linamaanisha pia kwamba Yehova anafanya kusudi lake litimie kwa kuwawezesha Mashahidi wake waendelee kutimiza kazi yao. Kutafakari juu ya jambo hilo kutatuchochea tuendelee kuishi kulingana na jina ambalo tumepewa. Kåre, ndugu aliye na miaka 84 na ambaye ni Shahidi aliyetumika kwa bidii huko Norvège kwa muda wa miaka 70, anasema hivi: “Ninaona kumutumikia Yehova, Mufalme wa umilele, na kuwa kati ya watu wanaoitwa kwa jina lake takatifu kuwa pendeleo kubwa. Kila mara ninapofundisha watu Biblia na kuona namna macho yao yanangaa kwa furaha wanapoielewa, ninaona hilo kuwa pendeleo kubwa. Kwa mufano, ninafurahi sana ninapofundisha watu faida ambazo zabihu ya ukombozi ya Kristo inatuletea na kwamba, kupitia zabihu hiyo, wanaweza kupata uzima wa milele katika dunia mupya yenye amani na yenye haki.”

¹⁷ Kwa kweli, katika maeneo fulani inaendelea kuwa vigumu kupata watu wanaotaka kujifunza juu ya Mungu. Je, wewe pia unafurahi wakati unapata mutu anayekusikiliza na unapofundisha watu jina la Yehova? Lakini, namna gani tunaweza kuwa Mashahidi wa Yehova na wakati uleule kuwa mashahidi wa Yesu? Tutazungumuzia ulizo hilo katika habari inayofuata.