Gazeti hili limewatia moyo wazazi Wakristo wawatolee musaada wa kiroho watoto wao waliotengwa ambao wangali wanaishi nyumbani kwao ikiwa kuna lazima ya kufanya hivyo. Kwa mufano, Munara wa Mulinzi wa tarehe 15/11/1988, ukurasa wa 19 na 20, ulionyesha kwamba wazazi wanaweza kujifunza Biblia na mutoto wao mudogo aliyetengwa na kutaniko ambaye angali anaishi nyumbani pamoja nao. Labda kupitia njia hiyo mutoto atapata vitia-moyo anavyohitaji ili kubadili mwenendo wake.

Kuhusiana na mahali ambapo mutu anaweza kukaa katika Jumba la Ufalme, si vibaya ikiwa mutoto aliyetengwa anakaa kimya pamoja na wazazi wake. Kwa kuwa si lazima mutu aliyetengwa na kutaniko akae tu kwenye viti vya nyuma, si vibaya ikiwa mutoto aliyetengwa anakaa karibu na wazazi wake, iwe wanakaa kwenye viti vya nyuma, vya mbele ao vilivyo katikati. Kwa kuwa wazazi wana daraka la kuhangaikia hali ya kiroho ya mutoto wao, wanapaswa kuhakikisha kwamba mutoto wao ni mwenye kufaidika kabisa na mikutano. Kuliko kuacha mutoto wao akae mahali fulani bila mutu wa kumuchunga, kukaa pamoja naye kunaweza kuwasaidia wajue ikiwa anafaidika kabisa na mikutano.

Lakini, namna gani ikiwa mutoto aliyetengwa haishi tena na wazazi wake? Je, anaweza kukaa pamoja na wazazi wake? Zamani, gazeti hili limeonyesha waziwazi namna Mukristo anapaswa kujiendesha kuhusiana na kushirikiana na mutu wa familia aliyetengwa na kutaniko ambaye haishi tena nyumbani. * Mutu aliyetengwa anaweza kukaa kwa utulivu karibu na washiriki wa familia yake wakati wa mikutano, lakini hilo ni tofauti sana na kutafuta kushirikiana naye nyumbani bila sababu yoyote ya lazima. Ikiwa washiriki wengine wa familia wana maoni yanayofaa kuhusu mushiriki wao aliyetengwa na wanajikaza kutii mashauri ya Biblia kuhusu kushirikiana na mutengwa, hakuna sababu ya kujisumbua kuhusu kukaa naye kwenye mikutano.​—1 Kor. 5:11, 13; 2 Yoh. 11.

Mutu aliyetengwa anaweza kukaa karibu na mushiriki wa familia yake ao karibu na mushiriki yeyote wa kutaniko ikiwa tu anakaa kwa utulivu. Katika hali nyingi, kutia sheria kuhusu mahali mutu anaweza kukaa kunaweza kuleta matatizo mbalimbali. Ikiwa washiriki wote waaminifu katika familia wanajikaza kuheshimu kanuni za Biblia kuhusiana na mupango wa kutenga na kutaniko, na ikiwa hilo haliwakwaze ndugu na dada, hakuna sababu ya kujisumbua sana kuhusu mahali ambapo mutu aliyetengwa anaweza kukaa wakati wa mikutano. *