Mna Sababu ya Kushangilia

UUMBAJI unaonyesha utaratibu, kuanzia chembe ndogo zaidi iliyo hai mpaka magalaksi makubwa ya nyota yaliyopangwa katika makundi makubwa na makundi hayo yamepangwa katika makubwa hata zaidi ya nyota. Hilo halishangazi hata kidogo, kwa kuwa Muumba “si Mungu wa machafuko.” (1 Kor. 14:33) Mpango wa ibada wa Mungu unavutia pia. Fikiria mambo ambayo Yehova amefanya. Ameanzisha tengenezo moja la ulimwenguni pote lenye mamia ya mamilioni ya viumbe wenye akili—wanadamu na vilevile malaika—walio na uhuru wa kuchagua, na waliounganishwa katika ibada safi. Ni jambo la kustaajabisha kama nini!

Katika Israeli la kale, sehemu ya kidunia ya tengenezo la Mungu iliwakilishwa na jiji la Yerusalemu, ambako hekalu la Yehova lilikuwa na ambako mfalme aliyetiwa mafuta na Yehova aliishi. Mwisraeli mmoja aliyekuwa utekwani huko Babiloni alieleza jinsi alivyohisi kuhusu jiji hilo takatifu: “Ulimi wangu na ushikamane na kaakaa langu, kama nisingekukumbuka, kama nisingeinua Yerusalemu kuwa juu ya sababu yangu kuu ya kushangilia.”—Zab. 137:6.

Je, hivyo ndivyo unavyohisi kuhusu tengenezo la Mungu leo? Je, tengenezo hilo linakuletea shangwe kuliko kitu kingine chochote? Je, watoto wako wanaelewa historia ya sehemu ya kidunia ya tengenezo la Mungu na jinsi inavyofanya kazi? Je, wanathamini kwamba wao ni sehemu ya undugu wa ulimwenguni pote wa Mashahidi wa Yehova? (1 Pet. 2:17) Kwa nini msitumie mapendekezo yafuatayo katika jioni ya Ibada yenu ya Familia ili kusaidia familia yenu ithamini zaidi tengenezo la Yehova?

Kumbuka “Siku za Zamani za Kale”

Kila mwaka, familia za Waisraeli zilikusanyika ili kusherehekea Pasaka. Sherehe hiyo ilipoanzishwa, Musa aliwaagiza watu hivi: “Ikiwa mwana wako atakuuliza baadaye, na kusema, ‘Hili linamaanisha nini?’ basi utamwambia, ‘Kwa nguvu za mkono, Yehova alitutoa Misri, katika nyumba ya watumwa.’” (Kut. 13:14) Mambo ambayo Yehova aliwatendea Waisraeli zamani hayakupaswa kusahauliwa. Bila shaka, baba wengi Waisraeli walitii amri ya Musa. Vizazi vingi baadaye, Mwisraeli mmoja alisali hivi: “Ee Mungu, tumesikia kwa masikio yetu, mababu zetu wenyewe wametusimulia utendaji ambao ulifanya katika siku zao, siku za zamani za kale.”—Zab. 44:1.

Kwa kijana wa siku hizi, historia ya Mashahidi wa Yehova katika muda wa miaka 100 au zaidi iliyopita inaweza pia kuonekana kama “siku za zamani za kale.” Unaweza jinsi gani kufanya matukio hayo yawe halisi zaidi kwa watoto wako? Ili kufanya hivyo wazazi fulani wanatumia kitabu Mashahidi wa Yehova—Wapiga-Mbiu wa Ufalme wa Mungu, Kitabu cha Mwaka, masimulizi ya maisha yanayochapishwa katika magazeti yetu, na ripoti nyingine za historia ya kitheokrasi, kutia ndani DVD yetu mpya kuhusu watu wa Mungu katika nyakati zetu. Video zinazosimulia jinsi ndugu zetu walivyoteswa katika ule uliokuwa Muungano wa Sovieti na wakati wa utawala wa Nazi huko Ujerumani zinafundisha familia kumtegemea Yehova wakati wa majaribu. Tia habari kama hizo katika jioni ya Ibada yenu ya Familia. Hilo litajenga zaidi imani ya watoto wako ikiwa utimilifu wao utajaribiwa.

Hata hivyo, kuwasimulia watoto mambo ya kihistoria kunaweza kuwachosha haraka. Kwa hiyo, wasaidie watoto wako washiriki katika mazungumzo hayo. Kwa mfano, huenda ukamwomba mwana wako achague nchi moja ambayo anapenda, afanye utafiti kuhusu historia ya kitheokrasi ya nchi hiyo, kisha asimulie familia mambo fulani ambayo amejifunza. Huenda  katika kutaniko lenu kuna Wakristo waliotumikia kwa uaminifu kwa miaka mingi ambao wanaweza kujiunga nanyi jioni moja katika ibada yenu ya familia. Labda binti yenu anaweza kuwahoji na kufanya wajieleze, huku akiwaomba wasimulie mambo waliyojionea maishani. Au unaweza kumwomba mtoto wako achore picha za matukio makubwa ya kitheokrasi, kama vile ujenzi wa ofisi ya tawi, kusanyiko la kimataifa, au jinsi kinanda cha gramafoni kilivyotumiwa katika kazi ya kuhubiri nyumba kwa nyumba.

Jifunzeni Jinsi ‘Kila Kiungo Kinavyotenda Kazi’

Mtume Paulo alilinganisha kutaniko la Kikristo na “mwili wote, kwa kuunganishwa pamoja kwa upatano na kufanywa ushirikiane kupitia kila kiungo ambacho hutoa kile kinachohitajiwa, kulingana na utendaji wa kila kiungo.” (Efe. 4:16) Kujifunza jinsi mwili wa binadamu unavyofanya kazi kunafanya tumthamini na kumheshimu zaidi Muumba wetu. Vivyo hivyo, tunapochunguza jinsi kutaniko la ulimwenguni pote linavyofanya kazi, tunashangazwa na “hekima ya Mungu ya namna nyingi sana.”—Efe. 3:10.

Yehova anaeleza jinsi tengenezo lake linavyofanya kazi, kutia ndani sehemu ya kimbingu. Kwa mfano, anatueleza kwamba kwanza alimpa Yesu Kristo ufunuo, kisha Yesu ‘akamtuma malaika wake na kupitia yeye akautoa kwa njia ya ishara kwa mtumwa wake Yohana, aliyetoa ushahidi.’ (Ufu. 1:1, 2) Ikiwa Mungu anafunua jinsi sehemu isiyoonekana ya tengenezo lake inavyofanya kazi, je, hangetaka tuelewe jinsi ‘kila kiungo kinavyotenda kazi’ hapa duniani?

Kwa mfano, ikiwa mwangalizi wa mzunguko atatembelea kutaniko lenu hivi karibuni, kwa nini usichunguze pamoja na familia yako madaraka na mapendeleo ya waangalizi wanaosafiri? Wanamsaidia kila mmoja wetu jinsi gani? Maswali mengine ambayo mnaweza kuchunguza yanatia ndani: Kwa nini ni jambo la maana kuripoti utumishi wa shambani? Tengenezo la Mungu linategemezwa jinsi gani kifedha? Baraza Linaloongoza limepangwa jinsi gani, na linaandaa chakula cha kiroho jinsi gani?

Tunapoelewa jinsi ambavyo watu wa Yehova wamepangwa kitengenezo, tunafaidika kwa njia tatu hivi: Tunawathamini hata zaidi wale wanaofanya kazi kwa bidii kwa ajili yetu. (1 The. 5:12, 13) Tunachochewa kuunga mkono mipango ya kitheokrasi. (Mdo. 16:4, 5) Na mwishowe, tunawaamini hata zaidi wale wanaoongoza tunapoona jinsi maamuzi na mipango wanayofanya inavyotegemea Maandiko.—Ebr. 13:7.

“Kagueni Minara ya Makao Yake”

“Pigeni mwendo mkizunguka Sayuni, na kuuzunguka-zunguka, hesabuni minara yake. Wekeni mioyo yenu juu ya boma lake. Kagueni minara ya makao yake, ili mpate kukisimulia kizazi cha wakati ujao.” (Zab. 48:12, 13) Katika andiko hilo, mtunga-zaburi aliwasihi Waisraeli wachunguze Yerusalemu kwa undani. Je, unaweza kuwazia kumbukumbu zenye thamani ambazo zilisimuliwa na familia za Waisraeli ambao walisafiri kwenda katika jiji takatifu kwa ajili ya sherehe za kila mwaka na ambao walikuwa wameona hekalu lake lenye utukufu? Bila shaka, walichochewa “kukisimulia kizazi cha wakati ujao.”

Mfikirie malkia wa Sheba, ambaye mwanzoni hakuamini ripoti alizosikia kuhusu utawala bora wa Sulemani na hekima yake nyingi. Ni nini kilichomsadikisha kwamba mambo aliyosikia yalikuwa ya kweli? Alisema hivi: “Sikuyaamini maneno yao mpaka nilipokuja ili nijionee kwa macho yangu mwenyewe.” (2 Nya. 9:6) Ndiyo, mambo tunayoona kwa ‘macho yetu wenyewe’ yanaweza kutugusa moyo kabisa.

Unaweza kuwasaidia jinsi gani watoto wako waone maajabu ya tengenezo la Yehova kwa ‘macho yao wenyewe’? Ikiwa kuna ofisi ya tawi ya Mashahidi wa Yehova karibu na kwenu, mjitahidi kuitembelea ofisi hiyo. Kwa mfano, Mandy na Bethany walilelewa kilomita 1,500 hivi kutoka kwenye Betheli ya nchi yao. Ingawa hivyo, wazazi wao walipanga safari za mara kwa mara za kutembelea Betheli, hasa mabinti wao walipokuwa wakikua. Wanasema hivi: “Kabla ya kutembelea Betheli, tulifikiria kwamba palikuwa mahali pa watu wanaochukua mambo kwa  uzito na mahali pa watu wazee tu. Lakini tulikutana na vijana ambao walikuwa wakifanya kazi ya Yehova kwa bidii na kuifurahia! Tuliona kwamba tengenezo la Yehova halikuwa tu katika sehemu ndogo ambako tuliishi, na kila mara tulipotembelea Betheli tulitiwa nguvu kiroho.” Kuona tengenezo la Mungu kwa ukaribu kuliwachochea Mandy na Bethany waanze kufanya upainia, na hata walialikwa kutumika Betheli kama wajitoleaji wa muda.

Tuna njia nyingine ya ‘kuona’ tengenezo la Yehova, njia ambayo Waisraeli wa kale hawakuwa nayo. Katika miaka ya karibuni, watu wa Mungu wamepokea video na DVD ambazo zinazungumzia mambo mbalimbali kuhusu tengenezo la Mungu, kama vile: Jehovah’s Witnesses—Organized to Share the Good News (Les Témoins de Jéhovah—Organisés pour prêcher la bonne nouvelle), Our Whole Association of Brothers (Toute la comunauté des frères), To the Ends of the Earth (Jusqu’aux extrémités de la terre), na United by Divine Teaching (Unis grâce à l’enseignement divin). Wewe na familia yako mnapoona kazi ngumu ya Wanabetheli, wajitoleaji wa kutoa misaada, wamishonari, na ndugu wanaotayarisha na kupanga makusanyiko, bila shaka, mtathamini zaidi kutoka moyoni undugu wa ulimwenguni pote.

Kila kutaniko la watu wa Mungu linatimiza sehemu ya maana katika kuhubiri habari njema na kuwategemeza Wakristo katika eneo lake. Hata hivyo, tenga wakati pamoja na familia yako wa kukumbuka “ushirika mzima wa ndugu zenu ulimwenguni.” Hilo litakusaidia wewe pamoja na watoto wako kuendelea kubaki mkiwa “imara katika imani,” mkijua kwamba mna sababu ya kushangilia.—1 Pet. 5:9.

 [Sanduku/Picha katika ukurasa wa 18]

Tengenezo la Mungu—Habari Muhimu ya Kujifunza

Tuna maandalizi mengi ya kutusaidia kujifunza mengi kuhusu historia na utendaji wa tengenezo la Yehova. Maswali yafuatayo yanaweza kukusaidia uanze kufanya hivyo:

☞ Kazi inayofanywa na waangalizi wanaosafiri siku hizi ilianza jinsi gani?—Mashahidi wa Yehova—Wapiga-Mbiu wa Ufalme wa Mungu, ukurasa wa 222-227.

☞ Kulikuwa na tukio gani kuu kwenye “Siku ya Watoto” wakati wa Kusanyiko la Kitheokrasi mwaka wa 1941?—Mashahidi wa Yehova—Wapiga-Mbiu wa Ufalme wa Mungu, ukurasa wa 86, 88.

☞ Baraza Linaloongoza linafanya maamuzi jinsi gani?—“Kutoa Ushahidi Kamili” Kuhusu Ufalme wa Mungu, ukurasa wa 108-114.