1. Yehova anapenda nini?

 LEO, Yehova anapenda habari njema ya Ufalme ihubiriwe mu dunia yote. (Mk. 13:10; 1 Ti. 2:3, 4) Ni kazi ya Yehova. Na ni muzuri kuona vile amechagua Mwana wake mupendwa aongoze ile kazi. Juu Yesu njo iko natuongoza, tunaweza kuwa hakika kama kazi ya kuhubri itamalizika kwa wakati yenye Yehova anapenda, mbele mwisho ufike.​—Mt. 24:14.

2. Tutaona nini mu hii habari?

² Mu hii habari, tutaona namna Yesu iko natumia “mutumwa muaminifu na mwenye busara” juu ya kupatia wanafunzi wake chakula ya kiroho, na kuwapanga juu watimize muzuri kazi kubwa ya kuhubiri yenye iko nafanywa leo. (Mt. 24:45) Tutaona pia mambo yenye kila mutu anaweza kufanya juu ya kutegemeza Yesu na mutumwa muaminifu.

3. Yesu alipewa mamlaka gani?

³ Yesu iko naongoza kazi ya kuhubri. Nini njo inaonyesha vile? Wakati kidogo mbele Yesu aende mbinguni, alikutana na wanafunzi wake waaminifu ku mulima fulani katika Galilaya. Na kisha aliwaambia hivi: “Nimepewa mamlaka yote mbinguni na duniani. Kwa hiyo, muende, na mufanye wanafunzi  kutoka kwa watu wa mataifa yote.” (Mt. 28:18, 19) Kati ya mamlaka yenye Yesu amepewa muko pia mamlaka ya kuongoza kazi ya kuhubiri.

4. Nini njo inaonyesha kama Yesu angali naongoza kazi ya kuhubiri leo?

⁴ Yesu alisema kama kazi ya kuhubiri na kufanya wanafunzi itafanywa katika “mataifa yote” na kama atakuwa na wanafunzi wake “sikuzote mupaka umalizio wa mupangilio wa mambo.” (Mt. 28:20) Ile maneno inaonyesha waziwazi kama Yesu angali naongoza kazi ya kuhubiri leo.

5. Namna gani tuko nasaidia kutimiza maneno ya Zaburi 110:3?

⁵ Yesu alikuwa hakika kama hakutakosekana watu wa kuhubiri habari njema mu siku hizi za mwisho. Alijua kama hii maneno ya Zaburi ilipaswa kutimia: “Watu wako watajitoa kwa kujipendea katika siku ya jeshi lako.” (Zb. 110:3) Kama uko nahubiri habari njema, uko nategemeza Yesu na mutumwa muaminifu; na uko nasaidia kutimiza ule unabii. Kazi iko nasonga mbele, lakini kuko matatizo fulani.

6. Ni tatizo gani yenye wahubiri wa Ufalme wako nakutana nayo leo?

⁶ Tatizo moya yenye wahubiri wa Ufalme wako nakutana nayo ni upinzani. Waasi-imani, viongozi wa dini, na watu wenye kufanya politike wameeneza habari za uongo juu ya kazi yetu. Kama watu wa familia yetu, watu wenye tunajuana nao na wafanyakazi wenzetu wanaamini zile habari za uongo, wanaweza kutuchochea tuache kumutumikia Yehova ao tuache kuhubiri. Mu inchi fulani, maadui wetu wanaogopesha ndugu na dada zetu, wanawashambulia ao hata kuwatia mu gereza. Ile haitushangaze. Yesu alisema hivi: “Mutachukiwa na mataifa yote kwa sababu ya jina langu.” (Mt. 24:9) Kuona vile watu wanatuchukia kunaonyesha kama tunakubaliwa na Yehova. (Mt. 5:11, 12) Shetani njo iko nachochea ile chuki. Lakini, Yesu iko na nguvu mingi kupita Shetani. Juu Yesu iko natutegemeza, habari njema iko inafikia watu wa mataifa yote. Ona jambo yenye inaonyesha vile.

7. Nini njo inaonyesha kama Ufunuo 14:6, 7 iko natimia?

⁷ Tatizo ingine yenye wahubiri wa Ufalme wako nakutana nayo ni luga. Wahubiri wanakutanaka na watu wengi wenye hawazungumuze luga yao. Mu Ufunuo wenye Yesu alipatia mutume Yohana, alionyesha kama luga haingezuia habari njema ihubiriwe mu siku zetu. (Soma Ufunuo 14:6, 7.) Nini njo inaonyesha vile? Tuko napatia watu wengi kadiri inawezekana nafasi ya kusikia habari njema. Leo, watu mu dunia yote wanaweza kusoma vichapo vyenye kutegemea Biblia ku site yetu jw.org juu iko na habari mbalimbali mu luga zaidi ya 1 000! Baraza Yenye Kuongoza ilikubali kitabu Furahia Maisha Milele!, yenye tunatumia kwa sasa juu ya kuongoza mafunzo ya Biblia, itafsiriwe mu luga zaidi ya 700! Chakula ya kiroho imetolewa pia kupitia video kwa ajili ya bubu na kwa ajili ya vipofu. Tuko naona namna maunabii ya Biblia iko natimia. Watu “kutoka katika luga zote za mataifa” wako najifunza kusema “luga safi” ya kweli ya Biblia. (Zek. 8:23; Sef. 3:9) Ile yote inawezekana juu ya uongozi muzuri wa Yesu Kristo.

8. Mupaka hapa kazi yetu ya kuhubiri imekuwa na matokeo gani?

⁸ Leo, zaidi ya watu 8 000 000 mu inchi 240 wako mu tengenezo ya Yehova; na kila mwaka maelfu wako nabatizwa! Lakini, jambo ya maana zaidi kuliko zile hesabu ni sifa za Kikristo, ni kusema  “utu mupya,” zenye wale wanafunzi wapya wamekomalisha. (Kol. 3:8-10) Wengi waliachana na uasherati, jeuri, ubaguzi, na kupenda sana inchi yao. Unabii wa Isaya 2:4 uko natimia; ‘hawajifunze vita tena.’ Wakati tunajikaza kuvala utu mupya, tunasaidia watu wapendezwe na tengenezo ya Mungu, na tunaonyesha kama tuko nafuata kiongozi wetu Yesu Kristo. (Yoh. 13:35; 1 Pe. 2:12) Ile yote haijitokezake tu. Yesu iko natupatia musaada wenye tuko nao lazima.

9. Kulingana na Matayo 24:45-47, Yesu alisema kama atafanya nini wakati ya mwisho?

⁹ Soma Matayo 24:45-47. Yesu alisema kama wakati ya mwisho, ataweka “mutumwa muaminifu na mwenye busara” juu ya kutoa chakula ya kiroho. Kwa hiyo, tunatazamia kama ule mutumwa anapaswa kuwa na kazi mingi ya kufanya leo. Na ni vile mambo iko kabisa. Kiongozi wetu ametumia kikundi kidogo ya watiwa-mafuta juu ya kutolea watu wa Mungu na wale wenye kupendezwa “chakula” ya kiroho “kwa wakati wenye kufaa.” Wale watiwa-mafuta hawako mabwana juu ya imani ya wengine. (2 Ko. 1:24) Lakini, wanatambua kama Yesu Kristo njo “kiongozi na kamanda” wa watu wake.​—Isa. 55:4.

10. Kati ya vitabu vyenye kuonyeshwa ku picha, ni kitabu gani njo ilikusaidia uanze kumutumikia Yehova?

¹⁰ Tangu 1919, mutumwa muaminifu ametayarisha vichapo mbalimbali vyenye vimesaidia wale wenye kupendezwa wajifunze kweli ya Biblia. Mu 1921, mutumwa muaminifu alitayarisha kitabu La Harpe de Dieu juu ya kusaidia wale wenye kupendezwa wajifunze mafundisho ya musingi ya Biblia. Kadiri hali ya dunia iliendelea kubadilika, mutumwa muaminifu alitoa vichapo vingine. Ni kitabu gani njo ilikusaidia kumujua  na kumupenda Baba yetu wa mbinguni? Pengine ni kitabu “ Que Dieu soit reconnu pour vrai ! ” Kweli Iongozayo Kwenye Uzima wa Milele, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Biblia Inafundisha Kabisa Nini?, Biblia Inatufundisha Nini? ao ni kitabu yetu ya mupya Furahia Maisha Milele! Vile vitabu vyote vilitayarishwa juu ya kutusaidia kufanya wanafunzi, na kila kitabu ilitayarishwa juu ya kutimiza mahitaji fulani wakati ilitolewa.

11. Juu ya nini tuko na lazima ya kujifunza mambo mingi zaidi juu ya Yehova na juu ya Biblia?

¹¹ Haiko wapya tu njo wako na lazima ya kujifunza mambo mingi zaidi juu ya Yehova na juu ya Biblia. Siye wote tuko na lazima ya kufanya vile. Mutume Paulo alisema hivi: “Chakula kigumu ni cha watu wakomavu.” Paulo aliongezea tena kama kutumikisha mambo yenye tunajifunza mu Biblia kutatusaidia “kufanya tofauti kati ya mambo yenye kuwa sawa na yenye kuwa makosa.” (Ebr. 5:14) Ni nguvu sana leo kutii kanuni za Yehova juu watu wengi wanajiendesha mubaya sana. Lakini, Yesu anakamata mipango juu tujifunze mambo yenye tuko nayo lazima ili imani yetu ikuwe nguvu. Mafundisho yenye tunapata inatoka mu Neno ya Mungu, Biblia. Yesu anaongoza mutumwa muaminifu juu atayarishe na kugawanya ile chakula ya kiroho.

12. Kama vile Yesu, nini inaonyesha kama tunaheshimia jina ya Mungu?

¹² Kama vile Yesu, tumepatia jina ya Mungu heshima yenye ile jina inastahili. (Yoh. 17:6, 26) Kwa mufano, mu 1931 tulikamata jina yenye inategemea Biblia ya Mashahidi wa Yehova. Kwa kufanya vile, tulionyesha kama jina ya Mungu iko ya maana kwetu na kama tunapenda kujulikana mu ile jina. (Isa. 43:10-12) Na tangu Mwezi wa 10 wa ile mwaka, jina ya Mungu inakuwaka ku kila jalada  ya kwanza ya gazeti Munara wa Mulinzi. Zaidi ya ile, Biblia​—Tafsiri ya Ulimwengu Mupya imerudisha jina ya Mungu kila fasi kwenye inastahili mu Neno yake. Ile ni tofauti kabisa na dini zenye kujiita kuwa za Kikristo zenye zimeondoa jina ya Yehova mu tafsiri zao za Biblia!

13. Nini njo inakuhakikishia kama Yesu iko natumia “mutumwa muaminifu na mwenye busara” leo? (Yohana 6:68)

¹³ Kupitia “mutumwa muaminifu na mwenye busara,” Yesu ameweka tengenezo ya muzuri sana ku dunia juu ya kuendelesha ibada safi. Uko na mawazo gani juu ya ile tengenezo? Pengine, uko na mawazo sawa ile ya mutume Petro, mwenye alimuambia Yesu hivi: “Bwana, tutaenda kwa nani? Wewe uko na maneno ya uzima wa milele.” (Yoh. 6:68) Maisha yetu ingekuwa namna gani, kama hatungepata nafasi ya kujikuta mu tengenezo ya Yehova? Kupitia ile tengenezo, Yesu anakamata mipango juu tulishwe muzuri kiroho. Tena, anatuzoeza juu tutimize muzuri kazi yetu ya kuhubiri. Zaidi ya ile, anatusaidia kuvala “utu mupya,” juu tumufurahishe Yehova.​—Efe. 4:24.

14. Juu uko mu tengenezo ya Yehova, umepata faida gani mu hii kipindi ya Coronavirus?

¹⁴ Yesu anatutolea muongozo wenye hekima mu hii kipindi ya nguvu. Faida ya muongozo wake ilionekana wazi wakati ugonjwa wa Coronavirus ulianza. Ile wakati, watu wengi hawakujua wafanye nini, lakini Yesu alihakikisha kama tunapata maagizo yenye kuwa wazi juu ya kutulinda. Wazee walikumbushwa kuendelea kupashana habari na watu wote mu kutaniko na wajikaze kujua mahitaji yao ya kimwili na ya kiroho. (Isa.  32:1, 2) Tulipata muongozo na vitia-moyo vingine kupitia ripoti za Baraza Yenye Kuongoza.

15. Wakati ya ugonjwa wa Coronavirus, tulipewa maagizo gani kuhusu namna ya kufanya mikutano na kazi ya kuhubiri, na matokeo ilikuwa nini?

¹⁵ Mu kipindi ya ugonjwa wa Coronavirus, tulipewa pia maagizo yenye kuwa wazi kuhusu namna ya kufanya mikutano na namna ya kuhubiri. Bila kukawia, tulianza kuhuzuria mikutano na mikusanyiko kupitia vidéoconférence. Tulianza pia kuhubiri zaidi sana kupitia barua na telefone. Yehova alibariki bidii yetu. Biro nyingi za tawi zimeripoti kama hesabu ya wahubiri imeongezeka. Wengi wamejionea mambo mingi yenye kutia moyo mu hii wakati.​—Ona kisanduku “ Yehova Anabariki Kazi Yetu ya Kuhubiri.”

16. Tuko hakika na jambo gani?

¹⁶ Wengine wanaweza kufikiri kama maagizo yenye tengenezo ilitupatia wakati ya ugonjwa wa Coronavirus ilipitisha mipaka. Lakini, kuko ushuhuda mwingi wenye unaonyesha kama maagizo yenye tulipata ilikuwa yenye hekima. (Mat. 11:19) Na wakati tunafikiri sana juu ya namna Yesu ameongoza watu wake kwa upendo, tuko hakika kama hata kutokee nini, Yehova na Mwana wake mupendwa Yesu, hawatatuacha.​—Soma Waebrania 13:5, 6.

17. Unajisikia namna gani vile Yesu njo Kiongozi wetu?

¹⁷ Tuko na furaha sana vile Yesu njo Kiongozi wetu! Tuko mu tengenezo yenye haina migawanyiko juu ya mambo ya desturi, inchi, ao luga. Tunalishwa muzuri kiroho na tunapewa mazoezi yenye tuko nayo lazima juu ya kutimiza kazi yetu ya kuhubiri. Kila mumoja wetu iko nafundishwa namna ya kuvala utu mupya, na tuko najifunza kupendana. Tuko na kila sababu ya kujivunia Kiongozi wetu Yesu!