17 GUSHT 2022
RUSI

U japin zemër njerëzve të tyre të shtrenjtë, edhe pse vetë po kalojnë sprova

LUAJ

Më 8 gusht 2022, Gjykata e Krahinës së Golovinskijt në Moskë dënoi vëllezërit Aleksandër Serebrjakov dhe Juri Temirbulatov. Të dy i dënuan me 6 vjet vënie në provë. Atyre nuk u kërkohet të shkojnë në burg në këtë moment dhe i liruan menjëherë nga paraburgimi.

Tabelë kronologjike

10 shkurt 2021

Oficerë nga Ministria e Punëve të Brendshme, nga FSB-ja dhe Garda Kombëtare bastisin 16 shtëpi të Dëshmitarëve të Jehovait. Dy vëllezër i rrahin, 18 i marrin në pyetje, kurse Aleksandrin dhe Jurin i arrestojnë
12 shkurt 2021

Të dy vëllezërit i futin në paraburgim
28 tetor 2021

Jurin e çojnë me urgjencë në spital ku i bëjnë një ndërhyrje urgjente për t’i hequr një tumor
4 nëntor 2021

Jurin e transferojnë nga spitali në paraburgim
7 shkurt 2022

Nis procesi penal

Të dhëna

Aleksandër Serebrjakovi

Lindur: 1977 (Çehov, Rajoni i Moskës)

Biografia: Prindërit e tij shërbyen në ushtri. Aleksandri ka jetuar edhe në Ukrainë e Kazakistan. Ka punuar në ndërtim

U nxit të studionte Biblën pasi vuri re dashurinë vëllazërore mes Dëshmitarëve të Jehovait. U pagëzua më 1996 dhe u martua me Irinën më 2006

Komente personale nga bashkëshortja e Aleksandrit, Irina a

Si të ka ndihmuar Aleksandri ta ruaje të fortë besimin kur ishte në paraburgim?

Aleksandri më dërgonte letra me shkrime dhe shprehje zemërdhënëse nga Bibla. Përveç kësaj i shkruanim njëri-tjetrit dhe tregonim xhevahire nga leximi javor i Biblës. Shkrimet që zgjidhte, më siguronin se do t’ia dilnim mbanë dhe do ta ruanim besnikërinë deri në fund.

Çfarë po të ndihmon që të qëndrosh besnike?

Psalmi 116:1, 2 thotë: «Sa e dua Jehovain, se zërin dhe përgjërimet m’i dëgjon! Sa të kem jetë do t’i lutem, se veshin nga unë e kthen.» E di mirë se Jehovai po shfaq përulësi duke e kthyer veshin nga unë, një njeri i papërsosur. Dhe këtë nuk e bën nga detyrimi, por nga dashuria. Ai ka gjithçka nën kontroll dhe e njeh mirë gjendjen tonë emocionale, fizike si dhe e di sa nevojë kemi të qëndrojmë të lidhur ngushtë me të. Kjo më jep sigurinë se Jehovai është edhe pranë tim shoqi dhe se po kujdeset për të.

Juri Temirbulatovi

Lindur: 1977 (Samarkand, Uzbekistan)

Biografia: Ka punuar si konsulent tatimesh

Juri u martua me Alën në vitin 1996. Nisën të studionin Biblën së bashku dhe u pagëzuan si Dëshmitarë të Jehovait më 1998. Ata kanë 3 fëmijë

Komente personale nga gruaja e Jurit, Ala b

Si arriti Juri të mbante një qëndrim pozitiv kur ishte në paraburgim?

Në letra, ai thoshte se lutja, shpresa dhe mbështetja e vëllezërve dhe e motrave e ndihmonin jashtë mase. Shkruante edhe për bisedat e bukura që bënte me të tjerët për lajmin e mirë. Ato i jepnin zemër dhe e mbushnin me gëzim.

Çfarë po të ndihmon që të qëndrosh besnike?

Lutja dhe meditimi për shpresën që kemi për të ardhmen, nuk më lënë të shkurajohem. E kuptoj se këto sprova do të mbarojnë një ditë. Jehovai do të fitojë, por edhe ne. Dëgjoj shpesh këngën 44 me titull «Përgjërimi i shpirtit». Ajo ka ca shprehje të fuqishme, dhe, kur situata bëhet tejet e vështirë, vë këtë këngë dhe këndoj edhe unë.

Edhe pse Aleksandri dhe Juri ishin larg familjeve, kanë lënë një shembull të shkëlqyer teksa kujdeseshin për ta që të ruanin një besim të fortë. Jehovai i shpërbleftë gjithnjë ata dhe njerëzit e tyre të shtrenjtë për besnikërinë që tregojnë!—1 Timoteut 5:8.

a b Kur u përgatit ky artikull, vëllezërit Serebrjakov dhe Temirbulatov ishin në paraburgim. Ishte e pamundur të kishim komente prej tyre.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME