Fëmijët kanë nevojë për të rritur që t’i drejtojnë dhe t’i këshillojnë. Si prind, je personi i duhur për këtë punë; faktikisht është detyra jote. Megjithatë, edhe të rritur të tjerë mund të jenë këshilltarë për fëmijën tënd.

Në shumë vende, fëmijët kalojnë fare pak kohë me të rriturit. Mendo pak:

• Pjesën më të madhe të ditës e kalojnë në shkollë, ku ka më shumë nxënës se mësues dhe të rritur të tjerë.

• Pas shkolle, disa prej tyre kthehen në shtëpi dhe s’gjejnë njeri, meqë të dy prindërve u duhet të punojnë.

• Një studim zbuloi se në Shtetet e Bashkuara, fëmijët e moshave 8-12 vjeç kalojnë mesatarisht rreth 6 orë në ditë me pajisjet elektronike. *

Një libër që flet për marrëdhëniet prind-fëmijë (Hold On to Your Kids), thotë: «Të rinjtë nuk duan të ndjekin shembullin e nënave, të baballarëve, të mësuesve ose të të rriturve të tjerë të përgjegjshëm dhe as u kërkojnë atyre këshilla a drejtim, . . . por bashkëmoshatarëve.»

Kalo kohë me fëmijët

PARIM NGA BIBLA: «Mësoji fëmijës rrugën që duhet të ndjekë dhe ai nuk do të largohet prej saj edhe kur të plaket.»​—Proverbat 22:6, Diodati i Ri.

Fëmijëve u vjen natyrshëm të kërkojnë drejtim nga prindërit. Madje, ekspertët thonë se, edhe kur hyjnë në adoleshencë, ata priren të vlerësojnë më shumë këshillën e prindërve se të moshatarëve. Në librin Ti dhe adoleshenti (anglisht), dr. Lorens Stinbergu, shkruan: «Prindërit mbeten personat që ndikojnë më tepër se kushdo te sjellja dhe te qëndrimi i fëmijës gjatë viteve të adoleshencës dhe pas adoleshencës.» Ai shton: «Adoleshentëve u intereson mendimi juaj dhe duan t’ju dëgjojnë, edhe nëse ndonjëherë nuk pranojnë atë që u thoni ose s’bien dakord me çdo gjë.»

Përfito nga prirja e natyrshme e fëmijëve për të kërkuar drejtim nga ti. Kalo kohë me ta dhe tregoji çfarë mendon për çështje të ndryshme, vlerat e tua dhe gjërat që të ka mësuar jeta.

 Gjeji një këshilltar

PARIM NGA BIBLA: «Kush ecën me të mençurit, do të bëhet i mençur.»​—Proverbat 13:20.

A të vjen ndër mend një i rritur që mund të jetë shembull i mirë për fëmijën tënd adoleshent? Pse të mos i rregullosh gjërat që të kalojë ca kohë me fëmijën tënd? Patjetër, kjo s’do të thotë të heqësh dorë nga përgjegjësia si prind. Ama nxitja nga një i rritur, tek i cili ke besim se nuk do ta lëndojë fëmijën, mund ta përforcojë stërvitjen tënde. Bibla flet për Timoteun që edhe kur u rrit, nxori shumë dobi nga shoqëria me apostullin Pavël. Edhe Pavli nxori goxha dobi nga shoqëria me Timoteun.​—Filipianëve 2:20, 22.

Sot shumë familje nuk jetojnë më bashkë; shpesh gjyshërit apo të afërm të tjerë të ngushtë jetojnë në vende të tjera të botës. Nëse je në këtë situatë, përpiqu t’i krijosh adoleshentit mundësi që të mësojë nga të rritur me cilësi të bukura për t’u imituar.