IYARI ñaupa tiaj cosasgunara fotogunara pasaushcara. Ñaca tucui cosasguna ucturishca maucayashca huajlirishca an, shujta shu parti pishin. Shinajpi shujta mushuj cuinta ricuriun, cai sumaj rurashca tucui partiunai ricurin. “¿Shujcunamanda mas yali mushujchu an?” pasiachij runara tapungui. “Pai cutipan mana, mas ñaupajmanda an, mana ima huras alichishcachu aca”. “¿Shu lugarbi huacachishca ashcachu?” can rimanguilla. “Mana cutipan cutillara pasiachij runa, cai atun huairaunara tamiaunaras ahuantashca shinallara huajlichijcunaras”. Chiraigu can iyaringuichari: “Shinajpi ¿imamanda rurashca an?”.

Caita rimashcai Diospa Shimi chi valishca libro cuinta an. Shu ñaupa libro an, shujcunamanda mas yali. Sirtu pacha shu quillcauna tian ñaupa pachamanda, shinajpi chiguna huajlirishca ashca chi tunu libroguna ña maucayashca timpuuna pasashcai. Chibi quillcashcauna cai científico temagunamanda riman, shinajpi mushuj intindishcauna llucshijpi ñaupa timpu tiajcuna ña huashama saquirinushca. Chibi tiashca camachishcauna ambiunamanda cuna ñucanchira huajlichina ushan. Shinallara ñaupajmanda quillcashcauna ansahualla saquirinun ichilla partiuna ña huajlirishca shujcuna ña chingarishca an.

Diospa Shimi chimanda shuj tunu an. 3500 huatauna yali charin, shinajpi mana imas pasashca. Tucui huataunaibi ashca arcaigunara charishca rupachishca, arcashca, mana valichishca ajpis ñaupajma llucshishca mana imaras tucusha. Mushuj yachachishcaunara llucshijpi, Biblia ashca tunuunai ñaupachishca quillcashca libro ashca paihua punzhaunai (ricungui “¿Anticuada o adelantada para su tiempo?” nishca partii).

Shina ashas, can tapuringuichari: “¿Sirtu pacha valin Biblia yachachishcauna cuna punzhai?”. Cai tapuira cutipangaj iyari runauna ima tunu shinzhi turmindusgunara pasanun. ¿Ima mas turmindachij an? Iyaringuichari Allpara huajlichijcuna, huañuchijcuna, shuhuajcunas, guerragunais. Cuna Biblia ali yachachishcara iyari, shina rurashcai tapuri: “¿Cai mundui tucui runauna mas ali anungachari cai ali rurashcaunara catisha?”.

GANASLLA CAUSANARA LLAQUINA

“Cushiunami macanaujcunara alichijcuna, Diospa churiuna nishca anungami” (Mateo 5:9). “Ranalla ajpi, canguna ushashca tupura, cushihua causaichi tucui runaunahua” (Romanos 12:18).

LLAQUINARA, PERDONDA RICUCHINA

“Cushiunami llaquij shunguyujcuna, paiguna llaquishca anaungami” (Mateo 5:​7). “Parijumanda ahuantanuichi. Parijumanda perdonanuichi maican runa shujta piñajpi. Imasna Cristo cangunara perdonashcasna, shinallara perdonanuichi cangunapura” (Colosenses 3:13).

TUCUIGUNA CHI TUPULLA ANCHI

Dios “shu yahuarmandalla tucui runara iñachicami, intiru cai pachai causanauchu” (Rashcauna [Hechos] 17:26). “Sirtu pacha ricsini Diospa ñaupajpi tucui runauna chi tupulla anchi. Dios maican llacta runaras, paita manzhajta, alira rauta, llaquin” (Hechos 10: 34, 35).

ÑUCANCHI ALLPARA CUIRANA

“Jehová Dios chi carira cai ali gustu pamba Edembi churarca tarpungaj cuirangaj” (Génesis 2:15). Dios ‘cai pachara tulajcunara tulanga’ (Ricuchina [Apocalipsis] 11:18).

SHUJCUNA CHARISHCARA MUNANA, TACARINARA CHIJNINA

“Cuiraichi tucui cullquira yalijta munanamanda. Runa causaiga, mana ashca charinaunara charinamandallachu” (Lucas 12:15). “Randi, shujhua tacarina, tucui irusta rana, cullquira yapajta llaquina, ama rimashcallas uyarichu cangunapura, canguna chuyaj shunguyujcuna asha” (Efesios 5:3).

MANA LLULLANA, SHINZHIRA TARBANA

“Tucui alirasha causangaj munasha” (Hebreos 13:18). “Ñaupa huras shuhuaj ama mas shuhuachu, astaumbas alira tarabasha” (Efesios 4:28).

MINISTIJCUNARA YANAPANA

“Huacaisiquiunara animachichi, irquiunara shinzhiyachichi, tucuigunahua ahuantaj aichi” (1 Tesalonicenses 5:14). “Huaccha huahuaunajpi huaccha huarmiunajpis pasiai rinami paiguna llaquiriushcais” cuirangaj (Santiago 1:27).

Biblia ali rashcaunara mana yangamandalla rimanzhu, astaun llaquingaj ñucanchi causaibi pactachingaj yachachin. Tucui runauna cai yachachishcara catisha ¿manzhu paiguna turmindusguna charishcara yanapanga? Sirtu pacha cai Biblia yachachishcauna yapa valij an, ñucanchira yanapan cuna punzhai. Shinajpi Biblia canmanda ¿imara rurana ushan?

Tucui hurasmanda mas sabiru runa shina nica: “Yachana, ‘Alimi,’ nisha rimashcami paihua churiunamanda” (Mateo 11:19). Can shina ¿iyanguichu? Shu yachachishcauna ali ashcara yachangaj ñucanchi causaibi pactachina anchi huasha ima tucunara ricushun. Chiraigu can tapuringuichari: “Biblia sirtu ali asha ¿manzhu cai camachishcauna ñuca causaira yanapanga? ¿Sirtu pacha yanapana ushanzhu cuna punzhai turmindusguna charishcara?”. Shu cuintashcara ricushun.

Diana * tucui huras tarbaj aca, cushi, ali causaira charica, shinajpi cungaimanda tucuira chingarica, paihua ushushi huañuca, paihua casarashca huajlirica shinallara paiga yapa cullqui illaj saquirica. Pai cuintan: “Mana ñuca pi ashcara yachacani ushushi illaj saquiricani cari illaj huasi illaj. Tucuira pirdicani: Pi ashcara mana yachacani ursa illaj mana chapanara charicani”.

Diana cai sirtu shimira rimashcara alira intindica: “Ñucanchi causai 70 huatagama pactan, manajpi maican yapa shinzhi ajpis 80 huatagama pactana ushan. Shinajpi chi huatauna shinzhi turmindusgunara llaquirishcaunas pasan; dsaslla rin, chingarinchi” (Salmo 90:10).

Cai tucui llaquiunara ahuantangaj Diana Biblia yanapashcara mascasha ali sintirica. Imasna cai catij quinsa temagunai ricungaraunchi, ashca runauna imasna Biblia camachishcaunara catisha paiguna problemagunara alichingaj ashca yanapashcara ricunushca. Biblia cai punda parrafoi rimashca cuinta shu valij libro cuinta ashca. Mana anzhu huaranga libroguna cuinta, huatauna pasashcai ña mana valinzhu. Biblia ¿shuj tunu librochu an? ¿Cai libroi tiaj iyaiguna Diosmandachu shamun runauna randimanda? (1 Tesalonicenses 2:13).

Can shinallara iyarina ushanguichari causai dsaslla pasan ashca turmindusguna llaquiuna charin. Camba causaibi ashca turmindusguna llaquiuna charishcai ¿maibi yanapaira, camachishcaunara, cushiyachinara mascangui?

Ricushun Biblia ima quinsa tunui yanapanga camba causaibi. Caita rurangaj yachachinmi:

1. Ushashaga llaquiunamanda caruyana.

2. Turmindusgunara charishcai alichina.

3. Ñucanchi causaibi llaquiunara ahuantana.

Cai catij temagunai caimanda rimashun.