NGERA mo duubech el mo er tirke el mengull er a Jehovah el Dios me tirke el diak el longull er ngii? Ngera mo duubech el mo er a Satan me a remengelengalek el reng er ngii? Ngera el klengeltengat a mo er a rebekongesenges el chad er a chelsel a Ta el Telael el Rak er a Omengederederel a Kristus? A nger er aikang me a kuk bebil el ker a ngar er ngii er a Chocholt 13:1–​22:21. a Aika el bliongel a ngar er ngii a 9 er aike el 16 el ues el ulemes a apostol el Johanes er a kmeed er a ulebengelel a kot el dart el rak C.E.

A Johanes a milluches el kmo: “Ngeltengat ngikel menguiu a ikal tekoi ra ulaoch, me tirikel orrenges e mo olab a ikel llechukl er ngii me te ngeltengat.” (Chocholt 1:3; 22:7) A donguiu e doltaut aike el desuub er a babier er a Chocholt e ngngar er ngii a lerellii er a rengud, e smisichii a klaumerang er kid el mo er a Dios me a Ngelekel el Jesus Kristus, e meskid a omelatk er a ngar er a medad el klebesei. b​—Hebru 4:12.

KLEUID EL BELATONG EL CHELDECHUDERRENG ER A DIOS A MLOITEL

(Chocholt 13:1–16:21)

A Chocholt 11:18 a kmo: “Mar bek el renged a mlo kesib a rengrir, e mocha er ngii a cheldechuderreng er [a Dios] . . . ma blsechel cho mokngemedeterir tirikel olekngemed ra belulechad.” A omesodel a ongeai el ues a ochotii a omerellel a “tal charm . . . el mlarngii a truich lorsul ma kleuid el bdelul.”​—Chocholt 13:1.

Ngar sel ongetiu el ues e a Johanes a milsang “a Ngelekel a sib a dechor ra Rois el Zion, ma dart ma chokouang ma cheual telael el chad el obengkel.” Tirkang a “tirikel mlengubet el mlara delongelir ar chad.” (Chocholt 14:1, 4) Me ngngar er ngii a sbedir a rechanghel el uleakullel sel ongetiu el ues. Ngar er a ongingil sel ues e a Johanes a milsterir a re “teuid el anghel el olab a ikel euid el ringel.” Me ngbleketakl el Jehovah a oldurech er a rechanghel el mo oleitel “a ikel kleuid el belatong el cheldechuderreng ra Dios el mora belulechad” er a Satan. Aika el belatong a ngar er ngii a subed me a uleklatk el kmo a Dios a mo oukerrekeriil er a rechad. (Chocholt 15:1; 16:1) Aika el eru el ues a meskid a komakai el omesodel a kerrekerilel a Renged el ngii a obengkel a ongedei el ringel me a ongeuid el omelekeuel a trombetang.​—Chocholt 11:14, 15.

Ker er a Biblia a Mlonger:

13:8​—Ngerang a “babier ra klengar er ngikel mlokoad el Ngelekel a sib”? Tiang a okesiu el iluil el babier el llechukl a ngklir tirke el mo mengedereder er a Renged el ngar er a eanged el obengkel a Jesus Kristus. Ngdirrek el llechukl a ngklir tirke el ngellitel el Kristiano el dirk ngar tia el chutem el tir a oba omelatk er a klengar el ngar er a eanged.

13:11-13​—Ngmekerang a tebelik el charm el ngar er ngii a teblo el orsul a loltengel er a ngau er a eanged el ua dragon? A belkul a teblo el orsul ngika el tebelik el charm​—a Renged er a Britain me a Merikel​—el melekoi el ua dragon el lousbech a ulekdakt me a orrimel me a meringel el odechelakl el melai a dereder. Ngoltengel a ngau er a eanged el leko ngprofet el melasem el melai a klisiich er ngike el mekngit, el ngar er a chelsel aika el eru el mekemad er a beluulechad er a chelsel a 20 el dart el rak e meruul er ngii el leko ngmla mo mesisiich er a kabelment er a Kiosanto.

16:17​—Ngerang a “milidiul” el lemloitel er ngii sel ongeuid el belatong? Tia el “milidiul” a omekesiu er a mekngit el blekerdelel a Satan, “el  reng el oureor er chelechang ra chelsir ar ngalek er chorrengesmengoit.” Me tia el mekngit el blekeradel er a beluulechad er a Satan a mla chuchebii a klechad me a chelechang e kede outeliil er tia el mekngit el eltel.​—Efesus 2:2.

Klubeled:

13:1-4, 18. “A tebelik el charm” a omekesiu er a kabelment er a klechad el “mlara daob el ngmasech,” el ngii a rullii a klechad el mo ua lengar er a omengedeklel a daob el diak bo el chelellakl. (Isaia 17:12, 13; Daniel 7:2-8, 17) A Satan a milebii e msa klisichel ngika el tebelik el charm el lambang er ngii a 666 el olecholt er a klungel a kngtil. Me a bo dodengelii a omerellel ngika el tebelik el charm e tiang a rullid me ngdiak doltirakl er ngii, e dirrek el diak dongull er ngii el ua loruul er ngii a ruumesingd el chad.​—Johanes 12:31; 15:19.

13:16, 17. Me alta e kede mo chelebangel a ringel a doruul a urered er a bek el sils, el ua ‘domchar malechub e dolterau,’ engdi ngdiak debecherei ngike el tebelik el charm me longedereder er a klengar er kid. A lsekum e kede kongei er a ‘cholangch ra kidekmel a chimad malechub a medal a bdelud’ e ngua dekengei er a tebelik el charm me longedereder er a uldesued me a omerelled.

14:6, 7. A klemechel a anghel a osisecheklid el kmo ngkirel el mo blak a rengud el omerk er a ungil el chais er a mla medalem el Rengedel a Dios. E dirrek el mo ngosuterir tirke el mesuub a Biblia el omekeroul er a omeluu el mo er a Jehovah e mo oldanges er ngii.

14:14-20. Sel bo el merek a “sim ra belulechad,” el ngii a sel omengudel er tirke el mo suobel, e seikid e ngmocha temel a anghel el “ruidm a budo ra belulechad el chemudel, e mildokl ra kloul omeseokl ra bilong el cheldechuderreng ra Dios.” Sel budo​—el ngii a mekngit el beluulechad er a Satan me a rokui el kabelment er ngii​—a mo mokngemed el mo cherechar. Me ngkired el oterekokl a rengud me ngdiak demechetikaik er tia el budo er a beluulechad.

16:13-16. Aike el olangch er a re “mengelengalek el reng” a omekesiu er a blulekngel a Diabelong el soal a reking er a beluulechad a bo lomtok er a Jehovah er sel taem el bo loleitel aike el kleuid el belatong el cheldechuderreng er a Dios.​—Matteus 24:42, 44.

16:21. Sel bo el keed a ulebongel er a beluulechad, e a sbedel a kerrekerilel a Jehovah el kirel tia el mekngit el blekeradel er a Satan a sebechel el mo uldimukl er ngii a mesisiich el olechotel a kerrekerilel a Dios, el ua chull el kori. Nguaisei engdi a ruumesingd el chad a mo melemolem el oltuub er a Dios.

A MLA MO KATS EL KING A MENGEDEREDER

(Chocholt 17:1–22:21)

A “Kloul Babilon,” el renged er a klsuul el klechelid er a beluulechad el rokir, a ta er a mengelengalek el bliongel er a mekngit el beluulechad er a Satan. A 11 el ues a olecholt er ngii el ua “derrir a tingaol dil”​—el mekngit el redil​—el “dengchokl ra bekerekard el charm.” Aike el “truich lorus” er ngike el tebelik el charm el ledengchokl er a bebul a mo okngemedii. (Chocholt 17:1, 3, 5, 16) A ongingil el ues a mesubed el kirel a rebetel ngii el tingaol dil el lomekesiu er ngii er a “kloul mats” e mesubed er a rechedal a Dios me ‘ltobed ra chelsel.’ A rebetok a mo mengeiung el kirel a telemellel sel klou el mats. Engdi ngar er ngii a klou el deurreng er a eanged el kirel a “merengel a chebechiil ra Ngelekel a sib.” (Chocholt 18:4, 9, 10, 15-19; 19:7) Ngar er sel 13 el ues, e ngike el ngar er a “becheleleul uos” a mo oumekemad er aike el renged. E mo okngemedii sel mekngit el beluulechad er a Satan.​—Chocholt 19:11-16.

E kuk mekerang el kirel “ngiil chuodel bersoech el Diabelong e Satan”? Ngoingerang e ngmo ‘obidokl ra diosech el ngau’? Tiang a bo losaod er ngii a 14 el ues. (Chocholt 20:2, 10) Aike el eru el ulebongel el ues a meskid a telkib el olechotel a klengar er a chelsel a Ta el Telael el Rak. Ngar er a ulebengelel tia el ‘chocholt,’ e a Johanes a mesang a “chomoachel el ralm ra klengar . . . el merael ra blngel sel kloul rael ra mats” e a kmal ungil el okedong a mlo er “tirikel meched a rengrir [me] le mei.”​—Chocholt 1:1; 22:1, 2, 17.

 Ker er a Biblia a Mlonger:

17:16; 18:9, 10​—Ngera uchul “mar king ra belulechad” a lmangel el mengebechub er ngii el dil el bla letemellii? A bechelechelingaol el reng er tir a uchul e te lmangel. A uriul er a ngemedel a Klou el Babilon, e a reking er a beluulechad a mocha melechesuar el kmo te kmal uluusbech er ngii. Ngii el dil a uchul me aike el mekngit el omerellir a ua ble lungil. Ngika el Klou el Babilon a dirrek el mlo obengterir el ngoititerir a remekekerei el chad el mo teloi er a mekemad. Ngdirrek el rirelleterir a rechad el mo chederdall er aike el kabelment.

19:12​—Ngmekerang a Jesus e di ngii el tang a medengelii sel diak lemedung el ngklel? Sel ngakl a locha melutk el kirel a deruchall me aike el techall el Jesus a mo olab er a sils er a Rubak, el ua losaod a Isaia 9:6. Ngdiak a ngodech el medengelii tia el ngakl, ngdi ta el Jesus, e le aike el techall el kirel a kmal ileakl me ngdi ngii el tang a medengelii a belkul a loba ngar er a bab el deruchall. Me nguaisei engdi, a Jesus a omesterir tirke el mo obengkel a bebil er aike el techall el mo er ngii, el ua ‘loluches er tir . . . a beches el ngklel.’​—Chocholt 3:12.

19:14​—Ngtechang a mo obengkel a Jesus el oumekemad er a Armageddon? Tirke el mo obengkel a Jesus er a mekemedil a Dios a “urrurt ra eanged” el tir a rechanghel me tirke el ngellitel el mla ngmai a dikesir er a eanged.​—Matteus 25:31, 32; Chocholt 2:26, 27.

20:11-15​—Ngklir a rua techang a llechukl er a “babier ra klengar”? Tia el babier a llechukl er ngii a ngklir tirke el rokui el mo nguu a diak a ulebengelel el klengar​—el rengellitel el Kristiano, me a klou el seked, me a reblak a rengrir el mesiungel a Dios el mo nguu a “chokiis rar melemalt.” (Rellir 24:15; Chocholt 2:10; 7:9) Tirke el mo mekiis el mo nguu a ‘chokiis rar diak le melemalt’ a sebechel a ngklir el mo llechukl er a “babier ra klengar” a lsekum e te oltirakl “a ikel llechukl er iaikal babier el kirel chomerellir” er a chelsel a Ta el Telael el Rak. Engdi aike el ngakl a sebechel el mesuld. A ngklir a rengellitel a mo medechel el mo cherechar a lsekum e te blak a rengrir el mo er a kodall. (Chocholt 3:5) E a ngklir tirke el mo nguu a klengar er tia el chutem a mo medechel el mo cherechar er a uriul er sel ulebongel el skeng er a orokiolel sel ta el telael el rak.​—Chocholt 20:7, 8.

Klubeled:

17:3, 5, 7, 16. A “llomeserreng el mlar bab el mei” a ngosukid el mo medengelii a “bertelel ngiil dil, ma bertelel ngikal [bekerekard el] charm el kleuid a bdelul e truich chorsul el oltak er ngiil redil.” (Jakobus 3:17) Ngika el okesiu el tebelik el charm a mle League of Nations e a uriul e ngmlo United Nations. Sel bo dodengelii tia el berrotel el tekoi e ngrullid el mo blak a rengud el omerk er tia el ungil el chais er a Rengedel a Dios, e dirrek el mesubed el kirel a sils er a kerrekerilel a Jehovah.

21:1-6. Ngsebechel el mo ulterekokl a rengud el kmo aike el meldung el klengetengat el mo er ngii el oeak a Renged a mo tmaut. E ngera uchul? E le tia el tekoi a medung el kirel el kmo: “Ngmla tmaut a ikal tekoi!”

22:1, 17. A “chomoachel el ralm ra klengar” a melutk el kirel aike el tekoi el bo longetmokl a Jehovah el mo olsobel er a rebekongesenges el chad er a klengit me a kodall. Ngkmal di kesai er tia el ralm a ngar er ngii er a chelechang. Me a leuaisei e bo doba omereng el saul el kongei er tia el okedong el mo nguu a “ralm ra klengar . . . el diak locheraol” e dirrek el mo ngosuterir a rebebil el mo melai er ngii!

[Footnote]

[Siasing er a 9 el llel]

Ngmera el betok el klengeltengat a bo loridm a rebekongesenges el chad er a eungel a omengederederel a Renged!