1. Ngmekera chelitakl e ngosukid?

A TA el merael chisel el chad el meluches a chelitakl a mle ta el ledu el kmo: “A tekoi a rullau el mo omdasu. E a ongngak a rullau el mo omelechesiu a tekoi. Engdi chelitakl a rullau el mo medengelii a uldasu.” Me a chelitekled a olecholt a odanges me a bltkil a rengud el mo er a Demad el Jehovah el ngar a eanged. E tiang a rullid el mengal mo kmeed er ngii. Ngkmal beot er kid el mo medengelii a uchul me a omengitakl a klou a ultutelel el tedebechel a mera el omengull, alta e kede mengitakl el di kid el tang, me a lechub e kede teloi er a rudam me a rudos er kid el mengitakl.

2, 3. (a) Ngua ngera uldesuir a rebebil el kirel a omengitakl el klou a ngerir er a chelsel a ongdibel? (b) Ngera el ker a bo dosaod er tia el suobel?

² Me ngua ngera uldesuem el kirel sel mongitakl el klou a ngerem er a chelsel a ongdibel? Ke kora merur? Ngar er a bebil el beluu, e ngmeringel er a resechal el mengitakl er mederir a rechad. E tia el uldasu a sebechel el rulleterir a rechad er a ongdibel el mo mekngit a uldesuir el kirel a omengitakl, e ileakl a lsekum a remechuodel er a ongdibel a kora chetirir el mengitakl, me a lechub e te mechesang el meruul a bebil el tekoi er sel temel omengitakl.​—Psalm 30:12.

 ³ A omengitakl a tedebechel a omengull er kid el mo er a Jehovah. Me ngdiak el soad el mo cheroid er a temel a chelitakl, me a lechub e bo lak debechir tia el tedebechel a miting er kid. Me a leuaisei, e ngungil a dolatk el kmo: ‘Ngua ngera uldesuek el kirel a omengitakl er a temel a miting? Ngera sebechek el remuul a lsekum ngdiak el soak el mengitakl er mederir a rechad? Ngmekera kungitakl el mera el ngar a renguk?’

4, 5. Ngmle uangera omengetmeklel a omengitakl er a chelsel a templo er a Israel er a irechar?

⁴ Ngar a reksi, e tirke el mengull er a Jehovah a uluusbech a chelitakl el oldanges er ngii. Me kede mesang el kmo sel taem el rechad er a Israel a mle blak a rengrir el mo er a Jehovah, e a omengitakl a ta er a kmal mle klou a ultutelel el tedebechel a omengull er tir. El ua tiang, sel taem el David a milengetmokl el kirel okedecherul a templo, e ngulemekrael er a 4,000 el chad er a Levi el mo mengitakl el oldanges er a Jehovah lousbech a ongngak. Ngar er a delongelir tirka el chad, e a 288 er tir a “mlosisechakl me te meduch er a rolel omengitakl el mor a Rubak.”​—1 Kronika 23:5; 25:7.

⁵ A ongngak me a chelitakl a dirrek el mle meklou a ultutelel el tedebechel a omengedolel a templo. Me a Biblia a mesaod el kmo: ‘Ng mle ngerechelir a re chad er a trombetang ma re chad er a chelitakl el mengitakl me ng sebechir el morenges el ta ngerir el oldanges e mereng a sulel a RUBAK. Ser a le mekider a chelitakl el obengkel a trombetang, ma ongesmoll, ma bebil er a klekedall er a chelitakl el oldanges er a RUBAK, . . . e a klebkellel a Dios a milekekii a Templo.’ Me ka di molatk er tia el klou el tekoi el locha kmal millisiich a klaumerang er a rechad er a Israel!​—2 Kronika 5:13, 14; 7:6.

6. Ngmilekerang a Nehemia e kutmokl a rolel a omengitakl me a ongngak er sel taem er a dirk el kabernor er a Jerusalem?

⁶ A Nehemia el uluungerachel er tirke el chad er a Israel el milleketek er a cheotelel a Jerusalem, a dirrek el uluungerachel er tirke el chad er a Levi el mengitakl e ousekool a tumetum. Me a tekoi el lurruul a dirrek el rirellii a omengedolel a cheuatel el kmal mlo uchul a klou el deurreng. A Nehemia a ulemii er a rechad er a chelitakl el mo “erul meklou el cheldebechel” el mo merael er bebul tia el cheuatel er a bita me a bitang e mo kebetech er sel kboub el kot el kmeed er a basio er a templo. Me a ongngak a kmal mle imis el klou a oto er ngii me ngmle sebechir a rechad el ngar cheroid el rongesii. (Nehemia 12:27, 28, 31, 38, 40, 43) Me ngulterekokl a rengud el kmo, a Jehovah a kmal mle dmeu a rengul el rongesterir a remengull er ngii el kmal mle semeriar el mengitakl a chelitakl er odanges el mo er ngii.

7. Ngmilekerang a Jesus e ochotii el kmo, a chelitakl a kirel mo klou a ultutelel el tedebechel a omengull er a Rekristiano?

⁷ Ngar er a taem er a Jesus, e a omengitakl a millemolem el klou a ultutelel el tedebechel a mera el omengull. Ka di molatk er a tekoi el dilubech er sel kot el klou a ultutelel kesus er a chelsel a reksi er a klechad. A uriul er a leketmeklii a Chedaol Belsoil er a Rubak a Jesus el obengterir a redisaiplo er ngii, e te rokui el dilak el mengitakl a chelitakl er a odanges el mo er a Jehovah.​—Monguiu er a Mateus 26:30.

8. Te milekerang a rekot el Kristiano e mecherei a ungil el kerebai el kirel a dongitakl a chelitakl er odanges el mo er a Dios?

⁸ Tirke el kot el Kristiano a milecherei a ungil el kerebai el kirel a dongitakl el loldanges er a Dios. Ngdimlak leua rechad er a Israel el mlo er a templo el mo mengull er a Jehovah, tirka el Kristiano a bai mlo kldibel er a blirir a rederta el chad e meruul a omengull er tir. Me alta e aika el blai a dimlak leklebokel el ua templo, engdi a rudam  a di millemolem el ngar a chelsel e blak a rengrir el mengitakl. A apostol el Paulus a dilu er a rudam er ngii el Kristiano el kmo: “Mkaosisechakl e mkellach el mor a ikel sebechel a llemesel a rengmiu, e mongitakl el olab a tekoi er a Chedaol Llechukl, ma odengesel a Kristus, ma tekoi el moumerang el oldanges e mereng a sulel a Dios.” (Kolose 3:16) Me a chelitakl el ngar a beches el blil a chelitakl a kmal kired el mengitakl el loba ‘omereng el saul.’ E le aikang a dirrek el tedebechel a kall el ‘keled er sel belsechel’ el “blak a rengul e mellomes a rengul el mesiou” a omeskid.​—Mateus 24:45.

9. (a) Ngera me a rebebil a mo diak lsorir el mengitakl er a temel a miting er kid me aike el ta el sils el ongdibel? (b) Ngua ngera rolel e kede mengitakl loldanges er a Jehovah, e rua techang a kirir lomekrael er kid? (Momes er a siasing er a uchelel a suobel.)

⁹ Ngera bebil luchul me ngmo diak lsoam el mengitakl? Nglocha diak el siukang er kau me a telungalek er kau el mengitakl. Me a lechub e sel morrenges er tirke el meduch el mengitakl el ngar a razio me a lechub a TV, e momekesiu er a chiklem el mo er a chiklir e ke locha mo merur me a lechub e ngmo chetim. Engdi kid el rokui a ngar er ngii a ngerecheled el mo mengitakl el oldanges er a Jehovah. Me bekengii a blil a cheliteklem, e mnguu el bedul bab, e mokisii a bdelum, e mongitakl el mo klou a ngerem! (Esra 3:11; monguiu er a Psalm 147:1.) A betok el Blil a Ongdibel er chelechang a mla mo er ngii a screen el olecholt a tekoi el ngar a chelitekled, e tiang a sebechel el ngosukau el mengitakl. Ngdirrek el omengitakl el chelitakl er a Renged a mla mo tedebechel sel Skuul el Kirir a Remechuodel. Me tiang a ochotii a klungel a ultutelel el kirir a remechuodel el mo blak a rengrir el mengitakl el lomekrael er kid er aike el temel a miting er a ongdibel.

10. Ngkired el melatk er a ngerang sel bo debekikl el mengitakl el klou a ngered?

¹⁰ A rebetok a bekikl el mengitakl el klou a ngerir, e le te omdasu el kmo ngkmal mo klou a ngerir me a lechub e ngmekngit a chiklir. Engdi  ka molatk er tiang, “kede rokui el blechoel el mo e mecheuid” sel dongedecheduch, engdi tiang a diak leterebengid me bo lak dongedecheduch. (Jakobus 3:2) Me ngera uchul me kede mecherei tia el cheiukl el dobang me ngtorebengid me ngmo diak dongitakl a odanges el mo er a Jehovah?

11, 12. Kede mekerang e lmuut el mo meduch el mengitakl?

¹¹ Kede locha bekikl el mengitakl e le ngdiak dodengelii a rolel a dongitakl. Engdi ngar er ngii a bebil el beot el rolel e ngsebeched el mo meduch el mengitakl. *​—Momes er a footnote.

¹² Ngsebechel el mo mesisiich e klou a ngerem el mengitakl loeak sel msubii a rolel e ke mo ungil louteliil. A telim a msa klisichel a oto er a ngerem sel mongitakl el di ua rolel e a dengki a msa klisichel a tama er a dengki. Me ngkirel el mo klou a ngerem el mengitakl el ua sel mongedecheduch. (Momes a bebil rolel el ngar a Benefit From Theocratic Ministry School Education, er a 181 el mora 184 el llel, el ngar cheungel a dai el “Properly Control Your Air Supply.”) A lebebil er a taem, e a Biblia a mengelechel er tirke el mengull er a Jehovah el mo ‘klou a ngerir’ sel longitakl a chelitakl er a odanges.​—Psalm 33:1-3.

13. Msodii a rolel e kede lmuut el mo ungil mengitakl.

¹³ Ngar er a temel a omengull el telungalek e molasem er tiang: Mngiltii a ta er a soam el chelitakl er ngar er a blil a chelitekled, e bo leklou a ngerem el menguiu er ngii. E sola e ta el motuu a telim, e mousbech er a osisiu el klungel a ngerem el dmung aike el rokui el tekoi el ngar a chimo el line er a chelitakl. E a uriul e mongitakl er ngii loba osisiu el klungel a ngerem. (Isaia 24:14) Seikid e ngmo mesisiich a oto er a ngerem sel mongitakl, e tiang a kmal ungil el tekoi. Me lako medakt me a lechub e merur el meruul er ngii!

14. (a) Ngoeak a ngera el rolel e sel debekengii a ngered el mo klou e ngosukid sel dongitakl? (Momes er a baks el “ A Rolel e Ngsebechem el Mo Meduch el Mengitakl.”) (b) Ngera bebil er a ungil el rolel e ngsebeched el lmuut el mo ungil el mengitakl?

¹⁴ Ngsebechel el lmuut el mo mesisiich a ngerem el mengitakl sel bekengii a ngerem el lmuut el mo klou. Me sel mongitakl e ke mekengii a ngerem el mo klou el kuk mo klou er sel momok er a ngerem el mengedecheduch. Engdi ke mo mekerang a lsekum ke omdasu el kmo, ngmechitechut a oto er a ngerem me a lechub e ngkuk kmal cheterrerek? Ngsebechem el metik a bebil el ungil el rolel el ngar a baks el “Overcoming Specific Problems,” el ngar a Benefit From Theocratic Ministry School Education, er a 184 el llel.

15. (a) Ngera el subed a tilobed er sel annual meeting er a rak er a 2016? (b) Ngera bebil el uchul me te ulemekbeches er a blil a chelitakl?

¹⁵ Tirke el rokui el mlo er sel annual meeting er a rak er a 2016, a kmal mle semeriar er sel taem el Brother Stephen Lett el ta er a chedal a Chelechad er a Ruungerachel a uluuchais el kirel a beches el blil a chelitakl el dai er ngii a “Sing Out Joyfully” to Jehovah. Ngika el Brother Lett a milsaod er a ta er a uchul me ngmlo kirel mo er ngii a beches el blil a chelitakl el kmo, sel New World Translation of the Holy Scriptures a mla mukbeches. Me a tekoi el ngar a chelitakl a mlo diak lousbech a bebil el tekoi el dikea debetik er a chelsel tia el New World Translation. Ngdirrek el mlo er ngii a beches el chelitakl el mesaod el kirel a urered er a berkel a klumech me a olubet el tenget. Me a lmuut el tang, a chelitakl a meklou a ultutelel el tedebechel a omengull er kid, me a Chelechad er a Ruungerachel, a mlo sorir el rullii e otebedii a meringelchad el blil a chelitakl, me ngmileketmokl e motobed el di osisiu a ikrel el ua sel New World Translation el Biblia e dirrek el silver a tkul el meliuekl.

16, 17. Ngera bebil er a omelodech el mlo er ngii er tia el beches el blil a chelitakl?

¹⁶ Te rirellii tia el blil a chelitakl el mo beot er kid el metik a chelitakl er a chelsel lokiu sel lodak aike el chelitakl el mesaod er a ta el tekoi. El ua tiang, aike el kot el 12 el chelitakl a mesaod el kirel a Jehovah, e aike el 8 el ongingil a mesaod er a Jesus me a olubet el tenget, e melemolem el uaisei. Ngdirrek el ngar er ngii a cherrungel el list el mesaod a tekoi er a chelsel aika el chelitakl el  ngar a uchelel tia el blil a chelitakl. Tiang a kmal ngosukid e le ngmo beot er a rudam el melilt a chelitakl el bo lousbech el kirel a cheldecheduch el mo er a buai.

¹⁷ A bebil el tekoi er a chelsel aika el chelitakl a mlengodech me bo lsebechel mo bleketakl a klumech er a chelsel el ngosuterir a rokui el chad el mo mengitakl el mera el ngar a rengrir. Me a tekoi el diak deblechoel el ousbech el ua “shall” a dirrek el mlo diak. Ngdi osisiu, a chelitakl el dai er ngii a “Long-Suffering” a mlutechei lousbech er a tekoi el “Exercise Patience,” me a tekoi er a chelsel aika el chelitakl a dirrek el mlengodech. Ngdirrek el melemalt el tekoi el mlo kirel mengodech a dai er a chelitakl el “Guard Your Heart” me ngmo diak el ua mesisiich loderuchel e ngbai di mlo tekoi el kmo “We Guard Our Hearts.” E ngera uchul? E le uchei, e a chad el mengitakl er ngii a ua loldurech er a rebebil el mo meruul a tekoi. E tiang a sebechel el mo meringel er a rebeches me a resemeriar el chad me a remekekerei el chad me a rudos el ngar er a miting er kid me aike el ta el sils el ongdibel me aike el meklou el ongdibel el mo medengelii a mera el belkul. Seikid a uchul me a dai me a dirrek el tekoi er a chelsel a mlengodech.

18. Ngera me ngkired el mesuub a chelitakl el ngar tia el beches el blil a chelitekled? (Momes er a footnote.)

¹⁸ A betok er aike el chelitakl el ngar a “Sing Out Joyfully” to Jehovah a di ua nglunguuch. Aikang a kmal sebechel ngosukau el mo ungil louchais aike el ngar a rengum el mo er a Jehovah. E a kuk bebil er ngii a ngosukid el mo mesisiich el ‘olecholt er a bltikerreng e meruul a ungil.’ (Hebru 10:24) Me ngsoad el mo ungil medengei a hu er ngii, me a delecherul, me a tekoi er a chelsel aika el chelitekled. E a ta er a rolel e kede meruul er tiang a oeak sel dorrenges aike el bla leketmokl el ongngak me a chelitakl el rudam me a rudos er kid a mengitakl. E aikang a ngar er ngii er a jw.org. Me sel mngar a blim e mosuub aika el chelitakl, e ke mo meduch e dirrek el ulterekokl a rengum e mengitakl el mera el ngar a rengum. *​—Momes er a footnote.

19. Te mekerang a rokui el ngar a chelsel a ongdibel e dmak el mengull er a Jehovah?

¹⁹ Lak mobes el kmo a omengitakl a ta er a klou a ultutelel tedebechel a omengull er kid. Ngta er a mesisiich el rolel e kede ochotii el mora Jehovah el kmo ngbetik a rengud er ngii, e mereng a sulel el kirel a rokui el tekoi el bla leruul el kired. (Monguiu er a Isaia 12:5.) Me sel moba klemeriarreng el mengitakl, e ke melisiich er a rebebil el mo meruul er a osisiu el tekoi. Me a rokui el ngar a ongdibel, el mekekerei me a remeklou me redirk mle soiseb er a klemerang, a sebechir el mengull er a Jehovah el loeak a chelitakl. Me lak el chetim el mengitakl el mera el ngar a rengum, bai molengesenges er a ulekrael el ledillii a ta er a milluches er a psalm el kmo: “Mongitakl el mor a RUBAK!” Choi, bo ledeu a rengum el mengitakl!​—Psalm 96:1.