1. Ngera ngomelechesiu er ngii a Jehovah el kirir a remesiungel?

 NGERA ngmesa Jehovah sel lomes er a remesiungel er tia el chutem? Ngmedengei sel ledeu a rengud me sel lemekngit a rengud. (Psa. 37:18) Sel lomes er kid el mesiou er ngii el mora tkurrebab el sebeched alta kede outekangel a tekoi el kmal omekringel er a rengud, e ngkmal mo dmeu a rengul! Ngaruchei er ngii ngkmal soal lolengeseu e mengelaod er kid.

2. Ngera ngmeruul er ngii a Jehovah el kirir tirke el chelemuul a rengrir, e mekera sebeched el ngmai a klungioled er a ulekerreuil?

² A Psalm 147:3 (NW) a kmo a Jehovah ‘omkar a telemellel’ a reng. A Jehovah losaod er ngii er tia el bades el kmo ngolengeseu er tirke el ngar ngii a telemellel a rengrir. Ngera kired el meruul me dengai a klungioled er a ulekerreuil? Molatk er tia el okesiu. A toktang a kmal sebechel ngosuir a chad el miltemall el mo ungil. Me nguaisei engdi ngika el chad a di sebechel el mo ungil a lsekum e ngkerekikl loltirakl a tekingel a toktang. Ngar tia el suobel e kede mo mesa el kmo a Tekingel a Jehovah ngera ngmelekoi el mo er tirke el chuarm a rengrir me a rolel e ngsebeched el loltaut a ulekrael er ngii.

JEHOVAH OLTEREKOKL ER A RENGUD EL KMO KEDE MEKREOS ER NGII

3. Ngera uchul me a rebebil a feel el kmo te diak el ngerang?

³ Kede kiei er a beluulechad el diak a bltikerreng er ngii me ngklengiterreng e le rebetok el chad a bla lerelleterir el mo omdasu el kmo ngdiak lengerang. A odos el Helen a a kmo: “Ak mlukeroul er a chelsel a telungalek el dimlak a bltikerreng er ngii. A demak a kmal mle mekngit a blekerdelel e bek el sils el lullekoi er kemam el kmo ngdiak a ultutelam.” Kau a locha ua Helen el diak lungil omeruul el mlo er kau, e bek el taem el di lolekoi a mekngit  el kirem, me a lechub e te mla rullau el mo feel el kmo ngkmal diak mngerang. A leuaisei e nglocha meringel er kau a mo oumerang el kmo ngngar ngii a chad el betik a rengul er kau.

4. A doltirakl er a Psalm 34:​18, e ngera ngolterekokl er a rengud er ngii a Jehovah?

⁴ Mo lmuut me a lsekum a rebebil a mle mekngit omerellir el mo er kau, me ngsebechel mo ulterekokl a rengum el kmo a Jehovah betik a rengul er kau e omes er kau el kmal mekreos. Ng “kmeed er tirkel chelam a rengrir.” (Monguiu er a Psalm 34:18.) A lsekum ke feel el kmo ‘ngdikea omeltkem’ e lak mobes el kmo a Jehovah ulemes a ungil el ngar er a rengum e ulemekrael er kau el mei er ngii. (Jn. 6:44) Ngkmal kltmokl el mo olengeseu er kau e le ke mekreos er ngii.

5. Ngera sebeched el suub er a omerellel a Jesus el mo er tirke el meltengel osengir a rechad er tir?

⁵ Ngsebeched el suub a lomelechesiu er ngii a Jehovah loeak a dorriter er a kerebil a Jesus. A Jesus er a loruul er a omesiungel er tia el chutem e ngulemtab er tirke el rechad a miltengel osengir er tir e ulechotii a klechubechub er tir. (Mt. 9:​9-12) A redil el mle smecher er a mekngit el secher er a leretechii a bilel el omeltkel a kmo ngmo ungil er a secherel, e a Jesus a milengelaod er ngii e chilat er ngii er a klaumerang er ngii. (Mk. 5:​25-34) A Jesus a mle cherrungel loukerebai er a Demal. (Jn. 14:9) Me ngsebechel mo ulterekokl a rengum el kmo a Jehovah omes er kau el klou a ultutelem e mes aike el ungil el blekerdelem, luldimukl er a klaumerang me a bltkil a rengum el mo er ngii.

6. Ngera sebechem el meruul er ngii a lsekum ke feel el kmo ngdiak a belkum el chad?

⁶ Ngera sebechem el meruul er ngii a lsekum ke di melemolem el loumededenger er a belkum el chad? Monguiu e molebedebek a bades er a Biblia el lolterekokl er a rengum el kmo ke mekreos er a Jehovah. b (Psa. 94:19) A lsekum e  ngdimlak el sebechem el lotutii a turrekong er kau me a lechub e ngmo mechitechut a rengum le ngdiak el sebechem el meruul a betok el ua rebebil, e lak momekesiu er kau er a rebebil me a lechub e bo lulturk osengem er aike el diak el sebechem el meruul. A Jehovah diak longerechir er kau el mo meruul lengelakl er aike el sebechem. (Psa. 103:​13, 14) A lsekum a ngar er a mong e ngngar ngii a chad el mlo mekngit er kau me a lechub e ngmillemall er kau, e tia kmal diak el fault er kau! Lak mobes el kmo a Jehovah mo oukerrekeriil er tirke el uaisei, ngdiak el tirke el miltemall. (1 Pe. 3:12) A Sandra el ngar ngii a millemall er ngii er a lengalek a kmo, “Ak blechoel el lolengit er a Jehovah me lengesukak el mo tabesul osengek el kirek, el mo omes er ngak el uai ngii a lomes er ngak.”

7. Ngmekera sebeched el lousbech a mekngit el experience er kid el ngar er a omesiunged el mora Jehovah?

⁷ Lak moumededenger el kmo a Jehovah sebechel lousbech er kau lolengeseu er a rebebil. Ngmla meskau a ileakl el chetengakl el mo kldemel er a ureor er a berkel a klumech. (1 Ko. 3:9) Experience er a klengar er kau a locha uchul me koba klechubechub e medengei aike el feel a rechad. Ngkmal betok a sebechem el meruul el lolengeseu er tir. A Helen el dulsaod er ngii er a uchei a ngilai a ngeso e chelechang e ngsebechel lolengeseu er a rebebil. Ngkmo: “Alta ak mle feel el kmo ngkmal diak ngerang engdi Jehovah mla rullak el mo feel el kmo ngngar ngii a betik a rengul er ngak e ngar ngii a ultutelek.” A Helen a kmal dmeu a rengul er chelechang el mesiou el ta er a regular pioneer.

A JEHOVAH A SOAL A DEKENGEI ER A KLAUSUBES ER NGII

8. Ngera el tekoi el lolterekokl er a rengud a debetik er ngii er a Isaia 1:18?

⁸ A rebebil er a mesiungel a Jehovah a kmal dirk oberaod a rengrir el kirel a klengit el leriruul er a ngar er a mong, luchei me a lechub e nguriul er a lemetecholb. Engdi ngdiak el soad el lobes el kmo a Jehovah milskid a olubet e le ngkmal betik a rengul er kid. Me ngika kmal soal a dekengei er tia el sengk er ngii. Ngolterekokl er a rengud el kmo a lsekum kede mla ‘dmedesii’ c a delongeled kid me ngii e ngcherrungel el lousubes er kid. (Monguiu er a Isaia 1:18.) Kede kmal oba omereng el saul le bltikerreng el Demad el Jehovah obes a klengit el deriruul er a ngar er a mong! E a osisiu el taem e ngkmal diak lobes aike el ungil el bla deruul.—Psa. 103:​9, 12; Heb. 6:10.

9. Ngera uchul me ngkired el mora tkurrebab el klisiched el mo ulturk osenged er chelechang me a ngar medad el diak el ngar er a mong?

⁹ A lsekum a tekoi el omriruul er a ngar er a mong a dirk omekberaod er kau e bora tkurrebab el klisichem el mo ulturk osengem er aike el moruul er chelechang me a kirel a ngar medad el diak el ngar er a mong. Molatk er a apostol Paulus. Ngkmal uluuchel er a rengul el kirel a meringel odelecheklel el mora Rekristiano, engdi ngmle medengei el kmo a Jehovah a mla ousubes er ngii. (1 Ti. 1:​12-15) Ngika ngdi millemolem el melatk a kngtil er a ngar er a mong? Ngika ulterekokl el dimlak lekengei el mo meruul er tiang, el uai ngii el dimlak el kengei el melatk aike el accomplishments er ngii er a klechelid er a Rechijudea. (Fil. 3:​4-8, 13-15) Ngbai mle blak rengul el lomerk er a klumech e ulemes el beduluchei. Ngdi ua Paulus, ngdiak el sebechem el ngodechii a ngar er a mong. Engdi ngsebechem el odeuir a rengul a Jehovah e oldanges er ngii er chelechang e omes el beduluchei el kirel a ungil klengar er a ngar medad el bla letibir el mo er kau.

10. Ngera sebechem el meruul er ngii a lsekum omerellem er a ngar er a mong a tilemelleterir a rebebil?

¹⁰ Nglocha mo oberaod a rengum el kirel a tekoi  el mriruul er a ngar er a mong el mla tomelleterir a rebebil. Ngera sebechel ngosukau? Moruul aike el sebechem el sumechii, e mouchais e mochotii er tir el kmo ngkmal ouuchel a rengum el kirel. (2 Ko. 7:11) Molengit er a Jehovah me lengesuterir tirke el miltemall er omerellem. Ngsebechel ngosukau kau me tirke el mtilemelleterir el loutekangel e lmuut el metik er a budech.

11. Ngera sebeched el suub er a kerebil a profet Jona? (Dirrek el momes er a siasing.)

¹¹ Mngai a klubelem er a cheleuid el mriruul e becherei a Jehovah me lousbech er kau er a ngii di el rolel el soal. Molatk er a profet Jona. Ngika dimlak lebora Ninive el ua ledilung er ngii a Dios e bai chiliis el mora bita el beluu. Me a Jehovah silmecheklii a Jona me ngii a ngilai a klubelel er ngii. (Jon. 1:​1-4, 15-17; 2:​7-10) A Jehovah dimlak le give up er a Jona. Ngmilsang a lmuut el ta er a techall el mora Ninive, me a Jona kmal di mle mereched el olengesenges. Ngdimlak lebecherei a kngtil a rengul el kirel a cheleuid el lerirellii er a ngar er a mong me bo luchul e lak lekengei er a ngerachel el mlara Jehovah.—Jon. 3:​1-3.

JEHOVAH MENGELOAD ER KID LOEAK A CHEDAOL RENG

12. Ngmekera Jehovah e meskid a budech sel leduubech a mekngit el tekoi er a klengar er kid? (Filipi 4:​6, 7)

¹² Ngoeak a chedaol reng er ngii e a Jehovah mengelaod er kid sel leduubech a mekngit el tekoi er a klengar er kid. Molatk er a experience er a Ron me a Carol. A ngelekir el sechal a di mle ngii el nguu a klengar er ngii. Te melekoi el kmo: “Aki mla chobangel a ringel engdi ngdiak a meringel el uai tiang. Aki milluluuch er aike el betok el kesus el dimlak el sebechel el imiit a medemam, e mera el mlo omelechesiu er a budech el losaod er ngii a Filipi 4:​6, 7.” (Monguiu.) A lsekum e ngchelemuul a rengum e le ngngar ngii a mekngit el mla duubech el mo er kau e moluluuch el louchais er a Jehovah aike el rokui el ngar er a rengum. Ngsebechem el meluluuch el kirel el betok el taem. (Psa. 86:3; 88:1) Moluluuch el betok el taem el lolengit er a chedaol reng er a Jehovah. Ngkmal diak bo lekotouar er kau.—Lk. 11:​9-13.

13. Ngmekera chedaol reng e ngosukid el melemolem el mesiou er a Jehovah el loba blakerreng? (Efesus 3:16)

¹³ Ngngar ngii a meringel el blekeradel el mla rullau el mo diak a klisichem el meruul a ngii di el ngerang? A chedaol reng a sebechel smisichau el mo melemolem el mesiou er a Jehovah el loba blakerreng. (Monguiu er a Efesus 3:16.) Molatk er a odos el Flora. Ngii me a bechil a dilak el mesiou el missionari e a bechil a mlo mekngit, me ngmildort a chebechiielir. Ngkmo: “Ngmera el mlo imis el mekngit a renguk e di mlo melatk er ngii el tekoi. Ak milluluuch lolengit er a Jehovah me lebeskak a chedaol reng me bo lsebechek loutekangel. A Jehovah milskak aike el kuusbech el mo mechelaod a renguk e outekangel er a tekoi el uchelel e a kulemdasu el kmo ngdiak el sebechek el lotekur.” A Flora feel el kmo a Dios a mla ngosuir el lmuut el mo mui el oumerang er ngii e kmal ulterekokl a rengul el kmo ngmo ngosuir loutekangel a rokui el ringelel. Ngdochelir el kmo: “A Psalm 119:32 (NW) a kmal melutk er ngak: ‘Ngkmal soak el merael er a rolel a llechum e le ke rullii a basio er ngii er a chelsel a renguk.’”

14. Ngmekera debecherei a chedaol reng er a Dios me bo loureor er a chelsed?

¹⁴ Ngmekera sebechem el loureor lobengkel a nglunguchem lolengit er a chedaol reng? Moruul aike el tekoi el mo uchul e a chedaol reng er a Dios a mo oureor er a chelsem. Aika uldimukl er ngii a mora miting e omerk el mora rebebil. Momekeek er a uldesuem er a uldesuel a Jehovah loeak omonguiu er a Tekingel er a bek el sils. (Fil. 4:​8, 9) Sel monguiu, e momtab er a rechad er a Biblia el mlo chobangel a ringel e molebedebek er a rolel e a Jehovah ngilsuterir el loutekangel. A Sara el dulsaod er ngii er a uchei a  mlo chobangel a betok el oberaod el ringel. Ngkmo: “A cheldecheduch el kirel a Josef a kmal rirtechii a renguk. Ngika dimlak lebechei a ringel me a diak el melemalt el lomeruul el blo lechebangel me lechoitechetur a deleuill er ngii me a Jehovah.”—Gen. 39:​21-23.

A JEHOVAH MENGELAOD ER KID LOEAK A RUDAM ME A RUDOS ER KID

15. Ngsebeched el nguu ongelaod er techang, e mekera sebechir el ngosukid? (Dirrek el momes er a siasing.)

¹⁵ A rudam me a rudos a sebechir el ‘mo ongoloded’ sel dechebangel a ringel. (Kol. 4:​11, BT) Te ngar el lolechotel a bltkil a rengul a Jehovah el mei er kid. Ngsebechir el mengelaod er kid loeak a longoit a taem el lobengked e lorrenges er kid louchais aike el ngar er a rengud. Te locha mo share er a bades er a Biblia el melisiich er kid me a lechub e te meluluuch el lobengked. d (Rom 15:​4, BT) A lebebil e a odam me a lechub e ngodos a locha mo omeklatk er kid er a uldesuel a Jehovah e tia sebechel ngosukid el mo melemolem el klebechel a uldesued. A rudam me a rudos a dirrek el sebechir el lomeskid aike el dousbech el ua meruul a keled sel dechebangel a ringel.

16. Ngera locha kired el mo meruul er ngii me dengai a ngelsurir a rebebil?

¹⁶ A lebebil e nglocha mo kired el di kid el lolengit a ngeso. Rudam me a rudos er kid a betik a rengrir er kid e sorir el lolengeseu. (Osi. 17:17) Engdi te diak el lodengei el kmo ngera kede omelechesiu me a lechub e ngngera dousbech.  (Osi. 14:10) A lsekum kau a ngar ngii a ringelel a rengum e mkengei louchais er a rungil el sechelim. Mouchais er tir aike el mo ngosukau. Ngsebechem el mengedecheduch er a tang me a lechub e te teru el mechuodel el beot er kau a mengedecheduch er tir. A rebebil lodos a mla metik el kmo ngosuterir sel longedecheduch er a odos el mla mukeroul er a klereng.

17. Ngera bebil er a omelsemai el sebechel mo uchul e ngdiak dengai omelisiich, e mekera sebeched el mo mesisiich er ngii?

¹⁷ Momtok er a rengum el soal meleakl er kau er a rechad. A lebebil e a ringelel a rengum a uchul me ngdiak el soam el teloi er a rechad. Me a rudam me a rudos er kau a locha diak bo el understand er kau me a lechub e ngmo mekngit a tekoi el lousbech. (Jak. 3:2) Lak bechei aikang me bo luchul e lak mngai omelisiich el mousbech. A Gavin el ta er a remechuodel el smecher er a depression a kmo: “Ngbetok aike el taem el diak el soak el mengedecheduch er a resechelik me a lechub ak mengoit a taem el lobengterir.” Me nguaisei engdi Gavin a diak lebecherei a rengul me bo lemesisiich er ngii. Ngblechoel el mo ungil a rengul sel longoit a taem el lobengterir a rebebil. A odos el Amy a kmo: “Tekoi el dilubech el mei er ngak a uchul me ngmeringel er ngak oumerang er a rechad. Engdi ak mesuub el mo ua Jehovah el loumerang er a rudam me a rudos er ngak. Ak medengei el kmo ngrullii a Jehovah el mo dmeu a rengul e dirrek luchul me ngdmeu a renguk.”

MNGUU ONGELAOD ER A TELBILEL A JEHOVAH EL MO OMEKUNGIL A ROKUI EL TEKOI ER A NGAR MEDAD

18. Ngera sebeched el lomes el beduluchei el kirel, e ngera sebeched el meruul er ngii er chelechang?

¹⁸ Ngsebechel mo ulterekokl a rengud el lomes beduluchei sel dodengei el kmo a Jehovah a di kmedung e ngmo omekungil a rokui el telemellel a bedenged me a rengud. (Och. 21:​3, 4) Tiakid el taem e aike el rokui el ringel el bla dechebangel a “kmal di mo diak a melatk.” (Isa. 65:17) Ngua bla desaod, a Jehovah ‘omkar a telemall er kid’ er chelechang. Me mui el ngmai a klungiolem er aika el ulengesuil a Jehovah me a ongelaod er ngii. E lak ta el bo moumededenger el kmo ‘ngomekerreu er kau.’—1 Pe. 5:7.