1. Ngera uchul me ngsebechel mo meringel er kid olengesenges?

 KAU, ngmo ngmeringel er kau olengesenges? A King David me ngdirrek el milluluuch el mora Dios el kmo: “Mrellii a renguk el mo bekongesenges.” (Psa. 51:12) A David a kmal mle betik a rengul er a Jehovah. Me nguaisei engdi ngmla er ngii aike el taem el bo lemeringel er ngii olengesenges. E ngerang? A kot e kid a rechad a ngar ngii a blekerdeled el diak el soad lolengesenges. Ongerung, a Satan a blak a rengul el melasem el meruul er kid el mo omtok el uai ngii. (2 Ko. 11:3) Ongedei, kede iliuekl er a reng er tia el beluulechad el rechad er ngii a sorir el di omtok, el “reng el oureor er chelechang ra chelsir ar ngalek er chorrengesmengoit.” (Efe. 2:​2, BT) Ngkired el meringel loureor el oldechelakl er a rengud el soal meruul a klengit e dirrek el oltngakl a orimel el mo omtok, el lolisiich er ngii a Satan me a beluulechad er ngii. Ngkired el lolengesenges er a Jehovah me tirke el bla letetketerir el mo olab a klisiich.

2. Ngera belkul a bo de “kltmokl el lolengesenges”? (Jakobus 3:​17, NW)

² Monguiu er a Jakobus 3:17 (NW). b A Jakobus a mlukreng el mo meluches el kmo, a remellomes a rengrir el chad a “kltmokl el lolengesenges.” Molatk er a belkul tiang. Ngkired el kltmokl, e kongei el mo olengesenges er tirke el Jehovah mla mesterir a bebil klisiich. Nguaisei, engdi Jehovah kmal diak bo ledu er kid el mo olengesenges er a chad el oltngakl a llechul.—Rel. 4:​18-20.

3. Ngera uchul me ngklou a ultutelel er a Jehovah a dolengesenges er a rechad lolab a klisiich?

³ Kede locha feel el kmo ngbeot a dolengesenges er a Jehovah er a dolengesenges er a rechad. A rokui el ulekrael lomeskid a cherrungel. (Psa. 19:7) Engdi rechad lolab a klisiich a diak lemecherrungel.  Me nguaisei a Demad el ngar er a eanged a mla mesterir a rechad loungalek, kabelment, me a remechuodel a bebil klisiich. (Osi. 6:20; 1 Th. 5:12; 1 Pe. 2:​13, 14) Sel dolengesenges er tir e kede olengesenges er a Jehovah. Ka me dorriter a rolel e ngsebeched lolengesenges er a rechad el mla ngmai a klisiich er a Jehovah, alta lebebil e ngmo meringel er kid a kongei, e olengesenges a ulekrael er tir.

4. Ngera uchul me te betok er a rengalek a diak lolengesenges er a rechad er a blirir?

⁴ A remekekerei a iliuekl er a rengalek el “diak lorrenges a tekingir a re demerir ma re derrir.” (2 Ti 3:​1, 2) Ngera uchul me a rebetok er tir a diak el sorir lolengesenges? A rebebil er a roungalek a meruul a opposite er aike el lolekoi er a rengelekir me a rengelekir omdasu el kmo ng unfair. Rekuk bebil omdasu el kmo a beluulechad a kmal mla change me aike el lolekoi a rechad er a blirir a mla mo diak loureor me a lechub e ngkuk kmal strict. A lsekum e ke ngalek, e kau ngngar ngii a taem el bom feel el uaisei? A rebetok a meringel er tir oltaut er tia el llechul a Jehovah: “Molengesenges rar demmiu mar delemiu, [le] tia melemalt el tekoi.” (Efe. 6:1) Ngera sebechel ngosukau?

5. Ngera uchul me ngkmal ileakl el tekoi el Jesus a ullengesenges er a rechad er a blil el ua losaod er ngii a Lukas 2:​46-52?

⁵ Ngsebechem el suubii a blekongesenges er a Jesus el ngike el kot lungil kerebai er a blekongesenges. (1 Pe. 2:​21-24) Ngika mle perfect el chad el rechad er a blil a dimlak el perfect. Engdi a Jesus a millemolem lolecholt omengull el mo er tir, mo lmuut er aike el taem el rechad er a blil a riruul a cheleuid e dimlak el le understand er ngii. (Exo. 20:12) Molatk a tekoi el dilubech el mora Jesus er a le 12 a rekil. (Monguiu er a Lukas 2:​46-52.) A rechad er a blil a chilitii er a Jerusalem. Ngmle ngerechelel a Josef me a Maria el make sure el kmo a rokui el ngelekir a ulebengterir er a lorael el lmuut el mo remei er a bo lemerek a chedaol sils. Sera lebetik er ngii e a Maria mle blame er a Jesus er a ringel el mlo er tir! A Jesus a mle sebechel melekoi el kmo tia kmal diak el fair. Engdi ngbai ulechotii omengull er a longer er tir. Me nguaisei engdi a Josef me a Maria “dimlak lutebengii a belkul a tekingel.” Ngdi Jesus a millemolem el ‘orrenges a tekingir.’

6-7. Ngera sebechel ngosuterir a rengeasek el mo olengesenges er a rechad er a blirir?

⁶ Rengalek, ngmo meringel er kemiu olengesenges er a rechad er a blimiu sel le make a mistake me a lechub sel lak el understand er kemiu? Me ngngera sebechel ngosukau? A kot, e molatk er a uldesuel a Jehovah. A Biblia melekoi el kmo sel molengesenges er a rechad er a blimiu ng “chodeuir a rengul a Rubak.” (Kol. 3:​20, BT) A Jehovah medengei sel lak el understand er kau a rechad er a blim me sel loruul a rules el diak el beot er kau oltirakl. Engdi sel molilt el lolengesenges er tir e ke rullii el mo dmeu a rengul.

⁷ Ongerung, molatk er a uldesuir a rechad er a blim. Sel molengesenges er tir e ke rulleterir el mo dmeu a rengrir e rulleterir el mo trust er kau. (Osi. 23:​22-25) Ko mdirrek el locha kmal mo close. A Alexandre el odam er a Belgium a kmo: “Sera bo kurrenges a tekingir a rechad er a blik e ngmle change a relationship er kemam. Aki mlo close e happy.” c Ongedei, molatk er a rolel e a omolengesenges er chelechang a mo ngosukau er a uriul. A Paulo el kiei er a Brazil a kmo, “Ngak el silubii el mo olengesenges er a rechad er a blik a mla ngosukak el mo olengesenges er a Jehovah me tirke el olab a klisiich.”  A Tekingel a Dios a meskid a klou a ultutelel luchul me ngungil molengesenges er a rechad er a blim. Ngkmo: “Me bo lungilbesul a rokui el tekoi er kau, me bo mchad el meketeket er tial beluulchad.”—Efe. 6:​2, 3.

8. Ngera uchul me a rebetok el ngeasek a melilt el lolengesenges er a rechad er a blirir?

⁸ A rebetok el ngalek a mla mesa el kmo sel lolengesenges e ngdi mo ungil a rokui el tekoi. A Luiza el dirrek el chad er a Brazil a mle meringel er ngii er a uchelel el mo understand er a uchul me ngdimlak el sebechel mo ou cell phone. Ngika millatk el kmo a ruumesingd el ngalek el ua meklungel a mla er ngii a dengua er tir. Engdi ngmlo mtebengii el kmo a rechad er a blil a mle protect er ngii. Ngmelekoi el kmo, “A kumes er a olengesenges er a rechad er a blik el diak el ua straitjacket, e ngbai ua seat belt el sebechel losebelii a klengar er ngak.” A Elizabeth el ngeasek el lodos er a beluu er a Merikel a dirk meringel er ngii a lebebil er a taem el lolengesenges er a rechad er a blil. Ngkmo, “Sel bo lemeringel er ngak a understand er a uchul me a rechad er a blik a meruul er a ileakl el rules e ak mo melatk er aike el taem el rules er tir a mle protect er ngak.” A Monica el kiei er a Armenia a melekoi el kmo ngblechoel el mo ungil sel lolengesenges er a rechad er a blil er a bai sel lak lolengesenges er tir.

9. Ngera uldesuir a rebetok el kirel olengesenges a llach?

⁹ A rebetok a oumerang el kmo kede ousbech er a kabelment e ungil dolengesenges a bebil llach el loruul a “re merreder er a beluu.” (Rom 13:1) Engdi tirka el osisiu el chad a locha diak bo lolengesenges a llach el diak el sorir me a lechub e ngdiak el fair. Molatk er a omengkad el tax. Te mirruul er a survey er a ta el beluu er a Europe e miltik el kmo, a rebetok el chad oumerang el kmo “ngdiak el melemalt omharau a tax a lsekum ke omdasu el kmo ngdiak el fair.” Me ngdiak el mechas a rengud el rechad er tia el beluu a diak el harau a rokui el tax longerechir a kabelment.

10. Ngera uchul me kede olengesenges a llach el mo lmuut er aike el llach el diak el soad?

¹⁰ A Biblia melekoi el kmo a kabelment er a rechad a uchul a ringel, e ngar er a cheungel a klisichel a Diabelong, e di kmedung ngmo nguemed. (Psa. 110:​5, 6; Oli. 8:9; Lk. 4:​5, 6) Ngdirrek el melekoi el kmo “ngikel chad el omtok er tirkel olab omerreder a omtok er omerreder el le dillemii a Dios.” Me a Jehovah er chelechang omechei a kabelment me ngmengedereder me a blekeradel le chelderoder, e mengerechir er kid el mo olengesenges er tir. Sei a uchul me ngkired el ‘remuul a ngerecheled’ luldimukl er ngii a harau a tax, e mengull e olengesenges er tir. (Rom 13:​1-7) Nglocha diak lebeot er kid olengesenges er a llach, me a lechub a llach a diak el melemalt er osenged, me a lechub ngmo uchul a ringel el mei er kid a dolengesenges er ngii. Me nguaisei engdi kid  olengesenges er a Jehovah, e ngii a dmu er kid el mo olengesenges er tirke el olab a klisiich a lsekum e ngdiak lolemall a llechul.—Rel. 5:29.

11-12. Ngua losaod er ngii a Lukas 2:​1-6, ngera ngmirruul a Josef me a Maria me lolengesenges er a llach el mlo uchul a ringel el mo er tir, e ngera dilubech? (Dirrek el momes a siasing.)

¹¹ Ngsebeched el ngmai a klubeled er a Josef me a Maria el tir a mle kltmokl el olengesenges er a rulab a klisiich alta ngmlo uchul a ringel el mo er tir. (Monguiu er a Lukas 2:​1-6.) A Maria er a lebocha el etiu el bilel e ngii me a Josef a mleasem a blekongesenges er tir. Augustus el milengedereder er a Renged er a Rom ultebedii a tekingel me lemengai a ulecherangel er a rechad er a renged. A Josef me a Maria mle kirir el mora Bethlehem el mle 93 el mael a cherridel loeak a bukl me a ked. Tia mle meringel el omerael, tokubets el kirel a Maria. Te locha mle bekikl er a Maria me a ngalek. Te mo mekerang a lengar omerael el lebora labor? Ngika mle dioll er a telbiil el Mesias. Ngdi ungil a lak lotirakl el tia el llach er a kabelment?

¹² Alta ngmla er ngii a suebek a rengrir er ngii me nguaisei engdi a Josef me a Maria ullengesenges er a llach. A Jehovah ulemekngeltengat er a blekongesenges er tir. Me a Maria mlora Jerusalem el diak el klsakl e mechellii a mesisiich a bedengel tolechoi, e ultutii a ulaoch er a Biblia!—Mik. 5:2.

13. A blekongesenges er kid ngera ngsebechel rullii el mora rudam er kid?

¹³ Sel dolengesenges er a rulab a klisiich er a beluu e ngmo uchul a klungioled kid me a rechad. Ngoeak a ngera el rolel? A ta er ngii, a diak bo dobals. (Rom 13:4) A blekongesenges er kid a ngar ngii a bo lerellii er a osengir a rulab a klisiich el mora rokui el Sioning er a Jehovah. El ua tiang, betok el rak er a mla me mong, e a resoldau a tiluu er a Blil a Ongdibel er a Resioning er a Jehovah er a Nigeria losiik er a rechad el diak el sorir el harau a tax. Engdi a merredelir tirka el soldau a dilu er tir me te merael e dilu el kmo: “A Resioning er a Jehovah a harau a tax er tir.” Me a bek el taem el moltirakl a llach e ke rullii a ungil chisir a  rechedal a Jehovah. A ta er a klebesei e tia el ungil chised a locha sebechel lomekerreu er a rudam me a rudos er kau.—Mt. 5:16.

14. Ngera ngilsuir a ta el odos el mo “kltmokl el lolengesenges” er a rulab a klisiich er a beluu?

¹⁴ Me nguaisei engdi nglocha ngar ngii aike el taem el diak el soad lorrenges er a rulab a klisiich. A Joanna el odos el kiei er a beluu er a Merikel a kmo, “Ngkmal mle meringel er ngak a moba blekongesenges e le rebebil chedal a telungalek er ngak a mlo chuarm er a diak el melemalt el omerellir a rechad el olab a klisiich.” Me a Joanna mlo meringel loureor el melodech er a uldesuel el kirir a rechad lolab a klisiich er a kabelment. A kot e ngmle stob el menguiu a post er a rechad el ngar er a social media el milsaod a kngterir a rulab a klisiich er a kabelment. (Osi. 20:3) Ongerung, e ngmilluluuch el lolengit er a Jehovah me lengesuir el mo oumera el ulsirs er ngii el diak el omelodech er a kabelment. (Psa. 9:​9, 10) Ongedei, e ngmenguiu a suobel el mla motobed er a babilenged el mesaod el kirel a diak domekbitang. (Jn. 17:16) A Joanna chelechang e ngmelekoi el kmo ngii el mengull e olengesenges er a rechad lolab a klisiich er a kabelment a uchul me ngmelechesuar a budech.

15. Ngera uchul me ngsebechel mo meringel er kid olengesenges a ulekrael er a cheldebechelel a Jehovah?

¹⁵ A Jehovah olengit er kid el “molengesenges er tirke el omekrael” er a ongdibel. (Heb. 13:​17, NW) Me alta Jesus el Mengetekled a cherrungel, engdi tirke el lousbech er tir er tia el beluulechad a diak el mecherrungel. Me nglocha mo meringel er kid olengesenges er tir, tokubets a lsekum te olengit er kid el mo meruul er a tekoi el diak el soad el meruul er ngii. A apostol Petrus me ngdimlak el soal lolengesenges er a ulekrael el lengiluu. Sera ledu er ngii a anghel el mo menga tech el doltirakl er a llach er a Moses e ngdiak el klikiid e ngmle edei el taem el diak lekengei el mo mengang. (Rel. 10:​9-16) E ngerang? Tia el beches el ulekrael a dimlak el make sense er a rengul. Ngika dimlak el sau er tia el beches rolel a tekoi. A lsekum a Petrus a mle meringel er ngii olengesenges er a anghel el cherrungel, me nglocha lmuut el meringel er kid olengesenges er a rechad el diak el mecherrungel!

16. Alta apostol Paulus a mle sebechel lomes er a ulekrael el lengiluu el kmo ngdiak el tabesul, engdi ngmilekerang? (Rellir 21:​23, 24, 26)

¹⁶ A apostol Paulus a mle “kltmokl el lolengesenges” mo lmuut er a lengai a ulekrael el locha lulemdasu el kmo ngdiak el tabesul. Rekristiano el Chijudea rirenges a chais el kmo a Paulus a olisechakl er a rechad el mo “mengoit a Llach er a Moses,” e diak lolecholt er a omengull el mo er a Llach. (Rel. 21:21) A remechuodel el mlara Jerusalem ulemekrael er a Paulus me lengititerir a reteua el chad el mora templo e longikiid er tir loltirakl er a rolel omengikiid el lochotii el kmo ngoltirakl er a Llach. Engdi Paulus a mle medengei el kmo a Rekristiano a mla mo diak el ngar cheungel a Llach. Me ngii a diak a ngera el mekngit el bla lerellii. Me nguaisei a Paulus a ullengesenges. Me “ngilititerir tir el chad e ulebengterir el oltaut a rolel omengikiid.” (Monguiu er a Rellir 21:​23, 24, 26.) A blekongesenges er a Paulus a millisiich er a kltarreng.—Rom 14:​19, 21.

17. Ngera kede suubii er a experience er a Stephanie?

¹⁷ A odos el Stephanie a mle meringel er ngii a kongei er a omelilt el letilbir a rudam el olab a ngerachel er a belual. Ngii me a bechil a kmal mle dmeu a rengrir el mesiou el chedal a group er a ngodech el omelekoi. Engdi branch office a mle toreklii tia el group e assign er tir el lmuut el mora ongdibel el melekoi a tekingir. A Stephanie a kmo: “Ngkmal dimlak lungil a  renguk. A kulemdasu el kmo omelekingam a dimlak lousbech a ngeso.” Me nguaisei engdi ngileltii el mo support er tia el ulekrael. Ngkmo: “Cherengel a taem e ak mlo mesa el kmo tia kmal mle mellomes el ulekrael. Aki mla mo demerir e derrir a rebebil el ngar ongdibel er kemam el diak a telungalek er tir er a klemerang. Ak mesuub lobengkel a odos el mla lmuut el mo omerk er a klumech. E chelecha e ngmla mo klou a temek el meruul er a omesubek el di ngak el tang.” Ngmelemolem el melekoi el kmo: “Ngklikiid a ukltkek e le kmedengei el kmo ak mlora tkurrebab el sebechek el lolengesenges.”

18. Ngera klungiolel sel bo debekongesenges?

¹⁸ Ngsebeched el mesuub el mo olengesenges. A Jesus a “milsuub a blekongesenges ra ikel blo le charm er ngii.” (Heb. 5:​8, BT) Ngdi ua Jesus, kede blechoel el suubii el moba blekongesenges er a chelsel a meringel el blekeradel. El ua tiang, ngmlo meringel er kau olengesenges er a temel a COVID-19 pandemic er a bo lak dengar er a miting er a Blil a Ongdibel e bo lak doldingel obliil? Engdi a blekongesenges er kau a mle protect er kau, me a ongdibel a millemolem el ngar er a kltarreng, me kau uldeuir a rengul a Jehovah. Kid el rokui a mla mo ungil kltmokl el olengesenges a ngii di el ulekrael el bo dengai er a temel a kloul ringel. A klengar er kid ultuil er ngii!—Job 36:11.

19. Ngera uchul me ngsoam el mo bekongesenges?

¹⁹ Kede mla suubii el kmo a blekongesenges a uchul a diak el mochur el klengeltengat. Engdi sel kot el klou a ultutelel luchul me kede olengesenges er a Jehovah, a kid el betik a rengud er ngii e soad lodeuir a rengul. (1 Jn. 5:3) Ngkmal diak el sebeched el mtechei aike el rokui el bla leruul a Jehovah el kired. (Psa. 116:12) Engdi ngsebeched lolengesenges er ngii me tirke el ngar ngii a klisichir er kid. A lsekum kede mo olengesenges e kede ochotii el kmo ngmellomes a rengud. E tirke el mellomes a rengrir a rullii a Jehovah el mo dmeu a rengul.—Osi. 27:11.