TEMPU Hesus tabata riba tera, el a reflehá perfektamente e personalidat i forma di aktua di su Tata. El a bisa: “Mi no ta hasi nada riba mi propio inisiativa, sino ku ta loke e Tata a siña mi, mi ta papia. . . . Semper mi ta hasi loke ta agrad’é.” (Huan 8:28, 29; Kolosensenan 1:15) Pues, si nos ke sa kon Dios ta mira hende muhé i kon e ke pa trata nan, nos tin ku analisá Hesus su aktitut i manera di trata ku hende muhé.

Vários analista di Beibel a konkluí a base di loke e evangelionan ta trese dilanti ku Hesus su punto di bista di hende muhé tabata revolushonario pa e tempu ei. Den ki sentido? I loke ta mas importante ainda, su siñansanan ta libra hende muhé djawe?

Hesus no a konsiderá nan un opheto seksual. Den bista di algun lider religioso hudiu kualke kontakto ku hende muhé por a hiba na pashon seksual. Nan a konsiderá hende muhé un fuente peligroso di tentashon i p’esei a prohibí nan di papia ku hende hòmber den públiko òf di sali kas sin tapa kabes. Na kontraste, Hesus niun ora so no a bisa hende hòmber pa no anda ku hende muhé. Mas bien, el a konsehá nan pa dominá nan deseonan karnal i trata hende muhé ku rèspèt.—Mateo 5:28.

Hesus a bisa tambe: “Ken ku divorsiá di su esposa i kasa ku un otro muhé ta kometé adulterio kontra su esposa.” (Marko 10:11, 12) Pues, klaramente Hesus a rechasá e idea rabíniko ku tabata masha komun e tempu ei di ku un hòmber por a divorsiá di su kasá “pa kualke motibu.” (Mateo 19:3, 9) Mayoria di hudiu tabatin un konsepto kiboká di adulterio. Pa nan, un hòmber ku a drumi ku un otro muhé ku no ta su kasá no a kometé adulterio. Segun e rabinan, ta hende muhé so por ta infiel, no hende hòmber! Manera un komentario bíbliko a splika, “Hesus a elevá e nivel i dignidat di hende muhé ora el a pone e esposo bou di e mesun obligashon moral ku su esposa.”

E benefisio di su siñansa pa hende muhé djawe: Den e kongregashon kristian di Testigunan di Yehova, hende muhé ta asosiá libremente ku hende hòmber na reunion. Pero nan no tin nodi di tene miedu ku e ruman hòmbernan ta wak nan na un manera inapropiá òf ta bira muchu familiar ku nan, ya ku hòmbernan kristian ta hasi nan bèst pa trata ‘hende muhé mas grandi manera ta nan mama nan ta, hende muhé mas yòn manera ta nan ruman muhé nan ta, ku tur puresa.’—1 Timoteo 5:2.

Hesus a dediká tempu na siña hende muhé. E rabinan di e tempu ei tabata boga pa laga hende muhé keda bobo. Na kontraste, Hesus a dediká tempu na siña hende muhé e bèrdat i a animá nan pa ekspresá loke nan tabata pensa. Ademas, Hesus no a pensa ku hende muhé mester keda den kushina so. El a demostrá esei ora ku e no a nenga Maria e oportunidat di siña. (Lukas 10:38-42) E kontestanan bon pensá ku Marta, ruman di Maria, a duna Hesus despues di morto di Lázaro ta mustra ku e tambe a benefisiá di e siñansanan di Hesus.—Huan 11:21-27.

 Hesus tabata interesá den loke hende muhé tabata pensa. Mayoria di muhé hudiu den su tempu tabata pensa ku nan lo tabata felis solamente si nan a haña un yu ku nan por tabata orguyoso di dje, foral si e tabata un profeta. P’esei, ora un muhé a bis’é: “Felis ta e barika ku a karga bo!” Hesus a probechá di e oportunidat pa siñ’é ku obedensia na Dios tin muchu mas balor. (Lukas 11:27, 28) Asina Hesus a indiká ku hende muhé tabatin tarea mas importante ku e papel tradishonal imponé riba nan.—Huan 8:32.

E benefisio di su siñansa pa hende muhé djawe: Den e kongregashon kristian, e maestronan ta keda kontentu ku e komentarionan di hende muhé durante reunion. Nan ta respetá hende muhé ku tin madures kristian i ku pa medio di nan kondukta, tantu den privá komo den públiko, ta “maestra di loke ta bon.” (Tito 2:3) Nan ta konta tambe ku e ruman muhénan pa anunsiá e bon notisia di e Reino di Dios.—Salmo 68:11; wak e kuadro  “Apòstel Pablo A Prohibí Hende Muhé di Papia?” na página 9.

Hesus tabata interesá den bienestar di hende muhé. Den tempu di Beibel, yu muhé no tabatin mes tantu balor ku yu hòmber. E Talmut a reflehá e punto di bista akí, bisando: “Felis ta esun ku tin yu hòmber, i ai di esun ku tin yu muhé.” Un yu muhé tabata un karga pisá den bista di algun mayor: nan mester a buska un kasá p’e i paga un bruidschat, i nan no por a stèns ku lo el a kuida nan den nan behes.

Hesus a mustra ku bida di un mucha muhé chikitu tabata mes importante ku di un mucha hòmber: el a resusitá e yu muhé di Yairo meskos ku el a resusitá e yu hòmber di e biuda di Nain. (Marko 5:35, 41, 42; Lukas 7:11-15) Na un otro okashon, el a kura un muhé ku “pa 18 aña largu tabatin un spiritu ku a hasié malu.” Hesus asta a yama e muhé “yu di Abraham,” un ekspreshon kasi deskonosí den obranan skirbí hudiu. (Lukas 13:10-16) Usando e ekspreshon akí di rèspèt i kariño, el a demostrá ku no solamente el a konsiderá e muhé un miembro legítimo di sosiedat, sino tambe a rekonosé ku e muhé tabatin gran fe.—Lukas 19:9; Galationan 3:7.

E benefisio di su siñansa pa hende muhé djawe: Tin kaminda ta reina e idea ku un famia no ta gana nada ku kria un yu muhé. Por ehèmpel, segun un dicho asiátiko: “Kria un yu muhé ta manera muha hardin di bo bisiña.” Pero mayornan kristian amoroso no ta laga e manera di pensa ei influensiá nan. Al kontrario, nan ta perkurá bon pa tur nan yunan, tantu hòmber komo muhé, i ta sòru pa nan risibí e debido edukashon i kuido médiko.

Hesus tabata konfia hende muhé. Den korte di hustisia hudiu, e testimonio di un muhé no tabata bal muchu mas ku di un katibu. De echo, Hosefo, un historiadó di promé siglo, a konsehá: “No aseptá ningun evidensia ku ta bini di hende muhé, debí ku nan ta e sekso deskabeyá i kabes habrí.”

 Ki un kontraste grandi ku Hesus! El a skohe hende muhé pa anunsiá su resurekshon. (Mateo 28:1, 8-10) Apesar ku e muhénan fiel akí tabata testigu di e ehekushon i entiero di nan Señor, tabata difísil pa e apòstelnan kere nan. (Mateo 27:55, 56, 61; Lukas 24:10, 11) Pero e echo ku Hesus a aparesé na hende muhé promé ora el a resusitá ta duna prueba ku el a konsiderá nan digno di ta su testigunan, mesun digno ku kualke otro disipel.—Echonan 1:8, 14.

E benefisio di su siñansa pa hende muhé djawe: Hende hòmber ku tin responsabilidat den e kongregashonnan di Testigunan di Yehova ta mustra konsiderashon na hende muhé, tumando na kuenta loke nan tin di bisa. Esposonan kristian, di nan parti, ta onra nan kasá dor di skucha nan ku atenshon.—1 Pedro 3:7; Génesis 21:12.

Hende hòmber ku ta imitá Kristu ta duna hende muhé e libertat i rèspèt ku Dios tabatin na mente pa nan ora el a krea nan. (Génesis 1:27, 28) En bes di promové machismo, esposonan kristian ta laga e prinsipionan di Beibel guia nan, i esei ta hasi nan esposa mas felis.—Efesionan 5:28, 29.

Ora Yelena a kuminsá studia Beibel, su esposo tabata trat’é brutu i sin heful sin ku ningun hende tabata sa. E hòmber a lanta den un ambiente violento, kaminda tabata masha normal pa sekuestrá mucha muhé pa kasa kuné i tambe maltratá nan físikamente. Yelena a splika: “Loke mi a siña for di Beibel a duna mi forsa. Mi a bin komprondé ku tin un Dios ku ta stima mi masha hopi, ku ta balorá mi i ta interesá den mi bienestar. Mi a realisá tambe ku si mi esposo studia Beibel, esei lo por a kambia su aktitut pa ku mi.” Su soño a bira realidat ora ku finalmente su esposo a kuminsá studia Beibel i ku tempu a batisá komo Testigu di Yehova. Yelena a bisa: “El a bira un ehèmpel di dominio propio. I nos tur dos a siña pordoná otro libremente.” El a rekonosé: “Ku yudansa di e prinsipionan di Beibel, mi ta sinti mi stimá i protehá den mi matrimonio.”—Kolosensenan 3:13, 18, 19.

E kaso di Yelena no ta úniko. Tin miónes di hende muhé kristian mas ku ta felis pasobra nan, huntu ku nan esposo, ta hasi esfuerso pa apliká prinsipionan bíbliko den nan matrimonio. Ademas, meimei di nan rumannan den fe, nan ta haña konsuelo i ta sinti nan liber i respetá.—Huan 13:34, 35.

Tur kristian, tantu hòmber komo muhé, ta rekonosé ku nan ta imperfekto, pekadó i parti di e kreashon di Dios ku a ser “sometí na un bida di banidat.” Pero komo ku nan a kultivá un bon relashon ku nan amoroso Dios i Tata, Yehova, nan ta karga e speransa di “ser librá di sklabitut na un kurpa ku ta kaba na nada” i disfrutá di “e glorioso libertat di e yunan di Dios.” Esta un speransa maravioso esei ta pa hende hòmber i muhé ku ta bou di e kuido di Dios!—Romanonan 8:20, 21.