Bon Notisia Segun Mateo 28:1-20
28 Riba e promé dia di siman,* despues di sabat, asina ku di dia tabata habri, Maria Magdalena i e otro Maria a bai wak e graf.+
2 Diripiente, tabatin un temblor pisá, pasobra un angel di Yehova* a baha for di shelu i bini na e graf. E angel a lora e piedra hala un banda i kai sinta riba e piedra.+
3 E angel tabata bria manera welek. Su paña tabata blanku manera sneu.+
4 E hòmbernan ku tabata tene warda na e graf a spanta ora e angel a aparesé. Nan a spanta asina tantu ku nan a kuminsá tembla. Nan a bira manera hende morto.
5 E angel a bisa e muhénan: “Boso no mester tin miedu. Mi sa ku boso ta buska Hesus, kende nan a klaba na staka.+
6 E no ta akinan, pasobra el a ser lantá for di morto, manera e mes a bisa ku lo a sosodé.+ Bin mira e lugá kaminda e tabata drumí.
7 Bai lihé serka su disipelnan i bisa nan ku el a lanta for di morto. Bisa nan ku e ta bayendo Galilea+ i ku aya boso lo mir’é. Ta esei, mi a bini pa bisa boso.”+
8 E muhénan a bai lihé for di e graf. Maske nan tabata spantá, nan tabata masha kontentu. Nan a kore bai duna e disipelnan e mensahe.+
9 Dado momento, Hesus a topa nan i bisa nan: “Bon dia!” Nan a bai serka dje, bùig su dilanti i kohe su pianan tene.
10 Hesus a bisa nan: “No tene miedu! Bai i bisa mi rumannan ku nan mester bai Galilea. Aya, nan lo mira mi.”
11 Ora e muhénan tabata na kaminda, algun di e hendenan ku tabata tene warda na e graf+ a drenta stat i konta e saserdotenan prinsipal tur loke a sosodé.
12 E saserdotenan prinsipal a bai konsultá ku e ansianonan. Nan a duna e sòldánan un kantidat basta grandi di moneda di plata.
13 Nan a bisa e sòldánan pa bai bisa e hendenan: “Su disipelnan a bini den anochi i hòrta su kurpa miéntras nos tabata drumí.”+
14 Nan a bisa e sòldánan: “Si e asuntu akí yega na orea di Gobernador, nos lo papia kuné i splik’é e asuntu.* No preokupá.”
15 E ora ei, e sòldánan a tuma e monedanan di plata, i nan a hasi manera nan a ser instruí. Te dia di awe, e storia ei ta plamá entre e hudiunan.
16 Entretantu, e 11 disipelnan a bai Galilea+ i subi e seru i bai kaminda Hesus a bisa nan pa bai.+
17 Ora nan a mira Hesus, nan a bùig* su dilanti. Pero algun di nan a duda ku tabata Hesus.
18 Hesus a yega serka nan i kuminsá papia ku nan. El a bisa nan: “Mi a risibí tur outoridat den shelu i riba tera.+
19 P’esei, bai i siña hende di tur nashon.+ Yuda nan bira mi disipel.* Batisá nan+ den nòmber di e Tata, den nòmber di e Yu i den nòmber di spiritu santu.*
20 Siña nan kumpli ku tur e mandamentunan ku mi a duna boso.+ I no lubidá, tur dia, te na fin di e mundu akí,*+ lo mi ta ku boso.”
Nota
^ Esei tabata e dia ku awe nos ta yama djadumingu. Pa e hudiunan, e dia ei tabata e promé dia di siman.
^ Òf: “nos lo konvens’é.”
^ Òf: “bùig ku nan kara te na suela.”
^ Òf: “P’esei, bai i hasi hende di tur nashon mi disipel.”
^ “Batisá den nòmber di” ta enserá ku un hende ta aseptá outoridat i posishon di e Tata i di e Yu i ku un hende ta komprondé ròl di spiritu santu.
