1. Ki prospekto emoshonante ta spera e “multitut grandi”?

PURBA di imaginá tur e kosnan bon ku un gobièrnu poderoso, enkabesá pa un gobernante hustu i bondadoso, lo por hasi pa su pueblo durante 1.000 aña! Wèl, e “multitut grandi” lo disfrutá di e kosnan maravioso ei. E multitut grandi akí ta e sobrebibientenan di “e tribulashon grandi” ku lo pone un fin kompleto na e sistema malbado ku ta eksistí awe.—Rev. 7:9, 14.

2. Kiko hende a eksperensiá durante e último 6.000 añanan?

² Durante e último 6.000 añanan di historia humano, hende a purba di goberná nan mes, pero esaki a kousa masha hopi doló i sufrimentu pa humanidat. Hopi tempu pasá Beibel a bisa: “Hende a ehersé outoridat riba . . . otro hende pa su daño.” (Ekl. 8:9) Kiko nos ta mira awe? Fuera di guera i revolushon, tin e problemanan grave di pobresa, malesa, destrukshon di medio ambiente, kambio di klima, etcetera. Pero e aktitut di mayoria di hende ta di no preokupá nan kabes, ma di sigui dal bai numa. Funshonarionan gubernamental ta atvertí ku si nos no kambia e aktitut ei, e resultado lo ta desastroso.

3. Kiko lo tuma lugá durante e Reinado di Mil Aña?

³ Bou di mando di e Rei Mesiániko Hesukristu i su 144.000 ko-gobernante, e Reino di Dios progresivamente lo dal paso pa korigí tur e daño kousá na hende i na nan hogar, esta, planeta Tera. Durante e Reinado di Mil Aña, Yehova Dios su promesa alentador lo keda realisá: “Mi ta krea shelunan nobo i un tera nobo; i e kosnan di ántes lo no wòrdu rekordá mas ni bini na memoria.” (Isa. 65:17) Kua ta algun suseso maravioso ku lo tuma lugá den futuro? Ku yudansa di Dios su Palabra profétiko nos por haña un idea di  e kosnan maravioso ku lo tuma lugá, pero ku ainda “hende no ta mira.”—2 Kor. 4:18.

4. Dikon nos por bisa ku bibienda ta un problema serio awe?

⁴ Ken no ta deseá di tin su propio kas, un lugá kaminda e ku su famia por sinti nan mes protehá i sigur? Ma den e mundu djawe ta masha difísil pa haña bibienda adekuá. Hende ta biba den kasnan tur di lapi, riba otro, den bario marginá òf den edifisio tur sushi i dekaí. Ta soña so e hendenan ei por soña di tin nan propio kas.

5, 6. (a) Kon Isaías 65:21 i Mikéas 4:4 lo keda realisá? (b) Kon nos por risibí e bendishon ei?

⁵ Bou di gobernashon di e Reino, e deseo di tur hende di tin nan propio kas lo keda realisá, pasobra Isaías a profetisá: “Nan lo traha kas i biba den nan; tambe nan lo planta kunukunan di wendrùif i kome nan fruta.” (Isa. 65:21) Sinembargo, hende por spera mas ku simplemente yega na un kas propio. Awe, hopi hende ta biba den nan propio kas, i algun asta ta biba den manshon, pero tòg nan ta preokupá konstantemente ku nan lo por pèrdè nan kas debí na problema finansiero òf ku ladron òf otro kriminal lo por kibra drenta den nan kas. Bou di gobernashon di e Reino, nan lo no tin e preokupashonnan ei! Profeta Mikéas a skirbi: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Mik. 4:4.

⁶ Kiko nos mester hasi si nos ke mira e speransa maravioso ei keda realisá? Ta klaru ku awe nos tur tin mester di un lugá adekuá pa biba aden. Pero kiko ta e kos sabí pa hasi aworakí? Akaso nos mester hinka nos kurpa den debe grandi djis pa haña e kas di nos soño? Òf nos mester fiha nos bista riba e promesa di Yehova? Kòrda ku Hesus a bisa di su mes situashon: “Zoro tin hòl i para di shelu tin nèshi, ma e Yu di hende no tin kaminda pa pone su kabes.” (Luk. 9:58) Hesus tabatin e kapasidat i poder pa traha òf kumpra e mihó kas ku un hende hamas por tabatin. Pero dikon e no a hasi esei? Hesus klaramente no kier a enbolbé su mes den nada ku lo a strob’é di pone e Reino na promé lugá den su bida. Nos lo por sigui su ehèmpel i tene nos wowo simpel? Nos lo por hasi nos bèst pa no laga kosnan material bira e parti di mas importante di nos bida i yena nos ku inkietut?—Mat. 6:33, 34.

7. Originalmente, ki relashon Yehova a ordená ku mester tin entre hende i bestia?

⁷ Durante e proseso di kreashon, Yehova a traha hende te na último, komo e kulminashon di su obranan riba tera. El a bisa su Yu Primogénito, su Trahadó Eksperto, kiko presis tabata su propósito: “Laga nos traha hende segun nos imágen, konforme nos semehansa; i laga nan goberná riba e piskánan di laman i riba e paranan di shelu i riba e bestianan di kria i riba henter e tera, i riba tur bestia ku ta lastra riba tera.” (Gén. 1:26) Pues, Adam ku Eva, i ku tempu tur hende, a haña e òrdu pa kuida e bestianan i ehersé dominio riba nan.

8. Kon bestia ta komportá nan awendia?

⁸ Di bèrdat ta posibel pa hende ehersé dominio riba tur bestia i keda na pas ku nan? Hopi hende stima nan bestianan di kas, por ehèmpel, kachó ku pushi. Pero kiko di bestia salbahe? Segun un informe: “Sientífikonan ku a biba serka di bestia salbahe i a studia nan a deskubrí  ku tur mamífero tin sintimentu.” Naturalmente, nos sa mira bestia haña miedu òf bira agresivo ora nan ta sinti nan menasá. Akaso nan por demostrá loke algun hende ta deskribí komo sintimentu di kariño? E informe a sigui bisa: “Ta ora mamíferonan ta kria nan yunan, nan ta revelá nan kualidat prinsipal: nan tremendo kapasidat di demostrá tierno kariño.”

9. Ki kambio nos por spera relashoná ku bestia?

⁹ Pues, nos no mester keda sorprendí ora nos lesa den Beibel ku lo reina pas entre hende i bestia. (Lesa Isaías 11:6-9; 65:25.) Dikon nò? Wèl, kòrda ku ora Noe ku su famia a sali for di e arka despues di Diluvio, Yehova a bisa nan: “E temor pa boso i e teror pa boso lo ta riba tur bestia di tera.” Esei lo a fungi komo un protekshon pa e bestianan mes. (Gén. 9:2, 3) Pues, Yehova lo por kita un grado di e temor i teror ei pa asina e relashon entre hende ku bestia por ta manera el a ordená na prinsipio. (Osé. 2:18) Esta un dushi tempu ta spera tur hende ku lo ta na bida riba tera e ora ei!

10. Dikon lágrima ta algu komun den bida di hende?

¹⁰ Ora Sálomon a mira “tur e aktonan di opreshon ku a wòrdu hasí bou di solo,” el a lamentá: “Mi a wak e lágrimanan di esnan oprimí, i . . . no tabatin ni un hende pa konsolá nan.” (Ekl. 4:1) Awe ta meskos, òf asta pió! Kua di nos no a yega di yora pa un motibu òf otro? Ta bèrdat ku tin biaha e lágrimanan ta di alegria, pero mayoria di biaha, nan ta lágrima di angustia i doló.

11. Kua relato di Beibel ta esun ku mas ta konmové bo?

¹¹ Pensa un ratu riba e tantísimo relatonan konmovedor i emoshonal ku nos ta haña den Beibel. Ora Sara a muri na edat di 127 aña, “Abraham a bini pa tene rou pa Sara i pa yor’é.” (Gén. 23:1, 2) Ora Noemí a yama su dos suegranan biuda ayó, “nan a halsa nan bos i a yora.” Anto despues ku el a papia un poko mas ku nan, “nan a halsa nan bos i a yora atrobe.” (Rut 1:9, 14) Ora Rei Ezekías a bira malu i tabatin sigur ku lo el a bai muri, el a resa na Dios i a kuminsá “yora amargamente.” Evidentemente, esei a konmové Yehova. (2 Rei. 20:1-5) I ken no ta sintié konmoví pa e relato kaminda apòstel Pedro a nenga Hesus? Ora Pedro a tende gai kanta, “el a bai pafó i yora amargamente.”—Mat. 26:75.

12. Kon gobernashon di e Reino lo trese berdadero alivio pa humanidat?

¹² Komo ku tin asina tantu suseso trágiko ta tuma lugá—kosnan grandi i chikí—humanidat tin gran nesesidat di konsuelo i alivio. Esei ta loke e Reinado di Mil Aña lo proveé pa su súpditonan: “[Dios lo] seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.” (Rev. 21:4) Imaginá bo, lo no tin tristesa, sklamashon ni doló mas! Pero esei no ta tur kos. Dios a primintí ku lo e eliminá asta e enemigu mayó di humanidat: morto! Kon esei lo sosodé?

13. Kon morto a afektá hende for di dia ku Adam a peka?

¹³ For di dia ku Adam a peka, morto a reina riba hende manera un rei. El a resultá un enemigu invensibel. Ningun hende pekaminoso no por skapa di dje, i el a kousa gran tristesa i doló. (Rom. 5:12, 14) De echo, miónes di hende ta “den sklabitut henter nan bida pa motibu di nan miedu di muri.”—Heb. 2:15.

14. Kiko lo pasa ora kaba ku morto?

 ¹⁴ Beibel ta papia di un tempu ora ku morto lo ta “e último enemigu” ku lo ser destruí. (1 Kor. 15:26) Tin dos grupo ku ta bini na remarke pa benefisiá di esaki. E promé grupo ta e “multitut grandi” ku ta na bida aworakí i ku lo por keda na bida i drenta e mundu nobo primintí ku e posibilidat di biba pa semper. E di dos grupo ta e míles di miónes di hendenan ku a muri kaba i ku lo tin e posibilidat di lanta for di morto. Bo por imaginá bo kon kontentu i emoshoná e multitut grandi lo ta ora nan bai yama bonbiní na e hendenan ku resusitá? Un análisis di algun di e relatonan di resurekshon ku tin den Beibel lo por duna nos un idea di esei.—Lesa Marko 5:38-42; Lukas 7:11-17.

15. Kon kisas lo bo reakshoná ora bo mira un ser kerí ku a lanta for di morto?

¹⁵ Pensa riba e ekspreshon “nan no por a kontené nan mes di kontentu ku nan a bira” i esun “nan a kuminsá glorifiká Dios.” Si bo tabata presente na e okashonnan ei, kisas bo tambe lo a sinti asina. No tin duda ku nos lo sinti nos masha kontentu i emoshoná ora nos mira nos sernan kerí lanta for di morto pa medio di e resurekshon. Hesus a bisa: “Lo yega e ora ku tur esnan ku ta den graf lo tende su stèm i lo sali afó.” (Huan 5:28, 29) Ningun di nos hamas a mira algu asina tuma lugá. Lo e ta realmente un di e kosnan di mas maravioso ku aworakí “hende no ta mira,” pero ku lo tuma lugá!

16. (a) Dikon nos tin ku papia ku entusiasmo tokante e bendishonnan ku nos no ta mira ainda? (b) Kiko Pablo a bisa pa animá e kristiannan di Korinto?

¹⁶ Sí, un futuro maravioso ta spera hende ku  keda fiel na Yehova den e tempu krítiko akí. Aunke ainda nos no ta mira e bendishonnan ei, tòg ta bon pa nos keda pensa riba nan. Esei lo yuda nos konsentrá riba loke realmente ta importante i lo evitá ku e atrakshonnan pasahero di e mundu akí ta desviá nos. (Luk. 21:34; 1 Tim. 6:17-19) Tambe nos por papia ku entusiasmo tokante nos maravioso speransa pa futuro durante nos adorashon komo famia, den kòmbersashon ku nos rumannan den fe i ora nos ta papia ku studiante- i personanan interesá. Esaki lo mantené e speransa ei bibu den nos mente i kurason. Ta asina apòstel Pablo a animá su rumannan kristian. Ku su palabranan, el a hiba e rumannan ei, na moda di papia, te na konklushon di Kristu Su Reinado di Mil Aña. Purba di imaginá e magnitut di e palabranan di Pablo na 1 Korintionan 15:24, 25, 28.—Les’é.

17, 18. (a) Den ki manera Yehova tabata “tur kos pa tur hende” na prinsipio di historia humano? (b) Kon Hesus lo restorá pas i armonia?

¹⁷ E palabranan “pa Dios por ta tur kos pa tur hende” ta e mihó deskripshon ku tin di e manera ku bida lo ta na final di e 1.000 aña. Kiko e palabranan ei ke men? Pensa bèk riba e tempu den Edén ora ku e pareha perfekto, Adam ku Eva, tabata parti di Yehova su famia universal ku tabata biba na pas i armonia. Yehova, e Soberano di universo, tabata goberná direktamente riba henter su kreashon, riba tantu angel komo hende. Nan por a komuniká kuné personalmente, ador’é i ser bendishoná p’e. E tabata “tur kos pa tur hende.”

¹⁸ E relashon armonioso ei a daña ora ku hende, bou di influensia di Satanas, a rebeldiá kontra e soberania di Yehova. Pero desde aña 1914, e Reino Mesiániko progresivamente a dal paso pa restorá e pas i armonia ei. (Efe. 1:9, 10) Durante e Reinado di Mil Aña, kosnan maravioso ku aktualmente “hende no ta mira” lo bira realidat. Kiko lo pasa “na final,” esta, na konklushon di Kristu Su Reinado di Mil Aña? Wèl, aunke Hesus a “risibí tur outoridat den shelu i riba tera,” e no ta ambisioso. E no tin intenshon di usurpá òf gara e puesto di Yehova. Humildemente “lo e entregá e Reino na su Dios i Tata.” Sí, semper Hesus lo usa su outoridat i posishon úniko “pa gloria di Dios.”—Mat. 28:18; Flp. 2:9-11.

19, 20. (a) Kon tur hende bou di gobernashon di e Reino lo demostrá ku nan ta aseptá Yehova su derecho di goberná òf nò? (b) Ki speransa maravioso nos tin nos dilanti?

¹⁹ Na e tempu ei, tur hende riba tera lo a alkansá perfekshon bou di gobernashon di e Reino. Nan lo sigui e ehèmpel di Hesus, anto humildemente i di buena gana, nan lo aseptá Yehova su derecho di goberná riba nan. Nan lo tin e oportunidat di demostrá ku nan ke hasi esei dor di pasa e último prueba ku éksito. (Rev. 20:7-10) Despues di esaki, Yehova lo eliminá tur rebelde pa semper, sea ta hende òf angel. Henter e famia universal lo alabá Yehova, kende lo ta “tur kos pa tur hende.” Ki un dushi tempu esei lo ta!—Lesa Salmo 99:1-3.

²⁰ E kosnan maravioso ku pronto e Reino lo realisá ta motivá bo pa enfoká bo atenshon i esfuerso riba hasimentu di e boluntat di Dios? Bo ta sòru pa e speransa i konsuelo falsu ku e mundu di Satanas ta ofresé no desviá bo? Lo bo fortalesé bo determinashon pa apoyá i defendé Yehova su derecho di goberná? Laga bo echonan duna prueba ku esei ta loke bo ke hasi pa semper. E ora ei lo bo tin e privilegio di gosa di pas i prosperidat, no pa 1.000 aña so, sino pa semper!