“E ta esun ku ta kambia tempunan i épokanan; e ta kita reinan i ta pone reinan.”—DAN. 2:21.

1, 2. Kiko ta mustra ku Yehova sa presis kiko tempu ta enserá?

HOPI tempu promé ku Yehova Dios a krea hende, el a krea medionan ku hende por usa pa kalkulá tempu. Riba e di kuater dia di kreashon, el a bisa pa laga fuentenan di lus aparesé na shelu pa “separá dia for di nochi” i pa “sirbi komo señalnan” i pa indiká ‘temporadanan di aña, dianan i añanan.’ (Gén. 1:14, 19, 26) I ta klaru ku su boluntat a kumpli.

² No opstante, te awe sientífikonan no por splika eksaktamente kiko tempu ta enserá. Segun un ensiklopedia, “tempu ta un di e misterionan di mas grandi na mundu. Niun hende no por bisa kiko e ta eksaktamente.” Pero Yehova sí sa presis kiko tempu ta enserá. Pasobra ta e ta Esun ku “a krea e shelunan, . . . kende a forma tera i a trah’é.” Ademas, Beibel ta bisa ku ta Yehova ta Esun ku “ta deklará e fin for di prinsipio, i for di tempunan antiguo, kosnan ku no a wòrdu hasí ainda.” (Isa. 45:18; 46:10) P’esei, pa fortalesé nos fe den Yehova i den su Palabra, laga nos hasi un análisis ku ta demostrá ku Yehova por i ta kumpli ku su propósito na e tempu ku é a stipulá. Nos lo analisá: (1) algun aspekto di Yehova su kreashon i (2) profesianan ku a kumpli.

KREASHON TA FORTALESÉ NOS FE DEN YEHOVA

3. Kon e kosnan ku Yehova a krea ta indiká ku nan tin un orario eksakto?

³ Hopi kos ku Yehova a krea tin un orario eksakto ku nan ta sigui. Tuma por ehèmpel e planeta- i streanan. Nan ta move ku asina un presishon ku hende por sa di antemano den ki posishon nan ta na sierto momento. I a base di esaki, hende por determiná den ki temporada nos ta i tambe kua ta e ruta  korekto pa nabegá. No tin duda, Yehova e Kreador di e “oloshinan” konfiabel akí tin “poder,” i e meresé nos alabansa.—Lesa Isaías 40:26.

4. Kon e oloshi interno den tur loke tin bida ta demostrá ku Yehova ta un Dios sabí?

⁴ Tur loke tin bida tambe tin un orario eksakto ku nan ta sigui. Sí, hopi mata i bestia tin un oloshi interno ku ta dirigí nan siklo di bida. Ta p’esei hopi para sa presis ki ora nan tin ku kuminsá migra. (Yer. 8:7) Hende tambe tin un oloshi interno. Nos kurpa, por ehèmpel, ta indiká nos normalmente ki ora ta di dia i ki ora ta anochi. Pero ora nos biaha ku avion pa un parti di mundu ku tin un orario distinto for di nos pais, tin biaha nos kurpa tin mester di algun dia p’e ahustá su mes na esaki. No tin duda, hopi di e kosnan ku Yehova a krea ta demostrá su poder i sabiduria i ku e ta e Dios di ‘tempu i époka.’ (Lesa Salmo 104:24.) Pues, komo ku Yehova ta todopoderoso i tin sabiduria infinito, nos por tin fe i konfiansa ku e por kumpli ku su propósito!

PROFESIANAN A KUMPLI PRESIS NA TEMPU—ESAKI TA FORTALESÉ FE

5. (a) Kua ta e úniko manera ku nos por sa kiko ta e futuro di hende? (b) Dikon Yehova por profetisá loke lo sosodé i tambe na ki tempu esakinan lo tuma lugá?

⁵ Opservando e kreashon, nos por siña hopi tokante Yehova su “kualidatnan invisibel.” Pero esei no ta kontestá preguntanan importante manera: ‘Kiko lo ta e futuro di hende?’ (Rom. 1:20) E úniko manera ku nos por haña kontesta pa e pregunta akí ta akudiendo na Beibel, e Palabra di Dios. Beibel ta kontené hopi ehèmpel di profesia ku a kumpli presis na tempu! Sí, Yehova por revelá futuro pasobra e por mira kiko ta bai sosodé. Es mas, e profesianan akí semper ta kumpli na tempu pasobra Yehova Dios por pone susesonan tuma lugá di akuerdo ku su propósito i na e tempu ku é a stipulá.

6. Kiko ta mustra ku Yehova ke pa nos komprondé e profesianan den Beibel?

⁶ Yehova ke pa su adoradónan komprondé profesianan bíbliko i benefisiá di esakinan. P’esei, aunke su konsepto di tempu ta distinto for di esun di nos, ora e ta profetisá algu, e ta usa un idioma ku nos por komprondé. (Lesa Salmo 90:4.) E buki di Revelashon, por ehèmpel, ta referí na ‘kuater angel,’ kendenan “tabata prepará pa e ora, dia, luna i aña”—ku ta unidatnan di tempu ku nos ta komprondé. (Rev. 9:14, 15) I ora nos mira kon profesianan a kumpli eksaktamente na e tempu ku Dios a stipulá, nos fe den dje komo e Dios di ‘tempu i époka’ ta bira mas fuerte. Ademas, esei ta oumentá nos fe den su Palabra. P’esei, laga nos analisá algun di e profesianan ei.

7. Kon e profesia di Yeremías tokante Herúsalèm ta mustra ku Yehova semper ta kumpli ku su propósito na e tempu ku é a stipulá?

⁷ Promé, laga nos ban bèk na siglo 7 promé ku nos era. “Den e di kuater aña di Joakim, yu hòmber di Yosías, rei di Huda,” Yehova a papia ku Yeremías tokante henter e pueblo di Huda. (Yer. 25:1) Yehova a profetisá ku Herúsalèm lo a ser destruí i ku e hudiunan lo a ser hibá for di Huda pa Babilonia. Einan, nan lo a sirbi e “rei di Babilonia pa setenta aña.” I esei ta loke a sosodé: Na aña 607 promé ku nos era, e babilonionan a destruí Herúsalèm i a saka e hudiunan for di Huda i hiba nan Babilonia. Pero kiko Yehova a bisa ku lo a pasa despues di 70 aña? Yeremías a profetisá: “Asina SEÑOR ta bisa: ‘Despues ku setenta aña wòrdu kumplí pa Babilonia, lo mi bishitá boso i kumpli ku mi bon palabra pa ku boso, pa trese boso bèk na e lugá akí.” (Yer. 25:11, 12;  29:10) E profesia akí tambe a kumpli presis na tempu: E hudiunan a regresá nan tera na aña 537 promé ku nos era despues ku e medo- i personan a libra nan for di sklabitut na Babilonia.

8, 9. Kon e profesianan di Daniel relashoná ku e binida di e Mesías i e establesimentu di e Reino selestial ta mustra ku Yehova ta e Dios di ‘tempu i époka’?

⁸ Laga nos wak un otro profesia ku a enbolbé Dios su pueblo den pasado. Un dos aña promé ku e hudiunan a bandoná Babilonia, Dios a profetisá, mediante profeta Daniel, ku e Mesías lo a aparesé 483 aña despues ku sali un òrdu pa rekonstruí Herúsalèm. Anto e rei di Medo-Persia a duna e òrdu ei na aña 455 promé ku nos era. I eksaktamente 483 aña despues—na aña 29 di nos era—ora Hesus di Názarèt a batisá, el a ser ungí ku spiritu santu i asina a bira e Mesías. *—Neh. 2:1, 5-8; Dan. 9:24, 25; Luk. 3:1, 2, 21, 22.

⁹ Awor, pensa riba loke Beibel a profetisá tokante e Reino di Dios. Beibel a indiká ku e Reino Mesiániko lo a ser establesé den shelu na 1914. Kon Beibel a indiká esei? Wèl, el a duna “e señal” di Hesus su presensia i a señalá ku durante e tempu ei lo tin hopi ai, òf problema, riba tera debí ku Satanas lo a ser saká for di shelu. (Mat. 24:3-14; Rev. 12:9, 12) Es mas, tin profesianan bíbliko ku ta yuda nos kalkulá e aña eksakto, esta, 1914, tempu ku “e tempu stipulá di e nashonnan” a terminá i e Reino a kuminsá goberná den shelu.—Luk. 21:24; Dan. 4:10-17. *

10. Ki susesonan lo tuma lugá presis na tempu?

¹⁰ Loke tin ku bini ainda ta e “tribulashon grandi” ku Hesus a profetisá. Despues di esei, Hesus su Reinado di Mil Aña lo kuminsá. E kosnan akí tambe sin duda lo tuma lugá presis na tempu. Kòrda, tempu Hesus tabata riba tera, Yehova tabatin “e dia i ora” stipulá kaba.—Mat. 24:21, 36; Rev. 20:6.

LAGA NOS HASI BON USO DI NOS TEMPU

11. Kiko nos mester hasi si nos ta kere ku nos ta bibando den e tempu di fin?

¹¹ Kiko nos mester hasi si nos ta kere ku e Reino a kuminsá goberná kaba i ku nos ta bibando den ‘e tempu di fin’? (Dan. 12:4) Hopi hende ta mira ku e situashon di mundu ta bayendo di malu pa pió, pero nan no ta komprondé ku e desaroyonan akí ta kumplimentu di Beibel su profesianan relashoná ku e último dianan. Algun hende kisas ta pensa ku un dia e sistema di kos akí lo kai den otro, siendo ku otronan ta pensa ku hende lo trese “pas i siguridat.” (1 Tes.  5:3) Awor kiko di nos? Nos ta kere ku nos ta bibando den e parti final di “e último dianan”? Si ta asina, nos tin ku hasi esfuerso pa usa e tempu ku a resta pa sirbi e Dios di ‘tempu i époka’ i pa yuda otro hende konos’é. (2 Tim. 3:1) Pues, nos tin ku tuma desishonnan sabí pa nos por usa nos tempu bon.—Lesa Efesionan 5:15-17.

12. Kiko nos por siña for di loke Hesus a bisa tokante e tempu di Noe?

¹² Komo ku mundu ta yen di distraishon, no ta fásil pa hasi bon uso di nos tempu. Hesus a bisa ku e “presensia di e Yu di hende” lo ta meskos ku “e dianan di Noe.” Kon kos tabata den e dianan di Noe? Wèl, di antemano Dios a bisa Noe ku e ta bai pone un fin na e mundu di e tempu ei i ku tur e malbadonan lo hoga den un Diluvio mundial. I Noe, kende tabata “un predikadó di hustisia,” a deklará e mensahe di Dios fielmente na e hendenan den su tempu. (Mat. 24:37; 2 Ped. 2:5) Pero e hendenan akí tabata “kome i bebe, hòmber i muhé tabata kasa, . . . i nan no a hasi kaso te ora e Diluvio a bini i lastra nan tur bai kuné.” P’esei, Hesus a spièrta su siguidónan pa nan ta ‘prepará, pasobra e Yu di Hende lo bini na un ora ku nan no ta pensa.’ (Mat. 24:38, 39, 44) Nos mester ta manera Noe, i no manera e hendenan di su tempu. Awor, kiko lo yuda nos pa ta semper prepará?

13, 14. Kiko nos tin ku tene na mente tokante Yehova ku lo yuda nos sigui sirbié fielmente segun ku nos ta spera e binida di e Yu di hende?

¹³ Aunke e Yu di hende lo bini na un ora ku nos no ta pensa, nos tin ku kòrda ku Yehova semper ta kumpli ku su propósito na e momento ku é a stipulá. I su orario no ta dependé di susesonan di mundu ni di hende su plannan. Ta e mes ta disidí ki ora i kon su propósito lo kumpli. (Lesa Daniel 2:21.) De echo, Proverbionan 21:1 ta bisa: “Manera riunan di awa, asina kurason di rei ta den e man di SEÑOR; E ta bir’é pa unda ku E kier.”

¹⁴ Pues, Yehova por influensiá susesonan pa e por kumpli ku su propósito na e tempu ku el a stipulá. Hopi kambio históriko ku a tuma lugá riba mundu a kontribuí na kumplimentu di profesianan di Beibel, spesialmente esnan relashoná ku e predikashon mundial di e bon notisia di e Reino di Dios. Tuma por ehèmpel e kaida di Union Soviétiko i loke a pasa despues. Hopi hende no a spera kambionan polítiko asina grandi den un tempu asina kòrtiku. Sinembargo, e kambionan akí a hasi posibel ku desde e tempu ei padilanti e bon notisia por a ser prediká den hopi pais kaminda ántes nos trabou tabata prohibí. Pues anto, laga nos hasi bon uso di nos tempu, sirbiendo e Dios di ‘tempu i époka’ fielmente.

NOS TIN FE KU YEHOVA LO KUMPLI KU SU PROPÓSITO PRESIS NA TEMPU

15. Kon nos ta demostrá ku nos tin fe ora Yehova su organisashon bini ku sierto kambionan?

¹⁵ Pa nos por sigui prediká e bon notisia di Reino den e último dianan akí, nos mester tin fe ku Yehova lo kumpli ku su propósito na tempu. Pero tin biaha por bini kambio den e manera ku nos tin ku prediká i siña hende debí ku e situashon di mundu ta kambia. Sí, de bes en kuando Yehova su organisashon por bini ku kambio pa yuda nos ta mas efikas den e trabou di prediká. Anto nos ta demostrá ku nos tin fe den e Dios di ‘tempu i époka’ ora nos ta adaptá nos mes na e ahustenan akí segun ku nos ta sirbié fielmente bou di e liderato di su Yu, e “kabes di e kongregashon.”—Efe. 5:23.

16. Dikon nos por tin fe ku Yehova lo yuda nos na e momento apropiá?

¹⁶ Yehova ke pa nos sinti nos liber pa aserk’é den orashon ki ora ku nos ke i ku e pleno konfiansa ku lo e “yuda nos na  e momento apropiá.” (Heb. 4:16) Esaki ta demostrá kuantu e ta interesá den nos i ta stima kada un di nos. (Mat. 6:8; 10:29-31) I nos na nos turno ta demostrá nos fe den Dios ora nos ta hasi orashon regularmente, pa nos mes i pa nos rumannan den fe, i ta sigui Yehova su guia.

17, 18. (a) Kiko Yehova lo hasi pronto ku su enemigunan? (b) Kua trampa nos mester evitá?

¹⁷ Awor no ta tempu pa “duda;” ta tempu pa nos tin un fe fuerte ku ta duna nos kurashi pa hasi Dios su boluntat. (Rom. 4:20) Dios su enemigunan—Satanas i esnan ku e tin bou di su dominio—ta purba di para e trabou ku Hesus a asigná na su siguidónan, inkluso nos awe. (Mat. 28:19, 20) Aunke Satanas ta ataká nos, nos ta konvensí ku Yehova ta e “Dios bibu, kende ta Salbador di tur sorto di hende, spesialmente di esnan fiel.” E “sa kon pa libra hende deboto na dje for di prueba.”—1 Tim. 4:10; 2 Ped. 2:9.

¹⁸ Pronto, Yehova lo kaba ku e sistema malbado akí. Aunke nos no tin tur detaye ni nos no sa ki dia òf ora presis esaki lo tuma lugá, nos ta sigur ku Kristu lo kaba ku e enemigunan di Dios na e momento apropiá i ku e soberania di Yehova lo ser vindiká. P’esei, ta masha peligroso pa lubidá den ki ‘tempu i époka’ nos ta bibando awe! Laga nos nunka kai den e trampa di pensa ku “tur kos ta sigui eksaktamente manera nan tabata for di kuminsamentu di kreashon.”—1 Tes. 5:1; 2 Ped. 3:3, 4.

‘SPERA RIBA YEHOVA’

19, 20. Dikon nos tin ku spera riba Yehova?

¹⁹ For di tempu ku Dios a krea hende, su propósito tabata pa nan a biba pa semper pa nan por a siña konos’é i tambe e kosnan bunita ku el a krea. Eklesiástes 3:11 ta bisa: “El a traha tur kos apropiá na su tempu. Tambe el a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.”

²⁰ Nos ta masha kontentu ku Yehova su propósito no a kambia! (Mal. 3:6) Beibel ta bisa ku Dios “no ta varia ni kambia manera sombra ku ta move.” (Sant. 1:17) Ademas, Yehova no ta dependé di e medionan ku hende ta usa pa kalkulá tempu pa e kumpli ku su propósito. Yehova ta “Rei di eternidat.” (1 Tim. 1:17) P’esei, laga nos ‘spera riba dje, e Dios di nos salbashon.’ (Mik. 7:7) Sí, ‘sea fuerte i fortalesé boso kurason, boso tur ku ta spera riba Yehova.’—Sal. 31:24.

[Nota]

[Preguntanan di Estudio]

[Plachi na página 25]

Daniel tabatin fe ku Yehova lo a kumpli ku Su profesianan

[Plachi na página 27]

Bo ta hasi bon uso di bo tempu pa kumpli ku Yehova su boluntat?