Kana Segun e Spiritu i Kumpli ku Bo Dedikashon

“Kana segun e spiritu, i boso lo no kumpli ku deseo di e karni.”​—GAL. 5:16.

1. Ki tipo di boutismo a tuma lugá riba dia di Pentekòste?

DESPUES ku Hesus su siguidónan a ser batisá ku spiritu santu riba dia di Pentekòste di aña 33 di nos era, nan a kuminsá papia den lenga. Asina, nan a demostrá ku nan tabatin un don milagroso di spiritu santu. (1 Kor. 12:​4-10) Pa splika esaki, apòstel Pedro a duna un diskurso. Ki efekto e don ei i e diskurso tabatin riba e oyentenan? Wèl, hopi di nan “a wòrdu konmoví te den profundidat di nan kurason.” P’esei, ora Pedro a urgi nan pa repentí i batisá, nan a hasié. Beibel ta bisa: “Esnan ku a risibí su palabra a wòrdu batisá; i e dia ei a wòrdu añadí na nan mas o ménos tres mil alma.” (Echo. 2:​22, 36-41) Siguiendo instrukshon di Hesus, nan a batisá den awa den nòmber di e Tata, di e Yu i di spiritu santu.​—Mat. 28:19.

2, 3. (a) Splika e diferensia entre ser batisá ku spiritu santu i batisá den nòmber di spiritu santu. (b) Dikon tur hende ku ke bira kristian berdadero awe mester batisá den awa?

² Pero akaso tin un diferensia entre ser batisá ku spiritu santu i batisá den nòmber di  spiritu santu? Sí. Personanan ku ser batisá ku spiritu santu ta nase di nobo komo yunan di Dios, engendrá pa spiritu santu. (Juan 3:3) Nan ta ser ungí pa sirbi komo futuro rei i saserdote den e Reino selestial di Dios i ta bira parti di e kurpa spiritual di Kristu. (1 Kor. 12:13; Gal. 3:27; Rev. 20:6) Pues, ta Yehova ta esun ku ta efektuá e boutismo akí, esta, e boutismo ku spiritu santu; el a hasié riba dia di Pentekòste i tambe despues di esei. Sí, e ta esun ku ta skohe hende pa bira ko-heredero ku Kristu. (Rom. 8:​15-17) Pero kiko di e boutismo den awa den nòmber di spiritu santu ku regularmente ta tuma lugá na asamblea- i kongresonan di e pueblo di Yehova den nos tempu?

³ Kristiannan berdadero ta batisá den awa komo un símbolo di nan dedikashon inkondishonal na Yehova Dios. E ta un paso nesesario pa tantu esnan ku a risibí e yamada selestial komo e miónes di hòmber- i muhénan den nos tempu ku tin e speransa di biba pa semper riba tera. Pues, sin importá ki speransa un persona tin, pa Dios por asept’é, e tin ku batisá den nòmber di e Tata, di e Yu i di spiritu santu. I tur kristian ku batisá den e manera akí mester sigui “kana segun e spiritu.” (Lesa Galationan 5:16.) Abo ta kana segun e spiritu di Dios i asina kumpli ku bo dedikashon?

Kiko Ta Nifiká “Kana Segun e Spiritu”?

4. Kiko ta nifiká “kana segun e spiritu”?

⁴ “Kana segun e spiritu” ta enserá aseptá pa spiritu santu obra den bo bida. Sí, permitié influensiá bo bida. Ku otro palabra, laga spiritu santu goberná bo aktividatnan diario. Galationan kapítulo 5 ta resaltá e kontraste entre ser influensiá pa spiritu santu i pa e karni.​—Lesa Galationan 5:​17 i 18.

5. Ki obranan bo ta evitá ora spiritu santu tin influensia riba bo?

⁵ Ora spiritu santu tin influensia riba bo, bo ta hasi esfuerso pa evitá obranan di karni. Esakinan ta, entre otro, ‘inmoralidat, impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu, envidia, buracheria i parandiamentu.’ (Gal. 5:​19-21) Den un sentido, mediante ‘e spiritu bo ta mata e obranan di e kurpa.’ (Rom. 8:​5, 13) E ta yuda bo fiha bo mente riba e kosnan di e spiritu i sigui su guia en bes di laga bo deseonan karnal dominá bo.

6. Duna un ilustrashon ku ta mustra loke ta nesesario pa nos por desplegá e fruta di spiritu.

⁶ Segun ku spiritu santu ta obra den bo bida, bo ta desplegá kualidatnan ku ta agradá Dios, esta, “fruta di e spiritu.” (Gal. 5:​22, 23) Pero bo tin ku komprondé sí ku esaki ta rekerí esfuerso di bo banda. Laga nos ilustrá esaki: Un kunukero ta planta riba su tereno. Ta klaru ku e mester di solo i awa; sin eseinan, e no por spera di kosechá nada. Nos por kompará spiritu santu ku solo. Pues, nos tin mester di spiritu santu pa por desplegá e fruta di spiritu. Sinembargo, e kunuku lo por produsí algu si e kunukero no traha duru? (Pro. 10:4, BPK) Asina tambe, e grado i kalidat di e fruta di spiritu santu ku bo ta desplegá ta dependé di e manera ku bo ta kultivá e tera figurativo di bo kurason. P’esei, puntra  bo mes: ‘Mi ta kooperá ku e spiritu santu i asina permitié produsí su fruta den mi?’

7. Dikon estudio i meditashon ta masha importante si bo ke kultivá e fruta di spiritu santu?

⁷ Pa kunukeronan por haña un bon kosecha, nan tin ku muha nan plantashon. I pa kultivá e fruta di spiritu, bo tin mester di e awa di e bèrdat ku nos ta haña den Beibel i ku ta disponibel via e kongregashon kristian awe. (Isa. 55:1) Probablemente bo a yega di bisa hopi hende ku e Santu Skritura ta un produkto di spiritu santu. (2 Tim. 3:16) Ademas, e esklabo fiel i prudente ta perkurá pa e komprondementu di e awa puru di e bèrdat bíbliko ku hende tin masha mester di dje. (Mat. 24:​45-47) Pues, e asuntu ta bon kla: Pa spiritu santu influensiá nos bida, nos tin ku lesa e Palabra di Dios i meditá riba dje. Ora bo hasi esei, bo ta imitando e ekselente ehèmpel di e profetanan ku a hasi un “búskeda i investigashon ku tur diligensia” pa haña sa mas di e informashon ku tabata disponibel. Ta remarkabel ku asta e angelnan a mustra interes profundo den bèrdatnan spiritual relashoná ku e Simia primintí i e kongregashon di kristiannan ungí.​—1 Ped. 1:​10-12.

Kon Spiritu Santu Ta Influensiá Nos?

8. Dikon ta importante pa bo pidi Yehova su spiritu santu?

⁸ No ta un kuestion di djis studia e Skritura i meditá riba dje. Bo tin ku sigui pidi Yehova su yudansa i guia. E por “hasi tur kos muchu mas abundantemente di loke nos ta pidi òf pensa.” (Efe. 3:20; Luk. 11:13) Pero, kon lo bo kontestá si un hende puntra bo: “Dikon mi mester sigui pidi si Dios sa kaba ‘kiko mi tin mester, promé ku mi pidié’”? (Mat. 6:8) Wèl, pa kuminsá, ora bo resa pidi Dios pa su spiritu santu, bo ta atmití ku bo ta dependé riba Yehova. Ta meskos ku ora un persona aserká bo pa yudansa. Lo bo hasi tur loke bo por pa yud’é. Un motibu pakiko lo bo hasi esei ta pasobra e echo ku el a pidi bo yudansa ta indiká ku e ta konfia den bo. (Kompará ku Proverbionan 3:27.) Asina tambe, Yehova ta keda kontentu ora bo pidié su spiritu santu, i lo e duna bo e.​—Pro. 15:8.

9. Kon asistensia na reunionnan kristian por yuda pa e spiritu di Dios obra den bo bida?

⁹ Un otro manera ku e spiritu di Dios por influensiá nos bida tin di haber ku nos reunion-, asamblea- i kongresonan. Pues, ta masha importante pa nos hasi esfuerso pa asistí na nan i presta atenshon na e programa. Esei lo yuda nos komprondé “e profundidatnan di Dios.” (1 Kor. 2:10) Nos ta saka benefisio tambe ora nos ta duna komentario regularmente. Pensa riba e reunionnan ku bo a bai durante e último kuater simannan. Kuantu biaha bo a hisa bo man pa duna kontesta i asina ekspresá bo fe? Bo ta mira lugá pa mehorá den e aspekto akí? Si ta asina, pone un meta pa e siguiente simannan. Yehova lo mira ku bo ta dispuesto pa partisipá, i lo e duna bo su spiritu santu ku lo yuda bo benefisiá asta mas di e reunionnan.

10. Ora nos ta kana segun e spiritu, ki invitashon nos ta ekstendé na otro hende?

¹⁰ Kana segun e spiritu ta enserá aseptá e invitashon na Revelashon 22:17, ku ta bisa: “E spiritu i e brùit ta bisa: ‘Bin.’ I laga esun ku  tende, bisa: ‘Bin.’ I laga esun ku tin set, bin; laga esun ku kier, tuma e awa di bida pòrnada.” Mediante e brùit ungí, spiritu santu ta invitá hende pa tuma di e awa di bida. Si bo a aseptá e invitashon pa “bin,” abo tambe ta determiná pa bisa “bin”? Nos tin e gran privilegio di por partisipá den e trabou akí ku por salba bida!

11, 12. Den ki sentido spiritu santu ta enbolbí den e trabou di prediká?

¹¹ E trabou di sumo importansia akí ta ser hasí bou di guia di spiritu santu. Beibel ta yuda nos komprondé kon spiritu santu tabata enbolbí den habrimentu di teritorionan nobo pa misioneronan den promé siglo. Por ehèmpel, ‘spiritu santu a prohibí apòstel Pablo i su kompañeronan di papia e palabra na Asia’; e no a permití nan bai Bitinia tampoko. Nos no sa eksaktamente kon spiritu santu a stroba nan di bai e lugánan ei. Pero ta opvio ku spiritu santu a dirigí Pablo na e inmenso teritorio di Europa. Dikon nos ta bisa esei? Pasobra el a haña un vishon den kua un hòmber di Masedonia tabata roga pa yudansa.​—Echo. 16:​6-10.

¹² Awe tambe e spiritu di Yehova ta dirigí e obra mundial di predikashon. Yehova no ta usa vishonnan milagroso mas pa duna guia; mas bien, e ta dirigí e kristiannan ungí mediante su spiritu santu. I e spiritu ei ta motivá rumannan hòmber i muhé pa hasi tur loke nan por den e trabou di prediká i siña hende. Sin duda, abo tambe ta partisipá den e trabou di sumo importansia akí. Awor, kon bo por haña mas goso den e aktividat emoshonante akí?

13. Kon bo por someté bo mes na guia?

¹³ Bo ta someté bo mes na guia di spiritu santu ora bo ta apliká sugerensianan ku e esklabo fiel ta perkurá pa e pueblo di Dios. Konsiderá e ehèmpel di e hóben Mihoko di Hapon. Ora el a kaba di bira pionero, e no tabata sinti su mes kapas pa hasi rebishita; e tabata sinti ku e no tabata sa kon pa papia pa kapta interes di e doño di kas. Rònt di e tempu ei, Nos Ministerio di Reino a presentá algun sugerensia práktiko ku a mustra kon pa hasi rebishita breve. I despues di esei, a publiká e foyeto Kon pa Logra un Bida Satisfasiente, ku tabata masha útil den e teritorio hapones. Mihoko a apliká e sugerensianan ku a mustra kon pa usa e foyeto, spesialmente esnan ku a siñ’é kon pa hasi rebishita breve. No a dura mashá ku el a kuminsá studia Beibel ku hendenan ku anteriormente lo a nenga di studia. El a bisa: “Mi tabatin asina tantu estudio—sierto momento asta 12—ku mi mester a pone algun di nan riba lista di espera.” Sí, ora bo ta kana segun e spiritu, siguiendo instrukshon ku Yehova su sirbidónan ta haña, bo por kosechá abundantemente.

Dependé Riba e Spiritu di Dios

14, 15. (a) Kon bin hende imperfekto por kumpli ku nan dedikashon? (b) Kon bo por haña e mihó amigunan?

¹⁴ Komo un minister ordená, bo tin un ministerio, òf sirbishi, pa kumpli kuné. (Rom. 10:14) Kisas bo ta pensa ku bo no tin e kapasidat nesesario pa karga e responsabilidat ei. Pero, meskos ku den kaso di e ungínan, ta  Yehova ta esun ku ta hasi bo kompetente. (Lesa 2 Korintionan 3:5.) P’esei, bo por kumpli ku bo dedikashon basta bo hasi bo máksimo esfuerso i dependé riba e spiritu di Dios.

¹⁵ Ta sierto ku no ta fásil pa, komo hende imperfekto, nos kumpli ku nos dedikashon na nos Dios perfekto, Yehova. Algun di e personanan ku ántes bo tabata asosiá kuné kisas ta forma un opstákulo. Pasobra debí ku bo a kambia bo manera di biba, kisas nan ta keda strañá i ta ‘kalumniá bo.’ (1 Ped. 4:4) Pero no lubidá ku bo a kuminsá sera amistatnan nobo, di kua esnan di mas importante ta ku Yehova i Hesukristu. (Lesa Santiago 2:​21-23.) Ta masha importante tambe pa bo siña konosé e rumannan den bo kongregashon, kendenan ta forma parti di un hermandat mundial. (1 Ped. 2:17; Pro. 17:17) Mediante su spiritu, Yehova lo yuda bo haña amigunan ku lo sigui ehersé bon influensia riba bo.

16. Dikon abo tambe por “tin plaser den debilidat” meskos ku Pablo tabatin?

¹⁶ Tin biaha, ounke bo tin amigunan den kongregashon ku por yuda bo, ta difísil pa trata ku e desafionan di tur dia. Kisas loke bo tin ku lucha kuné ta laga bo sinti impotente, komo si fuera bo tin un avalancha di problema ku bo no por trata kuné. Spesialmente na momentonan asina, bo tin ku akudí na Yehova i pidié su spiritu santu. Apòstel Pablo a skirbi: “Ora mi ta débil, e ora ei mi ta fuerte.” (Lesa 2 Korintionan 4:​7-10; 12:10.) Pues, ounke Pablo tabata konsiente di su debilidatnan e tabata sa tambe ku e spiritu di Dios por a dun’é e fortalesa ku e tabata falta. P’esei, Dios su forsa aktivo por fortalesé bo ki ora ku bo ta sinti bo débil i ku bo tin mester di yudansa. Ademas, Pablo a skirbi ku e “tin plaser den debilidat.” Esei tabata asina pasobra ora e tabata débil, e tabata sinti kon spiritu santu tabata dun’é e forsa nesesario. Abo tambe por sinti meskos!​—Rom. 15:13.

17. Kon spiritu santu por yuda bo segun ku bo ta traha pa alkansá bo meta?

¹⁷ Pa nos por hiba un bida dediká na Dios, nos tin mester di su spiritu santu. Imaginá ku bo ta un kapitan di un barku di bela. Bo meta ta pa sirbi Yehova pa semper. Spiritu santu ta manera e bientu ku bo ta kue pa hiba bo na bo destinashon sano i salvo. Bo no ke pa e spiritu di e mundu di Satanas hiba bo p’aki i p’aya. (1 Kor. 2:12) P’esei, na moda di papia, bo tin ku rekonosé kua ta e bientu korekto i koh’é. Esei ta spiritu santu. I e lo guia bo den e direkshon korekto mediante Dios su Palabra i Su organisashon ku E ta dirigí mediante su spiritu santu.

18. Kiko bo ta determiná pa hasi awor, i dikon?

¹⁸ Si bo tin algun tempu kaba ta studia ku Testigunan di Yehova i ta disfrutá di asosiashon spiritual ku nan, pero ainda bo no a dal e pasonan importante di dedikashon i boutismo, puntra bo mes: ‘Kiko ta stroba mi?’ Si bo ta rekonosé e papel ku spiritu santu ta hunga den kumplimentu di Yehova su boluntat awe i bo ta komprondé kon e ta obra, dal e pasonan korekto a base di loke bo a siña. Yehova lo bendishoná bo rikamente. Lo e duna bo su spiritu santu na un manera generoso. Si bo tin hopi aña òf dékada kaba ku bo a batisá, sin duda bo a eksperensiá e influensia di spiritu santu den bo bida. Bo a mira i sinti kon Dios por usa su spiritu santu pa fortalesé bo. Esei por sigui asina, sí, pa semper. P’esei, sea determiná pa keda kana segun spiritu santu.

Bo Ta Kòrda?

• Kiko ta nifiká “kana segun e spiritu”?

• Kiko por yuda bo sigui “kana segun e spiritu”?

• Kon bo por kumpli ku bo dedikashon?

[Preguntanan di Estudio]

[Plachi na página 19]

Pa kultivá e tera figurativo di bo kurason ta rekerí esfuerso

[Plachi na página 20, 21]

Dios su spiritu santu tin influensia riba bo?