1, 2. (a) Kiko segun Hesus tabata e di dos mandamentu di mas grandi di Lei? (b) Ki preguntanan e artíkulo akí lo kontestá?

UN BIAHA un fariseo kier a pone Hesus na prueba, i el a puntr’é: “Maestro, kua ta e mandamentu di mas grandi di Lei?” Manera nos a mira den e artíkulo anterior, Hesus a kontest’é ku “e mandamentu di mas grandi i esun di promé” ta: “Stima Yehova bo Dios ku henter bo kurason, ku henter bo alma i ku henter bo mente.” Anto Hesus a agregá: “E di dos, igual kuné, ta esaki: ‘Stima bo próhimo meskos ku bo mes.’”—Mat. 22:34-39.

² Hesus a bisa anto ku nos tin ku stima nos próhimo meskos ku nos ta stima nos mes. P’esei ta bon pa nos puntra nos mes: Ken realmente ta nos próhimo? Kon nos por mustra amor pa próhimo? E artíkulo akí lo kontestá e preguntanan ei.

3, 4. (a) Ki ilustrashon Hesus a konta pa kontestá e hòmber ku a puntra ken realmente tabata su próhimo? (b) Kon e samaritano a yuda e hòmber ku nan a atraká, maltratá i laga kasi morto? (Wak e promé plachi.)

³ Un hòmber a yega di puntra Hesus: “Ken realmente ta mi próhimo?” Hesus a kontest’é pa medio di e ilustrashon di e  bon samaritano i a siñ’é kiko ta nifiká stima su próhimo. (Lesa Lukas 10:29-37.) El a kont’é di un hudiu ku nan a atraká, maltratá i laga kasi morto bentá riba kaminda. Anto a pasa un saserdote israelita i un levita. Nan a saka man pa yuda e hòmber manera lo bo por a ferwagt di nan? Nò. Ora nan a mir’é, nan a pas’é bai sin hasi nada p’e. Ta un samaritano, esta, un hòmber ku tabata di un pueblo ku tabata respetá e Lei di Moises, pero ku e hudiunan a despresiá, a yuda e hòmber.—Huan 4:9.

⁴ Pa kura e heridanan di e hudiu, e samaritano a basha zeta i biña riba nan. Despues el a hib’é na un posada i a duna e doño dos denario pa kuida e hòmber. E dos denarionan akí tabata ekivalente na mas òf ménos dos dia di salario. (Mat. 20:2) Pues ta fásil pa mira ken realmente tabata e berdadero próhimo di e hòmber heridá. Sin duda, e ilustrashon di Hesus ta siña nos pa mustra amor i kompashon pa nos próhimo.

5. Kon sirbidónan di Yehova a mustra amor pa próhimo despues di un desaster natural?

⁵ Den e “último dianan” krítiko akí hopi biaha ta difísil pa haña hende kompasivo manera e bon samaritano. Mayoria di hende ta feros, no tin kompashon ku otro ni amor pa loke ta bon. (2 Tim. 3:1-3) Prueba di esei ta ora orkan Sandy a asotá un área di New York na òktober 2012 i kousa hopi destrukshon. Hopi hende no tabatin koriente, verwarming i otro kosnan nesesario. Tabata tristu pa mira kon algun ‘alma malu’ tabata plùnder kas di e víktimanan akí. Testigunan di Yehova sí tabata diferente. Nan a organisá un programa pa yuda nan rumannan i tambe otro hende den e área ei. Nan a hasi esei pasobra kristiannan berdadero sí ta stima nan próhimo. Den ki otro maneranan nos por mustra amor pa próhimo?

6. Ki yudansa for di Beibel nos por duna nos próhimo?

⁶ Duna yudansa for di Beibel. Den nos trabou di prediká, nos ta duna nos próhimo “konsuelo for di e Skritura.” (Rom. 15:4) Sin duda, nos ta mustra amor pa próhimo ora nos usa Beibel pa papia ku e hendenan tokante e bon notisia di e Reino di Dios. (Mat. 24:14) Ta un gran onor pa hiba e mensahe di Reino ku ta bini di “e Dios ku ta duna speransa”!—Rom. 15:13.

7. Kiko ta e Regla di Oro i dikon ta bon pa nos siguié?

⁷ Sigui e Regla di Oro. Esaki ta un siñansa universal ku Hesus a ekspresá den su Sermon Riba Seru: “Tur loke boso ke pa hende hasi ku boso, boso tambe mester hasi ku nan. De echo, esaki ta esensia di e siñansanan di Lei i e Profetanan.” (Mat. 7:12) Ora nos trata otro hende manera Hesus a konsehá, nos ta kumpliendo ku e spiritu tras di e “Lei” (Génesis te Deuteronomio) i “e Profetanan” (e bukinan profétiko di e Skrituranan Hebreo). Yehova a duna su pueblo e instrukshonnan akí pasobra e tabata stima nan i tabata ke pa nan stima otro. Awe tambe, Yehova ta ferwagt di nos ku nos ta stima nos próhimo. Den e buki di Isaías, Yehova a bisa: “Mantené huisio i hasi hustisia . . . Bendishoná ta e hende ku ta hasi esaki.” (Isa. 56:1, 2) Nos por mira bon kla anto ku si nos stima nos próhimo i trat’é na un manera hustu, Yehova ta bendishoná nos.

8. Dikon nos tin ku stima nos enemigunan i kiko por sosodé si nos hasi esei?

⁸ Stima bo enemigunan. Hesus a bisa: “Boso a tende den pasado: ‘Stima bo próhimo i odia bo enemigu.’ Ma ami ta bisa boso: Sigui stima boso enemigunan i hasi orashon pa esnan ku ta persiguí boso, pa boso por demostrá ku boso ta yu di boso  Tata ku ta den shelu.” (Mat. 5:43-45) Apòstel Pablo a duna un konseho similar ora el a bisa: “Si bo enemigu tin hamber, dun’é di kome; si e tin set, dun’é algu di bebe.” (Rom. 12:20; Pro. 25:21) Segun e Lei di Moises, si un israelita a mira ku e animal di su enemigu a sukumbí bou di un karga, e mester a yuda libra e animal. (Éks. 23:5) Trahando huntu asina, hende ku ántes tabata enemigu di otro por a bira bon amigu. Meskos ta konta pa nos tempu tambe. Ora nos ta trata nos enemigunan ku amor, inkluso hende ku ta persiguí nos, esei ta suavisá nan kurason i pone nan aktitut pa ku nos kambia. I ken sa ku algun di nan por asta aseptá e bèrdat i bira kristian.

9. Kiko Hesus a bisa tokante hasi pas ku nos ruman?

⁹ “Hasi tur boso esfuerso pa ta na pas ku tur hende.” (Heb. 12:14) Esaki naturalmente ta inkluí nos rumannan, pasobra Hesus a bisa: “Si bo trese bo ofrenda na altar, i einan bo kòrda ku bo ruman tin algu kontra bo, laga bo ofrenda einan, dilanti di altar, i bai. Hasi pas ku bo ruman promé, i despues, ora bo bini bèk, duna bo ofrenda.” (Mat. 5:23, 24) Si nos tin problema ku un ruman, Yehova lo bendishoná nos ora nos mustra amor pa nos ruman i dal paso mesora pa hasi pas kuné.

10. Dikon nos no mester husga otro?

¹⁰ No husga otro. Hesus a bisa: “Stòp di husga, pa boso no ser husgá, pasobra ku e huisio ku boso ta husga, boso lo ser husgá, i ku e midí ku boso ta midi, nan lo midi pa boso. Pakiko anto bo ta wak e splenter den wowo di bo ruman ma no ta tuma nota di e balki den bo mes wowo? Òf kon bo por bisa bo ruman: ‘Laga mi saka e splenter for di bo wowo,’ miéntras ku tin un balki den bo mes wowo? Hipókrita! Saka e balki for di bo mes wowo promé; e ora ei lo bo mira kla kon pa saka e splenter for di wowo di bo ruman.” (Mat. 7:1-5) E lès ku nos ta siña akí ta ku nos no mester kritiká otro hende pa nan fayonan menor, pasobra nos tambe ta kometé fayo, anto grandi.

11, 12. Den ki manera spesial nos ta mustra amor pa próhimo?

¹¹ Nos ke mustra amor pa próhimo na un manera masha spesial. Meskos ku  Hesus, nos ta prediká e bon notisia di e Reino. (Luk. 8:1) El a enkargá su siguidónan pa “hasi hende di tur nashon [su] disipel.” (Mat. 28:19, 20) Ora nos obedesé Hesus, nos ta purba yuda nos próhimo p’e bandoná e kaminda hanchu ku ta hiba na destrukshon i mustr’é kon pa kana riba e kaminda smal ku ta hiba na bida. (Mat. 7:13, 14) Sin duda, Yehova lo bendishoná e esfuersonan ei.

¹² Meskos ku Hesus, nos ta yuda hende bira konsiente ku nan tin un nesesidat spiritual. (Mat. 5:3) I segun ku nos ta kompartí “e bon notisia di Dios” ku esnan ku ta reakshoná faborablemente, nos ta yuda nan satisfasé e nesesidat ei. (Rom. 1:1) Nos ta siña nan ku pa medio di Hesukristu nan por rekonsiliá ku Dios i haña su aprobashon. (2 Kor. 5:18, 19) Ora nos prediká e bon notisia anto, nos realmente ta mustra amor pa próhimo na un manera masha spesial.

13. Kon bo ta mira e obra di proklamá e Reino?

¹³ Ora nos ta hasi rebishita i dirigí estudio di Beibel na un manera efikas, nos ta haña e satisfakshon di por yuda hende adaptá nan na e normanan hustu di Dios. Algun di nan lo tin ku hasi kambio grandi den nan bida. (1 Kor. 6:9-11) Ta emoshonante pa mira kon Dios ta yuda esnan ku ta “dispuesto pa aseptá e bèrdat ku ta hiba na bida eterno” hasi e kambionan nesesario i bira amigu di dje. (Echo. 13:48) Hopi di nan kisas no tabatin ningun speransa, ma awor nan ta felis; òf tal bes nan tabatin hopi ansiedat, pero awor nan tin konfiansa den nos Tata selestial. Ta bunita pa mira e progreso spiritual ku e personanan akí ta hasi! Bo no ta haña ku ta un bendishon pa mustra amor pa próhimo den e manera spesial akí komo proklamadó di Reino?

14. Menshoná ku bo mes palabra algun aspekto di amor ku 1 Korintionan 13:4-8 ta papia di dje.

¹⁴ Si nos apliká loke Pablo a bisa relashoná ku amor den nos trato ku nos próhimo, nos por evitá hopi problema, nos lo ta felis i nos lo haña e bendishon di Dios. (Lesa 1 Korintionan 13:4-8.) Laga nos repasá brevemente kiko Pablo a bisa tokante amor i mira kon nos por apliká su palabranan den nos trato ku otro hende.

15. (a) Dikon nos mester tin pasenshi i mustra bondat? (b) Pakiko nos no mester ta yalurs ni kana broma?

¹⁵ “Amor tin pasenshi i ta bondadoso.” Meskos ku Dios a mustra pasenshi i bondat den su trato ku hende imperfekto, nos tambe mester tin pasenshi ku otro hende i trata nan ku bondat ora nan faya ku nos i papia malu ku nos. “Amor no ta yalurs.” Pues, si di bèrdat nos stima nos rumannan, nos lo no kudishá loke nan tin, ni e privilegionan ku nan tin den kongregashon. Ademas, si nos amor ta sinsero, nos lo no kana broma ni halsa nos mes. Al fin i al kabo, “un mirada orguyoso, un kurason halsá, i e lampi di e malbado ta piká.”—Pro. 21:4.

16, 17. Kon nos mester trata nos próhimo segun 1 Korintionan 13:5 i 6?

¹⁶ Amor lo yuda nos komportá nos na un manera desente. Nos lo no gaña nos próhimo, hòrt’é ni hasi nada ku ta violá e lei- i prinsipionan di Yehova. Tambe amor lo impulsá nos pa buska no solamente nos mes interesnan, sino tambe esnan di otro hende.—Flp. 2:4.

¹⁷ Amor sinsero no ta rabia lihé i “no ta keda kòrda e malu ku hende a hasié.” Pues nos no ta traha un lista di delaster kos malu ku otro hende hasi ku nos. (1 Tes. 5:15) Si nos tene hende na kurason,  nos no por agradá Dios. De echo, nos rabia lo ta manera un kandela ku por lanta un ora pa otro i hasi nos mes i otro hende daño. (Lev. 19:18) Ta mihó pordoná i lubidá. Ademas, komo ku amor no ta “alegrá ku inhustisia,” ni maske ora un persona ku ta odia nos ser maltratá òf sufri un inhustisia, nos no ta alegrá; nos a alegrá mas bien ku e bèrdat.—Lesa Proverbionan 24:17, 18.

18. Kiko 1 Korintionan 13:7 i 8 ta siña nos tokante amor?

¹⁸ Pablo a bisa tambe ku amor “ta wanta tur kos.” P’esei, si un hende ofendé nos pero ta pidi despensa, amor ta motivá nos pa pordon’é. Tambe amor ta “kere tur kos” den e Palabra di Dios i ta hasi nos gradisidu pa e alimento spiritual ku nos ta risibí. Amor ta ‘spera tur loke’ Beibel ta primintí i ta stimulá nos pa papia ku otro hende di e speransa ku nos tin. (1 Ped. 3:15) I ora nos ta pasa den situashonnan difísil, nos ta hasi orashon i spera riba e mihó resultado posibel. Amor ta “soportá tur kos,” sea ku otro hende a peka kontra nos, òf nos ta pasa den persekushon òf otro pruebanan. Finalmente, Pablo a sigurá nos, “amor no ta kaba nunka.” Hende obediente na Dios lo sigui mustra amor pa tur eternidat.

19, 20. Ki konseho bíbliko mester motivá nos pa sigui mustra amor pa próhimo?

¹⁹ Si nos apliká e konseho di Beibel, semper nos lo stima nos próhimo meskos ku nos mes. Esei ta enserá mustra amor na tur hende, no solamente esnan di nos rasa òf kultura. Tambe nos mester kòrda ku Hesus a bisa: “Stima bo próhimo meskos ku bo mes.” (Mat. 22:39) Tantu Dios komo Kristu ta ferwagt di nos ku nos ta stima nos próhimo. Si nos no ta sigur kiko pa hasi den un situashon ku ta enbolbé nos próhimo, laga nos pidi Dios guia nos pa medio di su spiritu. Ora nos hasi esei, Yehova lo bendishoná nos i lo e yuda nos trata nos próhimo ku amor.—Rom. 8:26, 27.

²⁰ E mandato pa nos stima nos próhimo meskos ku nos mes yama “e lei noble.” (Sant. 2:8) Den e Lei di Moises, Yehova a duna su pueblo hopi mandamentu ku a siña nan pa stima nan próhimo. Mas despues, Yehova a inspirá Pablo pa skirbi: “Kualke otro mandamentu ku tin—ta keda resumí den e palabra akí: ‘Stima bo próhimo meskos ku bo mes.’ Un hende ku tin amor no ta hasi malu ku su próhimo; p’esei amor ta kumplimentu di lei.” (Rom. 13:8-10) Pues nos tin ku sigui mustra amor pa próhimo.

21, 22. Dikon nos tin ku stima Dios i nos próhimo?

²¹ Ora nos ta meditá riba e motibu pakiko nos tin ku stima nos próhimo, ta bon pa nos reflekshoná riba loke Hesus a bisa di su Tata: “E ta laga su solo sali riba mal hende i bon hende i ta laga awa kai riba hende hustu i inhustu.” (Mat. 5:43-45) Kiko esaki ta siña nos? Nos tin ku mustra amor na nos próhimo, sea ku e próhimo ta hustu òf inhustu. I manera nos a bisa anteriormente, un manera importante pa mustra e amor ei ta di kompartí e mensahe di Reino kuné. Si nos próhimo aseptá e bon notisia ku un kurason sinsero, hopi bendishon ta ward’é!

²² Nos tin hopi motibu pa stima Yehova ku henter nos kurason, alma i mente. Tambe nos a mira ku nos por mustra amor pa próhimo den vários forma. Ora nos ta stima Dios i nos próhimo, nos ta obedesiendo e dos mandamentunan di mas grandi. I riba tur kos, nos lo agradá Yehova, nos Tata selestial amoroso.