1, 2. (a) Kiko tabata “e kas [òf, tabernakel] di David” i kon Dios a lanta esaki bèk? (b) Ken ta Yehova su sirbidónan awe?

DURANTE un reunion importante di e kuerpo gobernante ku a tuma lugá na Herúsalèm na aña 49 di nos era, disipel Santiago a bisa: “Simeon [Pedro] a konta detayadamente kon Dios pa promé biaha a dirigí su atenshon na e nashonnan pa saka for di nan un pueblo pa karga su nòmber. I e palabranan di e Profetanan ta kuadra ku esaki, manera ta pará skirbí: ‘Despues di e kosnan akí lo mi bini bèk i rekonstruí e kas di David ku a basha abou; lo mi rekonstruí su ruinanan i restor’é, pa e hendenan ku resta, huntu ku hende di tur nashon, esta, hende ku ta karga mi nòmber, por hasi esfuerso pa buska Yehova. Esaki ta loke Yehova ta bisa, kende ta esun ku ta hasi e kosnan akí i ku tabata konosí for di tempu antiguo.’”—Echo. 15:13-18.

² “E kas [reino òf dinastia] di David” a basha abou ora nan a baha Rei Sedekias for di trono. (Ámos 9:11) Sinembargo, e profesia di Ámos ta mustra ku Dios lo a lanta e “kas,” òf tabernakel, ei bèk, esta nombra un otro rei—un desendiente di David, Hesus—pa ta Rei pa semper. (Eze. 21:27; Echo. 2:29-36) I manera Santiago a indiká, e profesia akí ta mustra tambe ku tantu hudiu komo hende di tur nashon lo a ser ungí pa goberná huntu ku Hesus den shelu. Awe, e kristiannan ungí ku ainda ta riba tera i miónes di Hesus su ‘otro karnénan’ ta Yehova su sirbidónan. Huntu nan ta prediká e bèrdat di Beibel awe.—Huan 10:16.

3, 4. Kiko a yuda e hudiunan ku tabata na Babilonia keda spiritualmente fuerte?

³ Ora e hudiunan a ser hibá den koutiverio na Babilonia na aña 607 promé ku nos era, tabata bisto ku “e  tabernakel di David” a basha abou. Babilonia tabata pèstá ku religion falsu. Kon e pueblo di Dios lo por a keda fiel durante 70 aña den eksilio na Babilonia? Wèl, meskos ku e pueblo di Dios awe ta keda fiel den e mundu di Satanas. (1 Huan 5:19) Komo sirbidó di Yehova, nos tin nos herensia spiritual ku ta yuda nos keda fiel.

⁴ Parti di nos herensia spiritual ta e Palabra di Dios kompleto. E hudiunan ku tabata den eksilio na Babilonia no tabatin Beibel kompleto. Nan tabata konosé solamente e Lei di Moises ku su Dies Mandamentu. Nan tabata sa “e kantikanan di Sion,” nan por a kòrda hopi proverbio i nan tabata konosé hopi relato di otro sirbidónan di pasado ku a keda fiel na Yehova. E hudiunan den eksilio tabata yora pasobra nan kier a bai nan tera bèk. Sí, nan no a lubidá Yehova. (Lesa Salmo 137:1-6.) Tur esaki a yuda nan keda spiritualmente fuerte apesar ku nan tabata rondoná pa siñansa- i práktikanan pagano na Babilonia.

5. Ki sorto di dios trinitario hende den antiguo Babilonia i Egipto tabata adorá?

⁵ For di antigwedat, hende tabata adorá tres dios den un. E babilonionan, por ehèmpel, tabata adorá un dios trinitario ku tabata konsistí di Sin (e dios di luna), Shamash (e dios di solo) i Ishtar (e diosa di guera i fertilidat). Den Egipto di antigwedat, nan tabatin e kreensia ku mayoria di nan diosnan ta kasá ku yu i ku kada famia divino tabata un trinidat ku a konsistí di un dios tata, dios mama i dios yu. Aunke e tres diosnan akí huntu tabata ún dios, nan no tabata igual: Tin ora, un tabatin mas poder òf outoridat ku e otro, dependiendo di e papel ku e tabatin na dado momento. Un dios trinitario di Egipto a konsistí di e dios Osiris, e diosa Isis i nan yu hòmber Hórus.

6. Kiko e siñansa di Trinidat ta enserá, i kon nos a libra nos mes di e siñansa falsu akí?

⁶ Awe kristiandat tambe ta papia di un Trinidat: Dios Tata, Dios Yu i Spiritu Santu. Pero e siñansa akí ta ofendé Dios, pasobra e ta laga parse ku Yehova no ta Todopoderoso sino apénas un terser parti di un supuesto dios. Pero e pueblo di Dios sí a libra nan mes di e siñansa falsu ei pasobra nan ta kere den e palabranan inspirá akí: “Tende, o Israel, Yehova nos Dios ta ún Yehova.” (Deu. 6:4, NW) Hesus a sita e palabranan akí, i kristiannan berdadero ta konvensí di esei.—Mar. 12:29.

7. Dikon un hende ku ta kere den Trinidat no por batisá komo Testigu di Yehova?

⁷ E doktrina di Trinidat ta bai kontra e mandato ku Hesus a duna su siguidónan pa ‘hasi hende di tur nashon su disipel, i batisá nan den nòmber di e Tata i di e Yu i di spiritu santu.’ (Mat. 28:19) Esaki ta nifiká ku un persona ku ke batisá komo kristian berdadero, esta komo un Testigu di Yehova, mester rekonosé ku e Tata ta un Dios supremo i ku e tin outoridat riba su Yu, Hesus. Ademas, e mester komprondé ku spiritu santu ta Dios su forsa aktivo i no parti di un Trinidat. (Gén. 1:2, NW) Pues, un persona ku ta sigui kere den Trinidat no por batisá komo símbolo di su dedikashon na Yehova Dios. Nos ta masha kontentu ku, debí na nos herensia spiritual, nos no ta bai tras di un siñansa falsu ku ta desonrá Dios!

8. Segun e babilonionan, ki poder demoño i nan diosnan tabatin?

⁸ Aparte di kere den dios falsu, doktrina pagano i demoño, spiritismo tabata un  práktika komun na Babilonia. E buki The International Standard Bible Encyclopaedia ta bisa ku e babilonionan tabata kere ku demoño por dal hende ku malesa. P’esei, nan tabata resa pidi nan diosnan pa protehá nan kontra e demoñonan.

9. (a) Kon bini hopi hudiu a kuminsá kere den ideanan religioso falsu? (b) Dikon nos sí ta keda protehá kontra e peligernan di spiritismo?

⁹ Despues ku e hudiunan a sali for di sklabitut na Babilonia, hopi di nan a kuminsá bai tras di ideanan religioso falsu. Segun ku konseptonan griego a bira mas popular, hopi hudiu a bira víktima di influensia di demoño pasobra nan a kuminsá kere ku meskos ku tin mal demoño tin bon demoño tambe. Pero Beibel ta spièrta nos pa keda leu di kosnan di demoño, pasobra nos sa ku Dios a kondená e práktikanan spiritista ku tabata tuma lugá na Babilonia. E spièrtamentu akí tambe ta parti di nos herensia spiritual. (Isa. 47:1, 12-15) Sí, Yehova su punto di bista tokante spiritismo ta un protekshon pa nos.—Lesa Deuteronomio 18:10-12; Revelashon 21:8.

10. Di unda Babilonia e Grandi a haña su kreensianan i práktikanan pagano?

¹⁰ No ta den antiguo Babilonia so nan tabata praktiká spiritismo. Awe, hopi hende ku ta apoyá Babilonia e Grandi, e imperio di religion falsu, tambe ta mete ku spiritismo. (Rev. 18:21-24) Religion falsu di awendia realmente tin hopi similaridat ku religion di antiguo Babilonia di unda nan kreensianan i práktikanan pagano a originá. Pronto Babilonia e Grandi lo ser destruí pa motibu di tur su práktikanan spiritista, idolatria i otro pikánan.—Lesa Revelashon 18:1-5.

11. Ki spièrtamentu nos a publiká tokante spiritismo?

¹¹ Yehova a deklará: “Mi no por soportá e uso di poder mágiko.” (Isa. 1:13, NW) Den siglo 19, hopi hende tabata praktiká spiritismo. P’esei, e Zion’s Watch Tower di mei 1885 a trata e tópiko ei. E revista a bisa: ‘E kreensia ku e mortonan ta na bida i ku nan ta den un otro mundu no ta nada nobo. E kreensia akí tin su rais den mitologia i tabata parti di religionnan di antigwedat.’ Ademas, e revista a indiká ku ta e demoñonan ta papia ku e bibunan i hasi komo si fuera ta e mortonan ta papia, i di e manera ei, e demoñonan ta influensiá kondukta i manera di pensa di hopi hende. E foyeto Kiko e Skritura Ta Bisa Tokante Spiritismo? (na ingles) ku a ser publiká algun aña despues a duna spièrtamentunan similar, meskos ku algun di nos publikashonnan mas resien.

12. Kiko Dios a inspirá Sálomon pa bisa tokante e mortonan?

¹² “Tur [hende] ku a siña konosé e bèrdat” por kontestá e pregunta ei. (2 Huan 1) Sí, nos ta di akuerdo ku Sálomon, kende a bisa: “Un kachó bibu ta mihó ku un leon morto. Pasobra e bibunan sa ku nan lo muri, ma e mortonan no sa nada . . . Tur loke bo man haña pa hasi, hasié ku tur bo forsa; pasobra no tin ni aktividat ni planifikashon ni sabiduria den Seol [graf], kaminda bo ta bai.”—Ekl. 9:4, 5, 10.

13. Kon religion i kultura griego a influensiá e hudiunan?

¹³ E hudiunan lo mester tabata sa e bèrdat enkuanto morto. Ma despues ku Gresia a ser dividí entre e generalnan di Alexander e Grandi, gobernantenan griego a purba di uni Huda i Siria fòrsando e pueblo hudiu pa aseptá religion i kultura griego. Asina ei, e hudiunan a kuminsá kere den e siñansanan falsu di ku e alma  ta inmortal i ku e ta ser tormentá den un otro mundu. No ta e griegonan a bini ku e idea di ku tin un lugá invisibel kaminda e mortonan ta sufri, ya ku segun e buki The Religion of Babylonia and Assyria ta e babilonionan tabata kere ku a eksistí un otro mundu kaminda diosnan i demoñonan ku hopi poder tabata torturá hende. Sí, e babilonionan tabata kere ku alma ta inmortal.

14. Kiko Yòb i Abraham tabata sa enkuanto morto i resurekshon?

¹⁴ Aunke ku e hòmber hustu Yòb no tabatin e Skritura, e tabata sa e bèrdat enkuanto morto. E tabata sa tambe ku si e muri, Yehova, nos Dios amoroso, lo tabata ansioso pa resusit’é. (Yòb 14:13-15) Abraham tambe a kere den resurekshon. (Lesa Hebreonan 11:17-19.) Komo ku ta imposibel pa resusitá un persona ku no por muri nunka, e hòmbernan akí no a kere ku alma ta inmortal. Sin duda, Dios su spiritu santu a yuda tantu Yòb komo Abraham komprondé den ki kondishon e mortonan ta i pone fe den resurekshon. E bèrdatnan akí tambe ta parti di nos herensia.

15, 16. Kon nos ta ser reskatá for di piká i morto?

¹⁵ Nos ta masha kontentu ku Dios a revelá tambe kon lo e libra nos di e piká i morto ku nos a heredá for di Adam. (Rom. 5:12) Nos sa ku Hesus “no a bini pa ser sirbí, sino pa sirbi i pa duna su alma komo reskate a kambio di hopi hende.” (Mar. 10:45) Ta importante pa sa tokante “e liberashon ku ta basá riba e reskate ku Kristu Hesus a paga.”—Rom. 3:22-24.

¹⁶ Den promé siglo, tantu hudiu komo personanan no hudiu mester a arepentí di nan pikánan i pone fe den e sakrifisio di reskate di Hesus pa nan por a haña  pordon. Meskos ta konta pa nos awe. (Huan 3:16, 36) Si un hende ta sigui kere den doktrina falsu, tal komo Trinidat i inmortalidat di alma, e no por benefisiá di e reskate. Pero nos sí ta benefisiá di esaki. Dikon? Pasobra nos sa e bèrdat enkuanto e “Yu stimá [di Dios], pa medio di ken nos a haña nos liberashon mediante e reskate, esta, pordon di nos pikánan.”—Kol. 1:13, 14.

17, 18. Unda nos por haña informashon balioso enkuanto nos historia, i dikon nos ta benefisiá di loke nos ta siña tokante dje?

¹⁷ Nos por sigui papia hopi kos mas tokante loke Dios ta siña nos, tokante e eksperensianan ku nos ta pasa aden komo su sirbidónan i di e bendishonnan spiritual i material ku nos ta risibí. Pa dékadanan kaba, nos Anuarionan ta kontené relatonan emoshonante di nos aktividatnan rònt mundu. Nos por siña tambe di e historia di Testigunan di Yehova si nos wak e vidionan Un Historia di Fe Bibu, Parti 1 i 2, i lesa publikashonnan manera Testigunan di Yehova—Proklamadónan dje Reino di Dios (tur disponibel na spañó). Nos revistanan tambe ta kontené hopi eksperensia konmovedor tokante nos kerido rumannan den fe.

¹⁸ Un análisis balansá di e historia di Yehova su organisashon lo benefisiá nos mashá, meskos ku e pueblo di Israel a benefisiá ora nan a reflekshoná riba e manera ku Yehova a libra nan for di sklabitut na Egipto. (Éks. 12:26, 27) Ora Moises tabata di edat avansá, el a bisa e israelitanan: “Kòrda e dianan di promé aya, konsiderá e añanan di tur generashon. Puntra bo tata, i e lo konta bo, bo ansianonan, i nan lo bisa bo.” (Deu. 32:7) Komo ‘Yehova su pueblo i karnénan ku e ta pastoriá,’ ku goso nos tur ta duna alabansa na dje i konta hende di su obranan poderoso. (Sal. 79:13) Ademas, loke nos ta siña for di nos historia komo pueblo di Yehova lo yuda nos sigui sirbié.

19. En bista ku nos tin e lus di e bèrdat, kiko nos mester hasi?

¹⁹ Nos ta masha kontentu ku nos tin e lus di e bèrdat di Dios i no ta kana den skuridat. (Pro. 4:18, 19) P’esei, laga nos sigui studia e Palabra di Dios diligentemente i prediká e bèrdat ku zelo na otronan. Nos tin e mesun sintimentu ku e salmista ku a bisa: “Lo mi bini ku e echonan poderoso di Señor DIOS; lo mi menshoná bo hustisia, di bo so. O Dios, bo a siña mi for di mi hubentut; i te ainda mi ta deklará bo obranan maravioso. I asta ora mi bira bieu, ku kabei blanku, o Dios, no bandoná mi, te ora mi deklará bo poder na e generashon akí, bo poder na tur esnan ku ta bini.”—Sal. 71:16-18.

20. Kiko nos ta rekonosé, i kiko ta bo aktitut relashoná ku esaki?

²⁰ Komo Yehova su pueblo, nos ta rekonosé ku ta é tin derecho di goberná humanidat i ku hende mester keda fiel na dje. P’esei, nos ta proklamá e bèrdat inkuestionabel akí: Yehova ta e Soberano di henter universo, kende meresé e adorashon di henter nos kurason. (Rev. 4:11) I ku yudansa di su spiritu, nos ta prediká e bon notisia na hende afligí, yuda hende di kurason kibrá i konsolá esnan ferdrit. (Isa. 61:1, 2) Apesar di Satanas su esfuersonan enbano pa goberná humanidat, inkluso e pueblo di Dios, nos ta determiná pa keda fiel na nos Señor Soberano Yehova. Danki na nos herensia spiritual, nos por keda fiel i sigui alabá Yehova pa semper.—Lesa Salmo 26:11; 86:12.