Siña Hende Kiko Beibel Ta Siña Realmente

“Hasi tur e nashonnan disipel di mi, . . . i siña nan.”—MATEO 28:19, 20.

1. Te na ki grado Beibel ta disponibel?

E PALABRA DI YEHOVA, Beibel Santu, ta un di e bukinan di mas bieu i mas plamá na mundu. Por lo ménos parti di dje a ser tradusí na mas ku 2.300 idioma. Mas ku 90 porshento di e habitantenan di tera tiné na nan idioma materno.

2, 3. (a) Dikon ta reina konfushon tokante e siñansanan di Beibel? (b) Kua preguntanan nos lo konsiderá?

² Miónes di hende ta lesa un porshon di Beibel tur dia. Tin hende a les’é di kaft pa kaft hopi biaha. Míles di grupo religioso ta pretendé ku nan siñansanan ta basá riba Beibel. Sin embargo, nan ku nan mes no ta di akuerdo riba kiko Beibel ta siña. Loke ta hasi e konfushon mas grandi ainda ta e desakuerdonan pisá ku tin entre personanan di e mesun religion. Algun hende tin nan duda relashoná ku Beibel, su orígen i su balor. Hopi hende ta konsider’é komo un buki sagrado pa usa simplemente den seremonia, por ehèmpel ora di hasi un promesa solèm òf ora di hura den korte ku lo bo papia e bèrdat.

³ Echo ta ku Beibel ta kontené Dios su palabra, òf mensahe, poderoso pa humanidat. (Hebreonan 4:12) P’esei komo Testigunan di Yehova nos ke pa hende haña sa kiko Beibel ta siña. Nos ta hopi kontentu ku nos por kumpli ku e enkargo ku Hesukristu a duna su siguidónan ora el a bisa: “Bai i hasi tur e nashonnan disipel di mi, . . . i siña nan.” (Mateo 28:19, 20) Den nos sirbishi públiko, nos ta topa hende di kurason onrado ku ta hopi molestiá pa e konfushon religioso ku ta reina den mundu awe. Nan ke sa e bèrdat tokante nos Kreadó, i tin e deseo di siña kiko Beibel ta bisa tokante e propósito di bida. Laga nos konsiderá tres pregunta ku ta preokupá hopi hende. Den kada kaso, nos lo tuma nota di loke lidernan religioso ta bisa eróneamente, anto kaba nos lo repasá kiko Beibel ta siña realmente. E preguntanan ta (1) Dios ta interesá den nos? (2) Pakiko nos ta na mundu? (3) Kiko ta pasa ku nos ora nos muri?

Dios Ta Interesá den Nos?

4, 5. Dikon hende ta pensa ku Dios no ta interesá den nos?

⁴ Laga nos kuminsá ku e promé pregunta: Dios ta interesá den nos? Lamentablemente, hopi hende ta pensa ku e kontesta ta nò. Dikon nan ta pensa asina? Un motibu ta ku nan ta biba den un mundu yen di odio, guera i sufrimentu. Nan ta rasoná: ‘Si Dios tabata realmente interesá den nos, sigur lo el a prevení e kosnan malu ei di sosodé.’

⁵ Un otro motibu pakiko hende ta pensa ku Dios no tin kunes ku nos ta pasobra lidernan religioso a pone nan sinti asina. Kiko miembronan di klero ta bisa hopi biaha ora ku un tragedia sosodé? Ora ku un señora a pèrdè su dos yunan chikí den un aksidente di outo, su pastor a bisa: “Ta e boluntat di Dios. Dios tabatin mester di dos angelito mas.” Ora ku miembronan di klero ta hasi e tipo di  komentarionan ei, nan en realidat ta kulpando Dios pa e kosnan malu ku ta sosodé. Sin embargo, disipel Santiago a skirbi: “No laga ningun hende, ora nan ta bou di prueba, bisa: ‘Dios ta pone mi na prueba.’ Pasobra ku kos malu no por pone Dios na prueba ni e mes no ta pone ningun hende na prueba.” (Santiago 1:13, NW) Yehova Dios nunka ta kousa maldat. De echo, “leu sea di Dios di hasi maldat.”—Jòb 34:10.

6. Ken ta tras di e maldat i sufrimentu ku tin den e mundu aki?

⁶ Dikon anto tin asina tantu maldat i sufrimentu? Un motibu ta ku humanidat en general a rechasá Dios komo Gobernante, i nan no ke someté nan mes na su leinan i prinsipionan hustu. Sin realisá esei hende a someté nan mes na Dios su Atversario, Satanas, pasobra “henter mundu ta bou di kontròl di e malbado.” (1 Juan 5:19) Unabes nos ta na haltura di e echo aki ta bira mas fásil pa nos komprondé dikon situashonnan malu ta eksistí. Satanas ta malisioso, yen di odio, engañoso i kruel. Pues nos por ferwagt ku mundu ta reflehá e personalidat di su gobernante. Nada straño anto ku tin asina tantu maldat!

7. Menshoná algun motibu pakiko nos ta sufri.

⁷ Un otro motibu pakiko nos ta sufri ta imperfekshon humano. Hende pekaminoso tin e tendensia di lucha pa dominá otro, i e lucha ei hopi biaha ta resultá den guera, opreshon i sufrimentu. Manera Eklesiastés 8:9 ta bisa korektamente: “Hende a ehersé outoridat riba un otro hende pa su daño.” Un otro motibu mas di sufrimentu ta loke Beibel ta referí na dje komo “tempu i suseso imprevisto.” (Eklesiastés 9:11, NW) Hopi biaha, hende ta eksperensiá kalamidat pasobra nan ta na e lugá robes na e momento robes.

8, 9. Kon nos por sa ku Yehova ta realmente interesá den nos?

⁸ Ta un konsuelo pa haña sa ku Yehova no ta kousa sufrimentu. Pero Dios realmente ta interesá den loke ta sosodé den nos bida? E kontesta alentador ta sí! Nos sa ku Yehova ta interesá pasobra den su Palabra inspirá e ta bisa nos dikon el a permití hende sigui un mal rumbo. Dios su motibunan tin keber ku dos kuestion fundamental: su soberania i e integridat di hende. Siendo e Kreadó todopoderoso, Yehova no ta obligá di splika nos pakiko e ta permití sufrimentu. Sin embargo, e ta hasié pasobra e ta interesá den nos.

⁹ Konsiderá mas evidensia ku Dios ta interesá den nos. E “tabata tristu den su kurason” ora ku maldat a yena e tera den tempu di Noe. (Génesis 6:5, 6) E ta sinti otro awe? Nò, pasobra Dios no ta kambia. (Malakias 3:6) E ta odia inhustisia, i e tin rabia di mira hende sufri. Beibel ta siña nos ku pronto Dios lo drecha tur e  daño ku a resultá for di hende su gobernashon i di e influensia di Diabel. Esei ta prueba konvinsente ku Dios ta interesá den nos, no ta bèrdat?

10. Kiko Yehova ta pensa di hende su sufrimentu?

¹⁰ Lidernan religioso ta duna un bista kompletamente robes di Dios ora ku nan ta bisa ku e tragedianan ku nos ta eksperensiá den bida ta su boluntat. Al kontrario, Yehova ta anhelá pa pone fin na hende su sufrimentu. Segun 1 Pedro 5:7 [NW], “e ta interesá den boso.” Esei ta loke Beibel ta siña realmente!

Pakiko Nos Ta na Mundu?

11. Kiko e religionnan di mundu ta bisa hopi biaha tokante hende su bida riba tera?

¹¹ Laga nos konsiderá e di dos pregunta ku hopi hende ta hasi nan mes: Pakiko nos ta na mundu? E religionnan di e mundu aki hopi bes ta kontestá ku hende ta riba tera temporalmente. Nan ta mira tera komo djis un parada di tránsito riba e kaminda pa bida na un otro lugá. Tin miembro di klero eróneamente ta siña hende ku un dia Dios lo destruí e planeta aki. Debí na tal siñansa, hopi hende a konkluí ku mihó nan probechá di tur loke ku bida tin aden tanten ku nan por, pasobra ta morto so ta warda nan. Kiko Beibel ta siña realmente tokante e motibu ku nos ta na mundu?

12-14. Kiko Beibel ta siña tokante Dios su propósito pa tera i pa humanidat?

¹² Dios tin un propósito maravioso pa tera i pa humanidat. E “no a krea [e tera] pa e keda bashí, ma el a form’é pa e wòrdu habitá.” (Isaias 45:18) Ademas, Yehova “a establesé tera riba su fundeshinan, pa asina esei no kita for di su lugá nunka mas.” (Salmo 104:5) Ora nos siña e kosnan aki tokante Dios su propósito pa tera i pa humanidat, nos por komprondé pakiko nos ta na mundu.

¹³ Génesis kapítulo 1 i 2 ta mustra ku Yehova kuidadosamente a prepará e tera pa hende por biba ariba. Na final di e periodo di kreashon ei ku tabatin keber ku nos planeta, tur kos tabata “masha bon.” (Génesis 1:31) Dios a pone e promé hòmber i muhé, Adam ku Eva, den e bunita hòfi di Edén i a perkurá pa nan tin un abundansia di bon kuminda. Dios a bisa e promé pareha: “Sea fruktífero i multipliká, i yena e tera i hasi esaki someté na bo.” Nan mester a haña yu perfekto, sòru pa henter mundu bira manera nan kas paradísiko i goberná e bestianan na un manera amoroso.—Génesis 1:26-28.

¹⁴ E propósito di Yehova ta pa un famia humano perfekto biba pa semper riba tera. E Palabra di Dios ta bisa: “E hustunan lo heredá e tera, i lo biba den dje pa semper.” (Salmo 37:29) Sí, humanidat a ser kreá pa disfrutá di bida eterno den Paradeis riba tera. Esei ta Dios su propósito, i esei ta loke Beibel ta siña realmente!

Kiko Ta Pasa ku Nos Ora Nos Muri?

15. Kiko mayoria religion di mundu ta siña tokante loke ta pasa ku nos ora nos muri?

¹⁵ Laga nos konsiderá awor e di tres pregunta ku ta preokupá hopi hende: Kiko ta pasa ku nos ora nos muri?  Mayoria religion di mundu ta siña ku den hende tin algu ku ta sigui biba despues ku e kurpa muri. Tin gruponan religioso ku ainda ta pega na e idea ku Dios ta kastigá e malbadonan dor di someté nan na sufrimentu eterno den un fièrnu di kandela. Pero esei ta e bèrdat? Kiko Beibel ta siña realmente tokante morto?

16, 17. Segun Beibel, den ki kondishon e mortonan ta?

¹⁶ E Palabra di Dios ta deklará: “E bibunan sa ku nan lo muri, ma e mortonan no sa nada, ni nan no tin rekompensa mas.” Siendo ku e mortonan “no sa nada,” nan no por tende, mira, papia, sinti ni pensa. Nan no ta haña ningun rekompensa òf pago mas. Ta kon nan ta hasi hañ’é? Nan no por hasi ningun trabou! Es mas, “nan amor, nan odio i nan selo a peresé kaba,” pasobra nan no por ekspresá ningun emoshon.—Eklesiastés 9:5, 6, 10.

¹⁷ Loke Beibel ta bisa di e tópiko aki ta simpel i kla: e mortonan no ta sigui biba un otro kaminda. No tin nada ta sali for di nos kurpa ora nos muri i sigui biba pa asina e por nase di nobo den un otro kurpa, manera e hendenan ku ta kere den reenkarnashon ta bisa. Nos por ilustrá esei asin’aki: E bida ku nos tin ta manera e vlam di un bela. Ora paga e bela, e vlam no ta bai ningun kaminda. Simplemente e no t’ei mas.

18. Ora un studiante di Beibel siña ku e mortonan no ta konsiente di nada, ki konklushonnan e por saka?

¹⁸ Pensa riba loke e bèrdat simpel pero potente ei ta impliká. Ora un studiante di Beibel siña ku e mortonan no ta konsiente di nada, lo e por konkluí fásilmente ku sin importá kuantu renkor su defuntu antepasadonan por tabatin durante nan bida, nan no por molesti’é awor. Tambe lo e por komprondé masha lihé ku su sernan kerí ku a muri no por tende, mira, papia, sinti ni pensa mas. Pues anto, nan no por ta sufriendo soledat insoportabel den purgatorio ni ta penando den un lugá di tormento kayente. Sin embargo, Beibel ta siña nos ku e mortonan ku ta den Dios su memoria lo ser resusitá. Esta un speransa maravioso!—Juan 5:28, 29.

Un Buki Nobo pa Nos Usa

19, 20. Komo kristian, ki responsabilidat nos tin, i kua buki pa studia Beibel ta spesialmente diseñá pa nos usa den nos ministerio?

¹⁹ Nos a konsiderá apénas tres pregunta ku hopi hende ta hasi nan mes. Den kada kaso, nos a mira ku loke Beibel ta siña ta kla i simpel. Ta ki un goso di por kompartí e bèrdatnan ei ku hende ku ke sa kiko Beibel ta siña! Pero tin hopi otro pregunta importante pa kua hende di kurason onrado mester haña kontesta ku ta laga nan keda satisfecho. Komo kristian, nos tin e responsabilidat di yuda nan haña kontesta riba e preguntanan ei.

²⁰ Ta un reto pa siña hende bèrdatnan bíbliko den un manera kla i ku ta atraé nan kurason. “E esklabo fiel i prudente” a prepará un buki ku lo yuda nos enfrentá e reto ei, un buki spesialmente diseñá pa nos usa den nos ministerio kristian. (Mateo 24:45-47) E buki aki di 224 página ta titulá Kiko Beibel Ta Siña Realmente?

21, 22. Menshoná algun rasgo remarkabel di e buki Kiko Beibel Ta Siña Realmente?

 ²¹ E buki aki a keda presentá na e Kongresonan di Distrito 2005 di Testigunan di Yehova “Obedensia na Dios,” i e tin vários rasgo remarkabel. Por ehèmpel, e tin un introdukshon di sinku página ku ta resultando masha útil pa yuda kuminsá estudio di Beibel. Probablemente lo bo nota ku ta masha fásil pa papia tokante e plachinan i e tekstonan bíbliko ku tin den e introdukshon. Tambe lo bo por usa e informashon ku tin den e sekshon aki pa splika e doño di kas kon e por haña kapítulo i versíkulo den Beibel.

²² E buki ta skirbí na un manera simpel i kla. A hasi un esfuerso pa yega na kurason di e studiante dor di lag’é mira ku e informashon tin keber ku su bida. Na komienso di kada kapítulo tin vários pregunta di introdukshon anto na final di kada kapítulo tin un kuadro titulá “Loke Beibel Ta Siña.” E kuadro aki tin e kontesta bíbliko riba e preguntanan di introdukshon. Plachinan bunita huntu ku nan komentario i tambe e ilustrashonnan ku tin den e publikashon aki lo yuda e studiante kapta ideanan nobo. Ounke a tene e parti prinsipal di e buki basta simpel, tin un apèndiks ku lo permití bo bai mas en detaye riba 14 tópiko importante si e studiante tin mester di informashon adishonal.

23. Ki sugerensianan nos ta haña relashoná ku uso di e buki Beibel Ta Siña na estudio di Beibel?

²³ E buki Beibel Ta Siña ta diseñá pa yuda nos siña hende di diferente nivel di edukashon i di vários antesedente religioso. Si un studiante no tin ningun konosementu di Beibel, kisas ta tuma mas ku un seshon di estudio pa trata un kapítulo. No pasa purá-purá riba e informashon, sino mas bien hasi esfuerso pa yega na kurason di e studiante. Si e no ta komprondé un sierto ilustrashon ku a usa den e buki, splik’é òf usa un otro ilustrashon. Prepará bon, hasi bo bèst pa usa e buki na un manera efektivo i resa pidi Dios su yudansa di manera ku bo por manehá “e palabra di bèrdat na un manera korekto.”—2 Timoteo 2:15.

Sea Gradisidu pa Bo Privilegionan Presioso

24, 25. Yehova a duna su pueblo ki privilegionan presioso?

²⁴ Yehova a duna su pueblo privilegionan masha presioso. El a hasi posibel ku nos por siña e bèrdat tokante dje. Nos no mester balotá e privilegio ei nunka! De echo, Dios a skonde su propósitonan pa hende arogante i a revelá nan na hende humilde. Relashoná ku esaki Hesus a bisa: “Mi ta alabá bo, o Tata, Señor di shelu i tera, ku bo a skonde e kosnan aki pa sabínan i inteligentenan i a revelá nan na mucha chikitu.” (Mateo 11:25) Ta un onor úniko di por ser kontá entre e humildenan ku ta sirbi e Soberano Universal, Yehova.

²⁵ Dios a duna nos tambe e privilegio di siña otro hende tokante dje. No lubidá ku lidernan religioso a pinta Dios malu pa medio di e mentiranan ku nan a siña hende tokante dje. Debí na esei hopi hende tin un impreshon kompletamente robes di Yehova, i ta pensa ku e no ta interesá den nos i ku su kurason ta duru, sin sintimentu. Abo ta dispuesto, sí ansioso, pa yuda rektifiká e mal impreshon ku hende tin di Yehova? Abo ke pa tur hende di kurason onrado haña sa e bèrdat tokante Dios? Si ta asina, demostrá bo obedensia na Dios dor di prediká ku entusiasmo i siña otro hende loke e Skritura ta bisa riba temanan importante. Hende ku ta buskando e bèrdat tin ku haña sa kiko Beibel ta siña realmente.

Kiko Bo Ta Kontestá?

• Kon nos por sa ku Dios ta interesá den nos?

• Pakiko nos ta na mundu?

• Kiko ta pasa ku nos ora nos muri?

• Ki rasgonan di e buki Beibel Ta Siña abo ta haña hopi útil?

[Preguntanan di Estudio]

[Plachinan na página 22]

Beibel ta siña nos ku lo bin un fin na sufrimentu

[Rekonosementu]

Ariba na man drechi, mucha muhé: © Bruno Morandi/age fotostock; man robes, señora: AP Photo/Gemunu Amarasinghe; abou na man drechi, refugiadonan: © Sven Torfinn/Panos Pictures

[Plachi na página 23]

Hende hustu lo biba pa semper den Paradeis