Bo Fe Ta Motivá Bo na Akshon?

UN OFISIAL di ehérsito tabata konvensí ku Hesus por a kura su esklabo paralítiko. Pero e ofisial di ehérsito no a invitá Hesus pa bini su kas. Podisé el a sinti ku e no tabata digno di esei òf ku komo pagano e no por a risibí Hesus. Mas bien, e ofisial a manda algun ansiano hudiu bai serka Hesus i bis’é: “Señor, mi no ta digno pa bo bin bou di mi dak, ma djis papia un palabra, i mi sirbidó lo ta kurá.” Notando ku e ofisial di ehérsito tabata konvensí ku Hesus por a kura hende asta for di un distansia, Hesus a bisa e multitut ku tabata siguié: “Di bèrdat mi ta bisa boso, mi no a haña ningun hende na Israel ku un fe asina grandi.”—Mateo 8:5-10; Lukas 7:1-10.

E eksperensia aki por yuda nos enfoká riba un aspekto importante di fe. Berdadero fe no ta nifiká djis kere den un kos; mester tin akshon su tras. Santiago, un di e eskritornan di Beibel, a splika: “Fe . . . , si e no wòrdu kompañá ku obranan, ta morto riba su mes.” (Santiago 2:17) Nos por komprondé e punto aki mas mihó ora nos konsiderá un ehèmpel di bida real di loke por sosodé ora fe bira inaktivo.

Na aña 1513 promé ku nos era, e nashon di Israel a bira Yehova su pueblo spesial pa medio di e aliansa di Lei. Komo mediadó di e aliansa ei, Moisés a informá e yunan di Israel loke Dios a bisa: “Si di bèrdat boso kier  obedesé mi bos i warda mi aliansa, e ora ei boso lo ta . . . un nashon santu.” (Eksodo 19:3-6) Sí, pa Israel por tabata santu, nan mester a obedesé Dios.

Hopi siglo despues, e hudiunan a kuminsá duna mas importansia na studiamentu di e Lei ku na aplikashon di su prinsipionan. Den e buki The Life and Times of Jesus the Messiah (Bida i Époka di Hesus e Mesias) di Alfred Edersheim, el a skirbi: “Pa hopi tempu kaba e [rabinan]—e ‘grandinan di mundu’ a establesé ku estudio ta mas importante ku obra.”

Ta bèrdat ku Dios a manda e israelitanan di ántes pa studia su rekisitonan ku diligensia. E mes a bisa: “E palabranan aki, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:6, 7) Pero e intenshon di Yehova tabata pa estudio di e Lei bira mas importante ku loke esaki ta manda òf indiká hende pa hasi? Laga nos mira.

Estudio Ekstenso

E ponementu di hopi énfasis riba studiamentu di e Lei lo por a parse rasonabel pa e israelitanan, ya ku segun un tradishon hudiu Dios mes tabata dediká tres ora pa dia na studia e Lei. Ya bo por imaginá bo kaba kon algun hudiu lo a rasoná: ‘Si Dios mes ta studia e Lei regularmente, kiko ta para pa su kriaturanan riba tera? Nan lo no mester ta kompletamente apsorbá den esei?’

Pa e tempu dje promé siglo di nos era, e intensidat ku kua e rabinan tabata analisá i interpretá e Lei a bruha nan manera di pensa kompletamente. Hesus a bisa di nan: “E eskribanan i e fariseonan . . . ta papia, ma nan no ta hasi. . . . Nan ta mara karganan pisá i ta  pone nan riba skouder di hende, ma nan mes no ta dispuesto pa lanta ni ún dede pa kita nan.” (Mateo 23:2-4) E lidernan religioso ei a pone un karga pisá di hopi regla riba e pueblo komun. Pero den nan hipokresia nan mes a krea ‘buraku’ den e reglanan aki ku lo a libra nan sí di kumpli ku e mesun leinan ei. Ademas, ku tur e studiamentu ei, e hendenan aki “a neglishá loke ta mas importante di e Lei: hustisia, miserikòrdia i fieldat.”—Mateo 23:16-24.

Esta un ironia! Den nan afan pa establesé nan mes hustisia, e eskriba- i fariseonan a kibra nèt e Lei ku nan a pretendé di defendé! Tur e siglonan di debate tokante palabra i otro detayenan menor di e Lei no a hala nan mas serka Dios. Nan tambe a wòrdu desviá pa loke apòstel Pablo a yama “papiamentu profano i bano,” “argumentunan kontradiktorio” i “konosementu” falsu. (1 Timoteo 6:20, 21) Pero e efekto ku investigashon interminabel tabatin riba nan tabata un otro problema serio: Nan no a haña e klase di fe ku a motivá nan na e akshon korekto.

Mente Yen di Konosementu, Kurason sin Fe

E manera ku e lidernan religioso hudiu a pensa tabata leu for di e manera ku Dios ta pensa! Djis promé ku e israelitanan a drenta e Tera Primintí, Moisés a bisa nan: “Paga bon tinu na tur e palabranan ku mi ta spièrta boso kuné awe, ku boso lo ordená boso yunan pa perkurá di kumpli ku nan, tur e palabranan di e lei aki.” (Deuteronomio 32:46) Ta bisto anto ku e pueblo di Dios no mester tabata solamente studiante serio di e Lei sino tambe kumplidó di e Lei.

Sin embargo, na vários okashon e nashon di Israel a resultá di ta infiel na Yehova. En bes di hasi e klase di obra korekto, e yunan di Israel “no a ker’é ni a skucha su bos.” (Deuteronomio 9:23; Huesnan 2:15, 16; 2 Krónikanan 24:18, 19; Jeremias 25:4-7) E kolmo di nan infieldat tabata ora nan a rechasá Hesus komo e Mesias. (Juan 19:14-16) Yehova Dios, na su turno, a rechasá Israel i a dirigí su atenshon na e nashonnan.—Echonan 13:46.

Nos tin ku tene masha kuidou pa nos no kai den e mesun trampa—pensando ku nos por adorá Dios ku mente yen di konosementu pero ku un kurason sin fe. Ku otro palabra, studiamentu di Beibel mester bai mas aleu ku djis yena nos kabes ku konosementu. Konosementu eksakto mester alkansá nos kurason p’e por tin un efekto positivo riba nos bida. Tin sentido pa nos studia kon pa planta bèrdura sin nunka hinka un simia den tera? Klaru ku no tin nada malu pa haña sa kon tin ku kultivá i mantené un hardin, pero ku esei so nos lo no kosechá nada! Meskos tambe, hende ku ta siña e rekisitonan di Dios pa medio di un estudio di Beibel mester permití e simianan di e bèrdat alkansá nan kurason pa e simianan aki sprùit i impulsá nan na akshon.—Mateo 13:3-9, 19-23.

“Sea Kumplidónan di e Palabra”

Apòstel Pablo a bisa ku “fe ta bin for di tendementu.” (Romanonan 10:17) E sekuensia aki di tende e Palabra di Dios pa despues ehersé fe den su Yu, Hesukristu, ta habri kaminda pa nos haña bida eterno. Sí, algu mas ta nesesario ku djis bisa: ‘Mi ta kere den Dios i Kristu.’

Hesus a urgi su siguidónan pa nan tin e klase di fe ku lo motivá nan na akshon: “Mi Tata ta wòrdu glorifiká, ku boso ta karga hopi fruta i asina ta demostrá di ta mi disipelnan.” (Juan 15:8) Despues, Santiago, mitar ruman di Hesus, a skirbi: “Sea kumplidónan di e palabra i no solamente tendedónan.” (Santiago 1:22) Ma kon nos por sa kiko nos tin ku hasi? Ku palabra i  ehèmpel, Hesus a indiká kiko nos tin ku hasi pa agradá Dios.

Tempu ku Hesus tabata riba tera, el a traha duru pa promové interesnan di Reino i pa glorifiká e nòmber di su Tata. (Juan 17:4-8) Den ki manera? Wèl, kisas hopi hende ta pensa riba Hesus su milagernan di kura hende enfermo i koho. Pero e Evangelio di Mateo ta mustra bon kla den ki manera prinsipal Hesus a glorifiká e nòmber di su Tata: “Hesus tabata pasa den tur e statnan i pueblitonan, i tabata siña den nan snoanan i proklamá e evangelio di reino.” Ta notabel ku Hesus no a limitá su ministerio na papia de bes en kuando ku algun amigu i konosí òf ku esnan ku el a topa den su bisindario. El a hasi un gran esfuerso, probechando di tur medio disponibel pa el a bishitá hende “den henter Galilea.”—Mateo 4:23, 24; 9:35.

Tambe Hesus a instruí su siguidónan pa partisipá den e obra di hasi disipel. En bèrdat, el a pone un ehèmpel perfekto pa nan imitá. (1 Pedro 2:21) Hesus a bisa su disipelnan fiel: “P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.”—Mateo 28:19, 20.

Nos tin ku atmití ku e trabou di prediká ta un berdadero desafio. Hesus mes a bisa: “Mi ta manda boso manera lamchi meimei di lobo.” (Lukas 10:3) Ora nos ta enfrentá oposishon, nos tendensia natural ta pa hala atras pa evitá ku nos ta haña nos ku un doló òf ansiedat innesesario. Esei ta loke a sosodé riba e anochi ku Hesus a wòrdu arestá. E apòstelnan a hui bai despues ku miedu a poderá di nan. Mas lat e mesun anochi ei, Pedro a nenga tres biaha ku e tabata konosé Hesus.—Mateo 26:56, 69-75.

Ademas, kisas lo bo keda sorprendí pa haña sa ku asta apòstel Pablo a bisa ku el a hiba un lucha pa prediká e bon nobo. El a skirbi e kongregashon na Tesalónika: “Nos a tuma un kurashi mediante nos Dios pa papia e bon nobo di Dios ku boso ku hopi lucha.”—1 Tesalonisensenan 2:1, 2, NW.

Tantu Pablo komo e otro apòstelnan a logra superá tur miedu di papia ku otro hende tokante e Reino di Dios, pues bo tambe por. Kon asina? E paso di mas importante ta pa dependé riba Yehova. Si nos pone tur nos fe den Yehova, e fe ei lo motivá nos na akshon i nos lo por hasi su boluntat.—Echonan 4:17-20; 5:18, 27-29.

Bo Aktividat Lo Ser Rekompensá

Yehova ta bon na altura di e esfuerso ku nos ta hasi pa sirbié. E sa por ehèmpel ki ora nos ta malu òf kansá. E ta konsiente ku tin biaha nos ta duda den nos mes. Ora problemanan finansiero ta preokupá nos òf ora nos salú òf nos emoshonnan ta parse di traishoná nos, semper Yehova ta konsiente di nos situashon.—2 Krónikanan 16:9; 1 Pedro 3:12.

Ora Yehova mira ku apesar di nos imperfekshon i difikultatnan, nos fe ta impulsá nos na akshon, e ta keda hopi kontentu! E sintimentu tierno ku Yehova tin pa su fiel sirbidónan no ta djis un emoshon vago; su tras tin un promesa. Bou di inspirashon divino, apòstel Pablo a skirbi: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.”—Hebreonan 6:10.

Bo por konfia e deskripshon ku Beibel ta duna di Yehova komo “un Dios di fieldat i sin inhustisia,” i komo “esun ku ta rekompensá esnan ku ta busk’é.” (Deuteronomio 32:4; Hebreonan 11:6) Por ehèmpel, un señora na California, Merka, ta kòrda: “Mi tata a sirbi komo un predikadó di tempu kompletu pa dies aña promé ku el a kuminsá lanta un famia.  Mi tabata gusta tende ora e tabata konta kon Yehova a sosten’é den su ministerio. Hopi biaha el a gasta su último dòler na gasolin p’e por a sali den sirbishi. Ora e yega kas e ta haña, sin ku e tabata spera nada, pakete di kuminda ta ward’é na porta.”

Ademas di sosten material, “e Tata di miserikòrdianan i Dios di tur konsuelo” ta duna nos sosten emoshonal i spiritual. (2 Korintionan 1:3) Un testigu ku a wanta hopi prueba atraves di añanan a bisa: “Un hende ku ta dependé riba Yehova ta un hende satisfecho. E sintimentu ei ta duna bo e oportunidat pa konfia den Yehova i mira kon e ta aktua pa yuda bo.” Humildemente bo por aserká ‘Esun ku ta skucha orashon,’ ku e siguransa ku lo e presta atenshon na bo preokupashonnan.—Salmo 65:2.

Trahadónan di e kosecha spiritual ta risibí un gran rekompensa. (Mateo 9:37, 38) Hopi ku ta partisipá den e ministerio públiko tin un mihó salú. Bo tambe por haña e benefisio ei. Pero, mas importante ainda, dunamentu di testimonio na otro hende ta yuda nos fortalesé nos bon relashon ku Dios.—Santiago 2:23.

Sigui Hasi Bon

Lo ta un gran ekibokashon pa un sirbidó di Dios kere ku Yehova ta keda desapuntá si debí na enfermedat òf behes e no por hasi tur loke e ke hasi den e ministerio. Meskos ta konta tambe pa esnan ku debí na kebrante di salú, responsabilidat di famia òf otro sirkunstansia no por hasi mashá.

Kòrda ku ora apòstel Pablo a sinti ku un enfermedat òf opstákulo a strob’é, el “a roga Señor tres biaha pa esaki por [a] kita” for di dje. En bes di kura Pablo pa asina e por a hasi mas den Yehova su sirbishi, Dios a bis’é: “Mi grasia ta basta pa bo, pasobra mi poder ta wòrdu hasí perfekto den debilidat.” (2 Korintionan 12:7-10) P’esei, bo por ta sigur ku apesar di kualke sirkunstansia difísil ku bo por ta pasando aden, bo Tata selestial ta balorá tur loke bo por hasi pa promové su interesnan.—Hebreonan 13:15, 16.

Nos Kreadó amoroso no ta eksigí mas di loke nos por duna. Simplemente e ta pidi nos pa nos tin e klase di fe ku ta motivá nos na akshon.

[Plachi na página 26]

Studiamentu di e Lei so tabata sufisiente?

[Plachinan na página 29]

Tras di nos fe mester tin obra