Profesianan Prinsipal di Beibel Ta Señalá na Kristu

“E testimonio di Hesus ta e spiritu di profesia.”—REVELASHON 19:10.

1, 2. (a) Kuminsando na aña 29 di nos era, ki desishon Israel mester a tuma? (b) Kiko nos lo konsiderá den e artíkulo aki?

TABATA aña 29 di nos era. E habitantenan di Israel tabata papia ku entusiasmo tokante e Mesias primintí. E ministerio di Juan Boutista a krea gran ekspektativa. (Lukas 3:15) Juan mes a nenga di ta e Kristu. Mas bien, mustrando riba Hesus di Názarèt, el a bisa: “[Mi] a duna testimonio ku esaki ta e Yu di Dios.” (Juan 1:20, 34) No a tarda muchu ku multitut di hende a kuminsá sigui Hesus pa skucha su siñansa i haña kurashon serka dje.

² Den e lunanan ku a sigui, Yehova a duna bastante evidensia tokante su Yu. E hudiunan ku a studia e Skritura i ku a opservá e obranan di Hesus tabatin un base sólido pa nan pone fe den dje. Ma nèt e pueblo aki ku tabatin un pakto ku Dios, por lo general a mustra un falta di fe. Masha poko di nan a rekonosé ku Hesus ta e Kristu, Yu di Dios. (Juan 6:60-69) Kiko abo lo a hasi si bo tabata biba den e tempu ei? Lo bo a sinti bo motivá pa aseptá Hesus komo e Mesias i bira su fiel siguidó? Ban konsiderá e evidensia ku Hesus mes a duna tokante su identidat ora nan a akus’é di ta kibra sabat, i tuma nota tambe di e pruebanan ku el a duna despues pa fortalesé e fe di su disipelnan fiel.

Hesus Mes A Duna e Evidensia

3. Ki sirkunstansianan a obligá Hesus na duna evidensia di ken e tabata?

³ Tabata tempu di Pasku hudiu na aña 31 di nos era. Hesus tabata na Yerusalèm. El a  kaba di kura un hòmber ku tabata malu pa 38 aña. Ma e hudiunan a persiguí Hesus pasobra el a hasi esaki riba sabat. Tambe nan a akus’é di blasfemia i a buska manera di mat’é pasobra el a yama Dios su Tata. (Juan 5:1-9, 16-18) Hesus a defendé su mes presentando tres argumentu poderoso ku lo a konvensé kualke hudiu di kurason onrado ken realmente e tabata.

4, 5. Kiko tabata e propósito di Juan su ministerio, i kon bon el a kumpli kuné?

⁴ Na promé lugá, Hesus a señalá n’e testimonio di esun ku a bai dilanti dje, esta, Juan Boutista, bisando: “Boso a manda mensahero serka Juan, i el a duna testimonio di e bèrdat. E tabata e lampi ku tabata sendí i ku tabata lusa, i pa un tempu boso tabata kier regosihá den su lus.”—Juan 5:33, 35.

⁵ Promé ku Herodes a enkarselá Juan Boutista inhustamente, Juan den un sentido tabata manera un “lampi ku tabata sendí i ku tabata lusa,” ya ku el a kumpli ku e asignashon ku Dios a dun’é pa prepará e kaminda p’e Mesias. Juan a bisa: “Pa e [Mesias] por wòrdu manifestá na Israel, mi a bin ta batisá ku awa. . . . Mi a mira e spiritu ta baha for di shelu manera un palomba, i el a keda riba dje. Mi no tabata konos’é, ma Esun ku a manda mi batisá ku awa a bisa mi: ‘Esun ku bo mira e spiritu baha i keda riba dje, ta esaki ta esun ku ta batisá ku spiritu santu.’ I mi a mira i a duna testimonio ku esaki ta e Yu di Dios.” * (Juan 1:26-37) Juan spesífikamente a identifiká Hesus komo e Yu di Dios, esta, e Mesias primintí. Juan su testimonio tabata asina konvinsente ku un ocho luna despues di su morto, hopi hudiu di kurason onrado a konfesá: “Tur e kosnan ku Juan a bisa di e hòmber aki tabata bèrdat.”—Juan 10:41, 42.

6. Pakiko e obranan di Hesus lo mester a konvensé e hendenan ku e tabatin e respaldo di Dios?

⁶ Siguientemente, Hesus a usa un otro argumentu pa konfirmá su kredensialnan komo e Mesias. El a señalá na su mes obranan ekselente komo evidensia di ku e tabatin e respaldo di Dios, bisando: “E testimonio ku mi tin ta mas grandi ku esun di Juan, pasobra e obranan ku e Tata a duna mi pa kumpli kuné, e mesun obranan ku mi ta hasi, ta duna testimonio di mi ku ta e Tata a manda mi.” (Juan 5:36) Ni Hesus su enemigunan no por a nenga e evidensia aki, ku a inkluí masha hopi milager. Un par di nan a puntra despues: “Kiko nos ta hasi? Pasobra e hòmber aki ta hasi hopi milager.” (Juan 11:47) Sin embargo, algun a reakshoná faborablemente i a puntra: “Ora ku e Kristu bin, lo e hasi mas milager ku esnan ku e hòmber aki ta hasi?” (Juan 7:31) E hendenan ku a skucha Hesus tabata den un bon posishon pa ripará e kualidatnan di e Tata den e Yu.—Juan 14:9.

7. Kon e Skritura Hebreo ta duna testimonio tokante Hesus?

⁷ Finalmente, Hesus a hala atenshon na un testimonio irefutabel. El a bisa: “E Skrituranan . . . ta duna testimonio di mi.” Anto el agregá: “Si boso a kere Moisés, boso lo a kere mi; pasobra el a skirbi di mi.” (Juan 5:39, 46) Naturalmente, Moisés tabata djis un di e hopi testigunan pre-kristian ku a skirbi tokante Kristu. I loke nan a skirbi a inkluí sientos di profesia i genealogianan detayá ku a señalá na e Mesias. (Lukas 3:23-38; 24:44-46; Echonan 10:43) I kiko di e Lei di Moisés? Apòstel Pablo a skirbi ku e “Lei a bira nos tutor pa guia nos na Kristu.” (Galationan 3:24) Sí, “e testimonio di Hesus ta e spiritu [òf, henter e inklinashon, intenshon i propósito] di profesia.”—Revelashon 19:10.

8. Pakiko hopi hudiu no a pone fe den e Mesias?

⁸ Tur e evidensianan aki—Juan su testimonio bon kla, Hesus su mes obranan poderoso  i su kualidatnan ku ta reflehá esnan di Dios i tambe e testimonio hopi amplio di e Skritura—lo no a konvensé bo ku Hesus tabata e Mesias? Ken ku tabatin un berdadero amor pa Dios i pa su Palabra lo a mira esaki mesora i ehersé fe den Hesus komo e Mesias primintí. Sin embargo, básikamente no tabatin e tipo di amor ei den Israel. Hesus a bisa su opositornan: “Mi konosé boso, ku boso no tin e amor di Dios den boso mes.” (Juan 5:42) En bes di “buska e gloria ku ta bin for di e úniko Dios,” nan tabata “risibí gloria un for di otro.” No ta nada straño anto ku nan no tabata di akuerdo ku Hesus, kende, meskos ku su Tata, ta odia tal manera di pensa!—Juan 5:43, 44; Echonan 12:21-23.

Un Vishon Profétiko A Fortalesé Nan

9, 10. (a) Pakiko e señal ku Hesus a duna su disipelnan a yega na un momentu oportuno? (b) Ki promesa remarkabel Hesus a hasi na su disipelnan?

⁹ A pasa mas ku un aña desde ku Hesus a duna e prueba menshoná anteriormente di ku e ta e Mesias. E Pasku di aña 32 a yega te pasa bai. Hopi hende ku tabata kere den Hesus a stòp di siguié, podisé pa motibu di persekushon, materialismo òf e preokupashonnan di bida. Algun kisas a keda konfundí òf desapuntá pasobra Hesus a rechasá e esfuersonan di e pueblo pa hasié rei. Ora e lidernan religioso hudiu a kuestioná su outoridat, el a nenga di duna un señal di shelu pa glorifiká su mes. (Mateo 12:38, 39) Esaki lo a straña algun hende. Ademas, Hesus a kuminsá revelá algu na su disipelnan ku nan a haña masha difísil pa komprondé, esta, ku “e mester bai Yerusalèm, i sufri hopi kos na man di e ansianonan i saserdotenan prinsipal i eskribanan, i wòrdu matá.”—Mateo 16:21-23.

¹⁰ Tabata falta apénas nuebe pa dies luna pa Hesus “a laga e mundu aki i bai serka e Tata.” (Juan 13:1) Profundamente preokupá pa su disipelnan leal, Hesus a primintí algun di nan nèt loke el a nenga e hudiunan sin fe: un señal for di shelu. El a bisa: “Di bèrdat mi ta bisa boso, tin algun di esnan ku ta pará akinan ku lo no eksperensiá morto promé ku nan mira e Yu di hende bin den su reino.” (Mateo 16:28) Ta opvio ku aki Hesus no tabata ke men ku algun di su disipelnan lo a biba te dia e Reino Mesiániko ser establesí na 1914. Loke Hesus tabatin na mente tabata pa duna tres di su disipelnan íntimo un bista adelantá di su gloria den poder di Reino. E vishon espektakular aki yama e transfigurashon.

11. Deskribí e vishon di e transfigurashon.

¹¹ Seis dia despues, Hesus a bai ku Pedro, Santiago i Juan riba un seru haltu, probablemente riba un di e tòpnan di Seru Hermon. Ei, Hesus a “transfigurá nan dilanti; i su kara tabata bria manera solo, i su pañanan a bira mes blanku ku lus.” E profetanan Moisés i Elias tambe a aparesé, i tabata papia ku Hesus. E suseso asombroso aki probablemente a tuma lugá anochi, i esei a hasié mas  impaktante ainda. De echo, e tabata asina real ku Pedro a ofresé pa lanta tres tènt òf tabernakel: un pa Hesus, un pa Moisés i un pa Elias. Miéntras ku Pedro tabata papiando, sombra di un nubia briante a tapa nan i un bos for di e nubia a bisa: “Esaki ta mi Yu stimá, den kende mi tin goso; tende na dje!”—Mateo 17:1-6.

12, 13. Ki impakto e vishon di e transfigurashon tabatin riba e disipelnan di Hesus, i pakiko?

¹² Ta bèrdat ku un poko mas promé Pedro a bisa ku Hesus ta “e Kristu, Yu di e Dios bibu.” (Mateo 16:16) Pero imaginá bo ta tende Dios mes duna su testimonio, konfirmando e identidat i papel di su Yu ungí! E vishon di e transfigurashon sigur tabata un eksperensia ku a fortalesé e fe di Pedro, Santiago i Juan! Ku un fe muchu mas fuerte awor, nan tabata mihó prepará pa loke tabata spera nan i p’e papel importante ku nan lo hunga den e futuro kongregashon.

¹³ E transfigurashon a laga un impreshon duradero riba e disipelnan. Mas ku 30 aña despues, Pedro a skirbi: “[Hesus] a risibí onor i gloria di Dios Tata, un bos manera esaki a wòrdu dirigí na dje dor di e gloria mahestuoso: ‘Esaki ta mi yu stimá, den kende mi tin mi goso’—i nos mes a tende e bos aki bin for di shelu, ora nos tabata huntu kuné riba e seru santu.” (2 Pedro 1:17, 18) Juan tambe a keda impreshoná ku e suseso aki. Mas ku 60 aña despues ku el a tuma lugá, el a referí aparentemente na dje ku e palabranan: “Nos a mira su gloria, gloria manera di e unigénito di e Tata.” (Juan 1:14) Sin embargo, e transfigurashon no ta e último vishon ku e siguidónan di Hesus a haña.

Mas Komprondementu pa Dios Su Sirbidónan Leal

14, 15. Den ki sentido apòstel Juan mester a keda te ora Hesus a bin?

¹⁴ Despues ku Hesus a resusitá, el a aparesé na su disipelnan na Laman di Galilea. Ei el a bisa Pedro: “Si mi kier pa [Juan] keda te ora mi bin, ta bo asuntu esei?” (Juan 21:1, 20-22, 24) Akaso e palabranan aki ta indiká ku apòstel Juan lo a biba mas ku e otro apòstelnan? Ta parse ku sí pasobra Juan a sirbi Yehova fielmente pa kasi 70 aña mas. Sin embargo, Hesus tabata ke men mas ku esei.

¹⁵ E ekspreshon “te ora mi bin” ta pone nos kòrda riba Hesus su referensia na ‘e Yu di hende biniendo den su reino.’ (Mateo 16:28) Juan a keda te ora Hesus a bini den sentido ku despues Juan a haña un vishon profétiko di Hesus biniendo komo Gobernante di e Reino. Ora Juan tabata yegando na fin di su bida, tempu ku e tabata den eksilio riba e isla di Patmos, el a risibí e Revelashon ku tur su señalnan profétiko asombroso di susesonan ku mester a tuma lugá durante “e dia di Señor.” E vishonnan espektakular aki a konmové Juan asina profundamente ku ora Hesus a bisa, “Sí, mi ta bin pronto,” Juan a respondé mesora: “Amèn. Bin, Señor Hesus.”—Revelashon 1:1, 10; 22:20.

16. Pakiko ta importante pa nos sigui fortalesé nos fe?

¹⁶ E hendenan di kurason onrado ku tabata biba den promé siglo a aseptá Hesus komo Mesias i a pone fe den dje. En bista di e gran falta di fe ku a reina rònt di nan, i debí na e  trabou ku nan tabatin ku hasi, i e pruebanan ku tabatin nan dilanti, tabata nesesario pa fortifiká nan fe. Hesus a duna prueba amplio di ku é tabata e Mesias i el a duna vishonnan profétiko instruktivo ku tabata un estímulo pa su siguidónan leal. Awe, nos ta hopi leu den “e dia di Señor.” Pronto, Kristu lo destruí henter e mundu malbado di Satanas i libra e pueblo di Dios. Nos tambe tin ku fortifiká nos fe dor di probechá plenamente di tur loke Yehova a suministrá pa nos bienestar spiritual.

Protehá Atraves di Skuridat i Tribulashon

17, 18. Ki kontraste skèrpi a eksistí den promé siglo entre e siguidónan di Hesus i hende ku a oponé e propósito di Dios, i kiko tabata e resultado final pa kada grupo?

¹⁷ Despues di Hesus su morto, su disipelnan yen di kurashi a obedesé su mandamentu pa duna testimonio di dje “na Yerusalèm i na henter Judea i Samaria, i te na e parti mas alehá di mundu.” (Echonan 1:8) Apesar di e ola di persekushon, Yehova a bendishoná e kongregashon kristian resien formá ku iluminashon spiritual i ku hopi disipel nobo.—Echonan 2:47; 4:1-31; 8:1-8.

¹⁸ Di otro banda, e futuro di hende ku a oponé e bon nobo tabata birando mas i mas skur. Proverbionan 4:19 ta bisa: “Kaminda di e malbado ta manera skuridat; nan no sa riba kiko nan ta trompeká.” E “skuridat” a bira mas intenso na aña 66 di nos era ora forsanan romano a rondoná Yerusalèm. Despues ku nan a retirá temporalmente sin ningun aparente motibu, e romanonan a bini bèk na aña 70, i e biaha aki sí nan a destruí e stat. Segun e historiadó hudiu Hosefo, mas ku un mion hudiu a pèrdè nan bida. Sin embargo, e kristiannan fiel a skapa. Kon bin? Pasobra ora e romanonan a retirá nan trupanan e promé biaha, nan a obedesé Hesus su mandamentu pa hui.—Lukas 21:20-22.

19, 20. (a) Dikon e pueblo di Dios no tin pakiko di tene miedu segun ku e mundu aki ta yegando su fin? (b) Ki komprondementu remarkabel Yehova a duna su pueblo den e dékadanan promé ku 1914?

¹⁹ Awe nos ta den un situashon similar. E binidero gran tribulashon lo nifiká fin di henter e mundu malbado di Satanas. Pero e pueblo di Dios no tin pakiko di tene miedu, pasobra Hesus a primintí: “Mi ta ku boso semper, te na fin di mundu.” (Mateo 28:20) Pa Hesus por a fortalesé e fe di su promé disipelnan i tambe prepará nan pa loke tabatin den futuro, el a duna nan un bista adelantá di su gloria selestial komo Rei Mesiániko. Kiko di nos awe? Na 1914, e vishon ei a bira un realidat. I esei sigur a fortalesé e fe di e pueblo di Dios! E ta enserá e promesa di un futuro maravioso i Yehova su sirbidónan a haña un komprondementu progresivo di e Reino Mesiániko ei. Meimei di e skuridat kresiente di e mundu aki, “e berea di e hustu ta manera lus di ourora, ku ta bria mas i mas te ora ku bira di dia kla.”—Proverbionan 4:18.

²⁰ Asta promé ku 1914, un grupo chikitu di kristian ungí a kuminsá komprondé bèrdatnan importante tokante e regreso di Señor. Por ehèmpel, nan a diserní ku Hesus lo a bini bèk na un manera invisibel, i nan a konkluí esei for di e palabranan di e dos angelnan ku a aparesé na aña 33 n’e disipelnan na momentu  ku Hesus tabata subiendo na shelu. Despues ku un nubia a kita Hesus for di bista di su disipelnan, e angelnan a bisa: “E Hesus aki, kende a wòrdu tumá for di boso na shelu, lo bolbe di e mesun manera ku boso a mir’é ta bai shelu.”—Echonan 1:9-11.

21. Kiko nos lo konsiderá den e siguiente artíkulo?

²¹ Ta Hesus su siguidónan leal so a mir’é bai. Meskos ku e transfigurashon, no tabatin un manifestashon públiko; mundu en general no tabata sa mes kiko a sosodé. Meskos lo a tuma lugá ora Kristu regresá den poder di Reino. (Juan 14:19) Ta su fiel disipelnan ungí so lo a diserní ku e tabata presente komo rei. Den e siguiente artíkulo nos lo mira ki efekto profundo e komprondementu ei tabatin riba nan, lokual a kulminá den e rekohementu di miónes di persona ku lo a bira súpdito di Hesus riba tera.—Revelashon 7:9, 14.

[Nota]

Bo Ta Kòrda?

• Ora nan a akusá Hesus di ta kibra sabat i di ta blasfemá, ki evidensia el a duna pa mustra ku e tabata e Mesias?

• Kon e promé disipelnan di Hesus a benefisiá di e transfigurashon?

• Kiko Hesus tabata ke men ora el a bisa ku Juan lo a keda te ora el a bin?

• Na 1914, ki vishon a bira realidat?

[Preguntanan di Estudio]

[Plachinan na página 10]

Hesus a presentá evidensia ku e tabata e Mesias

[Plachi na página 12]

E vishon di e transfigurashon a fortalesé fe di e disipelnan

[Plachi na página 13]

Juan mester a keda te ora Hesus “bin”