Buska Loke Ta Bon den Tur Hende
Buska Loke Ta Bon den Tur Hende
“Kòrda di mi, o mi Dios, pa bon.”—NEHEMÍAS 13:31.
1. Kon Yehova ta mustra bondat na tur hende?
DESPUES di vários dia skur yen di nubia, klaridat di solo ta bon biní. Hende su beis ta drecha, i nan ta sinti nan mas kontentu. Asina tambe, despues di periodonan largu di solo kayente i un wer sofokante i seku, un pal’i áwaseru—asta si ta djis pa un ratu—ta refreská i duna alivio. Ta Yehova nos Kreadó amoroso ta esun ku a diseñá e maravioso regalo aki di wer den e atmósfera. Hesus a hala hende su atenshon riba Dios su generosidat ora el a siña nan: “Stima boso enemigunan, bendishoná esnan ku ta maldishoná boso, hasi bon na esnan ku ta odia boso, i hasi orashon pa esnan ku ta maltratá boso i ta pèrsiguí boso, pa boso por ta yunan di boso Tata ku ta den shelu; pasobra e ta hasi su solo sali riba mal hende i riba bon hende, i ta laga awa yobe riba hende hustu i riba hende inhustu.” (Mateo 5:43-45) Sí, Yehova ta mustra bondat na tur hende. Su sirbidónan mester hasi esfuerso pa imit’é dor di buska loke ta bon den otro hende.
2. (a) Riba ki base Yehova ta mustra bondat? (b) Relashoná ku e manera ku nos ta reakshoná riba Yehova su bondat, kiko e ta ripará?
2 Riba ki base Yehova ta mustra bondat? For di tempu ku Adam a kai den piká, semper Yehova a sigui buska loke ta bon den hende. (Salmo 130:3, 4) Su propósito ta pa restorá humanidat obediente na bida den Paradeis. (Efesionan 1:9, 10) Su bondat inmeresí a duna nos e speransa di por ser liberá for di piká i imperfekshon mediante e Simia primintí. (Génesis 3:15; Romanonan 5:12, 15) Si nos aseptá e areglo di reskate, ku tempu esei ta habri kaminda pa nos por bolbe bèk na perfekshon. Aktualmente Yehova ta opservá kada un di nos pa wak kon nos ta reakshoná riba, entre otro, su generosidat. (1 Juan 3:16) E ta ripará tur loke nos ta hasi pa demostrá nos apresio pa su bondat. “Dios no ta inhustu pa lubidá boso trabou i e amor ku boso a mustra pa su nòmber.”—Hebreonan 6:10.
3. Ki pregunta meresé nos konsiderashon?
3 Kon anto nos por imitá Yehova dor di buska loke ta bon den otro hende? Laga nos analisá e pregunta aki den kuater área di bida: (1) e ministerio kristian, (2) famia, (3) e kongregashon i (4) nos relashon ku otro hende.
Den e Trabou di Prediká i Hasi Disipel
4. Den ki sentido partisipashon den e sirbishi kristian ta un manera di buska loke ta bon den otro hende?
4 “E kunuku ta e mundu,” Hesus a splika su disipelnan ora el a kontestá nan pregunta tokante e nifikashon di e ilustrashon di trigu i yerba shimaron. Komo Kristu su disipelnan di tempu moderno, nos ta rekonosé e bèrdat aki ora nos ta den sirbishi. (Mateo 13:36-38; 28:19, 20) Nos sirbishi di vèlt ta enserá duna deklarashon públiko di nos fe. E echo so ku Testigunan di Yehova awendia ta bon konosí pa nan sirbishi di kas pa kas i riba kaya, ta un prueba ku nos ta trahando diligentemente pa buska hende ku ta meresé e mensahe di Reino. Sí, Hesus a duna e instrukshon: “Den kualkier stat òf pueblito ku boso drenta, buska pa haña sa ta ken ta digno den dje.”—Mateo 10:11; Echonan 17:17; 20:20.
5, 6. Dikon nos ta perseverá den bishitá hende bes tras bes na nan kas?
5 Ora nos ta hasi bishita inesperá serka hende, nos ta opservá nan reakshon riba nos mensahe. Sa sosodé ku nos ta haña un miembro di famia ku kier skucha nos, pero otro ta stroba e kòmbersashon dor di grita for di den kas: “Nos no ta interesá.” Nos ta haña masha laf ku oposishon òf falta di interes di un persona ta afektá reakshon di un otro! Pero awor, kiko nos por hasi pa perseverá den buska loke ta bon den tur hende?
6 Nos siguiente bishita na e kas ei ora nos ta prediká den e teritorio atrobe lo por duna nos e oportunidat pa papia dirèkt ku e persona ku a kibra nos kòmbersashon anterior. Si nos ta kòrda loke a pasa e promé bes, esei por yuda nos pa ta prepará. Kisas e persona ku tabata kontra biaha pasá tabatin bon intenshon, pensando ku e mester stòp esun ku a reakshoná, di skucha e mensahe di Reino. Podisé informashon eróneo tokante nos intenshonnan a influensiá su punto di bista. Pero esei no ta stroba nos di persistí den prediká e bon nobo di Reino na e kas ei. Anto ku takto nos lo purba di korigí e punto di bista inkorekto. Nos ta interesá pa yuda tur hende yega na un konosementu eksakto di Dios. Despues di esei probablemente Yehova lo hala e persona ei serka dje.—Juan 6:44; 1 Timoteo 2:4.
7. Kiko por yuda nos keda positivo ora nos ta aserká hende?
7 Den e instrukshonnan ku Hesus a duna su disipelnan el a tene kuenta tambe ku oposishon di parti di miembronan di famia. No ta e mes a bisa: “Mi a bin pa pone un hòmber kontra su tata, i un yu muhé kontra su mama, i un nuera kontra su suegra”? Hesus a agregá: “Un hende su enemigunan lo ta e miembronan di su mes kas.” (Mateo 10:35, 36) Sin embargo, sirkunstansia i aktitut di hende sa kambia. Un malesa inesperá, morto di un famia, desaster, krísis emoshonal i kantidat di otro faktor por influensiá e manera ku hende ta reakshoná riba nos predikashon. Si nos tin un punto di bista negativo—esta, si nos ta pensa ku e hendenan ku nos ta prediká na dje lo no reakshoná nunka—nos ta realmente buskando loke ta bon den hende? Pakiko no bolbe bishitá e kasnan ei ku smak na un otro okashon? Kisas nan por reakshoná otro. Tin biaha no ta loke nos ta bisa so por pone un persona reakshoná otro, sino tambe e manera ku nos ta bis’é. Orashon ferviente promé ku nos kuminsá prediká sin duda lo yuda nos keda positivo i presentá e mensahe di Reino na un manera ku ta atraé tur hende.—Kolosensenan 4:6; 1 Tesalonisensenan 5:17.
8. Kiko lo por ta e resultado ora kristiannan ta buska loke ta bon den miembronan di famia ku no ta Testigu?
8 Den algun kongregashon tin vários miembro di e mesun famia ta sirbi Yehova. Kon bini? Hopi bes tabatin un miembro di famia di mas edat ku a perseverá i ku tabatin un bon relashon ku e otro miembronan i tambe ku su kasá. Dor di esei el a gana e atmirashon i rèspèt di esnan mas yòn, i asina a bira mas fásil pa nan kambia nan aktitut. Siguiendo e konseho di apòstel Pedro a yuda hopi esposa kristian gana nan esposo “sin palabra.”—1 Pedro 3:1, 2.
Den Famia
9, 10. Kon tantu Jakòb komo Jose a buska loke ta bon den nan miembronan di famia?
9 E banchinan estrecho ku ta mara miembronan di famia na otro ta un otro área den kua nos por buska loke ta bon den otro hende. Saka un lès for di e manera ku Jakòb a trata ku su yu hòmbernan. Na Génesis 37 versíkulo 3 i 4, Beibel ta mustra ku Jakòb tabatin un amor spesial pa Jose. Jose su rumannan tabata asina yalurs, ku nan a bai asina leu di a konspirá pa mata nan ruman. Sin embargo, tuma nota di e manera ku Jakòb i Jose a aktua mas despues. Nan tur dos a buska loke ta bon den nan miembronan di famia.
10 Tempu ku Jose tabata traha komo atministradó prinsipal di kuminda den e añanan ku tabatin gran skarsedat di kuminda na Egipto, el a risibí su rumannan bon. Ounke e no a laga nan sa mesora ken e tabata, el a maniobrá kosnan di tal manera ku a perkurá bon pa nan i ku nan tabatin kuminda pa bai hiba pa nan tata ku tabata di mayor edat. Sí, maske Jose su rumannan a odi’é, el a aktua na nan bienestar. (Génesis 41:53–42:8; 45:23) Tambe Jakòb a duna tur su yunan un bendishon profétiko ora e tabata bai muri. Ounke nan aktonan robes a pone ku nan a haña ménos privilegio, niun di nan no a keda sin haña herensia den e tera. (Génesis 49:3-28) Esta un maravioso ekspreshon di amor berdadero Jakòb a demostrá!
11, 12. (a) Kua ehèmpel profétiko ta enfatisá e importansia di buska loke ta bon den famia? (b) Ki lès nos ta saka for di e ehèmpel di e tata den e ilustrashon di Hesus di e yu pèrdí?
11 E gran pasenshi ku Yehova a demostrá den su trato ku e nashon infiel di Israel ta yuda nos komprondé mas aleu kon e ta buska loke ta bon den su pueblo. El a usa e sirkunstansianan familiar di profeta Oseas pa ilustrá su amor duradero. Gomer, esposa di Oseas, a kometé adulterio vários bes. Apesar di esei, Yehova a instruí Oseas: “Bai atrobe, stima un muhé ku ta stimá dor di su esposo, maske ku e ta un adúltera, meskos ku SEÑOR ta stima e yunan di Israel, maske nan ta bira na otro diosnan i ta gusta klòmpi di rasenchi.” (Oseas 3:1) Dikon el a haña e instrukshonnan ei? Yehova tabata sa ku den e nashon ku a desviá for di su kamindanan, tabatin hende ku lo a reakshoná faborablemente na su pasenshi. Oseas a deklará: “Despues e yunan di Israel lo bolbe i buska SEÑOR nan Dios i David nan rei; i nan lo bin na temblamentu na SEÑOR i na su bondat den e último dianan.” (Oseas 3:5) Esaki sigur ta un ekselente ehèmpel pa nos pensa riba dje ora nos tin problema den famia. Si bo sigui buska loke ta bon den otro miembronan di famia, en todo kaso bo ta pone un ekselente ehèmpel di pasenshi.
12 Hesus su ilustrashon di e yu pèrdí ta mustra nos mas ainda kon pa buska loke ta bon den nos propio famia. E yu hòmber mas chikitu a bolbe kas despues ku el a hiba un bida di paranda i malgastamentu. Su tata a trat’é ku miserikòrdia. Kon e tata a reakshoná riba e kehonan di e yu hòmber mayó ku nunka a bandoná e famia? Dirigiendo su mes na e yu hòmber mayó, e tata a deklará: “Mi yu, abo tabata semper serka mi, i tur loke mi tin ta di bo.” Pues e tata no a rabia skual e, ma simplemente a konfirmá su amor di tata. El a sigui: “Ma nos mester a fiesta i regosihá, pasobra e ruman hòmber di bo aki tabata morto i el a bolbe biba, i e tabata pèrdí i a wòrdu hañá.” Asina tambe nos por sigui buska loke ta bon den otro hende.—Lukas 15:11-32.
Den e Kongregashon Kristian
13, 14. Den ki manera asina nos por praktiká e lei real di amor den e kongregashon kristian?
13 Komo kristiannan nos tur ta hasi esfuerso pa kumpli ku e lei real di amor. (Santiago 2:1-9) Ta sierto ku podisé nos ta aseptá miembronan di nos kongregashon ku no tin e mesun kosnan material ku nos tin. Pero nos ta hasi “distinshon di persona” debí na rasa, kultura òf asta religion? Si esei ta e kaso, kon nos por kumpli ku e konseho di Santiago?
14 Un aktitut amigabel ku tur persona ku asistí na reunionnan kristian ta duna evidensia ku nos ta hospitalario. Ora nos ta tuma inisiativa pa papia ku esnan nobo ku ta bishitá e Salòn di Reino, kualkier nèrviosidat òf timides ku nan lo por tin na prinsipio probablemente lo disparsé. Ta p’esei mes, algun hende ku a asistí na un reunion kristian pa promé bes ta bisa: “Tur hende tabata amigabel. Tabata komo si fuera nan tur tabata konosé mi kaba. Mi a sinti mi na kas.”
15. Kon por yuda esnan mas hóben den kongregashon mustra interes den hende grandi?
15 Den algun kongregashon tin sierto hóbennan ta reuní huntu paden òf pafó di Salòn di Reino ora reunion kaba, evitando asina di asosiá ku hendenan mas grandi. Kiko ta e kosnan positivo ku por ser hasí pa para e tendensia aki? Klaru ku na promé lugá, ta e mayornan tin ku entrená nan yunan na kas i prepará nan pa e reunionnan. (Proverbionan 22:6) Nan por duna nan e tarea pa buska i pone kla e vários publikashonnan nesesario pa reunion pa asina tur hende tin loke nan mester pa bai reunion kuné. Tambe mayornan ta den e mihó posishon pa animá nan yunan pa kòmbersá ku rumannan di edat i esnan enfermo na Salòn di Reino. Si e muchanan tin algu signifikativo pa bisa e rumannan ei, nan mes tambe lo sinti nan satisfecho.
16, 17. Kon adultonan por buska loke ta bon den esnan mas yòn den e kongregashon?
16 Rumannan mas grandi den e kongregashon tambe mester mustra interes den e hóbennan di e kongregashon. (Filipensenan 2:4) Nan por tuma inisiativa pa hiba un kòmbersashon animante ku e hóbennan. Normalmente tin puntonan sobresaliente ku a ser tratá durante e reunion. Por puntra e hóbennan si nan a disfrutá di e reunion i si tabatin puntonan ku nan a gusta mas i ku nan lo por pone na práktika. Siendo un parti integral di e kongregashon, mester duna hóbennan rekonosementu p’e echo ku nan ta presta atenshon i elogiá nan pa e komentarionan ku nan a duna durante reunion òf pa kualkier parti ku nan a duna. E manera ku hóbennan ta trata ku esnan mas grandi den e kongregashon i e manera ku nan ta kumpli ku tareanan simpel na kas, lo indiká ku probablemente nan lo por kumpli ku responsabilidatnan mas grandi den bida despues.—Lukas 16:10.
17 Dor di aseptá responsabilidat, algun hóben a progresá asina bon te ku nan por a risibí tareanan di mas peso despues ku nan a desaroyá nan kualidatnan spiritual. Si un hóben tin kos di hasi, esei tambe ta evitá ku e ta kometé bobedat. (2 Timoteo 2:22) E tareanan ei lo por ‘proba’ kon apto ruman hòmbernan ku ta hasi esfuerso pa bira sirbidó ministerial ta. (1 Timoteo 3:10) E echo ku nan ta kla pa partisipá den e reunionnan, nan selo den sirbishi i tambe e interes personal ku nan ta mustra pa tur hende den e kongregashon, ta yuda ansianonan determiná ki potensial nan tin ora nan ta konsiderá pa duna nan mas responsabilidat.
Buska Loke Ta Bon den Tur Hende
18. Ki trampa ansianonan mester evitá ora di husga, i pakiko?
18 ‘No ta bon pa hasi distinshon di persona den hasimentu di huisio,’ Proverbionan 24:23 ta deklará. Sabiduria divino ta rekerí pa ansianonan evitá di mustra parsialidat ora nan ta husga asuntunan den e kongregashon. Santiago a deklará: “Sabiduria di ariba primeramente ta puru, despues pasífiko, suave, rasonabel, yen di miserikòrdia i bon fruta, imparsial, sin hipokresia.” (Santiago 3:17) Ta opvio ku ora ansianonan ta buska loke ta bon den otronan, nan tin ku tene kuidou pa relashonnan personal òf emoshon no influensiá nan huisio. E salmista Asaf a skirbi: “Dios ta para den su mes kongregashon; E ta husga meimei di e diosnan [òf tambe esnan ku parse dios, ku ta referí na huesnan humano]. Kuantu tempu mas lo bo husga inhustamente, i faboresé e malbado?” (Salmo 82:1, 2) Di akuerdo ku esei, ansianonan kristian ta evitá kualkier tendensia di faboritismo ora ta trata di asuntunan ku ta enbolbé un amigu òf famia. Di e manera aki nan ta konserbá unidat di e kongregashon i ta permití Yehova su spiritu flui libremente.—1 Tesalonisensenan 5:23.
19. Den ki maneranan nos por buska loke ta bon den otro hende?
19 Ora nos ta buska loke ta bon den nos rumannan, nos ta reflehá e aktitut ku Pablo a manifestá ora ku el a dirigí su mes na e kongregashon di Tesalónika. El a bisa: “I nos tin konfiansa den Señor tokante di boso, ku boso ta hasiendo i lo sigui hasi loke nos ta ordená.” (2 Tesalonisensenan 3:4) Ora nos ta buska loke ta bon den otronan nos lo ta mas inkliná pa pasa por haltu di nan fayonan. Nos lo buska áreanan riba kua nos por elogiá nos rumannan, i siguramente nos lo evitá di kritiká nan. Pablo a skirbi: “Ademas, ta wòrdu rekerí di mayordomo ku kada un ta wòrdu hañá fiel.” (1 Korintionan 4:2) No ta nos rumannan ku ta hiba delantera so nos ta stima debí na nan fieldat; esaki ta konta pa tur nos rumannan. Asina nos ta hala mas serka nan, fortalesiendo e lasonan di amistat kristian. Nos ta adoptá un punto di bista manera esun ku Pablo tabatin di e rumannan den su tempu. Nan ta “kompañeronan di trabou pa e reino di Dios” i “un enkurashamentu” pa nos. (Kolosensenan 4:11) Asina nos ta manifestá e aktitut di Yehova.
20. Ki bendishonnan esnan ku ta buska loke ta bon den tur hende lo haña?
20 Siguramente nos ta hasi e mesun orashon ku Nehemias: “Kòrda di mi, o mi Dios, pa bon.” (Nehemias 13:31) Nos ta masha kontentu ku Yehova ta buska loke ta bon den hende! (1 Reinan 14:13) Laga nos aktua meskos den nos trato ku otro hende. Dor di hasi esei, nos ta habri e posibilidat pa nos por tin e speransa di ser salbá i haña bida eterno den e mundu nobo ku awor ta masha serka.—Salmo 130:3-8.
Kon Lo Bo Kontestá?
• Riba ki base Yehova ta mustra bondat na tur hende?
• Kon nos por buska loke ta bon den otro hende
• den nos sirbishi?
• den nos famia?
• den nos kongregashon?
• den tur nos relashonnan?
[Preguntanan di Estudio]
[Plachi na página 18]
Maske Jose su rumannan a odi’é anteriormente, el a buska loke ta bon den nan
[Plachi na página 19]
Oposishon no ta stroba nos di purba yuda tur hende
[Plachi na página 20]
Apesar di nan pasado, niun di e yunan di Jakòb no a keda sin haña su bendishon
[Plachi na página 21]
Risibí tur hende na reunionnan kristian