Sembra Simia dje Berdad di Reino

“Sembra bo simia mainta i te atardi no laga bo man sosegá.”—ECLESIASTES 11:6.

1. Den ki sentido cristiannan ta sembra simia awe?

AGRICULTURA a hunga un papel importante den e sociedad hebreo di antigwedad. Esei ta e motibu pakico Jesus, kende a pasa henter su bida humano den e Tera Primintí, a incorporá tópiconan di agricultura den su ilustracionnan. Por ehempel, el a compará predicacion dje bon nobo dje Reino di Dios cu sembramentu di simia. (Mateo 13:1-9, 18-23; Lucas 8:5-15) Te n’e dia djawe, sea cu nos ta biba den un sociedad unda nan ta haci agricultura of no, sembra simia spiritual dje forma aki ta e trabou di mas importante cu cristiannan ta efectuá.

2. Con importante nos obra di predicá ta, i kico ta algun di e cosnan cu ta ser hací awe pa cumpli cuné?

² Participá den e trabou di sembra e berdad di Bijbel den e tempu di fin aki ta un privilegio grandi. E importancia dje obra aki ta bon expresá na Romanonan 10:14 i 15: “Con, na nan turno, nan lo tende sin un hende pa predicá? Con, en buelta nan lo predicá a ménos  cu nan a ser mandá? Net manera ta pará skirbí: ‘Ki bunita ta e pianan di esnan cu ta declará bon nobo di bon cosnan!’” Nunca tabata asina importante pa sigui padilanti cu un actitud positivo cumpliendo cu e comision aki cu Dios a duna. P’e motibu ei, Testigonan di Jehova ta completamente ocupá cu produccion i distribucion di Bijbel i literatura pa studia Bijbel den 340 idioma. Pa prepará e material aki ta rekerí mas cu 18.000 boluntario na nan sede mundial i na oficinanan di sucursal den vários pais. I casi seis miyon Testigo ta participá den distribuí e literatura bíblico aki rond mundu.

3. Kico ta ser lográ mediante e trabou di sembra berdad di Reino?

³ Kico ta e fruta dje trabou duru aki? Manera tabata e caso na principio di cristianismo, hopi hende awe ta aceptá e berdad. (Echonan 2:41, 46, 47) Sin embargo, loke ta mas importante ainda cu e gran cantidad di publicadónan di Reino recien bautisá, ta e echo cu e testimonio inmenso aki ta contribuí n’e santificacion di Jehova su nomber i na su vindicacion como e único Dios berdadero. (Mateo 6:9) Ademas, conocimentu dje Palabra di Dios ta mehorá bida di hopi hende i por hiba na nan salbacion.—Echonan 13:47.

4. Te na ki grado e apostelnan tabata preocupá pa e hendenan cu nan a predicá na dje?

⁴ E apostelnan tabata bon conciente cu e bon nobo ta importante ya cu e por duna bida, i nan tabatin sintimentu profundo pa esnan cu nan a predicá na dje. Esaki ta bisto for dje palabranan di apostel Pablo ora el a skirbi: “Teniendo tierno cariño pa boso, cu muchu gustu nos a compartí cu boso, no solamente e bon nobo di Dios, sino tambe nos propio alma, pasobra boso a bira stimá pa nos.” (1 Tesalonicensenan 2:8) Dor di manifestá e preocupacion genuino ei pa hende, Pablo i e otro apostelnan tabata imitá Jesus i e angelnan celestial, kendenan ta hopi enbolbí den e trabou di salba bida aki. Laga nos repasá e papel importante cu e sirbidónan celestial aki di Dios a hunga den sembra e berdad di Reino, i laga nos mira con nan ehempel ta animá nos pa cumpli cu nos papel.

Jesus—E Sembradó dje Berdad di Reino

5. Ora Jesus tabata riba tera, cu cua trabou el a ocupá su mes principalmente?

⁵ Jesus, un homber perfecto, tabatin e poder pa proveé hopi cos bon den e sentido material pa hende di su tempu. Por ehempel, lo e por a solucioná hopi malcomprendimentu médico di su dia, of lo e por a aumentá hende su comprendimentu riba otro terenonan di ciencia. Sin embargo, for di principio di su ministerio el a mustra bon cla cu su comision tabata pa predicá e bon nobo. (Lucas 4:17-21) I na final di su ministerio, el a splica: “Pa esaki mi a nace, i pa esaki mi a bini na mundu, pa mi duna testimonio di e berdad.” (Juan 18:37) Pues, el a ocupá su mes cu sembra simia dje berdad di Reino. Siña su contemporáneonan tocante Dios i Su propósitonan tabata mas importante cu cualkier otro educacion cu Jesus lo por a duna nan.—Romanonan 11:33-36.

6, 7. (a) Ki promesa remarcabel Jesus a haci promé cu el a subi na shelu, i con e ta cumpli cuné? (b) Con e actitud di Jesus pa cu e trabou di predicá ta influenciá abo personalmente?

⁶ Jesus a referí na su mes persona como e Sembrador dje berdad di Reino. (Juan 4:35-38) El a plama simia dje bon nobo na tur oportunidad. Asta ora e tabata muriendo riba staca, el a proclamá bon nobo tocante un futuro paradijs terenal. (Lucas 23:43) Ademas, su preocupacion profundo p’e bon nobo ser predicá no a caba na momento cu el a muri riba e staca di tormento. Promé cu el a subi na shelu, el a manda e apostelnan sigui sembra simia dje berdad di Reino i haci disipel. I n’e momento ei, Jesus a haci nan un promesa remarcabel. El a bisa: “Mira! Mi ta cu boso tur e dianan te n’e conclusion dje sistema di cosnan.”—Mateo 28:19, 20.

⁷ Cu e palabranan ei Jesus a comprometé  su mes pa apoyá, dirigí i protehá e trabou di predicá e bon nobo “tur e dianan te n’e conclusion dje sistema di cosnan.” Te den nos dia, Jesus ta sigui mustra interes personal den e trabou di predicá. E ta nos Lider, encargá cu e trabou di sembra e berdad di Reino. (Mateo 23:10) Como Cabes dje congregacion cristian, e ta responsabel dilanti Jehova p’e obra mundial aki.—Efesionan 1:22, 23; Colosensenan 1:18.

E Angelnan Ta Declará Noticia Alegre

8, 9. (a) Con e angelnan a desplegá un interes genuino den asuntunan humano? (b) Den ki sentido por ser bisá cu nos ta un exhibicion teatral pa e angelnan?

⁸ Ora Jehova a crea tera, e angelnan “a sclama huntu gososamente, i . . . a cuminsá grita den aplauso.” (Job 38:4-7) Desde e tempu ei, e criaturanan celestial aki a desplegá un interes intenso den asuntunan humano. Jehova a usa nan pa transmití pronunciacionnan divino na hende. (Salmo 103:20) Esaki ta e caso foral en coneccion cu e plamamentu dje bon nobo  den nos dia. Den e revelacion duná na dje, apostel Juan a mira un “angel bula meimei di shelu” i esaki tabatin “bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo, bisando cu bos haltu: ‘Teme Dios i dun’é gloria, pasobra e ora di huicio di dje a yega.’”—Revelacion 14:6, 7.

⁹ Bijbel ta referí na angel como “spiritu pa sirbishi público, mandá pa sirbi na fabor di esnan cu lo heredá salbacion.” (Hebreonan 1:14) Segun cu e angelnan ansiosamente ta cumpli cu nan trabounan asigná, nan tin e oportunidad di observá nos i nos trabou. Ta como si fuera nos ta cumpli cu nos trabou riba un plataforma di teater, unda un auditorio celestial tin bon bista riba nos. (1 Corintionan 4:9) Ta algu serio pa pensa riba i tog emocionante pa sa cu nos no ta traha nos so como sembradó dje berdad di Reino!

Nos Ta Cumpli cu Nos Papel Ansiosamente

10. Con por aplicá e conseho práctico di Eclesiástes 11:6 na nos trabou di evangelisá?

¹⁰ Con bini Jesus i e angelnan ta asina interesá den nos trabou? Jesus a duna un motibu ora el a bisa: “Mi ta bisa boso, goso ta lanta entre e angelnan di Dios pa un pecadó cu ta repentí.” (Lucas 15:10) Nos tambe tin e interes genuino ei den hende. P’esei, nos ta haci nos best pa plama simia dje berdad di Reino tur caminda. Por aplicá e palabranan di Eclesiástes 11:6 na nos trabou. Einan Bijbel ta amonestá nos: “Sembra bo simia mainta i te atardi no laga bo man sosegá; pasobra bo no sa unda esaki lo tin éxito, sea aki of aya, of si nan tur dos lo ta igualmente bon.” Ta cierto cu pa cada persona cu aceptá nos mensahe por tin algun shen of asta miles cu ta rechas’é. Pero mescos cu e angelnan, nos ta alegrá ora asta “un pecadó” aceptá e mensahe di salbacion.

11. Con eficas uso di publicacionnan basá riba Bijbel por resultá?

¹¹ Predicá e bon nobo ta enbolbé hopi cos. Un yudansa importante den e trabou aki ta e informacionnan imprimí basá riba Bijbel cu Testigonan di Jehova ta usa. Den algun aspecto, e publicacionnan aki tambe ta manera simia cu ta ser plamá tur caminda. Nos no sa unda nan lo tin éxito. Tin bes un publicacion por pasa di man pa man promé cu un hende les’é. Den algun caso, Jesus i e angelnan asta por dirigí asuntunan di tal manera cu esnan di curason onrado por beneficiá di dje. Considerá algun experencia cu ta mustra con Jehova ta soru pa resultadonan inesperá i maraviyoso den casonan caminda a laga literatura den man di hende.

 E Trabou dje Dios Berdadero

12. Con un revista bieu a hunga un papel importante den yuda un famia yega na conocé Jehova?

¹² Na 1953, Robert cu Lila i nan yunan a muda di un stad grandi pa un cas di hacienda bieu i decaí den campo na Pennsylvania, Merca. Un poco promé cu nan a drenta den dje, Robert a dicidí pa traha un baño bou di un trapi. Despues di a kita un par di tabla, el a descubrí cu tras dje muraya, raton a warda papel kibrá, casca di ‘walnut’ i otro cos sushi. Einan, meimei di tur esei, tabatin un copia dje revista E Epoca di Oro. Robert tabata specialmente interesá den un artículo cu ta trata e tópico di lantamentu di yu. E guia cla basá riba Bijbel cu e revista a duna a impresión’é asina tantu, cu el a bisa Lila cu nan ta bai djoin “e religion di E Epoca di Oro.” Den djis un par di siman, Testigonan di Jehova a bini na nan porta, pero Robert a bisa nan cu e famia ta interesá solamente den “e religion di E Epoca di Oro.” E Testigonan a splica cu awor E Epoca di Oro tin un nomber nobo, esta, Spierta! Robert i Lila a cuminsá studia Bijbel regularmente cu e Testigonan, i cu tempu nan a bautisá. Nan, na nan turno, a sembra simia dje berdad den nan yunan i a cosechá abundantemente. Awe, mas cu 20 miembro dje famia aki, incluso tur nan shete yunan, ta sirbidónan bautisá di Jehova Dios.

13. Kico a motivá un pareha na Puerto Rico pa desaroyá interes den Bijbel?

¹³ Mas o ménos 40 aña pasá, William i Ada, un parehá casá di Puerto Rico, no tabatin interes pa studia Bijbel. Ki ora cu Testigonan di Jehova a bati na nan porta, e pareha tabata haci como si fuera nan no ta na cas. Un dia William a bishitá un lugá cu ta bende artículo usá, p’e cumpra un cos cu e tabatin mester p’e drecha algu na cas. Ora ya e tabata bayendo for dje lugá, su bista a cai riba un buki geel-berde hincá den un barí di sushi grandi. Tabata e buki Religion, publicá dor di Testigonan di Jehova na 1940. William a bai cas cu e buki i ora el a lesa tocante e diferencia entre religion falsu i religion berdadero esei a emocion’é mashá. E siguiente bes cu Testigonan di Jehova a yama na nan porta, William cu Ada tabata contentu pa scucha e mensahe i a cuminsá studia Bijbel cu nan. Algun luna despues, na 1958, nan a bautisá n’e Asamblea Internacional Boluntad Divino. Desde e tempu ei, nan a yuda mas cu 50 hende bira parti di nos hermandad cristian.

14. Manera un experencia ta mustra, ki potencial nos literatura basá riba Bijbel tin?

¹⁴ Karl tabatin solamente 11 aña i tabata un poco mala mucha. Segun e, semper e tabata hañ’é den problema. Su tata, un predicadó aleman metodista, a siñ’é cu ora mal hende muri nan ta kima den fiernu. P’esei, Karl tabatin masha miedu di fiernu. Un dia na 1917,  Karl a mira un pida papel cu informacion riba caya i a cog’é. Miéntras e tabata les’é, su wowo a cai mesora riba e pregunta: “Kico ta fiernu?” E papel tabata un invitacion pa un discurso público riba e tópico di fiernu, patrociná pa e Studiantenan di Bijbel, conocí awe como Testigonan di Jehova. Despues di mas o ménos un aña, despues di vários sesion di studio di Bijbel, Karl a bautisá, i asina a bira un Studiante di Bijbel. Na 1925 el a haña invitacion pa bai traha na e sede mundial di Testigonan di Jehova, caminda e ta sirbi ainda. Un carera cristian di mas cu ocho década a cuminsá cu un pida papel riba caya.

15. Kico Jehova por haci segun cu e ta haña ta bon?

¹⁵ Ta berdad cu hende no por determiná si e angelnan tabata directamente enbolbí den e experencianan aki, i si ta asina, te na ki grado nan tabata enbolbí. Tog, nos no mester duda nunca cu Jesus i e angelnan ta hunga un papel activo den e trabou di predicá i cu Jehova por guia asuntunan segun cu e ta haña ta bon. E experencianan aki i hopi otro similar ta ilustrá e posibel bon efecto cu nos literatura por tin despues cu e sali for di nos man.

Nos A Ser Confiá cu un Tesoro

16. Kico nos por siña for dje palabranan na 2 Corintionan 4:7?

¹⁶ Apostel Pablo a papia di un ‘tesoro den weanan di klei.’ E tesoro ei ta e comision di predicá cu Dios a duna, i e weanan di klei ta hende cu Jehova a confia cu e tesoro aki. Siendo cu e hendenan aki ta imperfecto i cu limitacion, Pablo ta sigui bisa cu e echo cu nan a haña e comision ei ta demostrá cu ‘e poder mas ayá di loke ta normal ta di Dios i no loke ta bini di nos mes.’ (2 Corintionan 4:7) Sí, nos por conta cu Jehova ta duna nos e poder necesario pa yuda nos cumpli cu e trabou cu tin nos dilanti.

17. Kico nos lo topa cuné miéntras nos ta sembra simia dje berdad di Reino, i pakico tog nos mester keda cu un actitud positivo?

¹⁷ Hopi bes nos tin cu haci sacrificio. Algun teritorio por ta difícil of incumbiniente pa traha. Tin áreanan caminda mayoria di hende ta extremadamente indiferente, asta hostil. Kisas a haci esfuerso den e localidadnan ei sin éxito obvio. Pero ningun esfuerso ta demasiado grandi ora tin asina tantu cos den wega. Corda, e simianan cu bo ta sembra awor por duna hende felicidad awor i tambe bida eterno den futuro. Hopi bes e palabranan di Salmo 126:6 a proba di ta berdad: “Esun cu sin falta ta bai, asta yorando, hibando cuné un sacu yen di simia, sin falta lo drenta cu sclamacion gososo, cargando su tapushinan di maishi.”

18. Con nos por presta constante atencion na nos ministerio, i pakico nos mester haci esaki?

¹⁸ Laga nos probechá di tur oportunidad pa sembra simia dje berdad di Reino generosamente. Laga nos no lubidá nunca cu, maske nos ta esnan cu ta planta i ta muha e simianan, ta Jehova ta esun cu ta haci nan crece. (1 Corintionan 3:6, 7) Sin embargo, mescos cu Jesus i e angelnan ta cumpli cu nan parti dje trabou, Jehova ta spera cu nos ta cumpli cu nos ministerio plenamente. (2 Timoteo 4:5) Laga nos presta atencion constante na nos siñamentu, na nos actitud i nos celo den e ministerio. Di con? Pablo ta contestá: “Haciendo esaki lo bo salba tantu bo mes como esnan cu ta scucha bo.”—1 Timoteo 4:16.

Kico Nos A Siña?

• Den ki maneranan nos trabou di sembra ta producí bon resultado?

• Con Jesucristo i e angelnan ta enbolbí den e trabou di evangelisá awe?

• Di con nos mester ta generoso como sembradónan dje berdad di Reino?

• Ora nos topa cu indiferencia of hostilidad den nos ministerio, kico lo mester motivá nos pa sigui perseverá?

[Preguntanan di Estudio]

[Plachi na página 15]

Mescos cu cunukeronan den antiguo Israel, cristiannan awe ta plama simia dje berdad di Reino generosamente

[Plachi na página 16, 17]

Testigonan di Jehova ta producí i distribuí un variedad grandi di publicacion basá riba Bijbel den 340 idioma