1. Ki kambio a tuma lugá den algun pais den e dékadanan resien?

PA MÍLES di aña, mayoria di hende tabatin un religion. Pero, den e dékadanan resien un kambio grandi a tuma lugá. Mas i mas hende no ta kere den Dios. De echo, den algun pais mayoria di hende ta bisa ku nan no ta pertenesé na un religion. *—Mat. 24:12.

2. Ki ta algun motibu ku kada bes tin mas tantu hende ku no ta kere den Dios?

² Dikon kada bes tin mas tantu hende ta bisa ku nan no ta kere den Dios? * Kisas pasobra algun ta enfoká riba plaser i nan mes problemanan. (Luk. 8:14) Otronan a bira ateista. Tambe tin esnan ku ta kere den Dios pero ta pensa ku religion ta ouderwets, di poko importansia i no ta kuadra ku siensia i lógika. Kisas nan ta pensa asina pasobra nan ta tende nan amigunan, maestronan di skol òf personahenan famoso di medio di komunikashon bisa ku bida a kuminsá pa medio di evolushon. Pero, kasi nunka nan no ta tende rasonamentu lógiko ku ta yuda nan kere den Dios. Otro hende a haña disgustu di lider religioso ku ta golos pa plaka i poder. Den algun pais, gobièrnu ta traha lei ku no ta permití hende adorá Dios libremente.

3. Kiko nos lo siña den e artíkulo akí?

³ Hesus a manda nos pa “hasi hende di tur nashon [su] disipel.” (Mat. 28:19) Kon nos por yuda hende ku no ta  kere den Dios siña stima Dios i bira disipel di Kristu? Nos mester komprondé ku e manera ku un hende ta reakshoná na nos mensahe ta dependé di e lugá kaminda el a lanta. Por ehèmpel, un hende ku a lanta na Europa lo reakshoná diferente for di un hende di Asia. Dikon? Na Europa, hopi hende sa algu di Beibel i a yega di tende ku Dios a krea tur kos. Pero, na Asia mayoria di hende sa masha poko òf nada mes tokante Beibel, i kisas nan no ta kere den un Kreador. P’esei, den e artíkulo akí nos lo siña kon pa yega na kurason di tur esnan ku nos ta topa den sirbishi, sin importá di unda nan ta bini òf kiko nan ta kere aden.

4. Dikon nos por ta positivo?

⁴ Sea Positivo. Tur aña, vários hende ku no tabata kere den Dios a bira Testigu di Yehova. Hopi di nan ya tabatin norma moral haltu i nan tabata disgustá ku e hipokresia ku tin den religion falsu. Otronan no tabatin norma moral haltu i mayoria di nan mester a stòp ku mal hábito. Ku yudansa di Yehova, nos por tin sigur ku nos lo haña esnan ku ta “dispuesto pa aseptá e bèrdat ku ta hiba na bida eterno.”—Echo. 13:48; 1 Tim. 2:3, 4.

5. Kiko ta pone ku generalmente algun hende ta reakshoná bon na nos mensahe?

⁵ Sea Amabel i Mustra Takto. Generalmente, hende ta reakshoná bon na nos mensahe, no pa loke nos ta bisa, sino pa e manera ku nos ta bis’é. Nan ta gusta ora nos ta amabel, ta mustra takto i interes sinsero den nan. Nos no ta obligá nan skucha nos. Na lugá di esei, nos ta purba di komprondé kiko nan ta pensa di religion i dikon nan ta pensa asina. Por ehèmpel, tin hende ku no ta gusta papia tokante religion ku hende ku nan no konosé. Otronan ta haña ku ta mal manera pa puntra un hende kiko e ta pensa di Dios. I tin otro hende tin bèrgwensa pa hende mira nan ta lesa Beibel, foral si ta ku un Testigu di Yehova. Sea kual sea e kaso, nos ta purba di respetá nan sintimentunan.—2 Tim. 2:24, nota.

6. Kon apòstel Pablo a mustra ku el a adaptá su mes, i kon nos por imit’é?

⁶ Kisas algun hende no ta gusta ora nos usa palabra manera “Beibel,” “kreashon,” “Dios” òf “religion.” Kiko nos por hasi? Nos por adaptá nos método di kòmbersá meskos ku apòstel Pablo a hasi. Ora el a papia ku hudiu, el a usa Skritura pa rasoná ku nan. Pero, ora el a papia ku e filósofonan griego na Areópago, e no a referí direktamente na Beibel. (Echo. 17:2, 3, 22-31) Kon nos por imitá Pablo? Si nos ta kòmbersá ku un hende ku no ta kere den Beibel, kisas ta mihó pa no referí direktamente na dje. Si nos ripará ku un hende no gusta pa otronan mir’é ta lesa for di Beibel ku nos, nos por purba di mustr’é e tekstonan na un manera mas diskreto usando por ehèmpel un telefòn òf tablet.

7. Kiko kisas nos tin ku hasi si nos ke imitá e ehèmpel di Pablo deskribí na 1 Korintionan 9:20-23?

⁷ Sea Komprensivo i Skucha Bon. Nos tin ku purba di komprondé kiko ta influensiá pensamentu di e hendenan ku nos ta prediká na dje. (Pro. 20:5) Ban analisá Pablo su ehèmpel atrobe. Pablo tabata hudiu. Pues, sigur e mester a adaptá su manera di prediká ora el a papia ku hende no hudiu pasobra nan tabata sa masha poko òf nada mes di Yehova i e Skritura. Di mes manera, si nos ke komprondé e hendenan den nos teritorio i pone nos mes den  nan sapatu, kisas nos tin ku buska informashon den nos publikashonnan òf pidi yudansa di otro publikadó ku tin mas eksperensia.—Lesa 1 Korintionan 9:20-23.

8. Kon nos por kuminsá un kòmbersashon tokante Beibel?

⁸ Nos meta ta pa haña hende “digno di e mensahe.” (Mat. 10:11) Pa logra esei, nos tin ku puntra e persona su opinion i skucha bon na loke e ta bisa. Un ruman na Inglatera ta puntra e hendenan kiko nan ta pensa ku hende mester hasi pa por tin un matrimonio felis, lanta yu òf trata ku inhustisia. Despues di skucha bon na loke nan kontestá, e ta bisa: “Kiko bo ta pensa di e konseho akí skirbí kasi 2.000 aña pasá?” E ora ei, sin menshoná “Beibel,” e ta mustra nan algun teksto interesante riba su telefòn.

9. Menshoná un manera ku nos por yega na kurason di hende ku por lo general no ke papia di Dios.

⁹ Kon nos por yega na kurason di hende ku por lo general no ke papia di Dios? Nos por papia tokante algu ku ta interesá nan. Por ehèmpel, hopi hende ta interesá den naturalesa. Pues, nos por bisa algu manera: “Kisas bo a ripará ku ora sientífiko inventá algu nobo, mayoria di biaha nan ta kopia algu ku ya kaba ta eksistí den naturalesa. Por ehèmpel, pa diseñá mikrofon nan ta studia orea di animal, i pa diseñá kámara nan ta studia wowo di animal. Pero, segun bo, e kosnan den naturalesa a eksistí di nan mes? Un persona a krea nan? Òf bo ta pensa algu otro?” Despues di skucha bon, nos por puntra: “Ora e sientífikonan ei ta studia e diseño di orea i wowo, bo no ta kere ku nan ta siñando for di un persona? Mi a haña masha interesante ku un poeta di antigwedat a puntra si esun ku a krea orea no por skucha i si esun ku a krea wowo no por mira. Despues, e poeta a bisa ku esun ku a krea tur e kosnan ei ta esun ku ta duna hende konosementu. Algun sientífiko ta di akuerdo ku e palabranan ei i ta kere den kreashon.” (Sal. 94:9, 10) Djei, nos por mustr’é un vidio for di jw.org^® di e seri “Punto di Bista Tokante e Orígen di Bida” bou di “Entrevista i Eksperensia.” (Bai na PUBLIKASHON > VIDIO.) Òf, nos por dun’é e foyeto Bida Ta Obra di un Kreador?

10. Menshoná un otro manera ku nos por kuminsá un kòmbersashon ku hende ku no ke papia di Dios.

¹⁰ Mayoria di hende ta anhelá un mihó  futuro. Pero, hopi di nan tin miedu ku mundu lo ser destruí òf ku lo no ta posibel pa nos biba riba dje mas. Un superintendente biahero na Noruega ta bisa ku hende ku no ke papia di Dios mayoria di biaha sí ke papia tokante e situashon mundial. Despues di kumindá un hende, e ta bisa: “Bo ta kere ku kos lo bai drecha den futuro? Ken bo ta kere por logra esei? Polítiko, sientífiko òf otro persona?” Despues di skucha bon e ta lesa òf sita un teksto ku ta papia di un mihó futuro. Algun ta haña interesante ku Beibel ta primintí ku mundu nunka lo ser destruí i ku bon hende lo biba riba dje pa semper.—Sal. 37:29; Ekl. 1:4.

11. (a) Dikon nos mester usa diferente método pa kuminsá un kòmbersashon? (b) Kon nos por imitá e ehèmpel di Pablo deskribí na Romanonan 1:14-16?

¹¹ Nos mester usa diferente método pa kuminsá un kòmbersashon. Dikon? Pasobra kada hende ta diferente. Loke un ta haña interesante no ta interesante pa un otro. Algun no tin problema pa papia di Dios òf Beibel. Otronan ta preferá pa papia tokante otro tema promé. Sea kual sea e kaso, nos tin ku probechá di e oportunidat pa papia ku tur sorto di hende. (Lesa Romanonan 1:14-16.) Pero, nos no ke lubidá ku Yehova ta esun ku ta pone e bèrdat krese den kurason di hende ku ta deseá di hasi loke ta bon.—1 Kor. 3:6, 7.

12. Kiko nos por hasi pa yega na kurason di hende di Asia ku nunka no a ègt para pensa si tin un Kreador òf nò?

¹² Rònt mundu, hopi publikadó ta bini den kontakto ku hende di Asia. Tin di nan ta bini for di algun pais kaminda gobièrnu a traha lei ku no ta permití hende adorá Dios libremente. Na vários pais di Asia, hopi hende nunka no a ègt para pensa si tin un Kreador òf nò. Algun di nan ta kurioso i nan ta kla pa aseptá un estudio di Beibel. Pero, na promé instante tin hende ku no ta interesá pa siña algu nobo. Kiko nos por hasi pa prediká na nan? Algun publikadó ku eksperensia tin éksito den kuminsá un kòmbersashon informal, mustrando interes sinsero den e persona. Djei, ora ta apropiá, e publikadó ta kont’é kon su bida a mehorá despues ku el a apliká un prinsipio di Beibel.

13. Kiko por atraé un hende na Beibel? (Wak e plachi riba portada.)

¹³ Un kos ku ta atraé hopi hende ta e bon konsehonan di Beibel. (Ekl. 7:12) Na New York, un ruman muhé ku ta prediká na hende di abla chines a bisa: “Mi ta purba di mustra interes den nan i skucha nan. Si mi haña sa ku nan a kaba di imigrá, mi ta puntra nan: ‘Kon ta bai ku e kambionan? Bo a logra haña trabou? Kon e hendenan djaki ta trata bo?’” Tin biaha esei ta habri kaminda pa un kòmbersashon bíbliko. Ora ta apropiá, e ruman ta agregá: “Kiko bo ta kere ta e klave pa tur hende bai bon ku otro? Mi por mustra bo un proverbio di Beibel? E ta bisa: ‘Kuminsamentu di pleitu ta manera ora dam kibra; p’esei, laga e asuntu para, promé ku e rementá.’ Bo ta kere ku e konseho ei por yuda hende bai bon ku otro?” (Pro. 17:14) Tipo di kòmbersashon asina por yuda nos haña sa ken ta dispuesto pa risibí un bishita atrobe.

14. Kon un ruman na Asia ta yuda hende ku ta bisa ku nan no ta kere den Dios?

¹⁴ Kiko awor di esnan ku ta bisa nos ku nan no ta kere den Dios? Un ruman na Asia ku tin hopi eksperensia predikando na hende ku no ta kere den Dios a splika:  “Normalmente ora un hende bisa ku e no ta kere den Dios, loke e ke men ta ku e no ta kere den e diosnan ku hende den e área ei ta adorá. Generalmente mi ta bis’é ku mi ta di akuerdo ku mayoria di dios no ta real, ma ku ta hende a traha nan. Hopi biaha mi ta lesa Yeremías 16:20, ku ta bisa: ‘Akaso hende por traha diosnan pa su mes? E por, ma nan no ta dios sí!’ Despues, mi ta puntr’é: ‘Kon nos por distinguí un dios berdadero for di e diosnan ku hende a traha?’ Mi ta skucha bon i despues lesa Isaías 41:23: ‘Konta e kosnan ku ta bini despues, pa nos haña sa ku boso ta diosnan.’ Kaba, mi ta mustr’é algu ku Yehova a profetisá i ku a kumpli.”

15. Kiko nos por siña for di e ehèmpel di un ruman na Ost Asia?

¹⁵ Un ruman na Ost Asia ta usa e siguiente método ora di hasi rebishita. E ta bisa: “Mi ta mustra nan ehèmpel di sabiduria di Beibel, di profesia ku a kumpli i di naturalesa. Djei, mi ta mustra nan ku tur esei ta indiká ku ta eksistí un Kreador sabí. Ora e hende aseptá e posibilidat ku Dios ta eksistí, e ora ei mi ta mustr’é loke Beibel ta bisa di Yehova.”

16. Segun Hebreonan 11:6, dikon tur studiante di Beibel mester tin fe den Dios i den Beibel, i kon nos por yuda nan kultivá esei?

¹⁶ Ora nos ta dirigí un estudio di Beibel ku hende ku no ta kere den Dios nos tin ku keda fortalesé nan fe ku Dios ta eksistí. (Lesa Hebreonan 11:6.) Ademas, nos tin ku yuda nan konfia den Beibel. Pa logra esei, nos lo tin ku ripití sierto siñansa vários biaha. Kada biaha ku nos studia ku nan, kisas nos tin ku proba nan ku Beibel ta e Palabra di Dios. Por ehèmpel, nos por analisá algun profesia ku a kumpli, e eksaktitut sientífiko i históriko di Beibel i Beibel su bon konsehonan.

17. Kiko nos por logra ora nos demostrá amor na hende?

¹⁷ Ora nos demostrá amor na hende, sea ku nan ta kere den Dios òf nò, nos ta yuda nan bira disipel di Kristu. (1 Kor. 13:1) Nos meta ta pa mustra nan ku Dios ta stima nos i ku e ke pa nos stim’é. Tur aña, míles di hende ku ántes tabatin poko òf niun interes den religion a siña stima Dios i a batisá. Pues, sea positivo. Mustra interes den tur sorto di hende. Skucha nan bon. Purba di komprondé nan. Siña nan mediante bo ehèmpel pa bira disipel di Kristu.