Ban siña di un mucha hòmber ku a skapa bida di su tio. Su tio ta apòstel Pablo. Nos no sa kon yama e mucha hòmber, pero loke sí nos sa ta ku e tabatin hopi kurashi. Bo ke tende ta kiko el a hasi?—

Pablo tabata den prizòn na Herúsalèm. Nan a ser’é den prizòn pasobra e tabata prediká tokante Hesus. Un par di mal hende tabatin rabia riba Pablo. P’esei nan a traha un plan malbado. Nan a bisa: ‘Ban pidi e komandante di e sòldánan pa e laga nan trese Pablo aki dilanti di hues. Nos ta bai skonde kantu di kaminda, anto ora Pablo pasa, nos ta mat’é!’

Pablo su subrino a haña sa di e plan. Kiko el a hasi e ora ei? El a bai na e prizòn i a konta Pablo e kos ku el a tende. Mesora, Pablo di kuné pa e bai konta e komandante di e sòldánan tokante e plan malbado. Bo ta kere ku tabata fásil pa Pablo su subrino bai papia ku e komandante?— Nò, pasobra e komandante tabata un hòmber importante. Pero e subrino di Pablo a mustra kurashi i a bai papia ku e komandante tòg.

E komandante tabata sa bon kiko pa hasi. El a pone un grupo di kasi 500 sòldá pa kuida Pablo! El a manda nan hiba Pablo Sesarea e anochi ei mes. Pablo a skapa?— Sí, e mal hendenan no por a mat’é! Nan plan malbado a faya.

Kiko e historia akí ta siña bo?— Abo tambe por tin kurashi meskos ku Pablo su subrino. Nos mester tin kurashi ora nos ta papia ku hende tokante Yehova. Abo lo tin kurashi i sigui papia ku hende tokante Yehova?— Si bo hasié, lo bo por skapa un hende su bida tambe.