TEMPO Hesus tabata riba tera, el a refleha perfectamente e personalidad y forma di actua di su Tata. El a bisa: “Mi no ta haci nada riba mi propio iniciativa, sino cu ta loke e Tata a siña mi, mi ta papia. . . . Semper mi ta haci loke ta agrad’e.” (Juan 8:28, 29; Colosensenan 1:15) Pues, si nos kier sa con Dios ta mira hende muher y con e kier pa trata nan, nos tin cu analisa Hesus su actitud y manera di trata hende muher.

Varios analista di Bijbel a conclui a base di loke e Evangelionan ta trece padilanti cu Hesus su punto di bista di hende muher tabata revolucionario pa e tempo ey. Den ki sentido? Y loke ta mas importante ainda, su siñansanan ta libera hende muher di awe?

Hesus no a considera nan como un obheto sexual. Den bista di algun lider religioso hudiu cualkier contacto cu hende muher por a hiba na pasion sexual. Nan a considera hende muher como un fuente peligroso di tentacion y pesey a prohibi nan di papia cu hende homber den publico of di sali for di cas sin tapa cabes. Na contraste, Hesus ningun momento no a bisa hende homber pa no anda cu hende muher. Mas bien, el a conseha hende homber pa domina nan deseonan carnal y trata hende muher cu respet.​—Mateo 5:28.

Hesus a bisa tambe: “Ken cu divorcia di su esposa y casa cu un otro muher ta comete adulterio contra su esposa.” (Marco 10:11, 12) Pues, claramente Hesus a rechasa e idea rabinico, cu tabata masha comun e tempo ey, cu un homber por a divorcia di su casa “pa cualkier motibo.” (Mateo 19:3, 9) Mayoria di Hudiu tabatin un concepto robes di adulterio. Pa nan, un homber cu a drumi cu un muher cu no ta su casa no a comete adulterio. Segun e rabinan, ta hende muher so por ta infiel, no hende homber! Manera un comentario biblico a splica, “Hesus a eleva e nivel y dignidad di hende muher ora el a pone e esposo bou di e mesun obligacion moral cu su esposa.”

E beneficio di su siñansa pa hende muher di awe: Den e congregacion cristian di Testigonan di Jehova, hende muher ta asocia libremente cu hende homber na reunion. Pero nan no tin nodo di tene miedo cu e ruman hombernan ta wak nan na un manera inapropia of ta bira mucho familiar cu nan, ya cu hombernan cristian ta haci nan best pa trata ‘hende muher mas grandi manera ta nan mama nan ta, hende muher mas jong manera ta nan ruman muher nan ta, cu tur pureza.’​—1 Timoteo 5:2.

Hesus a dedica tempo na siña hende muher. E rabinan di e tempo ey tabata boga pa laga hende muher keda den ignorancia. Na contraste, Hesus a dedica tempo na siña hende muher e berdad y a anima nan pa expresa loke nan tabata pensa. Ademas, Hesus no a pensa cu hende muher mester keda den cushina so. El a demostra esey ora cu e no a nenga Maria e oportunidad di siña mas for di dje. (Lucas 10:38-42) E contestanan bon pensa cu Marta, ruman di Maria, a duna Hesus despues di morto di Lazaro ta mustra cu Marta tambe a beneficia di e siñansanan di Hesus.​—Juan 11:21-27.

 Hesus tabata interesa den loke hende muher tabata pensa. Mayoria di muher Hudiu den su tempo tabata pensa cu nan lo tabata feliz solamente si nan a haya un yiu cu nan por tabata orguyoso di dje, vooral si e tabata un profeta. Pesey, ora un muher a bis’e: “Feliz ta e bariga cu a carga bo!” Hesus a probecha di e oportunidad pa siñ’e cu obediencia na Dios tin mucho mas balor. (Lucas 11:27, 28) Asina Hesus a indica cu hende muher tabatin tarea mas importante cu e papel tradicional impone riba nan.​—Juan 8:32.

E beneficio di su siñansa pa hende muher di awe: Den e congregacion cristian, e maestronan ta keda contento cu e comentarionan di hende muher durante reunion. Nan ta respeta hende muher cu tin madurez cristian y cu pa medio di nan conducta, tanto den priva como den publico, ta “maestra di loke ta bon.” (Tito 2:3) Nan ta conta tambe cu e ruman muhernan pa anuncia e bon noticia di e Reino di Dios.​—Salmo 68:11; wak e cuadro “Apostel Pablo A Prohibi Hende Muher di Papia?”

Hesus tabata interesa den bienestar di hende muher. Den tempo di Bijbel, yiu muher no tabatin mes tanto balor cu yiu homber. E Talmud a refleha e punto di bista aki, bisando: “Feliz ta esun cu tin yiu homber, y ay di esun cu tin yiu muher.” Un yiu muher tabata un carga pisa den bista di algun mayor: Nan mester a busca un esposo p’e y paga un bruidsschat, y nan no por a stens cu e lo a cuida nan den nan biehes.

Hesus a mustra cu bida di un mucha muher chikito tabata mes importante cu di un mucha homber: El a resucita e yiu muher di Jairo mescos cu el a resucita e yiu homber di e viuda di Nain. (Marco 5:35, 41, 42; Lucas 7:11-15) Na un otro ocasion, el a cura un muher cu “pa 18 aña largo tabatin un spirito cu a hacie malo.” Hesus hasta a yama e muher “yiu di Abraham”, un expresion casi desconoci den obranan skirbi Hudiu. (Lucas 13:10-16) Uzando e expresion aki di respet y cariño, el a demostra cu no solamente el a considera e muher un miembro legitimo di sociedad, sino tambe a reconoce cu e muher tabatin gran fe.​—Lucas 19:9; Galationan 3:7.

E beneficio di su siñansa pa hende muher di awe: Tin caminda ta reina e idea cu un famia no ta gana nada cu cria un yiu muher. Por ehempel, segun un dicho Asiatico: “Cria un yiu muher ta manera muha hardin di bo bisiña.” Pero mayornan cristian amoroso no ta laga e manera di pensa ey influencia nan. Al contrario, nan ta percura bon pa tur nan yiunan, tanto homber como muher, y ta percura pa nan ricibi e debido educacion y cuido medico.

Hesus tabata confia hende muher. Den corte di husticia Hudiu, e testimonio di un muher tabata bal mescos cu esun di un catibo. Josefo, un historiador di prome siglo, a conseha: “No acepta ningun evidencia cu ta bin di hende muher, debi cu nan ta e sexo cu no ta serio ni no ta uza nan cabes.”

 Esta un contraste grandi cu Hesus! El a scoge hende muher pa anuncia su resureccion. (Mateo 28:1, 8-10) A pesar cu e muhernan fiel aki tabata testigo di e ehecucion y entiero di nan Señor, tabata dificil pa e apostelnan kere nan. (Mateo 27:55, 56, 61; Lucas 24:10, 11) Pero e echo cu Hesus a aparece na hende muher prome ora el a resucita ta duna prueba cu el a considera nan digno di ta su testigonan, mesun digno cu cualkier otro discipel.​—Echonan 1:8, 14.

E beneficio di su siñansa pa hende muher di awe: Hende homber cu tin responsabilidad den e congregacionnan di Testigonan di Jehova ta mustra consideracion na hende muher, tumando na cuenta loke nan tin di bisa. Esposonan cristian, di nan parti, ta honra nan esposa door di scucha nan cu atencion.​—1 Pedro 3:7; Genesis 21:12.

Hende homber cu ta imita Cristo ta duna hende muher e libertad y respet cu Dios tabatin na mente pa nan ora el a crea nan. (Genesis 1:27, 28) En bes di promove machismo, esposonan cristian ta laga e principionan di Bijbel guia nan, y esey ta haci nan esposa mas feliz.​—Efesionan 5:28, 29.

Ora Yelena a cuminsa studia Bijbel, su esposo tabata maltrat’e sin cu ningun hende tabata sa. E homber a lanta den un ambiente violento, den cua tabata masha normal pa secuestra mucha muher pa casa cu ne y tambe maltrata nan fisicamente. Yelena a splica: “Loke mi a siña for di Bijbel a duna mi forsa. Mi a bin compronde cu tin un Dios cu ta stima mi masha hopi, cu ta balora mi y ta interesa den mi bienestar. Mi a realisa tambe cu si mi esposo studia Bijbel, esey lo por a cambia su actitud pa cu mi.” Su soño a bira realidad ora cu finalmente su esposo a cuminsa studia Bijbel y cu tempo a batisa como Testigo di Jehova. Yelena a bisa: “El a bira un ehempel di dominio propio. Y nos tur dos a siña pordona otro libremente.” El a reconoce: “Cu yudansa di e principionan di Bijbel, mi ta sinti mi stima y proteha den mi matrimonio.”​—Colosensenan 3:13, 18, 19.

E caso di Yelena no ta unico. Tin miyones di hende muher cristian mas cu ta feliz pasobra nan, hunto cu nan esposo, ta haci esfuerso pa aplica principio biblico den nan matrimonio. Ademas, meymey di nan rumannan den fe, nan ta haya consuelo y ta sinti nan liber y respeta.​—Juan 13:34, 35.

Tur cristian, tanto homber como muher, ta reconoce cu nan ta imperfecto, pecador y parti di e creacion di Dios cu a ser “someti na un bida di banidad.” Pero como cu nan a cultiva un bon relacion cu nan amoroso Dios y Tata, Jehova, nan ta carga speransa di “ser libra di sclavitud na un curpa cu ta caba na nada” y disfruta di “e glorioso libertad di e yiunan di Dios.” Esta un speransa maraviyoso esey ta pa hende homber y muher cu ta bou di e cuido di Dios!​—Romanonan 8:20, 21.