Ken Ta Aplica e Siñansanan di Cristo Awe?

POR lo general hende ta reconoce Hesucristo como un di e hombernan di mas grandi cu a yega di biba. Hopi ta mir’e como e homber di mas grandi. Pa casi dos mil aña, su siñansanan tawatin un influencia profundo riba bida di hende—“bida humilde di hende bondadoso y tambe accionnan humanitario impresionante”, segun e autor Ingles Melvyn Bragg.

Kico di Cristianismo?

Kico di cristianismo? Un articulo a describie como “un di e mayor adelantonan spiritual di humanidad.” David Kelso di Glasgow Caledonian University, Escocia, a duna e siguiente punto di bista: “Su dos mil añanan di historia ta yen di logro sin precedente riba tereno social, di arte, arkitectura, filosofia y musica.”

Sinembargo, hopi otro hende tin un punto di bista completamente diferente. Nan no tin problema cu e idea cu un religion ta basa su mes riba e siñansanan di Hesucristo y e creencia cu Hesus tawata yiu di Dios. Loke si ta duna nan asco ta e conducta di religionnan cu ta pretende di representa cristianismo.

Por ehempel, e filosofo Aleman di siglo 19, Friedrich Nietzsche, a describi cristianismo den e contexto aki como “e mancha eterno di humanidad.” El a skirbi cu esaki ta “e gran maldicion, e corupcion enorme y esun di mas profundo, ... pa cua ningun medio ta demasiado venenoso, demasiado deshonesto, demasiado clandestino y demasiado miskiña.” Kisas bo ta haya cu e punto di bista di Nietzsche ta poco exagera, pero algun observado mas rasonabel a yega na conclusionnan similar. Pakico? Pasobra den transcurso di siglonan  e conducta di hende cu ta pretende di ta cristian ta caracterisa no pa e cualidadnan di Hesucristo, sino pa “degeneracion, blasfemia y crimennan horendo” na tur parti di mundo.

Cristianismo Ta Refleha e Siñansanan di Cristo?

Pesei anto, no ta irasonabel pa puntra: “Cristianismo djawe ta refleha e siñansanan di Cristo?” Algun hende lo bisa mesora: “Claro cu si. Acaso Hesus no a priminti su siguidonan cu lo e ta cu nan ‘te na fin di mundo’?” (Mateo 28:20) Si, en berdad el a bisa esei. Pero e tawata kiermen cu lo e ta cu tur hende cu ta pretende di ta su siguido, sin importa nan conducta?

Corda, algun lider religioso den tempo di Hesus a pensa cu Dios tawata cu nan sin cu el a pone ningun condicion pa nan. Siendo cu Dios a scohe Israel pa un papel special, algun lider religioso a pensa cu Dios nunca lo bandona nan—sin importa kico nan a haci. (Mikeas 3:11) Pero cu tempo nan a bai mucho leu den e manera cu nan a rechasa e lei- y normanan di Dios. Como resultado di esei, Hesucristo a bisa nan francamente: “Mira, boso cas ta keda desola pa boso!” (Mateo 23:38) Henter un sistema religioso a perde e fabor di Dios. Dios a rechas’e y a laga e ehersito Romano destrui su stad capital, Herusalem, y su tempel na aña 70 di nos era.

Algo similar por sosode cu cristianismo? Laga nos considera ki condicionnan Hesus su siguidonan mester cumpli cu ne pa e ta cu nan “te na fin di mundo” manera el a priminti.

[Plachi na pagina 2, 3]

E siñansanan di Hesucristo tin un influencia profundo riba miyones di hende rond mundo