Haci Yehova Bo Dios

D EN tempo biblico, cierto personanan tawatin un relacion asina intimo cu Yehova cu tawata papia di Yehova como nan Dios. Por ehempel, den e Scritura, Yehova ta ser describi como “e Dios di Abraham”, ‘e Dios di David’, y “e Dios di Elias.”—Genesis 31:42; 2 Reinan 2:14; 20:5.

Con e tres hombernan aki a logra haya un relacion intimo cu Dios? Kico nos por siña for di nan di manera cu nos tambe por edifica y mantene un relacion personal fuerte cu e Creador?

Abraham A Pone “Fe den Yehova”

Abraham tawata e prome persona cu Bijbel ta bisa cu a pone fe den Yehova. Fe tawata e cualidad principal di Abraham cu a yud’e gana Dios su aprobacion. De echo, Abraham tawata asina bon mira den bista di Yehova cu e Creador despues a introduci su mes na Moises como “e Dios di Abraham” y di Abraham su yiu Isaak y di su nieto Yacob.—Genesis 15:6, NW; Exodo 3:6.

Con Abraham a cultiva e clase di fe aki den Dios? Na prome luga, Abraham a edifica su fe riba un fundeshi solido. Podise ta Sem, e yiu homber di Noe cu tawata testigo ocular di Yehova su actonan di liberacion, a instrui Abraham den e camindanan di Yehova. Sem tawata un testimonio bibo cu Yehova “a preserva Noe, un predicado di husticia, hunto cu shete otro persona mas, ora cu el a trece un dilubio riba e mundo di e impionan.” (2 Pedro 2:5) Abraham lo por a siña for di Sem cu unabes Yehova priminti algo, esei lo cumpli sigur. En todo caso, ora cu Abraham mes a ricibi un promesa serca Dios, el a alegra y e manera cu el a hiba su bida tawata basa riba e echo cu e tawatin sigur cu e promesa ei lo cumpli.

Teniendo un fundeshi solido, Abraham su fe e ora ei a ser fortifica pa medio di su obranan. Apostel Pablo a skirbi: “Pa medio di fe Abraham, ora cu el a wordo yama, a obedece door di sali bai na un luga cu e tawata pa ricibi como herencia; y el a sali bai, sin sa unda e tawata bai.” (Hebreonan 11:8) E acto di obediencia ei a fortifica Abraham su fe. Anto relaciona cu esei, disipel Santiago a skirbi: “Bo ta mira cu fe tawata traha hunto cu su obranan, y como resultado di e obranan, fe a wordo perfecciona.”—Santiago 2:22.

Ademas, Yehova a permiti pa Abraham su fe ser poni na prueba, locual a haci su fe mas fuerte ainda. Pablo a sigui bisa: “Pa medio di fe Abraham, ora cu el a wordo poni na  prueba, a ofrece Isaak.” Prueba ta refina y fortifica fe, y ta hacie hopi “mas precioso cu oro.”—Hebreonan 11:17; 1 Pedro 1:7.

Aunke Abraham no a biba pa mira cumplimento di tur loke Dios a priminti, e tawatin e goso di mira otro hende sigui su ehempel. Su casa Sara y tres otro miembro di su famia—Isaak, Yacob y Yosef [Hose]—tambe ta ser elogia den Bijbel pa nan fe sobresaliente.—Hebreonan 11:11, 20-22.

Fe Manera di Abraham Awe

Fe ta esencial pa ken cu ta desea di haci Yehova nan Dios. Pablo a skirbi: “Sin fe ta imposibel pa agrada [Dios].” (Hebreonan 11:6) Con un sirbido di Dios awe por desaroya fe fuerte manera esun di Abraham?

Mescos cu tawata e caso di Abraham, nos fe mester ta estableci riba un fundeshi solido. E miho manera pa nos haci esei ta door di un estudio regular di Bijbel y di publicacionnan basa riba Bijbel. Door di lesa Bijbel y medita riba loke nos ta lesa, nos ta haya e siguransa cu e promesanan di Dios lo ser realisa. Esaki e ora ei lo motiva nos pa adapta nos bida a base di e speransa sigur ei. Nos fe ta ser fortifica mas ainda door di actonan di obediencia, cu ta inclui nos participacion den e sirbishi publico y asistencia na reunionnan Cristian.—Mateo 24:14; 28:19, 20; Hebreonan 10:24, 25.

Nos fe definitivamente lo ser poni na prueba, podise door di oposicion, malesa grave, morto di un ser keri of algo otro. Kedando fiel na Yehova bou di prueba ta enrikece nos fe, y ta hacie mas precioso cu oro. Sea cu nos ta na bida pa mira cumplimento di tur Dios su promesanan of no, nos fe lo hala nos mas serca di Yehova. Ademas, nos ehempel lo anima otro hende pa imita nos fe. (Hebreonan 13:7) Esaki tawata e caso cu Ralph, kende a observa y imita e fe di su mayornan. El a splica:

“Tempo cu mi tawata biba na cas, mi mayornan a anima henter e famia pa lanta mainta tempran pa nos por a lesa Bijbel hunto. Asina nos a lesa henter e Bijbel.” Te ainda Ralph ta lesa Bijbel tur mainta, y esaki ta duna su dia un bon comienso. Ralph tawatin custumber di bai den e sirbishi publico hunto cu su tata tur siman. “Di e manera ei mi a siña haci rebishita y conduci estudionan di Bijbel.” Awor Ralph ta sirbi como boluntario na un di e oficinanan di sucursal di Testigonan di Yehova na Europa. Ki un excelente recompensa pa e fe di su mayornan!

Un Homber Conforme Yehova Su Curason

David, kende a nace un 900 aña despues di Abraham, ta un personahe sobresaliente entre e sirbidonan di Yehova menciona den e Scritura. Relaciona cu e echo cu Yehova a scohe David como futuro rei, profeta Samuel a bisa: “SEÑOR a busca pa su mes un homber conforme su mes curason.” E laso di amistad entre Yehova cu David tawata asina pega, cu mas despues profeta Isaias a papia cu Rei Ezekias tocante ‘Yehova, e Dios di bo tata David.’—1 Samuel 13:14; 2 Reinan 20:5; Isaias 38:5.

Aunke David tawata conforme Yehova su curason, tawatin ocasionnan cu David a laga su deseonan domin’e. Tres biaha el a comete eror serio: El a permiti hende transporta e arca di aliansa na un manera inapropiado ora tawata hib’e Herusalem; el a comete adulterio cu Betsabe y a laga nan mata su esposo,  Urias; y el a tene un censo of conteo di e pueblo di Israel y Huda cu Yehova no a manda. Na cada un di e ocasionnan ei, David a viola e Lei di Dios.—2 Samuel 6:2-10; 11:2-27; 24:1-9.

Sinembargo, ora cu a confronta David cu su picanan, el a acepta responsabilidad pa nan y no a tira culpa riba otro hende. El a admiti cu no a haci areglo apropiado pa transporta e Arca, y a agrega cu “nos no a busca [Yehova] conforme e ordenansa.” Ora cu Natan e profeta a expone David su adulterio, David a contesta bisando: “Mi a peca contra SEÑOR.” Y unabes David a realisa cu el a comete un bobedad door di a conta e pueblo, el a admiti: “Mi a peca gravemente cu loke mi a haci.” David a repenti di su picanan y a keda serca di Yehova.—1 Cronicanan 15:13; 2 Samuel 12:13; 24:10.

Ora Nos Comete Eror

E ehempel di David ta un gran animacion pa nos den nos esfuerso pa haci Yehova nos Dios. Si un homber cu tawata asina conforme Yehova su curason tawata capas pa comete e picanan serio ei, nos no tin cu bira descurasha si apesar di nos miho esfuersonan, de bes en cuando nos ta faya of asta comete erornan serio. (Eclesiastes 7:20) E echo cu ora David a repenti, su picanan a ser pordona por sirbi como un consuelo pa nos. Esaki ta loke a sosode cu Uwe * algun aña pasa.

Uwe tawata sirbi como anciano den un congregacion di Testigonan di Yehova. Na un ocasion, el a sucumbi na mal deseo y a comete inmoralidad. Na principio Uwe, mescos cu Rei David, a purba tene e asunto secreto, sperando cu Yehova lo a pasa por halto di su pica. Pero cu tempo, Uwe su consenshi tawata molesti’e asina tanto cu el a confesa na un otro anciano. E ora ei nan a tuma accion pa yuda Uwe recupera di su desaster spiritual.

Uwe a repenti di su picanan y a keda serca di Yehova y e congregacion. E tawata asina gradicido pa e yudansa cu el a ricibi, cu algun siman despues el a skirbi e ancianonan y a expresa su gratitud sinsero y profundo pa e yudansa cu nan a dun’e. El a skirbi: “Boso a yuda mi limpia e nomber di Yehova di reproche.” Uwe a logra keda cu su relacion cu Yehova y cu tempo el a bolbe keda nombra como sirbido den e mesun congregacion.

“Un Homber cu Sintimentonan Mescos Cu di Nos”

Elias, kende a biba un siglo despues di David, tawata un di e profetanan principal di Israel. Elias tawata un defensor di adoracion berdadero den un tempo cu corupcion y inmoralidad tawata reina, y nunca el a tambalia den su debocion na Yehova. Nada straño anto cu su susesor, Eliseo, un biaha a yama Yehova “e Dios di Elias”!—2 Reinan 2:14.

Sinembargo, Elias no tawata sobrehumano. Santiago a skirbi: “Elias tawata un homber cu sintimentonan mescos cu di nos.” (Santiago 5:17, NW) Por ehempel, despues cu Elias a causa un derota severo pa e adoradonan di Baal den Israel, Reina Jezabel a menasa di mat’e. Con Elias a reacciona? El a haya miedo y a hui bai den desierto. Einan, sinta bou di un palo di enebro, Elias a lamenta: “Ta basta; awor, o SEÑOR, tuma mi bida, pasobra mi no ta miho cu mi tatanan.” Elias no kier tawata un profeta mas, sino mas bien el a prefera di muri.—1 Reinan 19:4.

Yehova sinembargo a mustra comprension pa Elias su sintimentonan. Dios a fortifica Elias y a sigur’e cu e no tawata su so, ya cu tawatin mas hende cu tawata leal na adoracion berdadero. Ademas, ainda Yehova tawata confia Elias y tawatin trabou pa e haci.—1 Reinan 19:5-18.

Elias su trastorno emocional no tawata un indicacion di cu el a perde Dios su aprobacion. Rond di 1.000 aña despues, tempo cu Cristo Hesus a transfigura dilanti di Pedro, Santiago y Huan, ta ken Yehova a scohe pa aparece den vision banda di Hesus? Moises  cu Elias. (Mateo 17:1-9) Claramente anto, Yehova a considera Elias como un profeta ehemplar. Aunke Elias tawata simplemente “un homber cu sintimentonan mescos cu di nos”, Dios a aprecia e trabou duro cu el a haci pa restaura adoracion puro y pa santifica Dios su nomber.

Nos Lucha Emocional

Sirbidonan di Yehova awe tin biaha por sinti nan desanima of precupa. Ta un gran consuelo pa sa cu Elias a experencia e mesun emocionnan! Y loke ta trankilisa nos ta cu mescos cu Yehova a compronde Elias su sintimentonan, asina tambe e ta compronde nos lucha emocional.—Salmo 103:14.

Di un banda, nos ta stima Dios y nos prohimo y ta desea di haci Yehova su trabou di proclama e bon nobo di Reino. Di otro banda, kisas nos ta decepciona cu e falta di reaccion faborabel riba nos predicacion of nos ta asta precupa pa e menasanan cu ta bin di parti di enemigonan di adoracion berdadero. Sinembargo, mescos cu Yehova a ekipa Elias pa sigui padilanti, e ta ekipa su sirbidonan djawe tambe. Tuma por ehempel e caso di Herbert cu Gertrud.

Herbert cu Gertrud a batisa como Testigonan di Yehova na Leipzig, den e ex Republica Democratico Aleman, na 1952. E tempo ei bida tawata dificil pa sirbidonan di Dios, ya cu nan sirbishi publico tawata bou di prohibicion. Con Herbert a sinti tocante e predicacion di cas pa cas?

“Tawatin biaha cu nos tawata hopi precupa. Ora nos a bai di cas pa cas, nos no tawata sa si autoridadnan lo a presenta diripiente y aresta nos.” Kico a yuda Herbert y otro rumannan vence nan miedo? “Nos a haci hopi estudio personal di Bijbel. Anto Yehova a duna nos e fortalesa pa sigui padilanti cu nos trabou di predica.” Herbert a pasa door di varios experencia den su sirbishi publico cu a fortific’e, y cu tin biaha a asta pon’e hari.

Herbert a topa un señora di edad mediano cu a mustra interes den Bijbel. Ora Herbert a bishit’e atrobe algun dia despues, tawatin un yoncuman presente cu a scucha e combersacion. Despues di varios minuut Herbert su bista a cai riba algo cu a pon’e tembla. Riba un stul den skina di e cuarto tawatin un pechi di polis. Tawata pechi di e yoncuman, kende tawata un polis dicidido pa aresta Herbert.

“Bo ta un Testigo di Yehova!” e yoncuman a grita. “Laga mi wak bo cedula.” Herbert a entreg’e su cedula. E ora ei algo inespera a sosode. E señora a bira wak e polis y a spiert’e: “Si algo mester pasa cu e homber di Dios aki, bo no ta bonbini mas den e cas aki.”

E yoncuman a pensa un rato, caba el a duna Herbert su cedula bek y a lag’e bai. Despues Herbert a haya sa cu e polis tawata enamora e yiu mohe di e señora. Obviamente, e polis a haya cu lo cumbinie mas pa sigui enamora e mucha mohe cu entrega Herbert.

Haci Yehova Nos Dios

Kico nos por siña di e susesonan aki? Mescos cu Abraham, nos mester tin fe firme den e promesanan di Yehova. Mescos cu David, nos mester acudi na Yehova cu berdadero arepentimento ki ora cu nos comete eror. Y mescos cu Elias, nos tin cu depende riba Yehova pa haya fortalesa den tempo di ansiedad. Di e maneranan ei nos por haci Yehova nos Dios awor y pa tur eternidad, ya cu e ta “e Dios bibo, kende ta e Salbador di tur hende, specialmente di creyentenan.”—1 Timoteo 4:10.

[Nota]

[Plachinan na pagina 25]

Actonan di obediencia a fortifica Abraham su fe

[Plachi na pagina 26]

Mescos cu David, nos mester repenti ora nos peca

[Plachi na pagina 28]

Mescos cu Yehova a compronde Elias su sintimentonan, asina e ta compronde esnan di nos