“Haci Trabou di un Predicado di Evangelio”

“Sea spierta den tur cos, . . . haci trabou di un predicado di Evangelio.”—2 TIMOTEO 4:5, E Testament Nobo.

1. Ki tarea Hesus a duna su siguidonan?

YEHOVA su nomber y proposito ta ser proclama rond mundo. Esei ta asina pasobra Dios su pueblo dedica a tuma na pecho e tarea cu Hesucristo a duna na su siguidonan ora cu el a bisa nan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.”—Mateo 28:19, 20.

2. Ki instruccion e superintendente Timoteo a ricibi, y cua ta un manera pa superintendentenan cristian cumpli cu nan sirbishi?

² Hesus su disipelnan di prome siglo a tuma e tarea ei na serio. Por ehempel, apostel Pablo a urgi Timoteo, cu tambe tawata un superintendente cristian mescos cu ne: “Haci trabou di un predicado di Evangelio; cumpli cu bo sirbishi henteramente.” (2 Timoteo 4:5, TN) Un manera cu un superintendente djawe ta cumpli cu su sirbishi ta door di ta un proclamado celoso di Reino, uno cu ta participa cu regularidad den sirbishi di veld. Por ehempel, e superintendente di Studio di Buki di Congregacion tin e privilegio recompensador di hiba delantera den e trabou di predica y entrena otronan. Pablo a cumpli cu su responsabilidad personal di proclama e bon nobo, y el a yuda entrena otro hende pa sirbishi.—Echonan 20:20; 1 Corintionan 9:16, 17.

 Predicadonan Celoso di Evangelio den Pasado

3, 4. Ki experencianan Felipe tawatin como un predicado di Evangelio?

³ E prome cristiannan tawata conoci como predicadonan celoso di e Evangelio. Tuma por ehempel Felipe, un predicado di Evangelio. E tawata un di e ‘shete hombernan di bon reputacion, yen di spirito santo y di sabiduria’ cu nan a scohe pa cumpli cu e tarea di reparti cuminda tur dia na un manera imparcial entre e biudanan cristian di abla Griego y esnan di abla Hebreo na Herusalem. (Echonan 6:1-6) Despues cu e asignacion special ei a caba y persecucion a plama tur cristian for di einan, cu excepcion di e apostelnan, Felipe a bai Samaria. Einan el a predica e bon nobo y cu poder di spirito santo e tawata saca demoño y cura hendenan lam y paralisa. Hopi Samaritano a acepta e mensahe di Reino y a batisa. Ora cu e apostelnan na Herusalem a tende esaki, nan a manda Pedro cu Huan na Samaria pa asina e creyentenan resien batisa por a haya spirito santo.—Echonan 8:4-17.

⁴ Siguientemente Dios su spirito a dirigi Felipe pa contra cu e eunuco di Etiopia riba e caminda pa Gaza. Despues di Felipe su splicacion cla di e profecia di Isaias, e homber aki “un oficial di corte di Candace, reina dje Etiopenan”, a pone fe den Hesucristo y a wordo batisa. (Echonan 8:26-38) Despues di esei Felipe a bai Azoto (Asdod) y caba Cesarea, anto riba caminda “pasando door di tur e stadnan, e tawata predica e evangelio.” (Echonan 8:39, 40) No tin duda cu Felipe a pone un excelente ehempel den haci e trabou di un predicado di Evangelio!

5. E cuater yiu mohenan di Felipe tawata conoci particularmente pa kico?

⁵ Un 20 aña despues, Felipe ainda tawata activo den sirbishi na Cesarea. Ora Pablo cu Lucas a keda na su cas, e “tawatin cuater yiu mohe birgen, kendenan tawata profeta.” (Echonan 21:8-10) Evidentemente nan a haya bon instruccion spiritual, nan tawatin celo pa sirbishi y tawatin asta e privilegio di papia profeticamente. E celo cu mayornan tin pa sirbishi por tin un excelente efecto riba nan yiunan awe, tanto mucha homber como mucha mohe, motivando nan pa haci e predicacion celoso di e Evangelio nan carera den bida.

Predicadonan Celoso di Evangelio Awe

6. Ki exito e predicadonan di Evangelio di prome siglo tawatin?

⁶ Den Hesucristo su profecia remarcabel cu ta señala na nos tempo y na e tempo di fin, el a declara: “E evangelio mester wordo predica prome na tur nacion.” (Marco 13:10) E fin lo bin despues cu a predica e bon nobo “den henter mundo.” (Mateo 24:14) Segun cu Pablo y otro predicadonan di prome siglo a proclama e bon nobo, hopi hende a bira creyente, y nan tawata forma congregacionnan den un luga tras di otro den henter e Imperio Romano. Ancianonan nombra pa sirbi den e congregacionnan aki a participa hunto cu nan rumannan den e trabou di predica e Evangelio y a extende e actividad ei den tur skina. E Palabra di Dios a sigui crece y prevalece den e dianan ei, mescos cu ta sosode awe debi cu miyones di Testigo di Yehova ta haciendo e trabou di predica e Evangelio. (Echonan 19:20) Abo ta un di e alabadonan felis aki di Yehova?

7. Kico proclamadonan di Reino ta haciendo awe?

⁷ Hopi proclamado di Reino di tempo actual ta probecha di oportunidadnan pa aumenta nan participacion den e trabou di predica e Evangelio. Miles di nan a drenta den e campo di misionero, y cientos di miles ta participa full-time den e actividad di predica como pionero regular y ausiliar. Y esnan cu ta sirbi como publicadonan celoso di Reino—tanto homber, mohe como mucha—tambe ta haci trabou cu ta digno di elogio. De echo, henter Yehova su pueblo ta disfrutando di su bendicion rico segun cu unidamente nan ta sirbie como predicadonan cristian di e Evangelio.—Sofonias 3:9.

8. Ki trabou di marcamento ta ser haci awor, y door di ken?

⁸ Dios a duna Hesus su siguidonan ungi e responsabilidad di proclama e bon nobo den  henter mundo. Un cantidad creciente di e “otro carnenan” di Cristo ta duna nan un man den e trabou aki di predica e Evangelio. (Huan 10:16) Profeticamente, e trabou aki cu ta salba bida ta ser compara cu ponemento di un señal of marca riba frenta di e hendenan cu ta suspira y keha pa motibo di tur e cosnan abominabel cu ta tumando luga awendia. Pronto, e malbadonan lo ser destrui. Mientrastanto, ta ki un gran privilegio di por hiba berdadnan cu ta salba bida pa e habitantenan di e tera!—Ezekiel 9:4-6, 11.

9. Con nos por yuda publicadonan nobo den sirbishi?

⁹ Si nos tin basta tempo ta participa den e trabou di predica, muy probablemente nos por haci algo pa yuda esnan nobo den congregacion. De bes en cuando, nos lo por laga nan compaña nos den sirbishi. Esnan cu ta sirbi como anciano lo kier haci tur loke nan por pa yuda rumannan den fe crece spiritualmente. E bon esfuerso di superintendentenan humilde por contribui hopi na yuda otro rumannan pa ta predicadonan celoso y productivo di e Evangelio.—2 Pedro 1:5-8.

Dunando Testimonio di Cas pa Cas

10. Ki ehempel Cristo y su prome siguidonan a pone den sirbishi?

¹⁰ Hesucristo a pone un excelente ehempel como predicado di Evangelio pa su siguidonan. Relaciona cu e sirbishi di Cristo y su apostelnan, e Palabra di Dios ta declara: “El a cuminsa bai di un stad y di un pueblito pa otro, proclamado y predicando e reino di Dios; y e diesdosnan tawata hunto cu ne.” (Lucas 8:1) Ke tal di e apostelnan mes? Despues cu Dios a drama spirito santo riba nan na Pentecoste di aña 33 di nos era, “tur dia, den tempel y di cas pa cas, nan tawata sigui siña hende y predica Hesus como e Cristo.”—Echonan 5:42.

11. Segun Echonan 20:20 y 21, kico Pablo a haci den su sirbishi?

¹¹ Debi na apostel Pablo su trabou celoso di predica e Evangelio, e por a bisa ancianonan cristian di Efeso: “Mi no a laga di declara nada cu tawata di probecho pa boso y tawata siña boso publicamente y di cas pa cas.” Ora Pablo tawata ‘siña di cas pa cas’, ta cas di su compañeronan cu tawata adora Yehova e tawata bishita, haciendo bishita di pastoreo serca creyentenan? No, pasobra el a sigui splica cu e tawata “dunando testimonio, tanto na Hudiu como na Griego, di repentimento pa cu Dios y di fe den nos Señor Hesucristo.” (Echonan 20:20, 21) Por lo general hende dedica caba na Yehova lo no tawatin mester di instruccion tocante “repentimento pa cu Dios y di fe den nos Señor Hesucristo.” Pablo a entrena e ancianonan cristian di Efeso den sirbishi di cas pa cas mientras nan tawata cu ne ora cu e tawata siña hende incredulo tocante repentimento y fe. Door di haci esaki, Pablo a imita e metodo cu Hesus a establece.

12, 13. Na harmonia cu Filipensenan 1:7, kico e pueblo di Yehova a haci tocante nan derecho di predica?

¹² Sirbishi di cas pa cas por ta un reto. Por ehempel, tin hende ta rabia ora nos yega na nan porta cu e mensahe di Bijbel. No ta nos intencion pa pone hende rabia. Sinembargo, sirbishi di cas pa cas ta na harmonia cu e Scritura, y amor pa Dios y pa prohimo ta motiva nos pa duna testimonio den e manera aki. (Marco 12:28-31) Pa ‘defende y establece legalmente’ nos derecho di predica di cas pa cas, nos a entama casonan den corte, incluso e Corte Supremo di Merca. (Filipensenan 1:7, NW) Casi semper e corte ei a dicidi na nos fabor. E siguiente veredicto ta un ehempel tipico di esaki:

¹³ “E entrega personal di tratadonan religioso ta un forma masha antiguo mes cu misioneronan a uza pa evangelisa; e ta mes bieu cu e historia di imprenta. Atrabes di añanan esaki tawata un forsa poderoso den varios movemento religioso. Awendia tin varios secta cu na gran escala ta uza e forma di evangelisa aki, y nan repartidonan ta hiba e Evangelio na miles y miles di hogar y mediante bishitanan personal nan ta purba gana miembro pa nan fe. . . . Bou di e Prome Enmienda [di e Constitucion Mericano] e tipo di actividad religioso aki ta  ocupa e mesun posicion importante cu rindi adoracion den misa y predica via preekstoel.”—Murdock v. Pennsylvania, 1943.

Dicon Sigui Predica?

14. Ki efecto progresivo nos sirbishi por tin?

¹⁴ Tin hopi motibo pa duna testimonio di cas pa cas. Cada biaha cu nos bishita un doño di cas, nos ta purba planta un simiña di berdad biblico. Door di haci rebishita, nos ta purba muha e simiña ei. Y progresivamente e efecto riba e doño di cas por bira mas fuerte, pasobra Pablo a skirbi: “Ami a planta, Apolos a muha, ma ta Dios a duna crecemento.” (1 Corintionan 3:6) Pesei laga nos sigui ‘planta y muha’, cu e confiansa cu Yehova lo “duna crecemento.”

15, 16. Dicon nos ta pasa bes tras bes na cas di hende?

¹⁵ Nos ta haci e trabou di predicado di Evangelio pasobra bida ta den wega. Door di predica nos por salba nos mes y esnan cu scucha nos. (1 Timoteo 4:16) Si nos sa cu un hende su bida ta na peliger, nos lo a haci djis un intento leve pa yud’e? Claro cu no! Siendo cu esaki ta envolve salbacion di hende, nos ta sigui pasa bes tras bes na e casnan di hende. Circunstancianan ta sigui cambia. Un hende cu ta mucho ocupa pa scucha na un cierto ocasion kisas ta dispuesto pa tende e mensahe di Bijbel na un otro ora. Podise un otro miembro di famia ta habri porta, y esei lo por hiba na un combersacion biblico.

¹⁶ No ta solamente e circunstancia sino tambe e actitud di e doñonan di cas por cambia. Por ehempel, e dolor cu morto di un ser keri ta causa kisas ta motiva un persona pa scucha e mensahe di Reino. Nos ta spera di por consola e persona, hacie conciente di su necesidad spiritual y mustr’e con e por satisface esei.—Mateo 5:3, 4, NW.

17. Cua ta e motibo principal pa nos actividad di predica?

¹⁷ E motibo principal pakico nos ta duna testimonio di cas pa cas of ta participa den otro formanan di sirbishi cristian, ta e deseo di por yuda haci e nomber di Yehova conoci. (Exodo 9:16; Salmo 83:18, NW) Nos ta sinti un gran satisfaccion ora cu nos trabou di predica e Evangelio ta yuda amantenan di e berdad y husticia bira alabadonan di Yehova. E salmista a canta: “Tanto yoncuman como birgen; anciano y mucha. Laga tur alaba e nomber di [“Yehova”, NW], pasobra ta su nomber so ta halsa; su gloria ta mas halto cu tera y shelo.”—Salmo 148:12, 13.

Predica e Evangelio Ta Beneficia Nos Personalmente

18. Con nos ta beneficia door di predica e Evangelio?

¹⁸ Nos ta beneficia personalmente den varios manera door di haci e trabou di un predicado di Evangelio. Bayendo di cas pa cas cu e bon nobo ta yuda nos cultiva humildad, specialmente ora hende no ta ricibi nos na un manera amabel. Pa nos por ta predicadonan efectivo, nos mester ta manera Pablo, kende ‘a bira tur cos pa tur tipo di hende, pa asina lo e por salba algun.’ (1 Corintionan 9:19-23) Experencia den sirbishi ta yuda nos desplega tacto. Door di depende riba Yehova y scohe nos palabranan bon, nos por aplica Pablo su conseho: “Laga boso palabranan ta semper cu gracia, sasona cu salu, pa boso por sa con boso mester contesta cada persona.”—Colosensenan 4:6.

19. Con spirito santo ta yuda predicadonan di e Evangelio?

¹⁹ E trabou di predica e Evangelio tambe ta motiva nos pa depende riba Dios su spirito santo. (Zacarias 4:6) Na su turno, e fruta di spirito santo—“amor, goso, pas, pasenshi, cariño, bondad, fieldad, mansedumbre, dominio propio” ta bira bisto den nos sirbishi. (Galationan 5:22, 23) E ta influencia nos trato cu hende, pasobra door di somete nos mes na e guia di e spirito nos por mustra amor, ser gososo y pacifico, tene pasenshi y mustra cariño, desplega bondad y fieldad, y manifesta mansedumbre y dominio propio ora nos ta proclama e bon nobo.

20, 21. Menciona algun bendicion y beneficio di keda ocupa como predicadonan di Evangelio.

²⁰ Un bendicion mas cu nos ta haya como  predicadonan di e Evangelio ta cu nos ta bira mas comprensivo. Ora hende conta nos nan problemanan—malesa, desempleo, dificultadnan domestico—nos no ta actua como consehero, sino mas bien ta comparti textonan biblico cu ta anima nan y consola nan. Nos ta interesa den hende cu a ser ciega spiritualmente pero cu aparentemente tin un amor pa husticia. (2 Corintionan 4:4) Y ta ki un gran bendicion di por duna yudansa spiritual na e hendenan ei di curason recto.

²¹ Participacion regular den e trabou di predica e Evangelio ta yuda nos mantene nos bista fiha riba cosnan spiritual. (Lucas 11:34) Esaki sigur ta un beneficio, ya cu di otro manera kisas nos lo por entrega na e tentacionnan materialista cu ta asina comun den e mundo aki. Apostel Huan a urgi cristiannan: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo. Y e mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:15-17) Un cos cu lo yuda nos pa nos no stima mundo ta di keda ocupa como predicadonan di Evangelio cu tin hopi di haci den e trabou di Señor.—1 Corintionan 15:58.

Montona Tesoro den Shelo

22, 23. (a) Ki tipo di tesoro predicadonan cristian di e Evangelio ta montona? (b) Con e siguiente articulo lo yuda nos?

²² E actividad celoso di predica e Reino ta trece beneficionan duradero. Hesus a mustra esaki ora el a bisa: “No montona tesoro pa boso mes riba tera, caminda mot y frusto ta destrui nan, y caminda ladron ta kibra drenta y horta; ma montona tesoro pa boso mes den shelo, caminda ni mot ni frusto no ta destrui nan, y caminda ladron no ta kibra drenta ni horta; pasobra caminda boso tesoro ta, einan boso curason lo ta tambe.”—Mateo 6:19-21.

²³ Laga nos sigui montona tesoro den shelo, sabiendo cu nos lo no por tin un privilegio mas grandi cu esun di representa e Señor Soberano Yehova como su Testigonan. (Isaias 43:10-12) Segun cu nos ta cumpli cu nos tarea como sirbidonan di Dios, probablemente nos lo sinti mescos cu un ruman mohe cristian di 90 y pico aña cu a bisa tocante su bida largo den sirbishi di Dios: “Despues di tur loke mi a experencia mi ta gradici Yehova cu el a soporta mi tur e añanan aki, y mi ta pidi fervientemente den oracion pa e por keda mi Tata amoroso pa semper.” Si nos tambe tin tal aprecio pa nos relacion cu Dios, nos siguramente lo kier haci e trabou di predica e Evangelio den un manera cabal. E siguiente articulo lo yuda nos mira con nos por cumpli cu nos sirbishi henteramente.

Con Lo Bo Contesta?

• Dicon nos tin cu haci e trabou di un predicado di Evangelio?

• Kico bo por bisa di e trabou di predicadonan di Evangelio den pasado y presente?

• Dicon nos ta duna testimonio di cas pa cas?

• Con abo personalmente ta beneficia di haci e trabou di un predicado di Evangelio?

[Preguntanan di Estudio]

[Plachi na pagina 10]

Den nos tempo tambe tin predicadonan gososo mescos cu Felipe y su yiu mohenan

[Plachi na pagina 14]

Con abo personalmente ta beneficia segun cu bo ta comparti e bon nobo cu otro hende?