JECHOONNI seensaa, “Waaqayyo jalqabatti bantiiwwan waaqaa fi lafa uume” jedhan, jechoota hanga ammaatti barreeffaman hundarra caalaa namoota hedduu biratti kan beekamanidha. (Uumama 1:1) Macaafni Qulqulluun, jechoota gabaabaa hiika guddaa qaban kanaan Yihowaa isa Hundumaa danda’uufi Caaffanni Qulqullaa’oon hundinuu irratti xiyyeeffatanii wajjin wal nu barsiisa. Himni Macaafa Qulqulluu inni jalqabaa, Waaqayyo lafa irra jiraannu dabalatee, uumama cufa bal’aa kana akka uume ibsa. Caqasoonni itti aansanii jiran, Waaqayyo yeroo dheeraa fakkeenyaan guyyoota jedhamanii waamaman keessatti, lafti iddoo jireenyaatiif akka taatutti, wantoota nama dinqisiisan hedduu akka irratti uume nuuf ibsu.

Wantoota Waaqayyo lafarratti uume hundarra kan caalu namadha. Namni akka bifa Waaqayyootti, jechuunis amalawwan Waaqayyoo kan akka jaalalaafi ogummaasaa calaqqisuu akka danda’u godhamee kan uumamedha. Waaqayyo biyyoo lafaarraa nama uume. Nama isa jalqabaa Addaam jedhee maqaa erga moggaaseefii booda, jannata, jechuunis bakka dhaabaa Eeden keessa isa kaa’e. Waaqayyo bakka dhaabaa sana, mukkeetii babbareedaniifi ija godhataniin guute.

Waaqayyo, Addaam haati manaa akka isa barbaachistu hubate. Kanaafuu cinaacha Addaam keessaa lafee tokko fuudhee, dubartii uumuudhaan haadha manaa godhee isaaf kan kenne si’a ta’u, Addaamis Hewwaan jedhee maqaa moggaaseef. Addaam gammachuudhaan, “Isheen kun lafeen ishee lafee koo keessaa, foon ishees foon koo irraa fuudhame” jedhee walaloodhaan ishee jajate. Waaqayyo, “Kanaafis dhiirri abbaa isaa fi haadha isaa in dhiisa, haadha manaa isaattis in maxxana; isaan lachanuus foon tokko in ta’u” jedhe.—Uumama 2:22-24; 3:20.

Waaqayyo Addaamiifi Hewwaaniif abboommii lama kenne. Tokkoffaa, lafa kana akka misoomsaniifi akka kunuunsan; yeroo boodammoo, sanyiisaaniitiin lafa akka guutan isaanitti hime. Lammaffaammoo, jannata bal’aa sana keessaa, ija mukaa tokkittiirraa jechuunis, “ija mukicha nyaatanii hamaafi gaarii ittiin beekan” irraa akka hin nyaanne isaan abboome. (Uumama 2:17) Abboommii kana eeguu yoo didan ni du’u. Waaqayyo abboommiiwwan kana isaanii kennuudhaan, Bulchaasaanii ta’uusaa fudhachuusaanii akka argisiisan carraa isaanii kenne. Kanaaf abboomamuunsaanii, jaalalaafi galateeffannaa isaaf qaban argisiisa. Bulchiinsasaa isa gaarii fudhachuuf sababii ga’aa qabu turan. Namoonni kun mudaa hin qaban turan. Macaafni Qulqulluun, “Waaqayyo waanuma hojjete hundumaa in ilaale; kunoo, innis baay’ee gaarii ture” jechuudhaan nutti hima.—Uumama 1:31.

—Uumama boqonnaa 1 fi 2⁠rratti kan hundaa’e.