WAAQAYYO Addaamiifi Hewwaaniin dhaaba Eeden keessa kaaʼe. Isaan, abboomamuu waan didaniif kan duʼan taʼanillee, Waaqayyo nuun dabalatee ijoolleensaanii hundi barabaraaf Jannata keessa akka jiraatan carraa isaaniif baneera. Macaafni Qulqulluun, “Warri qajeelonni biyya in qabaatu [‘lafa in dhaalu,’ hiika bara 1899] yeroo hundumaafis keessa in taaʼu” jechuudhaan abdii kenna.—Faarfannaa 37:29.

Macaafni Qulqulluun waaʼee “bantiiwwan waaqaa haaraa” fi “lafa haaraa” ni dubbata. (Isaayaas 65:17; 2 Phexros 3:13) “Bantiiwwan waaqaa” amma jiran, bulchitoota namootaa yeroo ammaatti argaman kan argisiisan yommuu taʼu, “bantiiwwan waaqaa haaraa” kan jedhamanimmoo, Yesus Kiristosiifi warra isaa wajjin waaqarratti bulchan argisiisu. Bantiiwwan waaqaa haaraan kun, jechuunis bulchiinsi Waaqayyoo inni qajeelaan nagaa argamsiisu guutummaa lafaa yeroo bulchu haallisaa baayʼee gaarii taʼa!

“Lafa haaraa” kan jedhamehoo maalidha?— Lafa haaraa kan jedhaman namoota gaarii Yihowaa jaallatanidha. Yeroo tokko tokko Macaafni Qulqulluun “lafa” yommuu jedhu, waaʼee lafa kanaa utuu hin taʼin, waaʼee namoota lafarra jiraatanii dubbachuusaati. (Ermiyaas 22:29; Faarfannaa 76:8; 96:11) Kanaaf, namoonni lafa haaraa taʼan lafuma kanarra jiraatu.

Biyyi lafaa namoonni hamoon keessa jiraatan kun ni bada. Bishaan Badiisaa bara Nohi, namoota hamoo lafarraa balleessee akka ture yaadadhu. Akkuma kanaan dura barannemmoo, biyyi lafaa inni hamaan kun, Armaagedoonitti ni balleeffama. Mee amma Armaagedoon booda addunyaa haaraa keessa jiraachuun maal akka fakkaatu haa ilaallu.

Addunyaa haaraa nagaa qabu, jechuunis Jannata Waaqayyo fidu keessa  barabaraaf jiraachuu barbaaddaa?— Doktoorri kamiyyuu barabaraan nu jiraachisuu hin dandaʼu. Qorichi duʼarraa nu oolchuu dandaʼus hin jiru. Barabaraaf jiraachuu kan dandeenyu, Waaqayyotti yoo dhihaanne qofadha. Barsiisaa Guddichi kana gochuu kan dandeenyu akkamitti akka taʼe nutti himeera.

Mee Macaafa Qulqulluu keenya baasnee Yohannis boqonnaa 17, lakkoofsa 3 haa dubbisnu. Barsiisaa Guddichi caqasa kanarratti, “Si Waaqayyo isa tokkicha, isa dhugaa, Yesus Kristosin isa ati ergites beekuun isaanii jireenya bara baraa ti” jedheera.

Asirratti Yesus barabaraaf jiraachuuf maal gochuu akka qabnu dubbate?— Jalqabarratti, waaʼee Abbaa keenya isa samii, jechuunis waaʼee Yihowaafi waaʼee Ilmasaa isa lubbuusaa nuu kennee barachuu qabna. Kana jechuun, Macaafa Qulqulluu qayyabachuu qabna jechuudha. Kitaabni Barsiisaa Guddicharraa Baradhu jedhamu kun kana gochuuf nu gargaara.

Haataʼu malee, waaʼee Yihowaa barachuun keenya barabaraaf jiraachuuf kan nu gargaaru akkamitti?— Akkuma guyyaa guyyaadhaan nyaanni nu barbaachisu, guyyaa guyyaadhaan waaʼee Yihowaa barachuun nu barbaachisa. Macaafni Qulqulluun, “Namni nyaata duwwaadhaan hin jiraatu, dubbii afaan Waaqayyoo keessaa baʼu hundumaan malee” jedha.—Maatewos 4:4.

Waaqayyo cubbuu keenya akka nurraa balleessuuf Ilmasaa waan ergeef, waaʼee Yesus Kiristos barachuunis nu barbaachisa. Macaafni Qulqulluun, “Fayyinnis Yesus Kristos duwwaadhaan malee, kan biraatiin tokko illee hin jiru” jedha. Kana malees, “Namni ilma Waaqayyootti amanu, jireenya bara baraa qaba” jedha. (Hojii Ergamootaa 4:12; Yohannis 3:36) Yesusitti ni amannaa? Isa malee jireenya barabaraa argachuu akka hin dandeenyehoo hubanneerraa?— Taanaan, guyyaa guyyaadhaan Barsiisaa Guddicharraa barachuu keenya itti fufna; akkasumas wanta inni jedhe hojiirra oolchina.

Karaan gaariin Barsiisaa Guddicharraa barachuu itti dandeenyu inni tokko, kitaaba kana irra deddeebinee dubbisuu, fakkiiwwansaa hunda  ilaaluufi irratti xiinxaluudha. Gaaffii fakkiiwwan bira jiran deebisuu akka dandeessu of gamaaggami. Kitaaba kana abbaafi haadhakee wajjin dubbisi. Warrikee sii wajjin hin jiran taanaanimmoo, namoota gurguddaafi ijoollee kaanii wajjin dubbisi. Namoonni kaan, addunyaa haaraa Waaqayyo fidu keessa jiraachuuf maal gochuu akka qaban Barsiisaa Guddicharraa akka baratan gargaaruu utuu dandeessee sitti hin toluu?—

Macaafni Qulqulluun, ‘biyyi lafaa akka darbu’ nutti hima. Ittaansuudhaanis, “Namni fedha Waaqayyoo raawwatu garuu bara baraan in jiraata” jechuudhaan, addunyaa haaraa Waaqayyo fidu keessatti barabaraaf jiraachuuf maal gochuu akka qabnu nutti hima. (1 Yohannis 2:17) Addunyaa haaraa Waaqayyo fidu keessa barabaraaf jiraachuu kan dandeenyu akkamittiree?— Eeyyee, waaʼee Yihowaafi waaʼee Ilmasaa Yesus barachuudhaani. Haataʼu malee, wanta barannes hojiirra oolchuu qabna. Kitaaba kana qayyabachuunkee, kana gochuuf kan si gargaaru akka taʼu hawwina.