Zakkaariyaas 9:1-17
9 Murtii Waaqayyo dabarse:
“Dubbiin Yihowaa biyya Hadraak irratti dhufeera,Damaasqoon akeeka* isaa taateetti,+Sababiin isaas, ijji Yihowaa ilmaan namootaa irra,+Gosoota Israaʼel hundumaa irra jira.
2 Akkasumas Hamaat+ ishii ishii daangessitu,Xiirosii+ fi Siidooniinis+ akeeka isaa godhateera; sababiin isaas, isaan baayʼee ogeeyyii akka taʼanitti yaadu.+
3 Xiiros dallaa ittisaa* ijaarratteetti.
Ishiin meetii akkuma biyyootti,Warqiis akkuma kosii daandii irra jiruutti tuullatteetti.+
4 Kunoo, Yihowaan qabeenya ishii ishii irraa ni fuudha,Raayyaa waraanaa ishii galaana keessatti* ni rukuta;+Ishiinis ibiddaan gubamti.+
5 Ashqaloon kana argitee ni sodaatti;Gaazaan baayʼee ni dhiphatti,Eqroonis baayʼee ni dhiphatti, sababiin isaas, inni ishiin abdatte salphateera.
Gaazaan mootii ishii ni dhabdi,Ashqaloon keessas namni hin jiraatu.+
6 Ilmi diqaalaa taʼe Ashdood keessa ni buufata,Anis of tuulummaa Filisxeem nan balleessa.+
7 Wantoota dhiigaan faalaman afaan isaa keessaa,Wantoota balfamoo taʼanis ilkaan isaa gidduudhaa nan balleessa,Isa keessaa kan hafe kan Waaqa keenyaa ni taʼa;Yihudaa keessatti akka dura buʼaa* ni taʼa,+Eqroonis akka Yebuusichaa ni taati.+
8 Namni tokko illee akka isa keessa hin darbinee fi akka achiin hin deebineef,Ani eegduu taʼee mana koo bira nan buufadha;+Namni hojii hojjechiisu* kana booda achi keessa hin darbu,+Sababiin isaas, ani amma ijuma kootiin isa* argeera.
9 Yaa intala Xiyoon, baayʼee gammadi.
Yaa intala Yerusaalem, injifannoodhaan iyyi.
Kunoo, mootiin kee gara kee ni dhufa.+
Inni qajeelaa dha, fayyina ni argamsiisa,*Kan gad of qabu dhas;+ harree irra taaʼee,Ilmoo harree,* eeyyee, ilmoo harree irra taaʼee ni dhufa.+
10 Ani Efreem irraa gaarii fardaa waraanaa,Yerusaalem irraas farda nan fuudha.
Iddaan waraanaa ni fudhatama.
Inni sabootaaf nagaa ni labsa;+Bulchiinsi isaa galaanaa hamma galaanaatti,Lagicha* irraas hamma andaara lafaatti ni taʼa.+
11 Yaa dubartii nana, ani dhiiga kakuu keetiitiin kan kaʼe
Hidhamtoota kee boolla bishaan hin qabne keessaa baasee nan erga.+
12 Isin hidhamtoonni warri abdii qabdan, gara dahoo sanaatti deebiʼaa.+
Ani harʼa sitti nan hima:‘Yaa dubartii nana, ani gaʼee dachaa siif nan deebisa.+
13 Sababiin isaas, ani Yihudaa akka iddaa kootti nan dabsa.*
Iddaa sana Efreemiin nan guuta,*Yaa Xiyoon, ani ilmaan kee dammaqseeIlmaan Giriikii irratti akka kaʼan nan godha,Akka goraadee loltuus sin godha.’
14 Yihowaan saba isaa wajjin akka jiru ni argisiisa,Xiyyi isaa akkuma bakakkaatti ni baʼa.
Yihowaan Gooftaa Ol Aanaan sagalee xurumbaa* ni dhageessisa,+Obomboleettii kibbaatiinis fuulduratti ni adeema.
15 Yihowaan Gooftaan Raayyaa isaaniif ni lola,Isaan dhagoota furrisaa ni liqimsu, ni dhidhiitus.+
Isaan ni dhugu, akka waan daadhii wayinii dhuganiittis ni wacu;Akka saanii golbootti,Akka goleewwan iddoo aarsaattis ni guutamu.+
16 Sabni isaa hoolota isaa waan taʼaniif,Guyyaa sanatti Waaqni isaanii Yihowaan isaan ni oolcha;+Isaan akkuma dhagaa gatii guddaa qabuu fi gonfoo irra jiruutti biyyoo isaa irraa ni calaqqisu.+
17 Sababiin isaas, gaarummaan isaa baayʼee guddaa dha!+
Miidhaginni isaas baayʼee dinqisiisaa dha!
Midhaan dargaggoonni,Daadhiin wayiniis shamarran akka ciman ni godha.”+
Miiljaleewwan
^ Kal., “iddoo boqonnaa.”
^ Ykn., “dahoo.”
^ Ykn tarii, “irratti.”
^ Kal., “sheekii.” Namni dura buʼaa gosaa taʼe “sheekii” jedhamee waamama ture.
^ Dhiphina saba isaa kan argisiisu fakkaata.
^ Ykn., “cunqursu.”
^ Ykn., “ni injifata; oolcheeras.”
^ Ykn., “Wadala.”
^ Jechuunis, Efraaxis.
^ Kal., “irra nan ejjedha.”
^ Jechuunis, akkuma xiyyaatti.
^ Ykn., “fiinoo,” jechuunis, xurumbaa gaanfa irraa hojjetamu.
