Wangeela Maarqos 1:1-45
-
Yohaannis Cuuphaan ni lallabe (1-8)
-
Cuuphamuu Yesuus (9-11)
-
Yesuus Seexanaan qorame (12, 13)
-
Yesuus Galiilaatti lallabuu jalqabe (14, 15)
-
Barattoonni jalqabaa ni waamaman (16-20)
-
Yesuus hafuura xuraaʼaa baase (21-28)
-
Yesuus Qifirnaahomitti namoota hedduu fayyise (29-34)
-
Bakka namni hin jirretti kadhachuu (35-39)
-
Namni dhukkuba nadaayiitiin qabame ni fayye (40-45)
1 Misiraachoon waaʼee Yesuus Kiristoos Ilma Waaqayyoo ibsu kana irraa jalqaba:
2 Isaayyaas raajichi akkana jedhee barreesseera: “(Kunoo, ani ergamaa koo isa karaa siif qopheessu si* dura nan erga.)+
3 Sagaleen tokko lafa onaa keessaa, ‘Daandii Yihowaa* qopheessaa! Karaa isaas wal qixxeessaa’ jedhee iyya.”+
4 Yohaannis Cuuphaan, cuuphaa isa mallattoo yaada geddarannaa taʼee fi dhiifama cubbuu argachuuf karaa banu lafa onaa keessatti lallaba ture.+
5 Guutummaan naannoo Yihudaa fi jiraattonni Yerusaalem hundi gara isaa dhaqanii cubbuu isaanii ifatti himachaa Laga Yordaanos keessatti isaan cuuphamu* turan.+
6 Yohaannis uffata rifeensa gaalaa irraa tolfame uffata, mudhii isaas qabattoo gogaa irraa tolfameen hidhata ture;+ akkasumas awwaannisaa fi damma bosonaa nyaata ture.+
7 Inni akkana jedhee lallaba ture: “Namni ana caalaa jabaa taʼe tokko na booda dhufaa jira; ani gad jedhee hidhaa kophee isaa illee hiikuuf gaʼumsa hin qabu.+
8 Ani bishaaniinan isin cuuphe; inni garuu hafuura qulqulluudhaan+ isin cuupha.”
9 Bara sanatti Yesuus Naazireet ishii Galiilaatti argamtu irraa dhufee Laga Yordaanositti Yohaannisiin cuuphame.+
10 Akkuma bishaan keessaa ol baʼeenis samiiwwan utuu banamanii fi hafuurri qulqulluun akka gugeetti* utuu isa irra buʼuu+ arge.
11 Achiis sagaleen, “Ati Ilma koo isa jaallatamaa dha; ani sitti nan gammada”+ jedhu tokko samii irraa ni dhufe.
12 Yeruma sanas hafuurri gara lafa onaa akka dhaqu isa kakaase.
13 Kanaafuu, Seexanaan qoramaa guyyaa 40f lafa onaa keessa ture.+ Inni bineensota bosonaa wajjin ture; taʼus maleekonni isa tajaajilu turan.+
14 Yohaannis erga hidhamee booda, Yesuus misiraachoo Waaqayyoo lallabaa+ gara Galiilaa dhaqe;+
15 Inni, “Yeroon murteeffame gaʼeera; Mootummaan Waaqayyoos dhihaateera. Kanaafuu, yaada geddaradhaa;+ misiraachichattis amanaa” jedha ture.
16 Qarqara Galaana Galiilaa utuu deemaa jiruu, Simoonii fi obboleessi Simoon Indiriyaas+ utuu saaphana isaanii galaanatti darbatanii+ arge; isaan qurxummii kan qaban turan.+
17 Kanaafuu Yesuus, “Kottaa na duukaa buʼaa; ani immoo namoota kan qabdan isin nan godha”+ isaaniin jedhe.
18 Isaanis yeruma sana saaphana isaanii dhiisanii isa duukaa buʼan.+
19 Erga xinnoo adeemee booda, Yaaqoob ilmi Zabdewosii fi obboleessi isaa Yohaannis bidiruu isaanii keessatti utuu saaphana isaanii suphanii isaan argee,+
20 yeruma sana isaan waame. Kanaafuu, isaan abbaa isaanii Zabdewosiin namoota mindeeffamanii wajjin bidiricha keessatti dhiisanii isa duukaa buʼan.
21 Achiis gara Qifirnaahom deeman.
Akkuma guyyaan Sanbataa gaʼeenis mana sagadaa seenee barsiisuu jalqabe.+
22 Namoonnis akkaataa inni itti barsiisu baayʼee dinqisiifatan; sababiin isaas, inni akka barsiisota seeraatti* utuu hin taʼin, akka nama aangoo qabuutti isaan barsiisa ture.+
23 Yeroo kanatti namni hafuura xuraaʼaadhaan qabame tokko mana sagadaa isaanii keessa jira ture; inni akkana jedhee iyye:
24 “Yaa Yesuus nama Naazireet, nuyii fi ati maal wal irraa qabna?+ Nu balleessuu dhuftee? Ati Qulqullicha Isa Kan Waaqayyoo taʼuu kee sirriittan beeka!”+
25 Yesuus garuu, “Cal jedhi, isa keessaas baʼi!” jedhee isa ifate.
26 Hafuurri xuraaʼaan sunis namicha erga dhidhiittachiisee booda, caraanee isa keessaa baʼe.
27 Yeroo kanatti namoonni sun hundi baayʼee dinqisiifatanii, “Kun maali? Barumsa haaraa dha! Inni hafuurota xuraaʼoo illee aangoodhaan ajaja; isaanis isaaf ajajamu” jedhanii walitti dudubbachuu jalqaban.
28 Kanaan kan kaʼes, oduun waaʼee isaa dubbatamu kallattii hundumaatiin guutummaa naannoo Galiilaa keessatti saffisaan babalʼate.
29 Achiis mana sagadaa keessaa baʼanii, Yaaqoobii fi Yohaannisii wajjin gara mana Simoonii fi Indiriyaas dhaqan.+
30 Yeroo kanatti amaatiin Simoon+ dhukkuba dhaqna gubaatiin qabamtee ciistee turte; isaanis yeruma sana waaʼee ishii isatti himan.
31 Innis gara ishii dhaqee harka ishii qabee ol ishii kaase. Dhaqna gubaan sunis ishii ni gadhiise; ishiinis isaan tajaajiluu jalqabde.
32 Galgala erga aduun lixxee booda, namoonni warra dhukkubsatanii fi jinniidhaan qabaman hunda gara isaatti fiduu jalqaban;+
33 namoonni magaalattii hundis balbalicha duratti walitti qabaman.
34 Kanaafuu, inni namoota dhukkuba adda addaatiin qabaman hedduu ni fayyise;+ jinniiwwan hedduus ni baase; taʼus, jinniiwwan kun inni Kiristoos taʼuu isaa* waan beekaniif akka dubbatan isaaniif hin heyyamne.
35 Ganama barii utuma lafti hin ifin kaʼee gad baʼuudhaan bakka namni hin jirre dhaqee achitti kadhachuu jalqabe.+
36 Simoonii fi namoonni isaa wajjin turan garuu cimsanii isa barbaadan;
37 yommuu isa argatanis, “Namni hundi si barbaadaa jira” isaan jedhan.
38 Inni garuu, “Achittis akkan lallabuuf kottaa gara magaalota dhihoo jiranii haa dhaqnu; sababiin isaas, ani kanaafan dhufe”+ isaaniin jedhe.
39 Achiis manneen sagadaa isaanii keessatti lallabaa fi jinniiwwan baasaa guutummaa Galiilaa keessa naannaʼe.+
40 Achittis namichi dhukkuba nadaayiitiin qabame tokko gara isaa dhufee jilbeenfatee, “Yoo fedhii kee taʼe, na fayyisuu* dandeessa”+ jedhee isa kadhate.
41 Yesuusis baayʼee isaaf gaddee, harka isaa diriirsee isa qaqqabee, “Nan fedha! Fayyi!”*+ isaan jedhe.
42 Yeruma sana dhukkubni nadaayii sun isa irraa bade, namichis ni fayye.*
43 Achiis Yesuus cimsee isa akeekkachiisuudhaan yeruma sana isa geggeesse:
44 “Eenyutti iyyuu homaa akka hin dubbanne of eeggadhu; garuu dhaqiitii lubichatti of argisiisi; isaaniif ragaa akka taʼuttis akkuma Museen ajajetti+ qulqullaaʼuu keetiif kennaa dhiheessi”+ isaan jedhe.
45 Namichi garuu erga achii deemee booda wanta kana balʼinaan labsuu fi odeessuu jalqabe; kanaan kan kaʼes, sana booda Yesuus ifatti gara magaalaatti seenuu hin dandeenye; kanaa mannaa, magaalaadhaa ala bakka namni hin jirre jiraachuu jalqabe. Taʼus, namoonni kallattii hundumaa irraa gara isaa dhufu turan.+
Miiljaleewwan
^ Kal., “fuula kee.”
^ Kutaa Dabalataa A5 ilaali.
^ Ykn., “gad liccisiifamu.”
^ Ykn., “makoodiitti; andariitti.”
^ Kal., “barreessitootaatti.”
^ Ykn tarii, “eenyu akka inni taʼe.”
^ Kal., “qulqulleessuu.”
^ Kal., “qulqullaaʼi.”
^ Kal., “ni qulqullaaʼe.”
