Lakkoofsa 23:1-30
23 Achiis Balaʼaam Baalaaqiin, “Bakka kanatti iddoowwan aarsaa torba ijaari;+ achiis qotiyoowwan torbaa fi korbeeyyii hoolaa torba naaf qopheessi” jedhe.
2 Baalaaqis yeruma sana akkuma Balaʼaam jedhe ni godhe. Achiis Baalaaqii fi Balaʼaam tokkoon tokkoon iddoowwan aarsaa sanaa irratti qotiyyoo tokko tokkoo fi korbeessa hoolaa tokko tokko ni dhiheessan.+
3 Balaʼaamis Baalaaqiin, “Ati asuma aarsaa kee isa gubamu bira turi; ani immoo nan deema. Tarii Yihowaan natti mulʼata taʼa. Anis wanta inni natti mulʼisu kam iyyuu sitti nan hima” jedhe. Achiis gara tabba tokkootti ol baʼe.
4 Waaqayyos Balaʼaamitti ni mulʼate;+ innis, “Ani iddoowwan aarsaa torba tarree galchee ijaareera; tokkoon tokkoon iddoowwan aarsaa irrattis qotiyyoo tokko tokkoo fi korbeessa hoolaa tokko tokko dhiheesseera” isaan jedhe.
5 Yihowaan dubbii kana afaan Balaʼaam keessa ni kaaʼe:+ “Gara Baalaaqitti deebiʼiitii akkana isaan jedhi.”
6 Kanaafuu, inni ni deebiʼe; Baalaaqii fi bulchitoonni Moʼaab hundis aarsaa isaa isa gubamu bira dhaabbatanii ni arge.
7 Achiis jechama kana dubbate:+
“Baalaaq mootiin Moʼaab Aaraam irraa,+Gaarota bahaa biraa na fidee akkana naan jedhe:
‘Kottuutii Yaaqoobiin naaf abaari.
Eeyyee, kottuutii Israaʼeliin naaf balaaleffadhu.’+
8 Namoota Waaqayyo hin abaarre akkamittan abaara?
Namoota Yihowaan hin balaaleffanne hoo akkamittan balaaleffadha?+
9 Ani fiixee qarsaa irraa isaan nan ilaala,Tabba irraas isaan nan arga.
Isaan akka saba tokkootti kophaa isaanii achi jiraatu;+Saboota keessaa tokko akka taʼanittis of hin ilaalan.+
10 Namoota Yaaqoob warra akka biyyoo lafaatti hedduu taʼan+Yookiin kurmaana Israaʼel illee eenyutu lakkaaʼuu dandaʼa?
Duʼa nama qajeelaa duʼuu nan barbaada,*Dhumni koos akka kan isaanii haa taʼu.”
11 Achiis Baalaaq Balaʼaamiin, “Wanti ati na irratti raawwatte kun maali dha? Ani diinota koo akka abaartun si fide; ati garuu isaan eebbiste malee wanta goote hin qabdu”+ jedhe.
12 Innis, “Ani wanta Yihowaan afaan koo keessa kaaʼe qofa dubbachuu hin qabuu?” jedhee deebise.+
13 Baalaaqis, “Maaloo, bakka isaaniin itti ilaaluu dandeessu kan biraa haa dhaqnu. Muraasa isaanii qofa argita malee, hunda isaanii hin argitu. Achi taʼiitii isaaniin naaf abaari”+ isaan jedhe.
14 Kanaafuu, inni gara dirree Zofiim isa fiixee Phisgaa irratti+ argamutti isa ni geesse; achiis iddoowwan aarsaa torba ijaaree tokkoon tokkoon iddoo aarsaa sanaa irratti qotiyyoo tokko tokkoo fi korbeessa hoolaa tokko tokko dhiheesse.+
15 Balaʼaamis Baalaaqiin, “Achitti hamman isaa wajjin dubbadhutti ati asuma aarsaa kee isa gubamu bira turi” jedhe.
16 Yihowaanis Bala’aamitti ni mulʼate; dubbii kanas afaan isaa keessa ni kaaʼe:+ “Gara Baalaaqitti deebiʼiitii akkana isaan jedhi.”
17 Kanaafuu, inni gara isaa dhufee, Baalaaq aarsaa isaa isa gubamu biratti isa eegaa akka jiru ni arge; bulchitoonni Moʼaabis isaa wajjin turan. Baalaaqis, “Yihowaan maal jedhe?” jedhee isa gaafate.
18 Achiis inni jechama kana dubbate:+
“Yaa Baalaaq, kaʼii dhaggeeffadhu.
Yaa ilma Ziphoor, na dhagaʼi.
19 Waaqayyo akka namaa soba hin dubbatu,+Akka ilma namaas yaada isaa hin jijjiiru.*+
Inni wanta tokko yommuu jedhu, wanta sana hin raawwatuu?
Wanta dubbate hoo, fiixaan hin baasuu?+
20 Kunoo, ani eebbisuufan dhufe;Egaa inni eebbiseera,+ ani immoo jijjiiruu hin dandaʼu.+
21 Inni mora Yaaqoob irratti raawwatamu akkamii iyyuu hin obsu,Rakkinni akkamii iyyuu Israaʼel irra akka gaʼus hin heyyamu.
Waaqni isaa Yihowaan isaanii wajjin jira,+Inni isaan gidduutti akka mootiitti sagalee guddaadhaan ni jajama.
22 Waaqayyo biyya Gibxii keessaa isaan baaseera.+
Inni isaaniif akka gaanfota gafarsaa ti.+
23 Sababiin isaas, namni Yaaqoob irratti raajii hamaa dubbachuu dandaʼu hin jiru,+Hoodni Israaʼel irratti hojjetu akkamii iyyuu hin jiru.+
Yeroo kanatti waaʼee Yaaqoobii fi waaʼee Israaʼel,
‘Wanta Waaqayyo godhe ilaalaa!’ ni jedhama.
24 Sabni akka leencaatti ol kaʼu kunoo ti,Inni akkuma leencaatti kaʼee ni dhaabbata.+
Inni isa adamse hamma nyaatutti,Dhiiga warra qalamaniis hamma dhugutti hin ciisu.”
25 Achiis Baalaaq Balaʼaamiin, “Isa abaaruu hin dandeessu taanaan, isa eebbisuus hin qabdu” jedhe.
26 Balaʼaamis, “‘Wantuma Yihowaan jedhe hundumaan godha’ siin hin jennee?” jedhee Baalaaqiif deebise.+
27 Baalaaqis Balaʼaamiin, “Maaloo kottu, ammas gara bakka kan biraatti sin geessa. Tarii achi irraa isa naaf abaaruun kee Waaqa dhugaa duratti wanta sirrii taʼuu dandaʼa” jedhe.+
28 Kanaafuu, Baalaaq Balaʼaamiin gara fiixee Pheʼor isa Yeshiimon* fuuldura jirutti geesse.+
29 Achiis Balaʼaam Baalaaqiin, “Bakka kanatti iddoowwan aarsaa torba ijaari; achiis qotiyyoowwan torbaa fi korbeeyyii hoolaa torba naaf qopheessi” jedhe.+
30 Baalaaqis akkuma Bala’aam jedhe ni godhe; tokkoon tokkoon iddoo aarsaa sanaa irrattis qotiyyoo tokko tokkoo fi korbeessa hoolaa tokko tokko ni dhiheesse.
Miiljaleewwan
^ Ykn., “Lubbuun koo duʼa nama qajeelaa haa duutu.”
^ Ykn., “hin gaabbu.”
^ Ykn tarii, “gammoojjii; lafa onaa.”
