Fakkeenya 4:1-27
4 Yaa ilmaan koo, adaba abbaa dhagaʼaa;+Hubannaa argachuuf xiyyeeffannaadhaan dhaggeeffadhaa,
2 Qajeelfama gaarii isiniif nan kenna;Barumsa* koo hin dhiisinaa.+
3 Ani abbaa kootiif ilma dhugaan ture,+Haati tiyyas anaaf jaalala guddaa qabdi turte.+
4 Inni akkana jedhee na barsiiseera: “Garaan kee dubbii koo cimsee haa qabatu.+
Ajajawwan koo eegi, lubbuudhaanis ni jiraatta.+
5 Ogummaa argadhu, hubannaas argadhu.+
Wantan jedhu hin irraanfatin, isa irraas hin gorin.
6 Isa hin dhiisin, innis si eega.
Isa jaalladhu, innis si golga.
7 Ogummaan wanta baayʼee barbaachisaa taʼe* waan taʼeef,+ ogummaa argadhu,Wanta qabdu hundumaa irrattis hubannaa qabaadhu.+
8 Bakka guddaa isaaf kenni, innis ol si qaba.+
Ati waan isa hammattuuf, inni ulfina siif kenna.+
9 Inni mataa kee irra gonfoo nama hawwatu ni kaaʼa;Gonfoo bareedinaatiinis si miidhagsa.”
10 Yaa ilma koo, dhagaʼi, dubbii koo fudhadhu,Barri jireenya keetiis hedduu ni taʼa.+
11 Daandii ogummaa irratti sin barsiisa;+Daandiiwwan qajeelinaa irrattis sin geggeessa.+
12 Yommuu deemtu, tarkaanfiin kee duubatti hin harkifamu;Yoo fiigdes, hin gufattu.
13 Adaba cimsii qabadhu; hin gadhiisin.+
Inni jireenya kee waan taʼeef, isa eegi.+
14 Daandii jalʼootaatti hin seenin,Daandii namoota hamoo irras hin deemin.+
15 Irraa baqadhu, isa irra hin buʼin;+Irraa gori, bira darbii deemi.+
16 Isaan wanta hamaa yoo raawwatan malee rafuu hin dandaʼan.
Nama tokko yoo lafaan dhaʼan malee hirriba hin argatan.
17 Isaan nyaata hamminaa sooratu,Daadhii wayinii jalʼinaas ni dhugu.
18 Daandiin qajeelotaa garuu akkuma ifa ganamaa isa akka gaariitti ifuu ti;Hamma akka ifa saafaa taʼuttis ifni isaa ittuma dabalaa deema.+
19 Daandiin hamootaa garuu akkuma dukkanaa ti;Isaan wanta isaan gufachiisu hin beekan.
20 Yaa ilma koo, dubbii koo dhagaʼi;Wantan jedhus of eeggannoodhaan dhaggeeffadhu.*
21 Ija kee duraa isaan hin fageessin;Garaa kee keessatti isaan qabadhu,+
22 Sababiin isaas, isaan warra isaan argataniif jireenya,+Guutummaa qaama* isaaniitiifis fayyaa argamsiisu.
23 Maddi jireenyaa isa keessaa waan argamuuf,Wantoota hundumaa caalaa garaa kee eeggadhu.+
24 Dubbii micciiramaa of irraa fageessi,+Dubbii jalʼaa irraas fagaadhu.
25 Ijji kee kallattiidhaan fuulduratti haa ilaalu,Eeyyee, kallattiidhaan fuuldura kee qofa ilaali.*+
26 Daandii miila keetii wal qixxeeffadhu,*+Daandiin kee hundis amansiisaa ni taʼa.
27 Gara mirgaatti yookiin gara bitaatti hin gorin.+
Miila kee wanta hamaa irraa deebisi.
Miiljaleewwan
^ Ykn., “Seera.”
^ Ykn., “wanta dursi kennamuuf.”
^ Kal., “Gurra kees wantan jedhutti qabi.”
^ Kal., “foon.”
^ Ykn., “Ijji kee inni ifu fuuldura kee qofa haa ilaalu.”
^ Ykn tarii, “of eeggannoodhaan ilaali.”
