Faarfannaa 78:1-72
Maaskiil.* Faarfannaa Asaaf.+
78 Yaa saba koo, seera* koo dhagaʼi;Gurra kees gara dubbii afaan kootti qabi.
2 Fakkeenyaan afaan koo nan banadha.
Hibboo bara duriis nan dubbadha.+
3 Waaʼee wanta dhageenyee fi wanta beeknuu,Isa abbootiin keenya nutti himan,+
4 Ilmaan isaanii jalaa hin dhoksinu;Gochawwan Yihowaa warra jajamuu qabanii fi jabina isaa,+Wantoota dinqisiisoo inni raawwates,+Dhaloota dhufutti ni himna.+
5 Inni yaadachiisa tokko Yaaqoob gidduutti ni hundeesse,Seera tokkos Israaʼel gidduutti ni dhaabe;Wantoota kana ijoollee isaanii akka beeksisan+Abbootii keenya ni ajaje,
6 Kunis dhaloonni dhufu,Ijoolleen gara fuulduraatti dhalatan, wantoota kana akka beekaniifi.+
Isaan immoo ijoollee isaaniitti ni himu.+
7 Wantoonni kunis Waaqayyo irratti amanannaa akka qabaatan godhu.
Isaan hojiiwwan Waaqayyoo hin irraanfatan,+Kanaa mannaa ajajawwan isaa ni eegu.+
8 Sana booda isaan akka abbootii isaanii,Dhaloota didaa fi fincilaa,+Dhaloota garaan isaa walaallammii taʼe,*+Isa hafuurri isaa Waaqayyoof amanamaa hin taane hin taʼan.
9 Efreemonni iddaa kan hidhatan turan,Garuu guyyaa waraanaatti ni baqatan.
10 Isaan kakuu Waaqayyoo hin eegne,+Seera isaatiin deemuus ni didan.+
11 Wanta inni godhe,Hojiiwwan isaa warra dinqisiisoo inni isaanitti argisiises ni irraanfatan.+
12 Inni biyya Gibxii keessatti, naannoo Zoʼaanitti,+Utuma abbootiin isaanii arganii wantoota dinqisiisoo raawwate.+
13 Achi keessa isaan ceesisuuf, galaanicha gargar hire,Bishaanonnis akka hidhaatti* akka dhaabbatan godhe.+
14 Guyyaa duumessaan,Halkan guutuu immoo ifa ibiddaatiin isaan geggeesse.+
15 Lafa onaa keessatti qarsaawwan ni babbaqaqse,Akka waan bishaan gad fagoo keessaa dhuganiittis dhuganii akka quufan godhe.+
16 Kattaa keessaa burqaawwan isaaniif ni baase,Bishaanis akkuma lagaatti akka gad yaaʼu godhe.+
17 Isaan garuu gammoojjii keessatti Isa Hundaa Olii irratti finciluudhaan,Isa irratti cubbuu hojjechuu isaanii itti fufan;+
18 Nyaata dharraʼan* irra deddeebiʼanii gaafachuudhaan,Garaa isaaniitti Waaqayyoon ni morkatan.*+
19 Kanaafuu, “Waaqayyo lafa onaa keessatti maaddii qopheessuu dandaʼaa?”+ jedhaniiIsa mormanii dubbatan.
20 Kunoo, inni qarsaa ni rukute,Kanaafuu, bishaanonni ni yaaʼan, burqaawwanis ni lolaʼan.+
“Nyaata hoo nuuf kennuu ni dandaʼaa?
Yookiin saba isaatiif foon qopheessuu ni dandaʼaa?”+
21 Yihowaan yommuu isaan dhagaʼetti baayʼee aare;+Ibiddi+ Yaaqoob irratti ni bobaʼe,Dheekkamsi isaas Israaʼel irratti ni bobaʼe;+
22 Sababiin isaas, isaan Waaqayyotti hin amanne;+Dandeettii inni isaan oolchuuf qabuttis hin amanamne.
23 Kanaafuu, samiiwwan ol gubbaa warra duumessa uffatan ni ajaje,Balbaloota samiis ni bane.
24 Isaan akka nyaataniif mannaa isaaniif roobsuu isaa itti fufe;Midhaan samiis isaaniif ni kenne.+
25 Namoonni nyaata warra jajjaboo* ni nyaatan;+Innis isaan quubsuuf hamma isaan gaʼu isaaniif ni qopheesse.+
26 Bubbee bahaa samiiwwan keessatti ni kakaase,Bubbeen kibbaas humna isaatiin akka bubbisu godhe.+
27 Foon akkuma biyyootti,Simbirrootas akkuma cirracha qarqara galaanaatti isaan irratti roobse.
28 Buufata isaa gidduutti,Guutummaa naannoo dunkaanota isaattis akka kufan godhe.
29 Isaanis ni nyaatan, akka malees ni quufan;Inni wanta isaan hawwan isaaniif ni kenne.+
30 Taʼus guutummaatti dharraa baʼuu isaanii dura,Nyaanni isaanii utuma afaan isaanii keessa jiruu,
31 Dheekkamsi Waaqayyoo isaan irratti bobaʼe.+
Namoota isaanii warra ciccimoo ni ajjeese;+Dargaggoota Israaʼelis ni kukuffise.
32 Kun taʼus, isaan caalaatti cubbuu hojjetan,+Hojiiwwan isaa warra dinqisiisoo taʼanittis hin amanne.+
33 Kanaafuu, inni guyyoota isaanii akkuma hafuuraatti,Waggoota isaaniis naasuu tasaatiin ni gabaabse.+
34 Isaan garuu akkuma inni isaan ajjeesuu jalqabeen isa barbaaddatu turan;+Deebiʼaniis Waaqayyoon ni barbaadu turan;
35 Kanas kan godhan, Waaqayyo Qarsaa+ isaanii,Waaqni Hundaa Olii isa isaan furu* akka taʼe yaadachuudhaan ture.+
36 Taʼus afaan isaaniitiin isa gowwoomsuuf yaalii godhan,Arraba isaaniitiinis isa soban.
37 Garaan isaanii isa biratti cimaa hin turre;+Isaan kakuu isaatiif amanamoo hin turre.+
38 Inni garuu gara laafessa ture;+Balleessaa isaanii isaaniif dhiisa,* akka badanis hin godhu ture.+
Dheekkamsa isaa hundumaa dammaqsuu mannaa,Yeroo baayʼee aarii isaa isaan irraa deebiseera.+
39 Sababiin isaas, isaan foon akka taʼan,Akkasumas bubbee bubbisee darbuu fi hin deebine akka taʼan* yaadateera.+
40 Isaan lafa onaa keessatti siʼa meeqa isa irratti fincila kaasan!+
Gammoojjii keessattis siʼa meeqa isa gaddisiisan!+
41 Irra deddeebiʼanii Waaqayyoon ni qoran,+Isa Qulqulluu kan Israaʼelis ni gaddisiisan.*
42 Humna* isaa hin yaadanne,Guyyaa itti diina jalaa isaan oolche* sana,+
43 Mallattoowwan isaa Gibxii keessatti,+Dinqiiwwan isaas naannoo Zoʼaan keessatti akkamitti akka argisiise,
44 Lageen isaanii keessaa dhuguu akka isaan hin dandeenyeef,Boʼoowwan Abbayyaa akkamitti gara dhiigaatti akka jijjiires+ hin yaadanne.
45 Inni tuuta qarxaasaa isaan nyaatu,+Raacha isaan balleessus isaanitti erge.+
46 Midhaan isaanii awwaannisa hin quufneef,Firii dadhabbii isaaniis hoomaa awwaannisaatiif ni kenne.+
47 Mukeetii wayinii isaanii cabbiidhaan,+Mukeetii harbuu isaaniis cabbii guguddaadhaan ni balleesse.
48 Horiiwwan feʼumsaa isaanii cabbiitti,+Horiiwwan qeʼee isaaniis bakakkaatti* dabarsee kenne.
49 Aarii isaa isa bobaʼaa,Finiina, dheekkamsaa fi dhiphina,Tuuta maleekotaa badiisa fidanis isaanitti erge.
50 Dheekkamsa isaatiif daandii qopheesse.
Duʼa irraa isaan* hin oolchine;Kanaa mannaa, golfaadhaaf dabarsee isaan* kenne.
51 Dhuma irrattis angafoota Gibxii hundumaa,Warra firii jalqaba jabina isaanii taʼan dunkaanota Kaam keessatti ni rukute.+
52 Achiis saba isaa akka hoolotaatti gad ni baase,+Akkuma tuuta horii lafa onaa keessa jiruuttis isaan geggeesse.
53 Nagaadhaan isaan geesse,Sodaanis isaanitti hin dhagaʼamne;+Galaanichi diinota isaanii ni uwwise.+
54 Gara naannoo isaa isa qulqulluutti,Gara naannoo gaarotaa isa harka isaa mirgaatiin argate kanaatti isaan geesse.+
55 Saboota isaan duraa ni ariʼe;+Wadaroo safaraatiin isaaniif dhaala ni hire;+Manneen isaanii keessa gosoota Israaʼel ni jiraachise.+
56 Isaan garuu Waaqa Isa Hundaa Olii morkachuu* isaanii fi isa irratti fincila kaasuu isaanii itti fufan;+Yaadachiisawwan isaatiifis xiyyeeffannaa hin kennine.+
57 Kana malees, isaan isa irraa ni garagalan, akka abbootii isaaniis gantoota turan.+
Akkuma iddaa laafeetti kan hin amansiisne turan.+
58 Iddoowwan ol kaʼoo isaaniitiin irra deddeebiʼanii isa dheekkamsiisan,+Fakkiiwwan isaanii warra bocamaniinis aariidhaaf* isa kakaasan.+
59 Waaqayyo ni dhagaʼe, akka malees ni dheekkame,+Kanaafuu, guutummaatti Israaʼeliin ni dhiise.
60 Dhuma irrattis godoo qulqulluu Shiiloo,Dunkaana isa inni namoota gidduu keessa jiraachaa ture sana ni dhiise.+
61 Mallattoon jabina isaa akka boojiʼamu godhe;Simboo isaas harka diinaatti dabarsee kenne.+
62 Saba isaa goraadeetti dabarsee kenne,+Dhaala isaattis akka malee aare.
63 Dargaggoota isaa ibiddi ni nyaate,Durboota isaatiifis sirbi cidhaa hin sirbamne.*
64 Luboonni isaa goraadeedhaan dhumaniiru,+Dubartoonni isaanii warri abbaan manaa irraa duʼes hin boonye.+
65 Achiis akkuma namni jabaan+ daadhii wayinii irraa dammaqutti,Yihowaan akka waan hirribaa dammaqutti ni dammaqe.+
66 Diinota isaas duubatti deebise;+Salphina cimaa keessa isaan buuse.
67 Dunkaana Yoseef ni tuffate;Gosa Efreem hin filanne.
68 Kanaa mannaa, gosa Yihudaa,+Gaara Xiyoon isa jaallatu ni filate.+
69 Iddoon qulqulluu isaa akka samiiwwaniitti,*Akka lafa ishii bara baraaf hundeesseettis jabaatee akka dhaabbatu godhe.+
70 Tajaajilaa isaa Daawitiin filatee,+Goorannoo hoolotaa gidduudhaa,+
71 Hoolota hoosisan eeguu irraas isa fudhate;Yaaqoob isa saba isaa taʼe irratti,Israaʼel isa dhaala isaa taʼe irrattis tiksee isa godhe.+
72 Innis garaa qajeelaadhaan isaan tikse,+Harka dandeettii qabuunis isaan geggeesse.+
Miiljaleewwan
^ Ibsa Jechootaa ilaali.
^ Ykn., “barumsa.”
^ Kal., “hin qophoofne.”
^ Ykn., “girgiddaatti.”
^ Ykn., “Lubbuu isaaniitiif nyaata.”
^ Kal., “qoran.”
^ Ykn., “maleekotaa.”
^ Ykn., “isaaniif haaloo baʼu.”
^ Kal., “haguuga.”
^ Ykn tarii, “Hafuurri akka deemuu fi deebiʼee akka hin dhufne.”
^ Ykn., “ni dhukkubsan.”
^ Kal., “Harka.”
^ Kal., “fure.”
^ Ykn tarii, “dhaqna gubaatti.”
^ Ykn., “lubbuu isaanii.”
^ Kal., “jireenya isaanii.”
^ Kal., “qoruu.”
^ Ykn., “hinaaffaadhaaf.”
^ Kal., “Durboonni isaa hin jajamne.”
^ Kal., “akka iddoowwan ol kaʼootti ni ijaare.”
