Faarfannaa 35:1-28
Faarfannaa Daawit.
35 Yaa Yihowaa, dhimma seeraa koo irratti warra na morman naaf falmi;+Warra naan lolan loli.+
2 Gaachana kee isa xinnoo* fi gaachana kee isa guddaa fudhadhuutii,+Naaf falmuuf kaʼi.+
3 Eeboo kee fi qottoo waraanaa kee warra na ariʼatan irratti kaasi.+
“Kan si fayyisu ana dha” naan jedhi.+
4 Warri lubbuu koo adamsan haa qaanaʼan, haa salphatanis.+
Warri na balleessuuf natti malatan salphatanii duubatti haa deebiʼan.
5 Isaan akka habaqii bubbee keessaa haa taʼan;Maleekaan Yihowaas isaan haa ariʼu.+
6 Yommuu maleekaan Yihowaa isaan hordofus,Daandiin isaanii dukkanaa fi mucuca haa taʼu.
7 Isaan sababii malee na qabuuf dhoksaatti saaphana diriirsaniiru;Sababii malees boolla naaf* qotaniiru.
8 Akka tasaa balaan isaan irra haa gaʼu;Saaphanni isaan dhoksaatti kaaʼan isaan haa qabu;Isaan achi keessatti kufanii haa badan.+
9 Ani garuu Yihowaatti nan gammada;Gochawwan fayyinaa isaattis nan gammada.
10 Lafeewwan koo hundi akkana jedhu:
“Yaa Yihowaa, kan akka keetii eenyu?
Ati nama gargaarsa hin qabne warra isa caalaa ciccimoo taʼan jalaa,+Isa gargaarsa hin qabnee fi isa hiyyeessa taʼes, warra isaan saaman jalaa ni oolchita.”+
11 Ragoonni hamoo taʼan dhihaatanii,+Wanta ani waaʼee isaa homaa hin beekne na gaafatan.
12 Wanta gaarii ani godheef hamaa naaf deebisan,+Akka gaddi natti* dhagaʼamus ni godhan.
13 Yommuu isaan dhukkubsatanitti garuu, ani uffata gaddaa nan uffadhe,Soomaan of* nan cunqurse;Yeroo kadhannaan koo deebii utuu hin argatin hafettis,*
14 Akka waan michuun koo yookiin obboleessi koo duʼeetti asii fi achi deemaa nan booʼe;Akka namni tokko haadha isaatiif booʼuttis gaddaan mataa koo gad nan qabe.
15 Yommuu ani gufadhetti garuu, isaan gammadanii walitti qabaman;Riphanii na rukutuufis walitti qabaman;Na cicciran, dubbiidhaan na waraanuu isaaniis itti fufan.
16 Warri Waaqa hin sodaanne tuffiidhaan natti qoosu;*Ilkaan isaaniis natti qaratu.+
17 Yaa Yihowaa, hamma yoomiitti callistee ilaalta?+
Haleellaa isaanii irraa na* oolchi;+Lubbuu koo isa gatii guddaa qabus* leencota saafela jalaa oolchi.+
18 Anis gumii guddaa keessatti galata siif nan galcha;+Namoota hedduu gidduuttis sin jajadha.
19 Warri sababii malee diinota koo taʼan rakkina na irra gaʼetti akka gammadan hin heyyamin;Warri sababii malee na jibban hamminaan ijaan akka walitti himan hin heyyamin.+
20 Isaan dubbii nagaa hin dubbatan,Kanaa mannaa, namoota biyyattii warra naga qabeeyyii taʼan irratti haxxummaadhaan mala qopheessu.+
21 Isaan, “Ishoo! Ishoo! Ijji keenya kana argeera” jechaa,Na himachuuf afaan isaanii balʼisanii banu.
22 Yaa Yihowaa, ati kana argiteetta. Calluma hin jedhin.+
Yaa Yihowaa, na irraa hin fagaatin.+
23 Naaf falmuuf dammaqi, kaʼis,Yaa Waaqa koo Yihowaa, dhimma seeraa koo irratti naaf falmi.
24 Yaa Waaqa koo Yihowaa, akka qajeelummaa keetti naaf murteessi;+Isaan rakkina na irra gaʼetti akka gammadan hin godhin.
25 Isaan matumaa garaa isaaniitti, “Ishoo! Wanta barbaanne arganneerra”* hin jedhin.
Isaan matumaa, “Isa liqimsineerra” hin jedhin.+
26 Warri rakkina na irra gaʼetti gammadan hundi,Haa qaanaʼan, haa salphatanis.
Warri ana irratti ol of qaban qaanii fi salphina haa uffatan.
27 Warri qajeelummaa kootti gammadan garuu haa ililchan;Isaan yeroo hundumaa,“Yihowaan inni nagaa tajaajilaa isaatti gammadu ulfina haa argatu”+ haa jedhan.
28 Achiis arrabni koo qajeelummaa kee irra deddeebiʼee dubbata,*+Guyyaa guutuus si jajata.+
Miiljaleewwan
^ Gaachana xixinnoo yeroo baayʼee warri xiyya darbatan qabatan.
^ Ykn., “lubbuu kootiif.”
^ Ykn., “lubbuu kootti.”
^ Ykn., “bobaa kootti deebiʼettis.”
^ Ykn., “lubbuu koo.”
^ Ykn tarii, “bixxillee tokkoof jedhanii qoosu.”
^ Ykn., “lubbuu koo.”
^ Kal., “Takkittii tiyya,” lubbuu isaa ykn jireenya isaa argisiisa.
^ Ykn., “Ishoo! Lubbuu keenya.”
^ Ykn., “irratti xiinxala.”
