Hisqiʼel 33:1-33
33 Achiis dubbiin Yihowaa akkana jedhu gara koo ni dhufe:
2 “Yaa ilma namaa, ilmaan saba keetti dubbadhu,+ akkana isaaniin jedhi:“‘Ani biyya tokko irratti goraadee nan fida taʼa;+ namoonni biyya sanaa hundis nama tokko fuudhanii waardiyyaa isaanii akka taʼu ni godhu;
3 innis goraadeen biyyattii irratti dhufaa akka jiru argee xurumbaa* afuufuudhaan namoota akeekkachiisa.+
4 Namni tokko sagalee xurumbaa dhagaʼee akeekkachiisa sana hojii irra oolchuu diduu isaatiin+ kan kaʼe goraadeen dhufee lubbuu isaa yoo balleesse,* dhiigni isaa mataa isaa irra ni taʼa.+
5 Inni sagalee xurumbaa kan dhagaʼe taʼus, akeekkachiisa sana hojii irra hin oolchine. Dhiigni isaa mataa isaa irra ni taʼa. Akeekkachiisa sana hojii irra oolcheera utuu taʼee lubbuun isaa ni oola ture.
6 “‘Haa taʼu malee, waardiyyaan sun goraadeen dhufaa akka jiru argee xurumbaa utuu hin afuufin hafuu isaatiin+ kan kaʼe namoonni akeekkachiisa yoo argachuu baatanii fi goraadeen dhufee isaan keessaa lubbuu nama tokkoo yoo balleesse, namni sun balleessaa ofii isaatiin ni duʼa; dhiiga isaa garuu waardiyyaa sana irraa nan barbaada.’*+
7 “Ati garuu yaa ilma namaa, ani mana Israaʼel irratti waardiyyaa godhee si muudeera; dubbii afaan koo keessaa baʼu yommuu dhageessu isaaniin naaf akeekkachiisi.+
8 Yommuu ani nama hamaa tokkoon, ‘Yaa nama hamaa nana, ati dhugumaan ni duuta!’+ jedhutti, ati immoo namni hamaan sun daandii isaa akka jijjiiru isa akeekkachiisuuf dubbachuu yoo dhiiste, inni nama hamaa waan taʼeef balleessaa isaatiin ni duʼa;+ dhiiga isaa garuu si irraa nan barbaada.
9 Haa taʼu malee, ati namni hamaan tokko daandii isaa irraa akka deebiʼu yoo akeekkachiiste, inni garuu daandii isaa jijjiiruu yoo dide, inni balleessaa isaatiin ni duʼa;+ ati garuu dhugumaan lubbuu kee ni oolfatta.+
10 “Atis yaa ilma namaa, mana Israaʼeliin akkana jedhi: ‘Isin, “Fincilli keenyaa fi cubbuun keenya akka malee nutti ulfaatee akka dhumnu nu gochaa jira;+ maarree akkamitti jiraachuu dandeenya?” jettaniittu.’+
11 Akkana isaaniin jedhi: ‘Yihowaan Gooftaa Ol Aanaan akkana jedha: “Lubbuu koo isa jiraataa taʼeen nan kakadha, ani duʼa nama hamaatti hin gammadu;+ kanaa mannaa, namni hamaan daandii isaa jijjiiree+ lubbuudhaan akka jiraatun barbaada.+ Yaa mana Israaʼel, deebiʼaa, daandii keessan isa hamaa irraa deebiʼaa;+ maaliif duutu?”’+
12 “Atis yaa ilma namaa, ilmaan saba keetiitiin akkana jedhi: ‘Namni qajeelaan yommuu fincilutti qajeelummaan isaa isa hin oolchu;+ namni hamaanis hammina isaa irraa yommuu deebiʼutti hamminni isaa isa hin gufachiisu;+ namni qajeelaan kam iyyuu guyyaa cubbuu hojjetetti qajeelummaa isaatiin kan kaʼe lubbuudhaan jiraachuu isaa itti fufuu hin dandaʼu.+
13 Ani nama qajeelaadhaan, “Ati dhugumaan lubbuudhaan ni jiraatta” yommuun jedhutti, inni qajeelummaa isaatti amanamee balleessaa* yoo raawwate,+ gochi qajeelummaa isaa tokko illee isaaf hin yaadatamu; kanaa mannaa, inni balleessaa raawwachuu isaatiin ni duʼa.+
14 “‘Ani nama hamaadhaan, “Ati dhugumaan ni duuta” yommuun jedhutti, inni cubbuu isaa irraa deebiʼee wanta haqaa fi qajeelaa taʼe yoo raawwate,+
15 kana malees, namni hamaan sun wanta qabsiisaan fudhatame yoo deebise,+ wanta saamichaan fudhatame deebisee yoo kaffale,+ balleessaa raawwachuu dhiisuudhaanis akka dambiiwwan jireenyaatti yoo deddeebiʼe, inni dhugumaan lubbuudhaan ni jiraata.+ Inni hin duʼu.
16 Cubbuun inni raawwate kam iyyuu isatti hin lakkaaʼamu.*+ Wanta haqaa fi qajeelaa taʼe raawwachuu isaatiin kan kaʼe inni dhugumaan lubbuudhaan ni jiraata.’+
17 “Sabni kee garuu, dhugumaan jalʼaa kan taʼe daandii isaanii taʼee utuu jiruu, ‘Daandiin Yihowaa jalʼaa dha’ jedhu.
18 “Namni qajeelaan qajeelummaa isaa dhiisee balleessaa yoo raawwate, inni balleessaa sanaan kan kaʼe duʼuu qaba.+
19 Haa taʼu malee, namni hamaan hammina isaa irraa deebiʼee wanta haqaa fi qajeelaa taʼe yoo raawwate, inni akkana gochuu isaatiin lubbuudhaan ni jiraata.+
20 “Isin garuu, ‘Daandiin Yihowaa jalʼaa dha’ jettaniittu.+ Yaa mana Israaʼel, ani akka daandii keessaniitti tokkoon tokkoon keessaniif murtii nan kenna.”
21 Yeroo dheeraa booda, boojiʼamnee waggaa 12ffaatti, jiʼa kurnaffaatti, jiʼicha keessaa guyyaa shanaffaatti namni Yerusaalem irraa miliqe tokko gara koo dhufee,+ “Magaalattiin rukutamteetti!” naan jedhe.+
22 Galgala namichi miliqe sun dhufuu isaa dura turetti harki Yihowaa na irratti dhufe; achiis inni namicha ganama gara koo dhufe sana duratti afaan koo ni bane. Kanaafuu, afaan koo ni baname; anis dubbachuu nan dandaʼe.+
23 Achiis dubbiin Yihowaa akkana jedhu gara koo ni dhufe:
24 “Yaa ilma namaa, biyya Israaʼel ilaalchisee jiraattonni diiggaawwan+ kanaa, ‘Abrahaam namuma tokko; taʼus biyyattii dhaala godhee fudhateera.+ Nuti garuu hedduu dha; biyyattiin dhaalaan akka nuuf kennamte hin shakkisiisu’ jechaa jiru.
25 “Kanaafuu, akkana isaaniin jedhi: ‘Yihowaan Gooftaa Ol Aanaan akkana jedha: “Isin nyaata dhiigaa wajjin nyaachaa jirtu;+ gara waaqolii keessan warra balfamoo* taʼanii ni ilaaltu; dhiiga dhangalaasuu keessanis itti fuftaniittu.+ Lafattii kan dhaaltan maaliifi ree?
26 Isin goraadee keessanitti amanamtaniittu;+ gochawwan jibbisiisoo irratti ni hirmaattu; tokkoon tokkoon keessanis haadha manaa nama kan biraa xureessitaniittu.+ Lafattii kan dhaaltan maaliifi ree?”’+
27 “Akkana isaaniin jedhi: ‘Yihowaan Gooftaa Ol Aanaan akkana jedha: “Lubbuu koo isa jiraataa taʼeen nan kakadha, warri diiggaawwan keessa jiran goraadeedhaan ni kufu; warra dirree keessa jiran bineensota bosonaatiif nyaata godhee nan kenna; warri dahoowwanii fi holqawwan keessa jiranis dhukkubaan ni duʼu.+
28 Biyyattiin guutummaatti ona akka taatu nan godha;+ of tuulummaan ishii fi koorri ishii ni xumurama; gaaronni Israaʼel ni onu;+ namni keessa darbus hin jiraatu.
29 Wantoota jibbisiisoo isaan raawwatan hundumaatiin kan kaʼe+ yommuun biyyattii guutummaatti ona godhutti+ isaan ani Yihowaa taʼuu koo dhugumaan ni hubatu.”’
30 “Yaa ilma namaa, sabni kee dallaawwan cinaattii fi balbala manneenii biratti waaʼee kee ni dubbatu.+ Tokkoon tokkoon namaa obboleessa isaatiin, ‘Kottu, dubbii Yihowaa irraa dhufu haa dhaggeeffannu’ jechaa jira.
31 Isaan akka saba kootti si dura taaʼuuf gara keetti ni yaaʼu; dubbii kee ni dhagaʼu, garuu hin raawwatan.+ Sababiin isaas, isaan afaan isaaniitiin sobanii si jaju;* garaan isaanii garuu buʼaa sirrii hin taane argachuuf hawwa.
32 Kunoo, ati isaaniif akkuma sirba jaalalaa sagalee bareedaa fi meeshaa muuziqaa ribuu qabuun dandeettii guddaadhaan sirbamee ti. Dubbii kee ni dhagaʼu; garuu namni hojii irra oolchu hin jiru.
33 Dhugumaan waan raawwatamuuf, yommuu inni raawwatamu, isaan raajiin gidduu isaanii akka ture dhugumaan ni hubatu.”+
Miiljaleewwan
^ Ykn., “fiinoo,” jechuunis, xurumbaa gaanfa irraa hojjetamu.
^ Kal., “yoo isa fudhate.”
^ Ykn., “dhiiga isaatiif garuu waardiyyaa sana nan gaafadha.”
^ Ykn., “jalʼina.”
^ Kal., “hin yaadatamu.”
^ Jechi Afaan Ibrootaa as irratti gale jecha “faandoo” jedhuu wajjin walitti dhufeenya qabaachuu kan dandaʼu yeroo taʼu, tuffii argisiisuuf itti hojjetameera.
^ Ykn., “fedhii guddaa akka qaban karaa argisiisuun dubbatu.”
