Hisqiʼel 27:1-36
-
Faaruu gaddaa doonii Xiiros isa liqimfame irratti faarfatame (1-36)
27 Ammas dubbiin Yihowaa akkana jedhu gara koo ni dhufe:
2 “Ati garuu yaa ilma namaa, Xiirosiif faaruu gaddaa faarfadhu;+
3 Xiirosiinis akkana jedhi:
‘Yaa ishii karrawwan galaanichaa bira jiraattu,Ishii saboota odolawwan hedduudhaaf daldaltuu taate nana,Yihowaan Gooftaa Ol Aanaan akkana jedha:
“Yaa Xiiros ati, ‘Miidhaginni koo mudaa hin qabu’ jetteetta.+
4 Naannoowwan kee galaanicha walakkaatti argamu,Warri si ijaaranis miidhaginni kee mudaa kan hin qabne akka taʼu godhaniiru.
5 Isaan saanqaawwan kee hundumaa muka birbirsaa Seenir+ irraa tolchaniiru,Utubaa siif tolchuufis muka gaattiraa Libaanon fudhataniiru.
6 Batoowwan kee muka qilxuu Baashaan irraa tolchaniiru,Funyaan kee muka gosa gaattiraa irraa kan tolfamee fi ilka arbaa odolawwan Kiitim+ irraa dhufeen kan uwwifame dha.
7 Uffanni quncee talbaa biyya Gibxii irraa dhufe inni halluu garaa garaa qabu sharaa kee taʼee tajaajileera,Huccuun si irra diriifames foʼaa bifa cuquliisaa fi suufii bifa dhiilgee odolawwan Elishaa+ irraa dhufeen kan tolfame dha.
8 Jiraattonni Siidoonii fi Arwaad+ warra galaanicha siif mooqan turan.
Yaa Xiiros, namoonni kee warri dandeettii qaban warra doonii irratti siif hojjetan turan.+
9 Namoonni Geebaal+ warri muuxannoo* fi dandeettii qaban baqaqaa kee siif duuchu turan.+
Dooniiwwan galaanichaa fi hojjettoonni isaanii hundi shaqaxa bituu fi gurguruuf gara kee dhufaniiru.
10 Namoonni Faarsi, Luudii fi Puut+ loltoota kee taʼanii raayyaa waraanaa kee keessatti tajaajilu turan.
Isaan gaachanootaa fi baarmeexaa sibiilaa isaanii si irratti fannisaniiru, simboos siif argamsiisaniiru.
11 Namoonni Arwaad warri raayyaa waraanaa kee keessa jiran sitti marsanii dallaawwan kee irra dhaabbataniiru,Gootonnis masaraawwan kee irra jiru turan.
Isaan dallaawwan keetti gaachanoota marsaniiru,Miidhaginni kees mudaa kan hin qabne akka taʼu godhaniiru.
12 “‘“Ati qabeenya hedduu waan qabduuf Tarshiish+ sii wajjin daldaluu jalqabdeetti.+ Isaan meetii, sibiila, qorqorroo fi sibiila irsaasiitiin shaqaxa kee jijjiirrataniiru.+
13 Yaawaan, Tuubaalii+ fi Meesheek+ sii wajjin bittaa fi gurgurtaa raawwataniiru; garbootaa fi meeshaawwan sibiila diimaatiin shaqaxa kee jijjiirrataniiru.+
14 Manni Togaarmaa+ fardeen, fardeen waraanaa fi gaangoliidhaan shaqaxa kee jijjiirrataniiru.
15 Namoonni Deedaan+ sii wajjin bittaa fi gurgurtaa raawwataniiru; atis odolawwan hedduu irratti daldaltoota mindeessiteetta; isaanis ilka arbaa+ fi muka gurraacha gatii guddaa qabu akka gibiraatti siif kennaniiru.
16 Oomishni kee hedduu waan taʼeef Edoom sii wajjin ni daldalte. Isaan tarkooyisiin,* suufii bifa dhiilgeetiin, uffata xilfiin halluu garaa garaa irratti dhaʼameen, huccuu baʼeessaan, elellaa fi ruubiidhaan* shaqaxa kee jijjiirrataniiru.
17 “‘“Yihudaanii fi biyyi Israaʼel sii wajjin bittaa fi gurgurtaa raawwataniiru; qamadii magaalaa Miinit,+ nyaata filatamaa, damma,+ zayitii fi baalsaamiidhaan+ shaqaxa kee jijjiirrataniiru.+
18 “‘“Oomisha kee isa hedduu taʼee fi qabeenya kee hundumaatiin kan kaʼe Damaasqoon+ daadhii wayinii Helboonii fi suufii Zahaar* sitti gurguruudhaan sii wajjin daldalteetti.
19 Weedaanii fi Yaawaan warri Uuzaal keessatti argaman sibiilaan, qaasiyaa* fi marga urgaaʼuun shaqaxa kee jijjiirrataniiru.
20 Deedaan+ gilaasha* irra taaʼaniin shaqaxa kee jijjiirratteetti.
21 Ati Arabootaa fi geggeessitoota Qeedaar+ warra hoolota xobbaallaa, korbeeyyii hoolaa fi reʼoota+ gurguran sana hundumaa mindeeffatteetta.
22 Daldaltoonni Sheebaa fi Raaʼaamaa+ sii wajjin bittaa fi gurgurtaa raawwataniiru; akaakuu urgooftuu baʼeessa taʼe hundumaa, dhagoota gatii guddaa qabanii fi warqiidhaan shaqaxa kee jijjiirrataniiru.+
23 Kaaraan,+ Kaaneen, Eedan,+ daldaltoonni Sheebaa,+ Ashuurii+ fi Kilmaad sii wajjin bittaa fi gurgurtaa raawwataniiru.
24 Isaan iddoowwan gabaa keetti uffatawwan babbareedoo, huccuuwwan foʼaa bifa cuquliisaa irraa tolfamanii fi xilfiin halluu garaa garaa irratti dhaʼame, akkasumas afatawwan halluu garaa garaa qaban gurgurataniiru; wantoonni kun hundis wadaroodhaan jabeeffamanii kan hidhaman turan.
25 Dooniiwwan Tarshiish+ shaqaxa siif ni fidu turan,Kanaan kan kaʼes ati galaanicha walakkaatti guutamtee, feʼumsis sitti ulfaatee* ture.
26 Warri galaanicha mooqan gara galaanota gad fagootti si geessaniiru;Bubbeen bahaas galaanicha walakkaatti si caccabseera.
27 Qabeenyi kee, miʼawwan kee, shaqaxni kee, imaltoonni galaanaa kee fi namoonni kee warri doonii irraa hojjetan,Warri baqaqaa kee duuchan, warri shaqaxa kee daldalan,+ akkasumas namoonni waraanaa hundi,+Guutummaan tuuta* si keessa jiru sanaa,Guyyaa kufaatii keetti hundi isaanii iyyuu galaanicha walakkaatti ni liqimfamu.+
28 Namoonni kee warri doonii irraa hojjetan yommuu iyyan biyyoonni qarqara galaanaatti argaman ni hollatu.
29 Namoonni batootti fayyadaman, imaltoonni galaanaa fi warri doonii irraa hojjetan hundiDooniiwwan isaanii irraa buʼanii lafa irra dhaabbatu.
30 Isaan awwaara mataa isaanii irratti firfirasanii daaraa irra gangalachaaSagalee isaanii ol kaasanii hirqinfatanii siif booʼu.+
31 Isaan mataa isaanii ni haaddatu, uffata gaddaas ni uffatu;Akka malee gadoodaa hirqinfatanii* siif booʼu.
32 Faaruu gaddaa isaanii keessatti akkana jedhanii waaʼee kee ni faarfatu:
‘Kan akka Xiiros ishii amma galaanicha walakkaatti calluma jette sanaa eenyu?+
33 Miʼawwan kee galaanicha irraa yommuu dhufanitti, ati namoota hedduu gammachiisteetta.+
Qabeenyi kee inni hedduunii fi shaqaxni kee mootonni lafaa akka badhaadhan godhaniiru.+
34 Amma ati galaana keessatti, bishaanota gad fagoo keessatti caccabdeetta,+Shaqaxni kee hundii fi namoonni kee sii wajjin liqimfamaniiru.+
35 Jiraattonni odolawwanii hundi ajaaʼibsiifannaadhaan si ilaalu,+Mootonni isaanii sodaadhaan hollatu,+ fuulli isaaniis ni jijjiirama.
36 Daldaltoonni saboota gidduutti argaman wanta si irra gaʼeen kan kaʼe ni siiqsu.
Dhumni kee akkuma tasaa ni taʼa, sodaachisaas ni taʼa,Atis bara baraaf akkuma baddetti hafta.’”’”+
Miiljaleewwan
^ Kal., “maanguddoo taʼanii.”
^ Ibsa Jechootaa ilaali.
^ Ibsa Jechootaa ilaali.
^ Ykn., “suufii bifa booraa gara diimaa.”
^ Muka akaakuu qarafaa taʼe dha.
^ Ykn., “uffata foʼaa dhaʼame irraa tolfame.”
^ Ykn tarii, “ulfina qabeettiis taatee.”
^ Kal., “gumii.”
^ Ykn., “lubbuu hadhaaʼeen.”
