Qorontos Tokkoffaa 5:1-13
5 Isin gidduutti halalummaan*+ akka raawwatame natti himameera; namni haadha manaa abbaa isaa wajjin jiraatu* tokko jira;+ halalummaan akkanaa immoo saboota kaan gidduutti illee hin argamu.
2 Maarree isin kanatti of jajuu qabduu? Kanaa mannaa, gadditanii+ namni gocha kana raawwate gidduu keessanii akka baafamu gochuu hin qabdanii?+
3 Ani qaamaan yoon isin bira jiraachuu baadhe illee, hafuuraan waanan isinii wajjin jiruuf, akkan qaamaan isin bira jirutti nama gocha kana raawwatetti murteesseera.
4 Maqaa Gooftaa keenya Yesuusiin yommuu walitti qabamtan, ani humna Gooftaa keenya Yesuusii wajjin hafuuraan isinii wajjin akkan jiru beekuudhaan,
5 dhiibbaan cubbuu namni kun gumicha irratti geessise akka baduu fi hafuurri gumichaa guyyaa Gooftaatti akka eegamuuf,+ nama kana Seexanatti+ dabarsaa kennaa.
6 Of jajuun keessan gaarii miti. Raacitii xinnoon guutummaa bukichaa akka bukeessu hin beektanii?+
7 Akkuma amma bukoo raacitii hin qabne taatan kana, bukoo haaraa akka taataniif raacitii moofaa of gidduudhaa baasaa. Sababiin isaas, hoolaan Faasikaa keenya Kiristoos+ aarsaa+ taʼeera.
8 Kanaafuu, raacitii moofaadhaan yookiin raacitii hamminaa fi raacitii cubbuutiin utuu hin taʼin, maxinoo raacitii hin qabne isa qulqulluu fi dhugaa taʼeen ayyaanicha haa kabajnu.+
9 Xalayaa koo keessatti michummaa namoota halalee* wajjin qabdan akka dhaabdan isiniif barreesseen ture;
10 kana jechuun koo namoota addunyaa kanaa warra halalee*+ yookiin sassattoota yookiin saamtota taʼan yookiin waaqolii tolfamoo waaqeffatan irraa guutummaatti fagaadhaa jechuu koo miti. Utuu akkana taʼee addunyaa keessaa baʼuu qabdu turtan.+
11 Amma garuu kanan isiniif barreessu, nama obboleessa jedhamee utuu waamamuu, halalee* yookiin sassattuu+ yookiin waaqolii tolfamoo kan waaqeffatu yookiin nama kan arrabsu yookiin machooftuu+ yookiin saamtuu+ taʼee wajjin michummaa qabdan akka dhiistaniifi;+ nama akkanaa wajjin nyaata illee hin nyaatinaa.
12 Namoota ala jiranitti murteessuuf maaltu na galche? Warra keessa jiranitti isintu murteessa;
13 warra ala jiranitti immoo Waaqayyotu murteessa mitii?+ “Nama hamaa of gidduudhaa baasaa.”+
Miiljaleewwan
^ Afaan Giriikiitiin poorniyaa. Ibsa Jechootaa ilaali.
^ Kal., “fudhate.” Afaan Giriikiitiin poorniyaa. Ibsa Jechootaa ilaali.
^ Ibsa jechootaa ilaali, “Halalummaa.”
^ Ibsa Jechootaa ilaali, “Halalummaa.”
^ Ibsa Jechootaa ilaali, “Halalummaa.”
