Wanta Sirrii fi Dogoggora Taʼe: Filannaa Gochuu Qabdu
Ulaagaaleen naamusaa hordofuuf filannu jireenya keenyarratti dhiibbaa guddaa godhu. Waaqni keenya Yihowaan kana beeka. Ulaagaaleesaa akka eegnu kan barbaadu kanaafi.
Yihowaan jireenya nagaa fi gammachuu qabu akka jiraannu barbaada.
“Ani Waaqa kee Yihowaa isa wanta si fayyadu si barsiisu, karaa irra deemuu qabdu irras si geggeessu dha. Ajajawwan koo xiyyeeffannaadhaan utuu dhageesseetta taʼee akkam gaarii ture! Silaa nagaan kee akkuma lagaa, qajeelummaan kees akkuma dambalii galaanaa ni taʼa.”—Isaayyaas 48:17, 18.
Waaqayyo Uumaa keenya waan taʼeef, karaa gaarii ittiin jiraachuu qabnu beeka. Ulaagaaleesaa akka hordofnu kan nu jajjabeessu akka nu fayyadan waan beekuufi. Ajajawwan Waaqayyoo yoo hordofne filannaan keenya buʼaa gaarii akka argamsiisu mirkanaaʼoo taʼuu dandeenya. Akkas yoo goone yeroo hundumaa filannaa sirrii, nagaa fi gammachuu argamsiisu goona.
Yihowaan wanta humna keenyaa ol taʼe nurraa hin eegu.
“Ajajni ani harʼa si ajaju kun siif baayʼee ulfaataa miti; si irraas fagoo miti.”—Keessa Deebii 30:11.
Ulaagaalee Naamusaa Waaqayyootiin jiraachuun yaadaa fi gocha keenyarratti jijjiirama gochuu gaafata. Haa taʼu malee, Waaqayyo wanta humna keenyaa ol taʼe nu hin gaafatu. Uumaa keenya waan taʼeef humna keenya beeka. Yihowaa yeroo beeknu ‘ajajawwan isaa baʼaa ulfaatoo akka hin taane’ ni hubanna.—1 Yohaannis 5:3.
Yihowaan namoota ulaagaalee inni baaseen jiraachuuf filatan gargaaruuf waadaa galeera.
“Ani Waaqni kee Yihowaan, isa harka kee mirgaa qabee, ‘Hin sodaatin. Ani sin gargaara’ siin jedhu sana dha.”—Isaayyaas 41:13.
Waaqayyo waan nu gargaaruuf ulaagaalee naamusaa inni baase eegnee jiraachuu ni dandeenya. Nu gargaaruuf Dubbiisaa Kitaaba Qulqulluutti fayyadama; Kitaabni Qulqulluun jajjabinaa fi abdii nuuf kenna.
Addunyaa maratti namoonni miliyoonaan lakkaaʼaman ulaagaalee Kitaaba Qulqulluu hordofuunsaanii jireenyasaanii akka isaaniif fooyyesse hubataniiru. Atis gorsa gaarii Kitaabni Qulqulluu kennu akka barattu si jajjabeessina. Birooshura Kitaaba Qulqulluurratti hundaaʼee fi Bara Baraaf Gammachuudhaan Jiraadhu! jedhamu dubbisuudhaan jalqabuu dandeessa; birooshuricha jw.org irraa kaffaltii malee argatta. Barumsawwan kana qabateera:
-
Kitaabni Qulqulluun Si Gargaaruu kan Dandaʼu Akkamitti?
-
Kitaabni Qulqulluun Abdii Kenna
-
Wanta Kitaabni Qulqulluun Jedhutti Amanuu ni Dandeessaa?
Dubbii Waaqayyoo kan taʼe Kitaaba Qulqulluu yeroo qortu wanti inni dubbatu yeroon kan itti hin dabarree fi “ammas taʼe bara baraaf yeroo hundumaa [amansiisaa]” akka taʼe hubatta. (Faarfannaa 111:8) Ulaagaalee naamusaa Kitaaba Qulqulluu keessatti ibsaman hordofuun akkaataa jireenyaa hundarra caaludha. Haa taʼu malee, Waaqayyo akkas akka goonu nu hin dirqisiisu. (Keessa Deebii 30:19, 20; Iyyaasuu 24:15) Kun filannaa tokkoon tokkoon keenyaati.
