“Mana barumsaa giddu galeessaa yommuun baradhu ijoollee hedduun na hin jaallatan; kunis na miidha ture. Kanaaf mana barumsaa sadarkaa lammaffaa yommuun galu, isaan fakkaachuuf akkaataa miidhaginaafi amalakoo nan jijjiire. Michuu argachuuf waanan hawweef, ijoolleen naa wajjin baratan akka na jaallataniif dhiibbaa hiriyaatiifan moʼame.”​—Jeeniifar, umriinshee 16. *

Atoo dhiibbaan hiriyaa sirra gaʼaa jiraa? Taanaan matadureen kun dhiibbaa kana moʼuuf si gargaaruu dandaʼa.

Dhiibbaan hiriyaa namoonni gaariin wanta gadhee akka raawwatan gochuu dandaʼa.

“Hiriyaan gadheen amala gaarii in mancaasa.”​—1 Qorontos 15:33.

“Gochi ykn haalli tokko sirrii akka hin taane beeknus, haala sana keessa yeroo gallu miirri keenya nu moʼee fedhiin namoota gammachiisuu akka nu toʼatu godha!”​—Daanaa.

Ofii keenyaas dhiibbaa ofirraan geessisuu dandeenya.

‘Ana isa waan gaarii hojjechuu barbaadutti, wanti hamaan harka kootti dhufa’​—Roomaa 7:21.

“Yeroo baayʼee keessikoo dhiibbaa akka narratti godhu natti dhagaʼama; wanta hiriyoonnikoo odeessaniifi gammachiisaa akka taʼe fakkeessanii dubbatan raawwachuun barbaada.”​—Diyaanaa.

Dhiibbaa hiriyaa moʼuun gammachuu guddaa siif argamsiisa.

‘Yaadni garaakee akka si hin ceephaanetti jiraadhu!’​—1 Phexros 3:16.

“Yeroo tokkotti dhiibbaa hiriyaa moʼuun natti ulfaatee ture; amma garuu adda taʼuu hin sodaadhu, murtookoo eegee itti fufuufis kutadheera. Yaada garaa qulqulluu qabaannaan wanti halkan hirriba keessa nama jeequ hin jiru.”​—Kaarlaa.

Wanta dogoggora taʼe akka raawwattu dhiibbaan hiriyaa yommuu sirra gaʼu gorsa armaan gadii hojiirra oolchuuf yaali:

Miidhaa geessisu yaadi. Akkas jedhii of gaafadhu: ‘Dhiibbaa hiriyaatiif yoon moʼame ilaalcha akkamiin ofiif qabaadha? Warrikoo yommuu kana dhagaʼan maaltu isaanitti dhagaʼama?’​—Seera buʼuuraa Macaafa Qulqulluu: Galaatiyaa 6:7.

“Warrikoo ‘Utuu dhiibbaa hiriyaatiif moʼamteetta taʼee maaltu sirra gaʼa ture?’ jedhanii na gaafatu turan. Dhiibbaan hiriyaa daandii dogoggoraarra akkamitti na buusuu akka dandaʼu akkan hubadhu na gargaaran.”​—Oliiviyaa.

Amannanaakee cimsadhu. ‘Gochi kun anarras taʼe warra kaanirra miidhaa geessisa jedhee kanan amanu maaliifi?’ jedhii of gaafadhu.​—Seera buʼuuraa Macaafa Qulqulluu: Ibroota 5:14.

“Yommuun xinnoo ture, hin taʼun jedha ykn deebii muraasa qofan kenna, amma garuu wanta tokko maaliif akkan godhu ykn hin goone ibsa balʼaa kennuu nan dandaʼa. Amma wanta sirriifi wanta dogoggora taʼe ilaalchisee amantiin ani qabu cimaadha. Namni gara biraan natti himee utuu hin taʼin ofumakoo itti amaneen deebisa.”​—Aniittaa.

Waaʼee eenyummaakee yaadi. ‘Nama akkamii taʼuun barbaada?’ jedhii of gaafadhu. Achiis dhiibbaa sirra gaʼaa jiru yaadiitii, ‘Namni akkasii haala kana keessatti maal gochuu qaba?’ jedhii of gaafadhu.​—Seera buʼuuraa Macaafa Qulqulluu: 2 Qorontos 13:5.

“Eenyummaa kootti waanan gammaduuf, wanti namoonni kaan waaʼeekoo yaadan na hin dhiphisu. Kana malees, namoonni eenyummaakoo isa dhugaa jaallatan baayʼeen jiru.”​—Aliisiyaa.

Waaʼee gara fuulduraa yaadi. Barumsa erga xumurtee waggoota muraasa ykn jiʼoota muraasa yoo taʼe, namoota isaan gammachiisuuf yaalaa turte sana yaadachuullee hin dandeessu taʼa.

“Suuraan mana barumsaatti kaʼe yeroon ilaalu, ijoolleen wajjin barachaa ture tokko tokko maqaasaaniillee yaadachuu hin dandeenye. Haataʼu malee yeroon mana barumsaa turetti, amantiikoo caalaa ilaalchasaaniitiif iddoo guddaan kennan ture. Kun gowwummaa guddaadha!”​—Doowun, umriinshee 22.

Dursii qophaaʼi. Macaafni Qulqulluun, “Namaaf immoo adduma addaan deebii isaaf deebisuun taʼu beekaa!” jedha.​—Qolosaayis 4:6.

“Warrikoo aniifi obboleetiinkoo wanta nu mudachuu dandaʼu akka yaannu nu gargaaru, achiis yommuu haalli akkasii nu mudatu wanta goonu akka beeknuuf, hojiin argisiisaan dhiheessina.”​—Kiristiin.