Michummaan jireenya gammachuu fi milkaaʼina qabu jiraachuuf gumaacha godha. Michoonni gaariin walii isaanii irratti dhiibbaa gaarii gochuu fi namoota gaarii akka taʼan wal gargaaruu dandaʼu.—Fakkeenya 27:17.

 Haa taʼu malee, Kitaabni Qulqulluun michoota keenya of eeggannoodhaan akka filannu nu gorsa. Michoota gadhee filachuunis rakkina akka nu irraan geessisu nu akeekkachiisa. (Fakkeenya 13:20; 1 Qorontos 15:33) Michoonni akkasii namni tokko murtoo sirrii hin taane akka godhu dhiibbaa irratti gochuu ykn amaloota gaggaarii inni qabu jalaa mancaasuu dandaʼu.

Mata duree kana keessatti qabxiiwwan armaan gadii irratti mariʼanna

•  Michuu gaarii kan jedhamu nama akkamiiti?

•  Kitaaba Qulqulluu keessatti michummaa gaarii ilaalchisee fakkeenya kan taʼan eenyu faʼi?

•  Namni tokko michuu Waaqayyoo taʼuu dandaʼaa?

•  Caqasoota Kitaaba Qulqulluu waaʼee michummaa ibsan

 Kitaabni Qulqulluun michummaa gaariin fedhii walfakkaatu qabaachuu qofa irratti hundaaʼuu akka hin qabne barsiisa. Fakkeenyaaf, Faarfannaan 119:63 “Ani warra si a sodaataniif, akkasumas, warra ajajawwan kee eegan hundumaatiif michuu dha” jedha. Barreessaan Kitaaba Qulqulluu kun michoota Waaqayyoon sodaatanii fi ulaagaalee isaa wajjin walsimanii jiraachuu barbaadan akka filate hubadhu.

 Kana malees, Kitaabni Qulqulluun amaloota michuu gaariin tokko qabaachuu qabu ni ibsa. Fakkeenyaaf:

•   “Michuu dhugaan yeroo hundumaa jaalala argisiisa, inni obboleessa yeroo dhiphinaatiif dhalate dha.”—Fakkeenya 17:17.

•   “Hiriyoonni wal balleessuuf qophaaʼan jiru, garuu michuun obboleessa caalaa namatti maxxanu jira.”—Fakkeenya 18:24.

 Caqasoonni kun michuu gaariin tokko amanamaa, jaalala qabeessa, gaarummaa kan argisiisuu fi arjaa akka taʼe dubbatu. Michuu gaariin nama yeroo gargaarsi nu barbaachisutti akka nu gargaaru itti amanamuu dandeenyu dha. Michuu dhugaan nama yeroo nuti daandii dogoggoraa irra deemuu jalqabnu ykn murtoo dogoggoraa gochuuf jennu nu sirreessuuf ija jabinaan dubbatu dha.—Fakkeenya 27:6, 9.

 Kitaabni Qulqulluun michummaa gaarii namoota umurii, akkaataa guddinaa, aadaa fi aangoo garaa garaa qaban gidduu ture qabateera. Mee michummaa akkasii sadii haa ilaallu.

•   Ruutii fi Naaʼomii. Ruut haadha manaa ilma Naaʼomii turte. Naaʼomiin umuriidhaanis baayʼee ishii caalti. Kana malees, akkaataan guddinaa Ruut kan Naaʼomii irraa baayʼee adda dha. Garaa garummaan akkasii jiraatus michummaa cimaa jaalala irratti hundaaʼe uumuu dandaʼaniiru.—Ruut 1:16.

•   Daawitii fi Yonaataan. Yonaataan Daawitiin waggaa 30 kan caalu taʼus, Kitaabni Qulqulluun ‘michummaa cimaadhaan akka walitti maxxanan’ dubbata.—1 Saamuʼel 18:1.

•   Yesuusii fi ergamoota isaa. Yesuus barsiisaa fi gooftaa isaanii waan tureef ergamoota isaa irratti aangoo qaba. (Yohaannis 13:13) Haa taʼu malee, ergamoonni isaa michoota isaa taʼuuf gaʼumsa akka hin qabne isatti hin dhagaʼamne. Kanaa mannaa, Yesuus warra barumsa isaa hordofanii wajjin walitti dhufeenya cimaa qaba ture. Akkana jedheera: “Ani wantan Abbaa koo irraa dhagaʼe hunda waanan isin beeksiseef, michoota jedhee isin waameera.”—Yohaannis 15:14, 15.

 Eeyyee, ilmaan namootaa michuu Waaqayyoo taʼuu dandaʼu. Kitaabni Qulqulluun Waaqayyo “Warra qajeelota taʼanii wajjin michummaa cimaa qaba” jedha. (Fakkeenya 3:32) Kana jechuun Waaqayyo namoota amala gaarii qabaachuuf, amanamoo taʼuu fi nama kabajuuf carraaqan, akkasumas warra ulaagaalee inni wanta sirrii fi dogoggora taʼeef baase hordofan michoota isaa akka taʼan filata jechuu dha. Fakkeenyaaf, Kitaaba Qulqulluu keessatti Abrahaam inni nama amanamaa ture michuu Waaqayyoo jedhamee waamameera.—2 Seenaa Baraa 20:7; Isaayyaas 41:8; Yaaqoob 2:23.