EMINYEETO NIBABUUZA
Okuriima—Ekicweka 1: Nyeteekateekire Kuriima?
Omu kicweka eki
Okuriima niki?
Abamwe nibareeba okuriima nk’obwire bw’okushemererwa hamwe kyonka. Kwonka omu kicweka eki, “okuriima” nikimanyisa obwire obu omwojo n’omwishiki barikumara hamwe barikureeba yaaba buri omwe ashemereire mugyenzi we. N’ahabw’ekyo, okuriima kwine ekigyendererwa. Ti kushemererwa n’ou otarikushushanisa nawe buhangwa kyonka.
Bwanyima y’obwire murikweriima, mwine kucwamu yaaba kuza omu bushwere nari kutagumizamu. Waatandika okuriima, oine kuba oyeteekateekiire kimwe ahari byombi.
Emperu ya byona: Ku oraabe nooreeba ngu ohikire kuriima, oine n’okuba oyeteekateekiire obushwere.
Okuriima otaine kigyendererwa kyʼokuza omu bushwere kiri nkʼokukora ebibuuzo byʼabarikwenda omurimo kwonka otaine kigyendererwa kyʼokutunga omurimo
Oyeteekateekire kuriima?
Okuriima nikubaasa kuruga obushwere, n’ahabw’ekyo oine kuteekateeka aha emitwarize yaawe. Nk’eky’okureeberaho, yetegyereze ebi:
Enkoragana omuka. Oku orikutwariza abazaire n’abu orikuzaarwa nabo, na munonga waaba oine amaganya, nikuba nikworeka oku orikwija kutwariza ou orikuriima.
Omusingye gwa Baibuli: “Obushaarizi bwona, n’okuguubwa kubi, n’oruyombo n’okujumiirana, hamwe n’eihari ryona biihwe omuriimwe.”—Abaefeso 4:31.
Yebuuze oti: ‘Abazaire n’abu ndikuzaarwa nabo nibabaasa kugira ngu nimbatwariza gye? Ku ndikugira obutaikirizana n’omwe aharibo, ningamba aha nshonga egyo nyikaikaine nari ninguubwa kubi ntongana?’
Waaba otarikubaasa kugonjoora obutaikiriza obu orikugira nʼabazaire baawe, mbwenu shi noija kubaasa kubugonjoora nʼou oraaze nawe omu bushwere?
Okwefeerereza. Waaza omu bushwere, nikiija kukwetengyesa butoosha kuteekateeka aha bi mugyenzi waawe arikukunda n’okumworobera.
Omusingye gwa Baibuli: “Omuntu weena arekye kwesherurira ebye ahabwe, kureka asherure eby’okuhwera mutaahi we.”—1 Abakorinso 10:24.
Yebuuze oti: ‘Butoosha nindemera aha nshonga eyangye? Abandi nibandeeba nk’oringaniire? Ni miringo ki ei ndikworeka ngu ninyebembeza eby’abandi okukira ebyangye?’
Obucureezi. Omuntu orikubaasa obushwere naikiriza enshobe ze, kandi ashaba okusaasirwa kuruga aha mutima.
Omusingye gwa Baibuli: ‘Twena nitushobya omuri bingi.’—Yakobo 3:2.
Yebuuze oti: ‘Buzima niinyikiriza enshobe zangye, nari ninyehorereza? Nindahuka kugira ekiniga abantu baancwera orubanja ruhikire?’
Esente. Omuntu orikumanya kukwata gye sente naija kwetantara obutaikirizana oburikukira kubaho omu bushwere.
Omusingye gwa Baibuli: “N’oha omuriimwe owaakuba naayenda kwombeka omunaara, atabanze kushutama akabariirira eby’emirimo yaagwo, akamanya ku araabe aine eby’okuguheza?”—Luka 14:28.
Yebuuze oti: ‘Nimbaasa kutegyeka enshohoza yangye, nari ninkira kuba ndi omu mabanja? Nyorekire nta ngu nimbaasa kukoresa esente omu muringo murungi?’
Entebeekanisa y’eby’omwoyo. Ku oraabe ori omwe aha Bajurizi ba Yehova, oshemereire kuba oine entebeekanisa y’eby’omwoyo ey’okwega Baibuli, n’okuza omu nteerane z’Ekikristaayo.
Omusingye gwa Baibuli: Baine okushemererwa abarikufayo aha kyetengo kyabo eky’eby’omwoyo.—Matayo 5:3.
Yebuuze oti: ‘Niinyehabura kuguma nyine entebeekanisa nungi y’eby’omwoyo? Ninyebembeza entebeekanisa yangye y’eby’omwoyo, nari niinyikiriza ebindi kunteganisa?’
Emperu ya byona: Omuntu ou oraaze nawe omu bushwere aine kuba ari omuntu orikwebaasa. Ku oraabe nooteeraho kuba omuntu nk’ogwo, obundi noija kukundwa ogwo oriyo naateeraho kuba nkaiwe.
