1. Nikimanyisa ki okuba omuntu omunyambabazi?

OMUNTU omunyambabazi, naaba aine esaasi, aine omutima murungi arikutwariza gye abandi, kandi ari efura. Nitubaasa kuteekateeka aha ky’okureeberaho kya Yesu eky’Omusamaria murungi. Omushaija ogwo kuruga omu ihanga erindi ‘akagirira esaasi’ Omuyudaaya owaabaire agwire omu bashuma. Omusamaria ‘akagirira esaasi’ Omuyudaaya owaabaire ahutaire, kandi yaafayo kutaho entebeekanisa y’okumureeberera. (Luk. 10:29-37) Eky’okureeberaho eki nikyoreka gye omutwarize murungi gwa Ruhanga ogw’embabazi. Ruhanga naatugirira embabazi ahabw’okutukunda, kandi buri izooba naazitugirira omu kukoragana naitwe.

2. Niki ekindi ekirikutwarirwa omutwarize gw’embabazi?

² Haine ekindi ekirikutwarirwa omu mutwarize gw’embabazi. Nigutwariramu okwanga kufubira omuntu n’obu orikuba ohikire kukikora. Omu muringo ogu, Yehova buzima atwire ari omunyambabazi ahariitwe. “[Tarikututwariza] nk’ebibi byaitu oku biri,” omuhandiiki wa zaaburi nikwo yaagizire. (Zab. 103:10) Kwonka obundi, Yehova naabaasa kuhana munonga omuntu okozire ekibi.

3. Nituza kugarukamu bibuuzo ki?

³ Omu kicweka eki, nituza kugarukamu ebibuuzo bishatu ebi: Ahabw’enki Yehova naatugirira embabazi? Mbwenu okuhana kwine akakwate n’embabazi? Kandi niki ekirikubaasa kutuhwera kugirira abandi embabazi? Ka tureebe oku Ekigambo kya Ruhanga kirikugarukamu ebibuuzo ebi.

4. Ahabw’enki Yehova naatugirira embabazi?

⁴ Yehova naakunda kuba omunyambabazi. Entumwa Paulo  akahandiika ngu Ruhanga ‘n’omutungi w’embabazi.’ Aha, Paulo akaba naashoboorora ngu Ruhanga aine embabazi ahabw’okugira ngu naaha abantu abatahikiriire amatsiko g’okuza omu iguru. (Efe. 2:4-7) Kwonka embabazi za Yehova nizikirira kimwe ahari ekyo. Omuhandiiki wa zaaburi Daudi akahandiika ati: “[Yehova] ni murungi ahari boona, kandi agira embabazi nyingi ahari byona ebi yaahangire.” (Zab. 145:9) Ahabw’okugira ngu Yehova naakunda abantu, naabagirira embabazi haaba hariho ah’okwihirira kukikora.

5. Yesu akeega ata aha mbabazi za Yehova?

⁵ Yesu kukira ondiijo weena, naamanya gye oku Yehova arikukunda kutugirira embabazi. Yehova na Yesu bakaba bari hamwe omu iguru kumara emyaka mingi munonga Yesu atakaizire omu nsi. (Enf. 8:30, 31) Emirundi mingi, Yesu akaba naareeba oku Ishe arikugirira embabazi abantu abasiisi. (Zab. 78:37-42) Yesu omu kwegyesa kwe, akaba naakira kugamba aha mutwarize gwa Ishe ogu.

6. Yesu akatuhwera ata kwetegyereza embabazi za Ishe?

⁶ Nk’oku kirikworekwa omu kicweka eky’enyima, Yesu akakoresa enfumu y’omwana owaarazire kutuhwera kwetegyereza oku Yehova arikukunda kutugirira embabazi. Omwojo ogwo akaruga omuka kandi “yaashiishagurira ebintu bye omu micwe mibi.” (Luk. 15:13) Bwanyima, akeeteisa emitwarize ye mibi, yaayecureeza, kandi yaagaruka omuka. Ishe akatwaza ata? Tikiratwire bwire buraingwa omwojo ogwo kubaasa kumanya oku ishe yaatwarize. Yesu akagira ati: “[Omutabani] ku yaabaire akiri hare munonga, ishe yaamureeba, yaakwatwa embabazi, yairuka, yaamugwa omunda, yaamunywegyera.” Omushaija ogu tarahemwire omutabani. Kureka, omu muringo gw’embabazi akasaasira omwojo ogu kandi yaagaruka yaamwakiira omu ka ye. Omwojo ogu akaba asiisire munonga, kwonka ahabw’okugira ngu akaba ayeteisize, ishe akamusaasira. Omuzaire omunyambabazi omu ky’okureeberaho naajwekyera Yehova. Omu muringo ogu, Yesu akatworeka ngu Ishe naaba ayeteekateekire kusaasira abasiisi abarikweteisiza kimwe.—Luk. 15:17-24.

7. Yehova naagirira ata abantu embabazi omu muringo gw’obwengye?

⁷ Yehova naayoreka embabazi ahabw’obwengye bw’ahaiguru. Obwengye bwa Yehova ti kwetegyereza kw’ahaiguru okutarimu nyehurira. Kureka, Baibuli neegira ngu ‘obwengye oburikuruga omu iguru bwijwire embabazi  n’ebyana ebirungi.’ (Yak. 3:17) Yehova kushushana n’omuzaire oine rukundo, naamanya ngu embabazi ze nizigasira abaana be. (Zab. 103:13; Isa. 49:15) Embabazi ze nizibaha amatsiko n’obu baraabe batahikiriire. N’ahabw’ekyo, obwengye bwa Yehova obutaine bugarukiro nibumuhiga kugirira abantu embabazi yaareeba ngu nikyetengyesa. Kwonka kandi, Yehova naamanya n’obu ataine kugirira omuntu embabazi. Tarikubaasa kushwekyerera ebitahikire ahabw’okugira ngu embabazi ze naaziringaniza n’obwengye.

8. Niki ekirikwetengyesa obumwe, kandi ahabw’enki?

⁸ Ka tugire ngu omuheereza wa Yehova yaacwamu nkana kuguma naakora ekibi. Twine kukora ki? Paulo akahandiika ngu ‘mutakwatanisa n’omuntu’ ogwo. (1 Kor. 5:11) Abasiisi abatarikweteisa nibabingwa omu kibiina. Eki nikyetengyesa kubaasa kurinda ab’eishe-emwe na banyaanyazi-itwe abeesigwa kuguma bahamiire aha mihanda ya Yehova erikwera. Kwonka abamwe, nikibaasa kubagumira kureeba okubingwa nk’omuringo ogu Ruhanga arikworekamu embabazi. Bata shi? Ka tureebe.

9-10. Kuhikaana na Abaheburaayo 12:5, 6, ahabw’enki turikubaasa kugira ngu okubingwa n’ekikorwa ky’embabazi? Ha eky’okureeberaho.

⁹ Omu nteerane z’Ekikristaayo twahurira ekirango ekirikukwata aha muntu ou turikukunda ngu “takiri omwe aha Bajurizi ba Yehova,” nitushaasha munonga. Nitubaasa kwebuuza yaaba kibaire nikyetengyesa kumubinga. Mbwenu shi okubinga buzima n’ekikorwa ky’embabazi? Eego buzima. Okwanga kuhana omuntu oine kuhanwa, ti kikorwa ky’obwengye, embabazi, nari rukundo. (Enf. 13:24) Mbwenu shi okubingwa nikubaasa kuhwera omusiisi oteeteisize kuhindura aha mitwarize ye? Nikubaasa. Baingi abaakozire ebibi by’amaani beetegyereize ngu okubingwa kwabo nikyo kyabaire nikyetengyesa kubahwera kweteera omu kifuba, bakahindura emitwarize yaabo, kandi bakagarukira Yehova.—Shoma Abaheburaayo 12:5, 6.

¹⁰ Teekateeka aha ky’okureeberaho eki. Omuriisa w’entaama yaayetegyereza ngu emwe aha ntaama ze erwaire. Naamanya ngu endwara ey’ekika eki kubaasa kukira, nikyetengyesa okutaanisa entaama egyo aha zindi. Kwonka, entaama tizirikukunda kwetaanisa aha zindi. Nizikunda kuba ziri na ngyenzi zaazo, kandi entaama neegira obwoba waagitaanisa aha zindi. Kwonka shi eki nikimanyisa ngu omuriisa naaba yaatwariza kubi entaama, yaacwamu kugitaanisa aha zindi kugiragurira? Ngaaha buzima. Naamanya ngu yaareka entaama erwaire kuguma n’ezindi, endwara neija kujanjaara. Entaama egyo yaagitaanisa aha zindi, naarinda ezaatsigara.—Gyeragyeranisa Abaleevi 13:3, 4.

11. (a) Ni mu miringo ki ei omuntu obingirwe arikubaasa kugyeragyeranisibwa n’entaama erwaire? (b) Ababingirwe nibabaasa kutunga bintu ki na buhwezi ki?

¹¹ Omukristaayo yaabingwa, nitubaasa kumugyeragyeranisa n’entaama egyo erwaire. Naaba arwaire omu by’omwoyo. (Yak. 5:14) Endwara y’eby’omwoyo nayo neeturira nk’endwara z’omubiri. N’ahabw’ekyo, obumwe nikiba nikyetengyesa kwiha omu kibiina omuntu orwaire omu by’omwoyo. Okuhana oku nikworeka rukundo ei Yehova ainiire abaheereza be abarikuguma bari abeesigwa omu kibiina, kandi nikubaasa kukwata aha musiisi kimureetere kweteisa. Yaaba abingirwe, naabaasa kugumizamu naija omu nteerane, ahu arikuriisibwa omu by’omwoyo kandi akombekwa. Kandi naikirizibwa n’okuguma naatunga ebitabo ebye eby’okukoresa n’okureeba JW Broadcasting^®. Kandi abareeberezi baareeba naahindura aha mitwarize ye, obumwe n’obumwe nibabaasa kuguma nibamuha obuhabuzi  kumuhwera kugaruka kuba gye omu by’omwoyo, kugira ngu agarukye abe omwe aha Bajurizi ba Yehova. *

12. Ni kintu ki eky’embabazi eki abareeberezi barikubaasa kukorera omusiisi orikwanga kweteisa?

¹² Ni kikuru kumanya ngu abasiisi abatarikweteisa bonka nibo barikubingwa. Abareeberezi nibamanya ngu egi n’enshonga nkuru, ei batarikuzaanazaanisa. Nibamanya ngu Yehova naahana ‘arikubariirira’, nari aha rurengo oruhikire. (Yer. 30:11) Nibakunda ab’eishe-emwe bagyenzi baabo, kandi nibaba batarikwenda kukora ekintu kyona ekirikubahitsyaho akabi omu by’omwoyo. Kwonka obumwe, ekintu ky’embabazi eki barikuba baine kukora, n’okwiha omusiisi omu kibiina kumara obwire.

13. Ahabw’enki Omukristaayo omwe omuri Korinso yaabaire aine kubingwa?

¹³ Yetegyereze oku entumwa Paulo yaatwariize omusiisi owaayangire kweteisa omu kyasha ky’okubanza. Omukristaayo omuri Korinso akaba naashambana na mukaishe. Aka ka kaabaire kari akagwe! Yehova akaba agambiire Abaisraeli aba ira aha nshonga egi ati: “Omushaija ku aribyama na mukaishe, aryaba ajwekire ishe busha, bombi baitwe.” (Lev. 20:11) Amazima gari ngu, Paulo taragizire ngu omushaija ogwo aitwe. Kwonka akagambira Abakristaayo ba Korinso kumubinga omu kibiina. Obuhwanshoni bw’omushaija ogwo bukaba nibukwata aha bandi omu kibiina, kandi abamwe bakaba tarikuteekateeka ngu eki n’ekihagaro ky’amaani!—1 Kor. 5:1, 2, 13.

14. Paulo akagirira ata embabazi omushaija owaabaire abingirwe omuri Korinso, kandi n’ahabw’enki? (2 Abakorinso 2:5-8, 11)

¹⁴ Bwanyima y’obwire, Paulo akamanya ngu omushaija ogwo akaba akozire empinduka. Omusiisi ogwo buzima akaba ayeteisize! N’obu araabe yaabaire areetsire okuhemuka omu kibiina, Paulo akagambira abareeberezi ngu akaba atarikwenda ‘kurengyesereza.’ Akabagambira ‘kumusaasira n’okumuhuumuriza.’ Yetegyereze enshonga ei Paulo yaahaire: “Ngu shana atakaarengwa obusaasi.” Paulo akasaasibwa omushaija ogwo owaabaire ayeteisize. Entumwa Paulo akaba atarikwenda kureeba omushaija arengirwe obusaasi, ayeyinamiriire ahabw’eki yaakozire, reero ekyo kikamureetera kurekyera aho kushaba okusaasirwa.—Shoma 2 Abakorinso 2:5-8, 11.

15. Abareeberezi nibabaasa kuringaaniza bata okuhana n’embabazi?

 ¹⁵ Abareeberezi barikutooreza Yehova, nibakunda kugirira abandi embabazi. Nibahana abasiisi kyaba nikyetengyesa kwonka nibabagirira embabazi kyaba nikibaasika. Baaba batakozire batyo, ezo niziba zitari mbabazi kureka n’okushwekyerera ebibi. Kwonka shi abareeberezi bonka nibo baine kugirira abandi embabazi?

16. Kurugiirira aha Enfumu 21:13, Yehova naatwara ata abarikwanga kugirira abandi embabazi?

¹⁶ Abakristaayo boona nibateeraho kuba abanyambabazi nka Yehova. Ahabw’enki? Enshonga emwe eri ngu Yehova tarikwija kuhurira abarikwanga kugirira abandi embabazi. (Shoma Enfumu 21:13.) Tihaine orikwenda ngu Yehova ayangye kuhurira okushaba kwe, n’ahabw’ekyo nitwetantara okugira omutima ogutarikusaasira. Omu mwanya gw’okwehuzya Omukristaayo mugyenzi waitu oine obusaasi, butoosha twine kuba tweteekateekire kuhurikiza okutaka kw’enshoberwa. Kandi n’eky’obwengye kugyendera aha buhabuzi obu: ‘Otarikusaasira naija kucwerwa orubanja atarikusaasirwa.’ (Yak. 2:13) Omu bucureezi twaijuka ngu naitwe nitwenda kugirirwa embabazi, nikibaasa kutuhwera kugirira abandi embabazi. Na munonga nituba nitwenda kugirira embabazi omuntu oyeteisize akagaruka omu kibiina.

17. Omugabe Daudi akooreka ata ngu aine omutima gw’embabazi?

¹⁷ Abarikugambwaho omu Baibuli nibabaasa kutuhwera kugirira abandi embabazi n’okwetantara omutima mubi gw’obutasaasira. Nk’eky’okureeberaho, teekateeka aha Mugabe Daudi. Obwire obwingi akaba naayoreka omutima gw’embabazi. N’obu Saulo araabe yaabaire naayenda kwita Daudi, kwonka Daudi we akagirira embabazi Saulo owaabaire ashukirweho amajuta, yaayanga kweshashuza.—1 Sam. 24:9-12, 18, 19.

18-19. Ni mirundi ki ebiri obu Daudi yaayoreka ngu taine mutima gw’embabazi?

¹⁸ Kwonka, tikugira ngu butoosha Daudi akaba aine omutima gw’embabazi. Nk’eky’okureeberaho, obu Nabali omushaija w’omutima mubi yaagamba omu muringo gutari gw’ekitiinisa kandi akaima Daudi n’abashaija be eby’okurya, Daudi akagira ekiniga yaayenda kumwita n’ab’eka ye boona. Kwonka Abigaili muka Nabali omukazi omunyambabazi, akagira eki yaakora ahonaaho kyahwera Daudi kutagiibwaho orubanja rw’eshagama.—1 Sam. 25:9-22, 32-35.

¹⁹ Omurundi ogundi, nabi Nasani akagambira Daudi aha mushaija omugaiga owaibire entaama y’omutaahi omworo ei yaabaire naakunda munonga. Daudi aine ekiniga kingi yaagarukamu ati: “Nindahira [Yehova] otahwaho, omushaija okozire ekyo kintu akaabaire ow’okufa!” (2 Sam. 12:1-6) Daudi akaba naamanya eki Ebiragiro byabaire nibigamba. Omushuma w’entaama akaba aine kugiriha arikubazamu kana. (Kur. 22:1) Kwonka okwitwa? Buzima ekyo kikaba kiri eky’obwinazi. Amazima gari ngu, Nasani akaba naarengyeza Daudi arikukoresa  eky’okureeberaho ekyo kumworeka ebibi ebi yaabaire akozire! Kandi Yehova akooreka ngu n’omunyambabazi ahari Daudi kukirira kimwe oku Daudi yaabaire naareeba omushuma w’entaama omu ky’okureeberaho kya Nasani!—2 Sam. 12:7-13.

20. Nitubaasa kwegyera ki ahari Daudi?

²⁰ Yetegyereze ngu Daudi ku yaagizire ekiniga, akacwamu kuza kwita Nabali na boona ab’omu ka ye. Kandi bwanyima, Daudi akacwera orubanja omushaija omu ky’okureeberaho kya Nasani ngu akaba ashemereire kufa. Aha murundi gwa kabiri ogu, nitubaasa kwebuuza ahabw’enki omushaija w’omutima murungi yaacwiremu omu muringo gutari gw’embabazi nk’ogwo. Yetegyereze embeera eyaabaire eriho. Omu bwire obwo, Daudi akaba aine omutima gurikumushinja. Ekiniga n’okucwera abandi orubanja ti kamanyiso akarikworeka ngu omuntu ari gye omu by’omwoyo. Ngaaha buzima. Yesu akarabura abakuratsi be ati: ‘[Murekye] kucwa orubanja, nyentsya naimwe mutarirucwerwa. Ahabw’okuba orubanja oru murikucwa, naimwe nimwija kurucwerwa.’ (Mat. 7:1, 2) N’ahabw’ekyo, ka twetantare omutima mubi ogw’obutasaasira, kandi tuteereho kugira embabazi nyingi nka Ruhanga waitu.

21-22. Ni mu miringo ki ei turikubaasa kugiriramu abandi embabazi?

²¹ Embabazi nizikira aha kugira enyehurira kyonka. Nangwa, embabazi nizishoboororwa nk’okworeka esaasi omu bikorwa. N’ahabw’ekyo twena nitubaasa kureeba abu twine kugirira embabazi omu maka gaitu, omu bibiina byaitu, n’ei turikutuura. Buzima, hariho emigisha mingi ey’okugirira abandi embabazi! Hariho orikwenda kuhuumurizibwa? Nitubaasa kumuha obuhwezi obwa butunu, obundi nk’okumuha eby’okurya, nari kumukorera ekindi kintu? Mbwenu shi hariho oherize kugarurwa omu kibiina orikwenda ow’okushashaanuka nawe kumugumya? Nitubaasa kwoherereza abandi obutumwa bw’amakuru marungi oburikuhuumuriza? Ogu ni gumwe aha miringo mirungi y’okworeka embabazi abantu boona.—Yob. 29:12, 13; Rom. 10:14, 15; Yak. 1:27.

²² Twaba nitufayo kwetegyereza, nitwija kureeba ngu hariho emigisha mingi ey’okugirira abandi embabazi. Twagirira abandi embabazi, ekyo ka kishemereire kuba nikishemeza Tataitwe ow’omu iguru oine embabazi nyingi!