1-2. Niki ekirikwija kureetera okuramya kwaitu kusiimwa Ruhanga?

 NOOTEEKATEEKA ahari ki waahurira ekigambo “okuramya”? Obundi nooteera akashushani orikureeba ow’eishe-emwe omucureezi atsimbire amaju aha rubaju rw’ekitanda kye arikushaba kuruga aha mutima. Nari nooteekateeka aha ka eshemereirwe erikwejumbira kimwe omu kwega Baibuli.

² Omu by’okureeberaho byombi, abantu abo nibaba nibeejumba omu bikorwa by’okuramya. Yehova shi naija kusiima okuramya kwabo? Naija kukusiima kwaba nikuhikaana n’ekigyendererwa kye, kandi baaba nibakunda Yehova barikumuha n’ekitiinisa. Nitukunda Yehova munonga. Nitumanya ngu niwe ahikire kuramibwa, kandi nituba nitwenda ngu ekiconco kyaitu ky’okumuramya kibe nikikirayo oburungi.

3. Nituza kushwijuma ki omu kicweka eki?

³ Omu kicweka eki, nituza kureeba okuramya oku Yehova yaabaire naasiima ira, kandi nituza n’okureeba ebintu munaana ebirikutwarirwa omu kuramya okurikusiimwa. Twakora tutyo, nitubaasa kuteekateeka aha ku buri omwe arikubaasa kuboneza okuramya kwe. Nituza n’okureeba ahabw’enki okuramya okw’amazima nikutureetera kushemererwa.

4. Obukristaayo butakabaireho abaheereza ba Yehova bakooreka bata ngu nibakunda Yehova kandi nibamuha ekitiinisa?

⁴ Obukristaayo butakabaireho, abashaija abeesigwa nk’Abeeli, Noa, Abrahamu, na Yobu baakoreka ngu nibakunda  Yehova kandi nibamuha ekitiinisa. Bata shi? Kurabira omu kworoba kwabo, okwikiriza, n’okuhayo ebitambo. Baibuli terikutugambira byona ebi barikubaasa kuba baakozire. Kwonka buzima bakakora nk’oku barikubaasa kumuha ekitiinisa, kandi okuramya kwabo akakusiima. Bwanyima Yehova akaha baijukuru b’Abrahamu ebiragiro kurabira omuri Musa. Ebiragiro ebi bikaba nibitwariramu eby’okukuratira omu kuramya Yehova omu muringo ogu arikusiima.

5. Okuramya okw’amazima kukabamu mpinduka ki bwanyima ya Yesu kufa kandi akazooka?

⁵ Bwanyima ya Yesu kufa kandi akazooka, Yehova akaba atakyenda ngu abaheereza be bamworobere kurabira omu Biragiro bya Musa. (Rom. 10:4) Abakristaayo bakaba baine kukuratira ekiragiro kisya, “ekiragiro kya Kristo.” (Gal. 6:2) Bakaba bataine kworobera “ekiragiro” eki barikukikwata omu mutwe, kandi tikirimu omushororongo gw’eby’okukuratira, kureka bakaba baine kutooreza Yesu barikugyendera aha nyegyesa ze. Na hati, Abakristaayo nibateeraho kukuratira Kristo kubaasa kushemeza Yehova n’okutunga “okuhuumura omu mitima” yaabo.—Mat. 11:29.

6. Nitubaasa kugasirwa tuta omu kicweka eki?

⁶ Twaba nitushwijuma buri kicweka ky’okuramya kwaitu, yebuuze oti: ‘Nkozire ntunguuka ki omu nshonga egi?’ Kandi noobaasa n’okwebuuza oti: ‘Nimbaasa kuboneza omuringo ogu ndikuramya?’ Oine kwesiimira omu kutunguuka oku waaherize kukora, kwonka nikiija kukwetengyesa kushaba Yehova kukuhwera kumanya ahu oine kwongyeramu amaani.

7. Yehova naareeba ata okuramya kwaitu okurikuruga aha mutima?

⁷ Nituramya Yehova twaba nitushaba. Ebyahandiikirwe nibigyeragyeranisa okushaba kwaitu n’obubaane obutebeekanisiibwe omu bwegyendesereza obwabaire nibuheebwayo aha ihema na bwanyima aha hekalu. (Zab. 141:2) Obubaane obwo bukaba niburugamu omugaju ogurikushemeza Ruhanga. Nikyo kimwe, okushaba kwaitu kuruga aha mutima ‘naakusiima’ n’obu twakukoresa ebigambo bikye byorobi. (Enf. 15:8; Bir. 33:10) Twine enshonga ehikire kwikiriza ngu Yehova naashemererwa kuhurira nitugamba ahari rukundo ei tumwiniire n’oku turikumusiima. Naayenda ngu tumugambire ebirikutwerarikiriza, amatsiko gaitu, n’ebyetengo byaitu. Otakatandikire kushaba Yehova, nikiba kiri kirungi kubanza waateekateeka aha bi orikuza kugamba. Waakora otyo, noija kushaba Sho ow’omu iguru omu muringo ogwine omugaju nk’ogw’obubaane.

8. Ni ryari obu turikubaasa kuhimbisa Yehova?

⁸ Nituramya Yehova twaba nitumuhimbisa. (Zab. 34:1) Nituhimbisa Yehova turikugambira abandi oku turikumukunda n’oku turikusiima emitwarize ye n’emirimo ye. Okuhimbisa nikuruga omu mutima ogurikusiima. Twatwara obwire tukateekateeka aha burungi bwa Yehova, ebintu byona ebi atukoreire, nitwija kuguma twine enshonga nyingi ezirikutureetera kumuhimbisa. Okubuurira nikutubaasisa kutamba “ekitambo ky’okusiima Ruhanga, nikyo kyana ky’eminwa erikuhimbisa eiziina rye.” (Heb. 13:15) Nk’oku turikubanza twateekateeka n’obwegyendesereza aha bi turikuza kugamba tutakashabire Yehova, nituteekateeka n’obwegyendesereza aha bi turikuza kugambira abantu omu buheereza. Nituba nitwenda ngu “ekitambo” kyaitu “ky’okusiima” kibe nikikirayo oburungi. Nitugamba kuruga aha mutima twaba nitugambira abandi amazima.

9. Kushushana n’Abaisraeli aba ira, enteerane nizitugasira zita? Ha eky’okureeberaho ekyawe.

 ⁹ Nituramya Yehova twaba turi omu nteerane. Abaisraeli aba ira bakagambirwa bati: ‘Buri mwaka abantu baawe boona abeetwa abashaija nibaija kureebwa kashatu omu maisho ga [Yehova] Ruhanga waawe omu mwanya ogu araatoorane.’ (Bir. 16:16) Bakaba baine kutsigaho amaka gaabo n’emisiri yaabo hataine obirinzire. Kwonka Yehova akabaraganisa ati: ‘Ku oriba ogiire kureebwa omu maisho ga [Yehova], tihaine muntu weena orikwija kwetenga ensi yaawe.’ (Kur. 34:24) Abaisraeli aba abarikutiina Yehova, bakaba bamwesigira kimwe baza aha nteerane ezi. Bakaba bagasirwa munonga, barikwongyera kwetegyereza Ebiragiro bya Ruhanga, barikuteekateeka aha burungi bwe, kandi bakashemererwa barikushashaanuka n’abarikuramya Yehova bagyenzi baabo. (Bir. 16:15) Naitwe nitugasirwa omu muringo nigwo gumwe twayefeerereza kuza omu nteerane z’Ekikristaayo. Kandi teekateeka aha ku Yehova arikushemererwa twaija twetebeekaniise kuha eky’okugarukamu kigufu kwonka ekiine amakuru.

10. Okweshongora ni kukuru kuta omu kuramya kwaitu?

¹⁰ Nituramya Yehova turikwejumba omu kweshongora. (Zab. 28:7) Abaisraeli bakaba nibareeba okweshongora nk’ekintu kikuru omu kuramya kwabo. Omugabe Daudi akataho Abaleevi 288 kuba abeeshongozi aha hekalu. (1 Bus. 25:1, 6-8) Obunaku obu, nitubaasa kworeka rukundo ei twiniire Ruhanga turikweshongora ebyeshongoro by’okuhimbisa. Oburungi bw’amaraka gaitu tikyo kikuru. Teekateeka aha kugyeragyeranisa oku: Twaba nitugamba, ‘twena nitushobya omuri bingi,’ kwonka ekyo tikirikuturemesa kugamba omu kibiina n’omu buheereza. (Yak. 3:2) Nikyo kimwe, titushemereire kwikiriza amaraka gaitu agatahikiriire kuturemesa kweshongorera Yehova eby’okumuhimbisa.

11. Nk’oku kiri omuri Zaaburi 48:13, ahabw’enki twine kutaho obwire bw’okweyegyesa Baibuli nk’eka?

¹¹ Nituramya Yehova twaba nitweyegyesa Ekigambo kye turikwegyesa n’abaana baitu ebirikumukwataho. Eizooba rya sabato rikaba niribaasisa Abaisraeli kureka emirimo yaabo eya butoosha, reero bakata omutima aha mukago gwabo na Yehova. (Kur. 31:16, 17) Abeesigwa omuribo bakaba nibeegyesa abaana baabo ebirikukwata ahari Yehova n’oburungi bwe. Naitwe tushemereire kutaho entebeekanisa y’okushoma n’okwega Ekigambo kya Ruhanga. Eki nikitwarirwa omu kuramya Yehova, kandi nikituhwera kumwirira haihi. (Zab. 73:28) Kandi twayega hamwe nk’eka, nitubaasa kuhwera ab’obusingye busya, nibo abaana baitu, kugira omukago murungi na Tataitwe ow’omu iguru.—Shoma Zaaburi 48:13.

12. Nitwegyera ki aha ku Yehova yaareebire omurimo gw’abo abaakozire ebintu by’okuta omu ihema?

¹² Nituramya Yehova twaba nitwombeka emyanya yaitu y’okuramizamu kandi turikugiboneza. Baibuli neegira ngu omurimo gw’okukora ihema n’ebintu byaryo gukaba guri “ogurikwera.” (Kur. 36:1, 4) Na hati, omurimo gw’okwombeka Ebyombeko by’Obukama n’ebindi byombeko by’ekibiina, Yehova naagureeba nk’ogurikwera. Ab’eishe-emwe na banyaanyazi-itwe nibamara obwire bwingi omu mirimo egi. Mbwenu shi titurikusiima okwehayo kwabo kwejumba omu murimo gw’Obukama ogu? Kandi nangwa, nibeejumba n’omu murimo gw’okubuurira. Kandi abamwe nibabaasa n’okwenda kuba baapayoniya. Abareeberezi nibabaasa kworeka ngu nibashagika emirimo y’okwombeka egi, batarikweziringa kutoorana ababuurizi aba abarikora n’amaani kuba baapayoniya baaba nibahikiiriza ebirikwetengyesa. Yaaba twine  emyoga omu kwombeka oku nari tutagiine, twena nitubaasa kwejumba omu kurinda ebyombeko by’ekibiina kuguma bicumire gye kandi nibireebeka gye.

13. Twine kugira miteekateekyere ki aha bi turikuhayo kushagika omurimo gw’Obukama?

¹³ Nituramya Yehova twashagika omurimo gw’Obukama turikuhayo. Abaisraeli bakaba bataine kureebeka omu maisho ga Yehova engaro nsha. (Bir. 16:16) Bakaba baine kuhayo ekiconco kurugiirira aha mbeera zaabo. Eki kikaba kyoreka ngu nibasiima entebeekanisa zoona, ezaabaire nizikorwa kubagasira omu by’omwoyo. Nitubaasa kworeka tuta ngu nitusiima Yehova n’eby’omwoyo ebi turikutunga? Omuringo gumwe n’okuhayo esente z’okuhwera omu nshohoza y’ekibiina eki turimu n’okushagika omurimo gw’Obukama omu nsi yoona, nk’oku embeera zaitu zirikutubaasisa. Entumwa Paulo akakigambaho ati: “Ahu okukunda kuri [okweteekateeka kwaba kuriho], nikwikirizibwa nk’oku omuntu aine, ti nk’oku ataine.” (2 Kor. 8:4, 12) Yehova naasiima kyona ekirikuheebwayo kuruga aha mutima, nangwa n’obu kyakuba kitari kihango.—Mak. 12:42-44; 2 Kor. 9:7.

14. Kurugiirira aha Enfumu 19:17, Yehova naareeba ata obuhwezi obu turikuha ab’eishe-emwe abaine eki bakyenire?

¹⁴ Nituramya Yehova twahwera Abakristaayo bagyenzi baitu abaine eki bakyenire. Yehova akaraganisa kushumbuusha Abaisraeli abaabaire nibafayo kuhwera abooro. (Bir. 15:7, 10) Eego, buri murundi ogu turikuhwera ow’eishe-emwe mugyenzi waitu oine eki akyenire, Yehova naareeba obuhwezi obwo nk’ekiconco eki twaha we. (Shoma Enfumu 19:17.) Nk’eky’okureeberaho, obu Abakristaayo omuri Filipi baatwekyera Paulo ekiconco ari omu kihome, akakyeta ‘ekitambo ekirikwikirizibwa kandi ekirikusiimwa Ruhanga.’ (Fil. 4:18) Reeba abari omu kibiina reero oyebuuze oti: ‘Harimu ou ndikubaasa kuhwera?’ Yehova naashemererwa ku arikureeba nitukoresa obwire bwaitu, amaani gaitu, emyoga yaitu, n’ebintu byaitu, kuhwera abaine eki bakyenire. Ekyo naakireeba nka kimwe aha birikutwarirwa omu kumuramya.—Yak. 1:27.

15. Okuramya okw’amazima nikwetengyesa obwire n’amaani, kwonka ahabw’enki kutari mugugu guremeire?

¹⁵ Okuramya okw’amazima nikwetengyesa obwire n’amaani. Kwonka ti mugugu guremeire. (1 Yoh. 5:3) Ahabw’enki? N’ahabw’okuba nituramya Yehova ahabw’okumukunda. Teera akashushani omwana naayenda kugira eki yaaha ishe. Naabaasa kumara eshaaha nyingi arikuhuuga ekishushani ky’okumuha. Omwana ogwo tarikwefuuza obwire obu yaamara naakihuuga. Naakunda ishe, kandi naashemererwa kumuha ekiconco ekyo. Nikyo kimwe, ahabw’okugira ngu nitukunda Yehova, nikitushemeza kuhayo obwire bwaitu n’amaani gaitu kwejumba omu kuramya okw’amazima.

16. Kurugiirira aha Abaheburaayo 6:10, Yehova naareeba ata okuteeraho kwa buri omwe ahariitwe kumushemeza?

¹⁶ Abazaire abaine rukundo tibarikuteekateeka ngu abaana baabo nibaija kubaha ebiconco birikwingana. Nibamanya ngu buri mwana n’ow’omutaano, kandi aine embeera z’omutaano. Nikyo kimwe, Tataitwe ow’omu iguru naayetegyereza embeera za buri omwe ahariitwe. Obundi iwe noobaasa kukora bingi kukira baingi abu orikumanya kandi abu orikukunda. Nari torikubaasa kukora bingi nk’abandi, shana obundi ahabw’emyaka yaawe, amagara gaawe, nari obujunaanizibwa bw’eka obu oine. Otahwamu amaani. (Gal. 6:4) Yehova tarikwija kwebwa emirimo yaawe.  Kasita oba noohayo ekirikukirayo oburungi, kandi oine ebigyendererwa birungi, noija kushemererwa. (Shoma Abaheburaayo 6:10.) Yehova naareeba n’ebigyendererwa ebiri omu mitima gwawe. Naayenda ngu otungye okushemererwa n’okumarwa ahabw’ebi orikubaasa kukora kumuramya.

17. (a) Twaba nitugumirwa kukora ebintu ebimwe omu kuramya kwaitu, nitubaasa kukora ki? (b) Kimwe aha biri omu kabokusi “ Yongyera aha Kushemererwa Kwawe” kikuhweraire kita?

¹⁷ Kandi shi waaba noogumirwa kwejumba omu bikorwa by’okuramya ebimwe nk’okweyegyesa nari obuheereza bw’orweteeraine? Obundi noobaasa kushanga ngu ku orikuguma nooyejumba omu bintu ebi, nooyongyera kubikunda n’okubigasirwamu. Okuramya kwaitu nitubaasa kukugyeragyeranisa n’okumanyiiza omubiri nari okwega kuteera ekyoma ekirikukoresibwa omu kweshongora. Twaba nitukikora rimwe na rimwe, titurikubaasa kurahuka kwega. Kwonka ka tugire ngu twacwamu kukikora tutarikwosha. Nitubaasa kutandika turikumara obwire bugufu, reero tugume nitwongyeraho mporampora. Twareeba ebirungi ebirikuruga omu kuteeraho kwaitu, nitubaasa kutandika kugirira ekihika okwega okwo kandi tukukunde. Nooreeba oku turikubaasa kugyendera aha buhabuzi nibwo bumwe omu kuramya kwaitu?

18. Nituhikiiriza tuta ekigyendererwa kyaitu eky’okubaho, kandi nihaija kurugamu ki?

¹⁸ Nituhikiiriza ekigyendererwa kyaitu kyenyini eky’okubaho turikuramya Yehova n’omutima gwaitu gwona. N’ekirikurugamu, nitugira okushemererwa n’okumarwa, kandi nitugira n’amatsiko g’okuramya Yehova ebiro byona. (Enf. 10:22) Twagizire obusingye bw’omu biteekateeko ahabw’okumanya ngu Yehova naahwera abarikumuramya baatunga oburemeezi. (Isa. 41:9, 10) Buzima twine enshonga nungi ezirikutureetera kushemererwa twaba nituramya Tataitwe owa rukundo, “oshemereire kuhimbisibwa n’okuheebwa ekitiinisa” ebyahangirwe bye byona!—Kush. 4:11.