1. Niki ekirikutureetera kugira emitwarize ei twine?

 YAABA tumazire ebiro bikye nari emyaka mingi tubatiziibwe, twena nitwenda kugira emitwarize ei Yehova arikukunda. Kubaasa kukora ekyo, twine kurinda ebiteekateeko byaitu. Ahabw’enki? Ahakuba nitukira kutwaza kurugiirira aha bi turikuteekateeka. Waaguma nooteekateeka aha bi omubiri gurikwetenga, noija kugamba nari kukora ebintu bibi. (Efe. 4:17-19) Kwonka, waaguma nooteekateeka aha bintu ebirungi, nikiija kukworobera kugamba ebirikushemeza Tataitwe ow’omu iguru Yehova, n’okubikora.—Gal. 5:16.

2. Nituza kugarukamu bibuuzo ki omu kicweka eki?

² Nk’oku kirikworekwa omu kicweka eky’enyima, titurikubaasa kuzibira buri kiteekateeko kibi kutaaha omu bwongo bwaitu. Kwonka nitubaasa kucwamu kutabigyenderaho. Tutakabatiziibwe, twine kurekyera aho kugamba n’okukora ebi Yehova arikwanga. Eki nikyo kintu ky’okubanza kandi ekikuru omu kujuura omuntu owa ira. Kubaasa kushemeza Yehova omu bwijwire, twine n’okworobera ekiragiro eki: ‘Mujware omuntu omusya.’ (Kol. 3:10) Omu kicweka eki, nituza kugarukamu ebibuuzo ebi: “Omuntu omusya” niki? Nitubaasa kutaho tuta omuntu omusya kandi akagumaho?

3. Kurugiirira aha Abagalatia 5:22, 23, “omuntu omusya” niki, kandi noobaasa kumujwara ata?

³ “Omuntu omusya” nikimanyisa okuteeraho kuteekateeka n’okutwaza nka Yehova. Noobaasa kujwara omuntu omusya orikugira emitwarize y’omwoyo gurikwera, kandi orikwikiriza omwoyo gurikwera kuhindura ebiteekateeko byawe, enyehurira  zaawe, n’emitwarize yaawe. (Shoma Abagalatia 5:22, 23.) Nk’eky’okureeberaho, nooba nookunda Yehova n’abantu be. (Mat. 22:36-39) Nooguma oshemereirwe n’obu waakuba naagyezibwa. (Yak. 1:2-4) Noogaruraho obusingye. (Mat. 5:9) Nooba omugumisiriza kandi omunyambabazi waaba nookoragana n’abandi. (Kol. 3:13) Nookunda ebirungi kandi noobikora. (Luk. 6:35) Omu bikorwa byawe byona noohamya ngu oine okwikiriza kuhami omuri Sho ow’omu iguru. (Yak. 2:18) Torikurahuka kugira ekiniga baakugwisa kubi, kandi nooyerinda waagyezibwa.—1 Kor. 9:25, 27; Tit. 3:2.

4. Shoboorora ahabw’enki twine kugira emitwarize yoona erimu omu Abagalatia 5:22, 23, n’omu Byahandiikirwe ebindi, kubaasa kujwara omuntu omusya?

⁴ Kubaasa kujwara omuntu omusya twine kugira emitwarize yoona eri omu Abagalatia 5:22, 23 n’omu Byahandiikirwe ebindi. * Emitwarize egi teri nk’ebijwaro ebi turikujwara kimwe-kimwe omu bwire butarikushushana. Ahakuba emitwarize egi eine akakwate n’emitwarize endiijo. Nk’eky’okureeberaho, buzima waaba nookunda mutaahi waawe, noija kumugumisiririza kandi omugirire embabazi. Kandi kubaasa kuba omuntu murungi buzima, oine kuba nooyetwara kandi orikwezibira.

5. Nikimanyisa ki okugira “okuteekateeka kwa Kristo,” kandi ahabw’enki twine kwegyera aha bi Yesu yaarabiremu? (1 Abakorinso 2:16)

⁵ Shoma 1 Abakorinso 2:16. Kubaasa kutaho omuntu musya, twine kugira “okuteekateeka kwa Yesu.” Eki nikimanyisa ngu, twine kumanya emiteekateekyere ya Yesu reero tumutooreze. Yesu akooreka emitwarize y’omwoyo gurikwera omu muringo oguhikiriire. Nk’endeeberwamu etaine kamogo, akatworeka gye emitwarize ya Yehova nk’oku eri. (Heb. 1:3) Twayongyera kugira emiteekateekyere nk’eya Yesu, nitwija kwongyera kutwaza nkawe, kandi tube abasinguzi omu kworeka emitwarize nk’eye.—Fil. 2:5.

6. Twine kuguma nitwijuka ki twaba nituteeraho kutaho omuntu omusya?

⁶ Buzima shi nikibaasika kutooreza Yesu? Nitubaasa kuteekateeka tuti: ‘Yesu n’ohikiriire. Tindikubaasa kuba nkawe omu bwijwire!’ Ku oraabe nikwo orikwehurira otyo, ijuka amazima aga. Ag’okubanza, okahangwa orikubaasa kutooreza Yehova na  Yesu. N’ahabw’ekyo noobaasa kucwamu kubatooreza, kandi nikibaasika kubatooreza aha rurengo oruringaniire. (Kut. 1:26) Aga kabiri, omwoyo gurikwera nigo maani agarikukirayo omu nsi n’omu iguru. Nigubaasa kukuhwera kuhikiiriza ebintu ebi otarikubaasa kukora ahabwawe. Aga kashatu, Yehova tarikukushaba kugira emitwarize y’omwoyo gurikwera omu muringo oguhikiriire. Nangwa, Tataitwe oine rukundo ataireho emyaka 1,000 kugira ngu abaine amatsiko g’okutuura omu nsi babaase kuba abahikiriire. (Kush. 20:1-3) Yehova eki arikutwenza hati n’okuteeraho munonga kumwesiga kutuhwera.

7. Nituza kushwijuma ki hati?

⁷ Nitubaasa kutooreza Yesu mu miringo ki? Nituza kureeba omu bugufu emitwarize ena ey’omwoyo gurikwera. Omu buri mbeera, nituza kureeba eki turikubaasa kwegyera aha ku Yesu yaayorekire emitwarize egyo. Kandi, nituza kushwijuma ebibuuzo bimwe ebiraatuhwere kweshwijuma kureeba ahu twahika omu kutaho omuntu omusya.

8. Yesu akooreka ata ngu aine rukundo?

⁸ Rukundo mpango ei Yesu yaabaire ainiire Yehova, ekamuhiga kuheereza Yehova n’okutufeera. (Yoh. 14:31; 15:13) Yesu akooreka rukundo mpango ei ainiire abantu kurugiirira aha ku yaabaire naatwaza obu yaabaire ari omu nsi. Buri izooba, akaba naatwaza omu muringo gwa rukundo n’embabazi, n’obu abamwe baabaire nibamuhakanisa. Omuringo mukuru ogu yaayorekire ngu naakunda abantu n’okubeegyesa ebirikukwata aha Bukama bwa Ruhanga. (Luk. 4:43, 44) Kandi Yesu akooreka rukundo ey’okwefeerereza ei ainiire Ruhanga n’abantu arikwehayo kubonabonesibwa abasiisi kuhika aha kufa. Ekyo kikatwiguriraho omuhanda gw’okutunga amagara agatahwaho.

9. Nitubaasa kutooreza tuta Yesu omu kworeka rukundo?

⁹ Tukeehayo ahari Yehova kandi twabatizibwa, ahabw’okugira ngu nitumukunda. N’ahabw’ekyo, nka Yesu, omuringo ogu turikutwarizamu abantu gushemereire kworeka ngu nitukunda Yehova. Entumwa Yohaana akahandiika ati: ‘Otarikukunda mugyenzi we ou arikureeba, tarikubaasa kukunda Ruhanga ou atakareebaga.’ (1 Yoh. 4:20) Nitubaasa kwebuuza tuti: ‘Nyongyeire kugirira abantu rukundo mpango? Niintwariza abandi omu muringo gw’embabazi na baantwariza kubi? Rukundo neempiga kukoresa obwire bwangye n’ebi nyine kuhwera abandi kwega ebirikukwata ahari Yehova? Nyeteekateekire kukora eki, n’obu baingi baakuba batarikusiima okuteeraho kwangye nari barikumpakanisa? Nimbaasa kusherura oburyo bw’okwongyera aha bwire obu ndikumara omu murimo gw’okuhindura abantu abeegi?’—Efe. 5:15, 16.

10. Yesu akaba naareetaho ata obusingye?

¹⁰ Yesu akaba naareetaho obusingye. Ku yaabaire atwarizibwa kubi, akaba ataihura ekibi ahabw’ekibi. Kandi akaba akora ekirikukira ahari ekyo. Akaba ateera orutambwe rw’okubanza kugaruraho obusingye, kandi akahiga abandi kushoboorora obutaikirizana bwabo. Nk’eky’okureeberaho, akabeegyesa ngu baine kugaruraho obusingye na bagyenzi baabo baaba nibenda ngu Yehova asiime okuramya kwabo. (Mat. 5:9, 23, 24) Kandi emirundi mingi akahwera entumwa kurekyera aho kuteera empaka ngu n’oha omukuru omuribo.—Luk. 9:46-48; 22:24-27.

11. Nitubaasa kureetaho tuta obusingye?

¹¹ Kubaasa kugaruraho obusingye, twine kukora ekirikukira aha kwetantara kureetaho emihondano. Twine kuteera orutambwe rw’okubanza omu kureetaho obusingye, kandi tuhigye ab’eishe-emwe na banyaanyazi-itwe  kushoboorora obutaikirizana bwabo. (Fil. 4:2, 3; Yak. 3:17, 18) Nitubaasa kwebuuza ebibuuzo ebi: ‘Nyeteekateekire kwefeerereza ki, kubaasa kugira obusingye n’abandi? Ow’eishe-emwe nari munyaanyazi-itwe yaankora kubi, nimbiika enziika? Nintegyereza ondiijo kuba niwe yaabanza kwija kugaruraho obusingye, nari niinye ndikubanza kwehabura kukikora n’obu mugyenzi wangye yaakuba niwe areetsireho oburemeezi? Kyaba nikibaasika, ninkira kuhiga abaine obutaikirizana kugarukana omu busingye?’

12. Yesu akooreka ata ngu n’omunyambabazi?

¹² Yesu akaba ari omunyambabazi. (Mat. 11:28-30) Eki akakyoreka arikutwariza gye abandi, kandi atarikuremera aha miteekateekyere ye n’omu mbeera zigumire. Nk’eky’okureeberaho, omukazi wa Foiniike ku yaamweshengyereize kukiza omwana we, omu kubanza taragarukiremu okushaba kwe, kwonka omukazi ogwo ku yaayorekire okwikiriza kwingi, Yesu akamugirira embabazi yaakiza omwana we. (Mat. 15:22-28) N’obu Yesu araabe yaabaire ari omunyambabazi, akaba atarikweziringa kuha obuhabuzi. Obumwe akaba ayoreka embabazi arikuhana butunu abu arikukunda. Nk’eky’okureeberaho, Petero ku yaateireho kuremesa Yesu kukora ebi Yehova arikukunda, Yesu akamuhana omu maisho g’abeegi abandi. (Mak. 8:32, 33) Eki tarakikozire kuhemura Petero, beitu kumutendeka n’okurabura abeegi abandi kutagira omweragiiro. Hatariho kubangaanisa, Petero naabaasa kuba yaagiziremu okuhemuka, kwonka akagasirwa omu kuhana okwo.

13. Nitubaasa kworeka tuta ngu turi abanyambabazi buzima?

¹³ Kubaasa kugirira abu orikukunda embabazi ezaabuzima, obumwe nooba oine kubagambira butunu. Kwonka, tooreza Yesu orikwegamiza obuhabuzi bwawe aha Kigambo kya Ruhanga. Twariza gye abandi. Gira emiteekateekyere mirungi aha bandi, orikumanya ngu abarikukunda Yehova hamwe naiwe, nibaija kugyendera aha buhabuzi obu orikubaha. Yebuuze ebibuuzo ebi: ‘Nyine obumanzi bw’okugamba, naareeba munywani wangye naakora ekigwire? Kyayetengyesa kuha obuhabuzi, ningamba omu muringo gw’embabazi nari ningamba nk’orikutongana? Nimba nyine kigyendererwa ki naaba nimpa obuhabuzi? Nimpa omuntu obuhabuzi ahabw’okungwisa kubi, nari ninkikora ahabw’okwendeza omuntu ogwo?’

14. Yesu akooreka ata omutwarize gw’oburungi?

¹⁴ Yesu tarikumanya bumanya ekirungi kureka naakikora. Yesu naakunda Ishe, n’ahabw’ekyo butoosha naakora ekihikire aine ekigyendererwa kirungi. Omutwarize gw’oburungi nigureebekyera aha ku abandi barikukwatwaho. N’omutwarize ogu turikubaasa kworeka turikukora ebirikuhwera abandi. Tikirikumara kumanya ekihikire ekiine kukorwa, tushemereire kukora ekihikire twine ekigyendererwa kihikire. Omuntu naabaasa kubuuza ati: ‘Nikibaasika shi kukora ekihikire oine ekigyendererwa kigwire?’ Eego, ekyo nikibaasika. Nk’eky’okureeberaho, Yesu akagamba ahari abo abarikuha abooro, kwonka bakahamya ngu abandi baamanya ebiconco ebi babahaire. Ebikorwa ebirikureebeka nka birungi ebyo, Yehova akaba atarikubisiima.—Mat. 6:1-4.

15. Nitubaasa kuba tuta barungi buzima?

¹⁵ Nitubaasa kuba barungi buzima twaba nitukora ebihikire tutaine bigyendererwa by’okweyendeza. N’ahabw’ekyo noobaasa kwebuuza oti: ‘Nimba niimanya ekihikire eki nyine kukora kandi nkikora? Ekigyendererwa kyangye ky’okukora ebirungi ni kiiha?’

16. Twine kukora ki buri izooba, kandi ahabw’enki?

¹⁶ Titwine kuteekateeka ngu omurimo gw’okutaho omuntu omusya niguhendera twaheza kubatizibwa. Twine kugumizamu niturinda “ekijwaro kyaitu kisya” kuguma omu mbeera nungi. Omuringo gumwe ogu turikubaasa kukoramu ekyo n’okusherura oburyo bw’okworeka emitwarize y’omwoyo gurikwera buri izooba. Ahabw’enki? Ahakuba Yehova ni Ruhanga ow’ebikorwa, kandi omwoyo gwe nagwo nigukora. (Kut. 1:2) N’ahabw’ekyo, buri mutwarize gw’omwoyo gurikwera gushemereire kutureetera kugira eki twakora. Nk’eky’okureeberaho, Yakobo akahandiika ati: ‘Okwikiriza okutaine kukora nikuba kufiire.’ (Yak. 2:26) Nikyo kimwe n’emitwarize endiijo yoona ey’omwoyo gurikwera. Buri kworeka ngu twine emitwarize egi, nikihamya ngu omwoyo gurikwera nigukorera omuriitwe.

17. Twine kutwaza tuta twaremwa kworeka emitwarize y’omwoyo gurikwera?

¹⁷ Nangwa n’Abakristaayo abamazire emyaka mingi babatiziibwe obumwe nibaremwa kworeka emitwarize y’omwoyo gurikwera. Kwonka ekikuru, n’okutahanika. Teekateeka ahari eki. Omwenda ogu orikukunda gwataagukaho kakye, noogunaga ahonaaho? Ngaaha. Obundi noobaasa kuteeraho kubaziira ahataagukire kyaba nikibaasika. Kwonka bwanyima nooba oine kuba omwegyendesereza. Nikyo kimwe, obumwe n’obumwe waaremwa kuba omunyambabazi, omugumisiriza nari kugirira ondiijo rukundo, oteehurira kubi. Okushaba okusaasirwa oyihire aha mutima, nikubaasa kugaruraho enkoragana yaawe n’omuntu ogwo. Kandi mariirira kutwaza gye nyentsya.

18. Nitubaasa kugira buhame ki?

¹⁸ Ka nitusiima munonga eky’okureeberaho kya Yesu! Twayongyera kugira emiteekateekyere n’emitwarize nk’eye, nikiija kutworobera kutwaza nkawe. Kandi twayongyera kutwaza nka Yesu, nitwija kwongyera kujwara omuntu omusya. Omu kicweka eki, twareeba emitwarize ena yonka ey’omwoyo gurikwera. Ahabw’enki otarikuteeraho kushwijuma emitwarize endiijo ey’omwoyo gurikwera, kandi okareeba oku orikubaasa kwongyera kugira emitwarize egyo? Ebicweka ebirikugamba aha nshonga egi biri omu Katabo k’Okucondooza ak’Abajurizi ba Yehova ahansi y’omutwe “Emitwarize y’Abakristaayo” reero oze aha “Emitwarize Ei Omwoyo Gurikwera Gurikutuhwera Kugira.” Noobaasa kugira obuhame ngu waahikiiriza obujunaanizibwa bwawe, Yehova naija kukuhwera kutaho omuntu musya kandi ogume omwine.