1. “Obusingye bwa Ruhanga” niki, kandi nitugasirwa tuta twabutunga? (Abafilipi 4:6, 7)

 HARIHO obusingye obu abantu omu nsi batarikumanya na kakye. Nibwo busingye bwa Ruhanga, nari okwikaikana okurikuruga omu kugira omukago guhami na Tataitwe ow’omu iguru. Twaba twine obusingye bwa Ruhanga, nituhurira twine oburinzi. (Shoma Abafilipi 4:6, 7.) Nitugira enkoragana nungi n’abarikumukunda. Kandi nitugira omukago guhami na ‘Ruhanga w’obusingye.’ (1 Tes. 5:23) Twamanya Tataitwe, tukamwesiga kandi tukamworobera, obusingye bwa Ruhanga nibutuhwera kwikaikana omu mutima twaba nituraba omu mbeera zigumire.

2. Nituhamya tuta ngu nikibaasika kugira obusingye bwa Ruhanga?

² Mbwenu shi nikibaasika kugira obusingye bwa Ruhanga haabaho oburemeezi, nk’endwara erikurahuka kujanjaara, ekihikiirizi, obutabanguko, nari okuhiiganisibwa? Oburemeezi nk’obwo nibubaasa kutureetera kutiina. Kwonka, Yesu akarabura abakuratsi be ati: “Emitima yaanyu etarishoberwa, n’obu kwakuba okutiina.” (Yoh. 14:27) Ekirikushemeza, ab’eishe-emwe na banyaanyazi-itwe nibagyendera aha buhabuzi bwa Yesu. Ahabw’obuhwezi bwa Yehova, babaasize kuguma baine obusingye n’obu barikuhikwaho okugyezibwa kw’emiringo mingi.

3. Endwara ezirikurahuka kujanjaara nari ebigwererezi nibibaasa kushiisha bita obusingye bwaitu?

³ Endwara ezirikurahuka kujanjaara nari ebigwererezi nibibaasa kuhindura embeera z’abantu ahonaaho. Teekateeka oku ekigwererezi kya COVID-19 kyakwatsire ahari baingi. Okucondooza  kumwe okwakozirwe, nikworeka ngu kimwe kya kabiri ky’abantu abaabuuziibwe bakagira ngu bakaba nibagumirwa kugwejegyera omu bwire bw’ekigwererezi ekyo. Ekigwererezi kikareetera abantu kwerarikirira ekirenga, kugira amaganya, kukoresa kubi amaarwa n’emibazi, okwenda kweita, n’emihondano y’omu maka. Ahu orikutuura haabaho endwara erikurahuka kujanjaara, noobaasa kwetantara ota kwerarikirira ekirenga kandi okaguma oine obusingye bwa Ruhanga?

4. Ahabw’enki okumanya ebi Yesu yaagambire aha biro by’emperu birikutureetera kugira obusingye?

⁴ Yesu akagira ngu omu biro by’aha mperu, hakaba nihaija kubaho endwara nyamwita, “omu myanya mingi.” (Luk. 21:11) Okumanya ekyo nikituhwera kita kugira obusingye? Tikirikututangaaza haabaho endwara ezirikurahuka kujanjaara. Nitureeba byona ebi Yesu yaagambire birikuhikiirira. Twine enshonga nungi ahabw’enki nitukuratira obuhabuzi obu Yesu yaahaire abantu b’omu biro by’aha mperu: ‘Muteemereza emitima.’—Mat. 24:6.

5. (a) Kuhikaana na Abafilipi 4:8, 9, twine kugamba ahari ki omu kushaba haabaho endwara erikurahuka kujanjaara? (b) Noobaasa kugasirwa ota waahurikiza Baibuli ekwatsirwe omu maraka?

⁵ Haabaho endwara erikurahuka kujanjaara nitubaasa kushoberwa kandi tutiine. Ekyo nikyo kyabaire ahari munyaanyazi-itwe Desi. b Bwanyima ya COVID-19 kwita ishento, mutabani wa ishento, n’omushaho we, akaba atiinire ngu nawe naaza kukwatwa endwara egyo agiturize nyina okaikwire. Ahabw’ekigwererezi akaba ayeerarikirire ngu naabaasa kufeerwa omurimo gwe, n’ahabw’ekyo akaba atarikumanya oku araabaase kutunga esente z’eby’okurya n’enju. Ebyo byona bikatandika kumureetera kuraara atagwejegyeire. Kwonka Desi akagaruka yaagira obusingye. Ata shi? Akashaba Yehova kumuhwera kwikaikana n’okugira emiteekateekyere mirungi. (Shoma Abafilipi 4:8, 9.) Akahurira Yehova “arikugamba” nawe kurabira omu Baibuli ekwatsirwe omu maraka. Naagira ati, “Ahabw’okugira ngu abashomi bakaba nibashoma baikaikaine, kikampumuriza kandi kyanyijutsya embabazi za Yehova.”—Zab. 94:19.

6. Okweyegyesa n’okuza omu nteerane nibibaasa kukuhwera bita?

⁶ Haabaho endwara erikurahuka kujanjaara nikitaahataaha omu ntebeekanisa yaawe, kwonka otaikiriza kurekyera aho kweyegyesa n’okuza omu nteerane. Ebyahikire aha b’eishe-emwe na banyaanyazi-itwe ebiri omu bitabo byaitu na vidiyo nibitwijutsya ngu nibaguma bari abeesigwa n’obu barikuhikwaho embeera zigumire nk’ezaitu. (1 Pet. 5:9) Enteerane niziija kukuhwera kuteekateeka aha bintu birungi kuruga omu Byahandiikirwe. Kandi niziija kukubaasisa kugumya  abandi nabo bakugumye. (Rom. 1:11, 12) Waateekateeka aha ku Yehova yaashagikire abaheereza be abaabaire barwaire, batiinire, nari baine eihamba, okwikiriza kwawe nikwongyera kuhama kandi ogira obwesigye ngu naiwe naija kukushagika.

7. Nitubaasa kwegyera ki aha ntumwa Yohaana?

⁷ Teeraho kuhurizana n’ab’eishe-emwe na banyaanyazi-itwe. Haabaho endwara erikurahuka kujanjaara nikibaasa kutwetengyesa ngu turekeho omwanya aha gati yaitu n’ab’eishe-emwe. Omu bwire nk’obwo, noobaasa kwehurira nk’entumwa Yohaana. Akaba naayenda kureeba munywani we Gaayo maisho na maisho. (3 Yoh. 13, 14) Kwonka, Yohaana akeetegyereza ngu tarikubaasa kureeba Gaayo omu kaire ako. N’ahabw’ekyo akakora eki yaabaire naabaasa, akamuhandiikira ebaruha. Waaba otarikubaasa kutaayaayira ab’eishe-emwe na banyaanyazi-itwe butunu teeraho kuhurizana nabo kurabira aha simu, vidiyo, nari kwoherereza obutumwa. Waaguma noohurizana n’Abakristaayo bagyenzi baawe, noija kuhurira oine oburinzi n’obusingye. Gaaniira n’abareeberezi waayerarikirira, kandi oikirize bakugumye.—Isa. 32:1, 2.

8. Ekihikiirizi nikibaasa kushiisha kita obusingye bwawe?

⁸ Ku oraabe araahikirweho ekihikiirizi ky’omwegyemure, omutsitsa, nari omuriro, noobaasa kuba waayerarikiriire kumara obwire. Ku oraabe waafeereirwe abakundwa baawe nari ebintu, noobaasa kuba waagizire obusaasi bwingi, okeehwa amatsiko nari okagira ekiniga. Ekyo tikirikumanyisa ngu nookunda munonga ebintu nari ngu toine kwikiriza. Okahikwaho embeera egumire munonga, kandi n’ekya butoosha kwehurira otyo. (Yob. 1:11) Kwonka n’omu mbeera zigumire, noobaasa kugira obusingye. Ota?

9. Yesu akatuhwera ata kwetebeekanisiza ebihikiirizi?

⁹ Ijuka eki Yesu yaagambire. Okutashushana n’abandi abarikuteekateeka ngu ebihikiirizi tibirikubaasa kubahikaho, nitumanya ngu ebihikiirizi nibiija kweyongyera kandi ebimwe bituhikeho. Yesu akagambira abakuratsi be ngu “emitsitsa y’amaani” n’ebihikiirizi ebindi nibiija kubaho emperu etakahikire. (Luk. 21:11) Kandi akagira ngu ‘obugomi,’ bukaba nibwija kukanya oburikutwariramu okuhenda ebiragiro, obushaarizi, n’obuzahambuki. (Mat. 24:12) Yesu taragizire ngu ebyo bikaba nibiza kuhika aha bantu abu Yehova atsigireho. Nangwa, baingi aha baheereza ba Yehova abeesigwa nibahikwaho ebihikiirizi. (Isa. 57:1; 2 Kor. 11:25) Yehova naabaasa kutaturinda ebihikiirizi byona omu muringo gw’eky’okutangaaza, kwonka naija kutuha ebirikwetengyesa kuguma twikaikaine kandi twine obusingye.

10. Ahabw’enki okwetebeekanisiza ekihikiirizi hati kirikworeka ngu nitwesiga Yehova? (Enfumu 22:3)

¹⁰ Twaba twetebeekaniise bukiri kare, nitwija kuguma twikaikaine haagira ekyabaho. Mbwenu shi okwetebeekanisa nikyoreka ngu titurikwesiga Yehova? Ngaaha buzima. Kureka, nikyoreka ngu twine obwesigye omuri Yehova ngu naabaasa kutuhwera. Ata shi? Ekigambo kya Ruhanga nikituhabura kwetebeekanisiza akabi akarikubaasa kubaho. (Shoma Enfumu 22:3.) Kandi ekibiina kya Yehova kitwire nikikoresa magaziini, enteerane z’ekibiina, n’ebirango kutuhiga kwetebeekanisiza akabi akarikubaasa kubaho kitaraariire. c Mbwenu shi nitwesiga Yehova? Ku kiraabe nikwo kiri, twine kworobera obuhabuzi obwo hati, ekihikiirizi kitakabaireho.

11. Nooyegyera ki ahari Margaret?

¹¹ Teekateeka aha byahikire ahari munyaanyazi-itwe  Margaret. Ab’obushoboorozi bakamugambira kuruga omuka ye ku habaireho ekihikiirizi ky’omuriro. Ahabw’okugira ngu abantu baingi bakaba nibateeraho kuhunga, emotoka zikaba ziri nyingi omu nguuto hatariho ah’okuraba. Omwika gurikwiragura gukaijura ahaiguru omu mwanya kandi Margaret akaba atarikubaasa kuruga omu motoka ye. Kwonka akahonokaho ahabw’okugira ngu akaba ayetebeekaniise. Akaba aine maapu omu nshaho ye eyaamuhwereire kumanya omuhanda gw’okumuhitsya ah’okuhungira. Kandi akaba yaarabire n’omu muhanda ogwo ekihikiirizi kitakabaireho, n’ahabw’ekyo akaba naamanya ahu yaabaire naaza. Ahabw’okugira ngu Margaret akaba ayetebeekaniise akabaasa kuhonokaho.

12. Ahabw’enki nitukuratira obuhabuzi obu turikuheebwa?

¹² Ab’obushoboorozi kubaasa kuturinda kandi hakabaho obuteeka, nibabaasa kutushaba kugaruka omuka bukiri kare nari kuruga omwanya kuza omu gundi. Abantu abamwe nibeeziringa kworoba ahabw’okutenda kutsigaho ebintu byabo. Abakristaayo bo nibatwaza bata? Baibuli neegira eti: “Ahabwa Mukama mworobere obutegyeki bwona obw’abantu, yaaba buri obw’omugabe nk’omutwe gwa boona, nari obw’abategyeki nk’abatairweho” Ruhanga. (1 Pet. 2:13, 14) Ekibiina kya Yehova nakyo nikituha obuhabuzi bw’okuturinda. Butoosha nitwijukibwa kuha abareeberezi ebirikutukwataho kugira ngu haabaho ekihikiirizi babaase kurahuka kutubona. Ekyo waakikozire? Nibabaasa kutuha obuhabuzi oburikutwariramu okuguma omu maka gaitu, kuza omu mwanya ogundi, kutunga eby’okutubaisaho n’oku turikubaasa kuhwera abandi. Twayanga kworoba, nituta amagara gaitu n’ag’abareeberezi omu kabi. Ijuka ngu abashaija abo abeesigwa nibaba nibenda kuturinda. (Heb. 13:17) Margaret akagira ngu, “okukuratira obuhabuzi bw’abareeberezi kikambaasisa kuhonokaho.”

13. Niki ekihweraire Abakristaayo abatsigireho amaka gaabo kuguma baine okushemererwa n’obusingye?

¹³ Ab’eishe-emwe na banyaanyazi-itwe baingi abahungire omu maka gaabo ahabw’ekihikiirizi, orutaro nari obutabanguko bakozire kyona eki barikubaasa kumanyiira embeera nsya n’okugumizamu nibakora bingi kuheereza Yehova. Nibagumizamu “nibabuurira” amakuru marungi nk’Abakristaayo aba ira abaataataine ahabw’okuhiiganisibwa. (Byak.  8:4) Okubuurira kubahweraire kugumizamu bataire omutima aha Bukama omu mwanya gw’okuguta aha mbeera zigumire ezi barikurabamu. N’ekirugiremu, babaasize kuguma baine okushemererwa n’obusingye.

14. Okuhiiganisibwa nikubaasa kushiisha kuta obusingye bwaitu?

¹⁴ Okuhiiganisibwa nikubaasa kutufeerereza ebintu bingi ebirikutureetera kugira obusingye. Nitugira okushemererwa n’okumarwa twaba twine obugabe bw’okuteeranira hamwe, kubuurira n’okukora emirimo yaitu ya butoosha tutarikutiina kukwatwa. Haagira ekyateganisa obugabe bwaitu bw’okukora ebyo nitubaasa kwerarikirira aha kiraabeho. N’ekya butoosha kwehurira tutyo. Kwonka nabwo, twine kwegyendesereza. Yesu akagambira Abakuratsi be ngu okuhiiganisibwa kukaba nikubaasa kubateeza entsibo. (Yoh. 16:1, 2) Mbwenu shi nitubaasa kuguma tuta twine obusingye?

15. Ahabw’enki tutarikutiina okuhiiganisibwa? (Yohaana 15:20; 16:33)

¹⁵ Ekigambo kya Ruhanga nikiturabura kiti: “Abamaririire kumara ebiro by’amagara gaabo byona omuri Yesu nibatiina Ruhanga” nibaija kuhiiganisibwa. (2 Tim. 3:12) Ow’eishe-emwe Andrei akagumirwa kwikiriza ekyo omurimo gw’Abajurizi ba Yehova ku gwazibiirwe omu eihanga rye. Akaba naateekateeka ati: ‘Turi Abajurizi ba Yehova baingi. Nikibaasika kita ab’obushoboorozi kutukoma twena?’ Kwonka omu mwanya gw’okugira obusingye, emiteekateekyere egyo ekamureetera kuguma ayerarikiriire. Ab’eishe-emwe abandi bakeesiga Yehova, omu mwanya gw’okwehamiza ngu tibaraakomwe. Bakaba nibamanya ngu nibabaasa kukomwa, kwonka bakaba bateerarikiriire munonga nka Andrei. N’ahabw’ekyo akateeraho kugira emiteekateekyere nk’ey’ab’eishe-emwe abo kandi yaata obwesigye bwe omuri Yehova. Omu bwire bukye akagira obusingye, hati aine okushemererwa n’obu haraabe hakiriho oburemeezi. Naitwe ekyo nikibaasa kutubaho. N’obu Yesu araabe yaaturabwire ngu nitwija kuhiiganisibwa, akatuhamiza ngu nitubaasa kuguma turi abeesigwa.—Shoma Yohaana 15:20; 16:33.

16. Twine kworobera buhabuzi ki haabaho okuhiiganisibwa?

¹⁶ Omurimo gwaitu gwazibirwa nari bakagutaho amaremesa, nitubaasa kutunga obuhabuzi  kuruga aha ofiisi y’eitaagi nari aha bareeberezi. Obuhabuzi obu nibuba bugyendereire kuturinda, kuhamya ngu nitutunga eby’okurya by’omwoyo, n’okutuhwera kugumizamu nitubuurira nk’oku kirikubaasika. Teeraho nk’oku orikubaasa kukuratira obuhabuzi obu orikuheebwa n’obu waakuba otarikwetegyereza gye ahabw’enki buri kuheebwa. (Yak. 3:17) Ekindi, toshemereire kugambira abandi ebirikukwata aha b’eishe-emwe na banyaanyazi-itwe nari emirimo y’ekibiina baaba bataine kubimanya.—Mub. 3:7.

17. Okushushana n’entumwa ab’omu kyasha ky’okubanza, tumariirire kukora ki?

¹⁷ Enshonga enkuru erikureetera Sitaane yaarwanisa abantu ba Ruhanga n’ahabw’okugira ngu ‘nibahamya ebya Yesu.’ (Kush. 12:17) Otakaikiriza Sitaane n’ensi ye kukutiinatiinisa. Okugumizamu noobuurira kandi orikwegyesa abandi n’obu haakubaho okuhakanisibwa nikituhwera kugira okushemererwa n’obusingye. Omu kyasha ky’okubanza abeebembezi b’Abayudaaya ku baaragiire entumwa kurekyera aho kubuurira, entumwa bakacwamu kworobera Ruhanga. Bakagumizamu nibabuurira, kandi ekyo kikabashemeza. (Byak. 5:27-29, 41, 42) Amazima gari ngu, omurimo gwaitu gwazibirwa, nituba twine kwegyendesereza omu kubuurira. (Mat. 10:16) Kwonka twateeraho kukora ekirikukirayo oburungi, nitwija kugira obusingye oburikuruga omu kushemeza Yehova n’omu kugambira abantu obutumwa oburikujuna amagara.

18. Twine kwijuka ki aha bikwatiraine n’Obukomooko bw’obusingye oburikwetengyesa?

¹⁸ Gira obwesigye ngu n’omu mbeera ezigumire munonga, nitubaasa kugira obusingye. Omu bwire nk’obwo, nituba twine kwijuka ngu obusingye oburikwetengyesa n’obusingye bwa Ruhanga, obu Yehova wenka arikuha. Muhamireho haabaho endwara erikurahuka kujanjaara, ekihikiirizi, nari okuhiiganisibwa. Hahimira aha kibiina kye. Ta omutima aha birungi ebi turaatungye omu biro by’omumaisho. Waakora otyo, ‘Ruhanga w’obusingye naija kuguma naiwe.’ (Fil. 4:9) Omu kicweka ekirikukurataho, nituza kureeba oku turikubaasa kuhwera Abakristaayo bagyenzi baitu, abarikuraba omu mbeera zigumire munonga kugira obusingye bwa Ruhanga.