1-2. Nituza kushwijuma ki omu kicweka eki?

NOOYEHURIRA ota waaba otegyereize ebintu ebi orikwendera kimwe kwonka bitarikwizira omu bwire? Nooyerarikirira? Enfumu 13:12 nihagira hati: ‘Amatsiko gatahwaire nigarusya omutima.’ Kwonka shi ku haakuba hariho enshonga nungi ahabw’enki ebintu ebyo bitakaizire? Ningira obwo, noija kugumisiriza kandi obe oyeteekateekire kutegyereza.

² Omu kicweka eki, nituza kureeba emisingye ya Baibuli mingi erikubaasa kutuhwera kugira omutwarize ‘gw’okutegyereza.’ (Mik. 7:7) Bwanyima, nituza kushwijuma embeera ibiri oku twine kutegyereza Yehova kugira eki yaakora. Aha muheru, nituza kureeba emigisha erikwija kutungwa abo abarikutegyereza Yehova kugira eki yaakora.

3. Omusingye oguri omu Enfumu 13:11 nigutwegyesa ki?

³ Eky’okureeberaho ekirikworeka gye ahabw’enki twine kugumisiriza kiri omu Enfumu 13:11. Nihagira hati: ‘Eitungo rya bugubugu niriija kutuuba, kwonka orikutunga mporampora naakanyisa.’ Waayetegyereza omusingye ogu? N’eky’obwengye kukora ebintu mporampora, orikukora kimwe-kimwe.

4. Omusingye oguri omu Enfumu 4:18 nigutwegyesa ki?

⁴ Enfumu 4:18 nihagira ngu “omuhanda gw’abahikiriire ni nk’omushana ogw’omu kasheeshe [ogurikuguma nigweyongyera kwaka gye kuhitsya] omu ihangwe.” Ebigambo ebi buzima nibikwata aha muringo ogu Yehova arikushuuruuriramu abantu be ekigyendererwa kye mporampora. Kwonka nibibaasa n’okukwata aha ku Omukristaayo arikutunguuka  omu by’omwoyo. Okutunguuka omu by’omwoyo torikubaasa kukurahukiiriza. Nikutwara obwire. Twaba abeeziriki omu kwega Ekigambo kya Ruhanga n’okugyendera aha buhabuzi bwakyo n’obu turikutunga omu kibiina, nitwija kurugaho nitugira emitwarize nk’eya Kristo. Nitwija n’okutunguuka omu kumanya Ruhanga. Teekateeka aha ku Yesu yaashobooroire enshonga egyo.

5. Yesu akakoresa ky’okureeberaho ki kworeka oku amazima garikukura mporampora omu muntu?

⁵ Yesu akakoresa eky’okureeberaho kworeka oku obutumwa bw’Obukama buri nk’akajuma kakye k’embibo akarikukura mporampora omu mitima y’abacureezi. Akagira ati: ‘Embibo zikamera, zaakura, [omubibi] atamanyire oku zirikukura. Eitaka niryo ririkumeza ryonka, hakabanza akababi, hakataho obushiisha, na bwanyima enjuma nkuru.’ (Mak. 4:27, 28) Yesu akaba naamanyisa ki? Akashoboorora ngu nk’oku ekimera kirikukura mporampora, nikwo n’omuntu orikwikiriza obutumwa bw’Obukama arikutunguuka mporampora. Nk’eky’okureeberaho, abu turikwegyesa Baibuli ku barikutandika kwirira haihi na Yehova, nitutandika kureeba empinduka nyingi ezi bakozire. (Efe. 4:22-24) Kwonka twine kwijuka ngu Yehova niwe arikubaasisa enjuma nkye y’amazima egyo kukura.​—1 Kor. 3:7.

6-7. Nitwegyera ki aha ku Yehova yaahangire ensi?

⁶ Omuri byona ebi Yehova arikukora, naagumisiriza kumara obwire bwona oburikwetengyesa kubaasa kuhikiiriza omurimo gwe. Eki naakikora ahabw’okwenda kuhaisa eiziina rye ekitiinisa n’okugasira abandi. Twara eky’okureeberaho, oku Yehova yaatebeekaniisiize abantu ensi mporampora.

⁷ Baibuli yaaba neeshoboorora oku Yehova yaatebeekaniise ensi, neegira ngu akataho “orugyero rwayo,” akatiimba “omusingye gwayo,” kandi ngu akataho “eibaare ry’obuhamizo.” (Yob. 38:5, 6) Kandi akatwara n’obwire kuteekateeka aha bi yaahangire. (Kut. 1:10, 12) Noobaasa kuteebereza oku baamaraika baayehuriire barikureeba Yehova  arikuhanga ebintu kubita omu buteeka? Baine kuba baashemereirwe munonga! Kandi ahabw’enshonga egyo “bakateera akaari k’okushemererwa.” (Yob. 38:7) Nitwega ki? Kikatwara enkumi n’enkumi z’emyaka Yehova kuhendera okuhanga kwe, kwonka ku yaayetegyereize n’obwegyendesereza ebi yaahangire, akareeba biri “birungi munonga.”​—Kut. 1:31.

8. Hati nituza kushwijuma ki?

⁸ Nk’oku twareeba omu by’okureeberaho ebiri aha ruguru, omu Kigambo kya Ruhanga nitubaasa kushangamu emisingye mingi erikworeka ngu twine kugumisiriza. Hati nituza kushwijuma oku twine kutegyereza Yehova kugira eki yaakora omu mbeera ibiri.

9. Ni ryari obu twine kutegyereza Yehova kugira eki yaakora?

⁹ Twine kutegyereza Yehova kugarukamu okushaba kwaitu. Twashaba kutunga amaani g’okugumisiriza okugyezibwa nari obuhwezi bw’okusingura obweremwa, Yehova naabaasa kureebeka nk’okyerereirwe kugarukamu okushaba kwaitu. Ahabw’enki Yehova atarikugarukamu buri kushaba kwaitu kwona ahonaaho?

10. Ahabw’enki twine kutegyereza Yehova kugarukamu okushaba kwaitu?

¹⁰ Yehova naahurikiza gye okushaba kwaitu. (Zab. 65:2) Naareeba okushaba kwaitu kuruga aha mutima nk’obuhame ngu twine okwikiriza. (Heb. 11:6) Kandi naaba naayenda kureeba oku tumaririire kukora ebirikuhikaana n’okushaba kwaitu hamwe n’ebi arikukunda. (1 Yoh. 3:22) N’ahabw’ekyo nitubaasa kworeka ngu nitugumisiriza turikugyendera aha bi turikushaba twaba nituteeraho kusingura omuze mubi nari obweremwa. Yesu akatuhwera kwetegyereza ngu kumwe aha kushaba kwaitu nikubaasa kutagarukwamu ahonaaho. Akagira ati: ‘Mushabe, nimwija kuheebwa, musherure, nimwija kuzoora, mwiguze, nimwija kwigurirwaho. Ahakuba omuntu weena orikushaba naaheebwa, orikusherura naazoora, orikwiguza naigurirwaho.’ (Mat. 7:7, 8) Twakuratira obuhabuzi obu ‘tukeezirikira okushaba,’ nitubaasa kuhamya ngu Tataitwe ow’omu iguru naija kutuhurira agarukyemu n’okushaba kwaitu.​—Kol. 4:2.

11. Ebiri omu Abaheburaayo 4:16 nibituhwera bita, okushaba kwaitu kwaba nikureebeka nk’okukyerereirwe kugarukwamu?

¹¹ N’obu okushaba kwaitu kwakureebeka nk’okukyerereirwe kugarukwamu, Yehova naaraganisa ngu naija kukugarukamu omu bwire obuhikire. (Shoma Abaheburaayo 4:16.) Egi niyo nshonga ahabw’enki tutaine kucwera Yehova orubanja ekintu kyaba kitabaireho ahonaaho nk’oku turikuteekateeka. Nk’eky’okureeberaho, abantu baingi batwire nibashaba kureeba Obukama bwa Ruhanga burikucwekyereza ensi egi embi. Nangwa na Yesu akagira ngu tushabe aha bikwatiraine n’enshonga egi. (Mat. 6:10) Kwonka ka nikiba kiri eky’obushema omuntu kureka okwikiriza oku oine omuri Ruhanga kutuuba ahabw’okugira ngu emperu tekahikire nk’oku abantu batwire nibateekateeka! (Hab. 2:3; Mat. 24:44) Nituba abanyabwengye twaguma tutegyereize Yehova, turikushaba twine okwikiriza. Emperu neija kwija omu bwire bwenyini obuhikire, ahakuba Yehova yaateireho ‘ekiro n’obunaku’ nari eshaaha obu eraahikye. Kandi eizooba eryo niryo ririkwija kuba nirikirirayo kimwe oburungi.​—Mat. 24:36; 2 Pet. 3:15.

12. Okugumisiriza kwaitu nikubaasa kugyezibwa mu miringo ki?

¹² Twine kugumisiriza tutegyereize ngu habeho  oburingaaniza. Abantu omu nsi egi nibakira kutwariza kubi abu batarikushanisa nabo obuhangwa, erangi, enganda, nari ab’eihanga erindi. Abandi nibatwarizibwa kubi ahabw’okugira ngu baine obumuga nari baine endwara z’omutwe. Baingi aha baheereza ba Yehova bagumisiriize obutari buringaaniza ahabw’enyikiriza zaabo ezirikwegamira aha Baibuli. Ku haraabe hariho owaatutwariize kubi omu miringo nk’egyo, twine kuguma nitwijuka ebigambo bya Yesu. Akagira ati: ‘Orikugumisiriza kuhitsya aha muheru, niwe arikwija kujunwa.’ (Mat. 24:13) Kwonka shi ku waakumanya ngu haine okozire ekibi ky’amaani omu kibiina? Abareeberezi baaheza kumanyisibwa enshonga, noija kugibarekyera, otegyereze kugira ngu bagikoreho nk’oku Yehova arikwenda? Eki nikibaasa kutwariramu ki?

13. Niki ekirikutwarirwa omu kukora aha nshonga nk’oku Yehova arikwenda?

¹³ Abareeberezi baamanya ngu haine okozire ekibi ky’amaani omu kibiina, nibashaba “obwengye oburikuruga omu iguru,” kugira ngu bagire emiteekateekyere nk’eya Yehova aha nshonga egyo. (Yak. 3:17) Ekigyendererwa kyabo n’okuhwera omusiisi ‘bakamwiha omu muhanda ogu yaahabiiremu’ kyaba nikibaasika. (Yak. 5:19, 20) Kandi nibaba nibenda kukora buri kimwe ekirikubaasika kurinda ekibiina n’okuhuumuriza abu omusiisi ogwo akozire kubi. (2 Kor. 1:3, 4) Abareeberezi baaba nibakora aha bibi by’amaani, baine kubanza baatunga obuhame bwona, ekirikubaasa kutwara obwire. Bwanyima nibashaba kandi omu bwegyendesereza nibahabura omuntu barikukoresa Ebyahandiikirwe, kandi nibamuhana ‘barikumubariirira’ nari aha rurengo oruhikire. (Yer. 30:11) N’obu abareeberezi baraabe batarikuguma nibatimwimwa, kwonka nabwo tibarikurahukiiriza kucwamu. Enshonga ku zirikukorwaho omu muringo oguhikire, buri omwe omu kibiina naareeba ebirungi ebirikurugamu. Kwonka, n’obu enshonga yaakukorwaho omu muringo murungi ogu, nabwo abamwe abu omusiisi yaashagiize nibabaasa kuguma baine obusaasi. Ku oraabe nikwo orikwehurira otyo, noobaasa kukora ki kutuubya aha busaasi bwawe?

14. Ni by’okureeberaho ki omu Baibuli ebirikubaasa kukuhwera kugumisiriza Omukristaayo ondiijo yaaba akutwariize kubi?

¹⁴ Haine obu omuntu araakutwariizeho kubi munonga, obundi ow’eishe-emwe mugyenzi  waawe? Noobaasa kushanga eby’okureeberaho birungi omu Kigambo kya Ruhanga aha bikwatiraine n’okutegyereza Yehova kushoboorora enshonga. Nk’eky’okureeberaho, n’obu beene ishe Yosefu baamutwariize omu muringo gutari gw’oburingaaniza, taraikiriize ebibi byabo kumureetera kugira engungu. Kureka, akaguma ataire omutima aha kuheereza Yehova, owaamuhaire omugisha ahabw’okugumisiriza ategyereize. (Kut. 39:21) Bwanyima y’obwire, Yosefu akabaasa kusaasira abaabaire bamukozire kubi, kandi akareeba n’oku Yehova yaamuhaire omugisha. (Kut. 45:5) Naitwe nka Yosefu, nikitugumya twareka enshonga omu mikono ya Yehova kureetaho oburingaaniza omu bwire bwe obuhikire.​—Zab. 7:17; 73:28.

15. Niki ekyahweraire munyaanyazi-itwe omwe kwehuzya obutari buringaaniza?

¹⁵ Amazima gari ngu, obutari buringaaniza obumwe nibuba butari bw’amaani kwingana n’obwo obwahikire ahari Yosefu, kwonka nabwo nibureeta obusaasi. Twagira obutaikirizana na mugyenzi waitu, nangwa n’obu yaakuba atarikuheereza Yehova, nitugasirwa twagyendera aha misingye ya Baibuli. (Fil. 2:3,4) Yetegyereze eky’okureeberaho kimwe. Munyaanyazi-itwe kikamukora kubi obu omukozi mugyenzi we yaamugambaho ebitahikire aha bandi. Omu mwanya gw’okugira ekiniga ahonaaho, akatwara obwire yaateekateeka aha ky’okureeberaho kya Yesu. Ku yaatwariziibwe kubi, tarateireho kweshashuza. (1 Pet. 2:21, 23) Ku yaijukire eki, akacwamu kwehuzya ekyabaireho. Bwanyima, akamanya ngu omukozi mugyenzi we ogwo akaba aine endwara y’amaani n’amaganya maingi. Munyaanyazi-itwe akahendera arikugira ngu mugyenzi we ogwo ebi yaagambire akaba atarikubimanyisa. N’ahabw’ekyo munyaanyazi-itwe akashemererwa munonga ahabw’okugira ngu akategyereza agumisiriize, kandi akagira obusingye.

16. Niki ekirikubaasa kukuhuumuriza waaba nootwarizibwa omu muringo gutari gw’oburingaaniza? (1 Petero 3:12)

¹⁶ Ku oraabe oriyo noogumisiriza obutari buringaaniza nari ekindi kintu, ijuka ngu Yehova naaba ari haihi “ab’emitima ehendekire.” (Zab. 34:18) Naakukunda ahabw’okugumisiriza kwawe n’okumwegyekyera oburemeezi  bwawe. (Zab. 55:22) Niwe Muramuzi w’ensi yoona. Tihaine eki atarikureeba. (Shoma 1 Petero 3:12.) Waaba nooraba omu mbeera zigumire ezi otarikubaasa kushoboorora, nooba oyeteekateekire kumutegyereza kugira eki yaakora?

17. Nk’oku kiri omuri Isaaya 30:18, Yehova naatuhamiza ki?

¹⁷ Juba Tataitwe ow’omu iguru naija kutuha emigisha mingi kurabira omu Bukama bwe. Isaaya 30:18 nihagira ngu Yehova ‘naategyereza kubagirira embabazi, kandi naija kubagirira esaasi.’ Ahabw’okuba Yehova ‘ni Ruhanga orikucwa emanja z’oburyo, abarikumutegyereza boona baine’ okushemererwa. Abarikuguma bategyereize Yehova nibaija kutunga emigisha mingi hati n’omu nsi ensya.

18. Ni migisha ki ei twiniire ekihika ky’okutunga?

¹⁸ Abaheereza ba Ruhanga ku baraataahe omu nsi ensya, tibarikwija kugaruka kugira okwerarikirira n’ezindi mbeera zigumire eziriho obunaku obu. Obutari buringaaniza n’obusaasi nibiija kuba bitakiriho. (Kush. 21:4) Titurikwija kugaruka kutegyereza, kubaasa kutunga ebi turikwenda ahabw’okuba nitwija kuba twine ebintu omu bwingi. (Zab. 72:16; Isa. 54:13) Ka ni gwija kuba omugisha gw’amaani!

19. Niki eki Yehova ariyo naatutebeekanisiza mporampora hati?

¹⁹ Hati Yehova ariyo naatutebeekanisa kwija kutegyekwa Obukama bwe, arikutuhwera kusingura emize mbi, reero tukagire emitwarize erikumushemeza. Otahwamu amaani, kandi otahanika. Ebirungi bikiri omu maisho! Obu twine amatsiko ga nyentsya nungi, ka tugumizemu tutegyereize Yehova tugumisiriize obwo nawe arikuhendera omurimo gwe!