Yehova * Ruhanga niwe yaatandikireho obushwere. Baibuli neeyoreka ngu akahanga omukazi w’okubanza kandi ‘yaamureetera Adamu.’ Adamu akashemererwa munonga, yaagira ati: “Ogu n’eigufa eryaruga omu magufa gangye, kandi n’omubiri ogwaruga omu mubiri gwangye.” (Okutandika 2:22, 23) N’omu bunaku obu, Yehova naayenda ngu abari omu bushwere obuhikire bagire okushemererwa.

Waataaha omu bushwere, noobaasa kuteekateeka ngu buri kimwe nikiija kukugyendera gye. Kwonka, n’obu omushaija n’omukazi we barikuba nibakundana, nibahikwaho oburemeezi butari bumwe. (1 Abakorinso 7:28) Omu katabo aka harimu emisingye ya Baibuli, erikubaasa kureetera obushwere bwawe n’eka yaawe kubamu okushemererwa waagigyenderaho.—Zaaburi 19:8-11.

EKI BAIBULI ERIKWEGYESA: Omushaija niwe mutwe gw’eka.—Abaefeso 5:23.

Waaba ori omushaija ori omu bushwere obuhikire, Yehova naayenda ngu otwarize omukazi waawe omu muringo gw’embabazi. (1 Petero 3:7) Akahanga omukazi oshemereire omushaija, n’ahabw’ekyo naayenda ngu omushaija akunde omukazi we amuhe n’ekitiinisa. (Okutandika 2:18) Oine kukundira kimwe omukazi waawe kandi okeebembeza ebyetengo ebye okukira ebyawe.—Abaefeso 5:25-29.

Waaba ori omukazi ori omu bushwere obuhikire, Yehova naayenda ngu ohe omushaija waawe ekitiinisa oyihire aha mutima kandi omuhwere omu kuhikiiriza obujunaanizibwa bwe. (1 Abakorinso 11:3; Abaefeso 5:33) Oshemereire kushagika ebi arikucwamu kandi okakwatanisa nawe. (Abakolosai 3:18) Waakora otyo, noija kusiimwa omushaija waawe hamwe na Yehova.—1 Petero 3:1-6.

EKI ORIKUBAASA KUKORA:

• Buuza ou ori nawe omu bushwere kukugambira eki orikubaasa kukora kuba omushaija nari omukazi murungi. Hurikiza gye, kandi oteereho kukora empindahinduka

• Gumisiriza ahakuba nikitwara obwire kumanya oku orikubaasa kushemeza ou ori nawe omu bushwere

EKI BAIBULI ERIKWEGYESA: Oine kumanya ebi ou ori nawe omu bushwere arikukunda. (Abafilipi 2:3, 4) Ou ori nawe omu bushwere mureebe nk’ow’omuhendo, ahabw’okuba Yehova naayenda ngu abaheereza be ‘batwaze gye ahari boona.’ (2 Timoseo 2:24) ‘Ebigambo ebirikucumita biri nka rurara, kwonka orurimi rw’omunyabwengye rutamba.’ N’ahabw’ekyo, nikiba kiri kirungi kuteekateeka aha bi orikuza kugamba. (Enfumu 12:18) Omwoyo gwa Yehova nigwija kukuhwera kugamba omu muringo gw’embabazi na rukundo.—Abagalatia 5:22, 23; Abakolosai 4:6.

EKI ORIKUBAASA KUKORA:

• Shaba Yehova akuhwere kuguma ori omucureezi n’okugira emiteekateekyere ehikire waaba noogaaniira n’ou ori nawe omu bushwere aha nshonga nkuru

• Teekateeka aha bi orikuza kugamba n’omuringo ogu oraabigambemu

EKI BAIBULI ERIKWEGYESA: Ku murikutaaha omu bushwere nimuhinduka “omubiri gumwe.” (Okutandika 2:24) Kwonka nabwo, nimuguma muri abantu babiri kandi nimubaasa kugira ebiteekateeko bitarikushushana. N’ahabw’ekyo, nimwetenga kwega kugira enyehurira n’ebiteekateeko ebirikuhikaana. (Abafilipi 2:2) Ni kikuru kukwatanisa mwaba mwine ebi murikucwamu. Baibuli neegira eti: “Enaama zoona zihamibwa okuhanuura.” (Enfumu 20:18) Mwaba mwine enshonga nkuru z’okucwamu mushemereire kugyendera aha misingye ya Baibuli.—Enfumu 8:32, 33.

EKI ORIKUBAASA KUKORA:

• Gambira ou ori nawe omu bushwere ebi orikuteekateeka hamwe n’enyehurira zaawe

• Waaba oine eki orikwenda kukora banza ogambire ou ori nawe omu bushwere